Blog

ဧပြီ ၁၀၊ ၂၀၂၁
M-Media

-မြန်မာ့အရေး ကူညီဖြေရှင်းပေးဖို့အတွက် ကုလသမဂ္ဂ အတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူး ကိုယ်စားလှယ် ခရစ္စတင်း ရှာရ်နာ ဘာဂီနာဟာ မနေ့က ထိုင်းနိုင်ငံ ဘန်ကောက်မြို့ကို ရောက်လာပါတယ်။

မြန်မာနိုင်ငံကို လာရောက်ဖို့ စစ်ကောင်စီကို ဆက်သွယ်ခဲ့ပေမယ့် လက်မခံခဲ့ဘူးလို့ ဘာဂီနာက Twitter မှာ ရေးသားခဲ့ပါတယ်။

“ဆွေးနွေးဖို့အတွက် ဘန်ကောက်ကို အခုပဲ ရောက်ပါတယ်။ ကျွန်မကို လက်ခံတွေ့ဆုံဖို့ အဆင်သင့်မဖြစ်သေးဘူးလို့ တပ်မတော်က အကြောင်းပြန်တဲ့အတွက် စိတ်မကောင်း ဖြစ်ရပါတယ်။ ဆွေးနွေးညှိနှိုင်းဖို့အတွက် ကျွန်မ အသင့်ဖြစ်နေပါပြီ။ ငြိမ်းချမ်းရေးအတွက် ရေရှည်တည်တံ့တဲ့အဖြေကို အကြမ်းဖက်မှုနဲ့ ဘယ်တော့မှ မရပါဘူး”

ထိုင်းနိုင်ငံခြားရေးဝန်ကြီးဌာနက ဘာဂီနာဟာ ကာကွယ်ဆေး ၂ ကြိမ် ထိုးထားသူဖြစ်တဲ့အတွက် ၇ ရက် ကွာရန်တင်းဝင်ရမှာ ဖြစ်ပြီး အဲဒီနောက်မှာ ထိုင်းအစိုးရ ဒုတိယဝန်ကြီးချုပ်၊ ကုလသမဂ္ဂ အဖွဲ့အစည်းတွေနဲ့ တွေဆုံဆွေးနွေးမယ်လို့ ထုတ်ပြန်ခဲ့ပါတယ်။

မြန်မာနိုင်ငံက အခြေအနေအတွက် အလွန်အမင်း စိုးရိမ်မိတယ်လို့ ထိုင်းနိုင်ငံခြားရေးဝန်ကြီးဌာနက ထည့်သွင်းပြောကြားခဲ့ပါတယ်။

ဘာဂီနာဟာ အရှေ့တောင်အာရှက အခြားနိုင်ငံတွေနဲ့လည်း မြန်မာ့အရေး ဆွေးနွေးဖို့ ရှိနေပါတယ်။

Ref : AFP

ဧပြီ ၉၊ ၂၀၂၁
M-Media

-ဖေဖော်ဝါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာ ဖြစ်ပေါ်နေတဲ့ ပြဿနာတွေကို သံတမန်နည်းလမ်းနဲ့ ဖြေရှင်းနိုင်ရေးအတွက် ကုလအတွင်းရေးမှူးချုပ်ရဲ့ မြန်မာနိုင်ငံဆိုင်ရာကိုယ်စားလှယ် ခရစ္စတင်း ရှာရ်နာ ဘာဂီနာ အာဆီယံကို လာရောက်ဖို့ ရှိနေပါတယ်။

စစ်ကောင်စီရဲ့ အကြမ်းဖက်သတ်ဖြတ်မှုကြောင့် မြန်မာနိုင်ငံမှာ ၂ လအတွင်း ပြည်သူ ၆၀၀ ကျော် သေဆုံးခဲ့ပြီး နိုင်ငံတကာက ဝေဖန်မှုတွေ မြင့်တက်လာတဲ့အချိန် ဘာဂီနာရဲ့ ဒီခရီးစဉ် ပေါ်ပေါက်လာတာပါ။

ထိုင်းနိုင်ငံအပါအဝင် အာဆီယံနိုင်ငံတစ်ချို့ကို သွားရောက်ကာ ခေါင်းဆောင်တွေနဲ့ တွေ့ဆုံဖို့ရှိသလို၊ စစ်ကောင်စီရဲ့ အဓိကမဟာမိတ်ဖြစ်တဲ့ တရုတ်နိုင်ငံကိုလည်း ဘာဂီနာတစ်ယောက် သွားရောက်မှာ ဖြစ်ပါတယ်။

ဘာဂီနာဟာ စစ်ကောင်စီ ခေါင်းဆောင်တွေနဲ့ မျက်နှာချင်းဆိုင် တွေ့ဆုံဆွေးနွေးချင်ပေမယ့် စစ်ကောင်စီက ပြည်ဝင်ခွင့် ငြင်းဆိုထားပါတယ်။

အာဆီယံကို လာရောက်မယ့်အချိန် အပါအဝင် အသေးစိတ်အချက်အလက်တွေကိုတော့ ထုတ်ဖော်ပြောဆိုခြင်း မရှိသေးပါဘူး။

ကုလလုံခြုံရေးကောင်စီကလည်း CRPH အဖွဲ့ဝင် ဒေါ်ဇင်မာအောင်နဲ့ ဒီကနေ့ညပိုင်းမှာ အွန်လိုင်းကနေတစ်ဆင့် တွေ့ဆုံဆွေးနွေးဖို့ ရှိပါတယ်။ ဒီဆွေးနွေးမှုမှာ စစ်ကောင်စီရဲ့ အဓိကမဟာမိတ်တွေဖြစ်တဲ့ ရုရှားနဲ့ တရုတ်ကိုယ်စားလှယ်တွေ ပါဝင်မှာ မဟုတ်ပါဘူး။

Ref: Asia Times