သြဂုတ်လ ၂၅၊ ၂၀၁၃
M-Media
သတင်း- ဆူးထက်
မြန်မာနိုင်ငံ လူငယ်များ အစည်းအရုံး ( Myanmar Youth Union- MYU) မှ ကြီးမှူး ကျင်းပသော နိုင်ငံတော် ၀န်ကြီး ဦးအောင်မင်းနှင့် ရန်ကုန် အခြေစိုက် လူငယ် အရပ်ဖက်လူ့ အဖွဲ့အစည်းများ တွေ့ဆုံပွဲ အခမ်းအနားကို ရန်ကုန်မြို့၊ Myanmar Peace Center တွင် သြဂုတ်လ ၂၄ရက်နေ့က ညနေ ၃နာရီမှ ၅နာရီခွဲထိ ကျင်းပပြုလုပ်ခဲ့ကြောင်း သတင်းရရှိသည်။
မြန်မာနိုင်ငံ လူငယ်များ အစည်းအရုံးမှ အဖွဲ့ဝင်တစ်ဦးက ” ကျွန်တော်တို့ ဖြစ်စေချင်တဲ့ အတိုင်း ဖြစ်လာတဲ့ အတွက် စိတ်ထဲမှာ လူငယ်တစ်ယောက်အနေနဲ့ အရမ်းဝမ်းသာတယ်။ အခုလို ပွဲမျိုးဖြစ်လာတာကြောင့် နောက်တက်လာမယ့် လူငယ်တွေ အတွက်ရော၊ လူငယ်တွေရဲ့ ပညာရေးအတွက်ရော၊ အလုပ်အကိုင် အတွက်ရော ပိုပြီးတော့ ကောင်းမွန်လာမယ်လို့ ကျွန်တော် မျှော်လင့်တယ် ” ဟု M-Media သို့ပြောသည်။
” ဒီနေ့ ပွဲလေးဟာ တော်တော်လေးကို လူငယ်တွေ အတွက်ရော၊ အစိုးရအတွက်ပါ အကျိုးရှိတယ်။ ဒီလိုမှသာလျှင် အစိုးရ ဘက်က အခက်အခဲတွေကို ကျွန်တော်တို့ သိနိုင်သလို ကျွန်တော်တို့ ဘက်ကလိုချင်တဲ့ ဆန္ဒတွေကိုလည်း အစိုးရဘက်က လူကြီးတွေ၊ ဗဟိုအစိုးရ အဖွဲ့က တိုက်ရိုက် သိနိုင်တာ ဖြစ်တယ်အတွက် အရမ်းကိုကောင်းတဲ့ ပွဲလေးပါ ” ဟု ကဗျာချစ်သူများ အသင်းမှ ကိုဆောင်းခက M-Media သို့ပြောသည်။
Pray for Myanmar မှ ကိုဇော်မင်းလတ်က ” ကျွန်တော်တို့ အဖွဲ့က ဘာသာပေါင်းစုံက လူငယ်တွေနဲ့ ဖွဲ့စည်းထားတဲ့ အဖွဲ့ ဖြစ်ပါတယ်။ ကျွန်တော် အစ္စလာမ် ဘာသာဝင် တစ်ယောက်နေနဲ့ ဘာတောင်းဆိုခဲ့သလဲ ဆိုရင် ကျွန်တော်တို့ တက္ကသိုလ်ကျောင်းတွေမှာ ဘွဲ့ရရှိပြီးရင် ဘွဲ့ယူခံနီးမှာ မှတ်ပုံတင်မရှိလို့ ဆိုပြီး ကျောင်းသားလူငယ်တွေဟာ ဘွဲ့ယူနိုင်ခြင်း မရှိပါဘူး။ ဒါဟာ နိုင်ငံတစ်နိုင်ငံလုံးမှာ ဖြစ်နေပါတယ် လို့ ၀န်ကြီးဦးအောင်မင်းကို တောင်းဆိုခဲ့ပါတယ်။
ဆက်လက်၍ ” ရခိုင်ပြည်နယ်အတွက် ပညာရေးကို ကျွန်တော်တို့ လူငယ်အဖွဲ့က ကူညီဆောင်ရွက်ပေးဖို့ ကလေးငယ်တွေ ရခိုင်ပြည်နယ်မှာ အားလုံး တန်းတူ ပညာသင်ကြားနိုင်ရန်အတွက် ကျွန်တော်တို့ ကူညီဆောင်ရွက်ပေးပါ့မယ်လို့ ပြောခဲ့ပါတယ်။ ကျွန်တော်တို့ သွားရောက်ခွင့်လည်း တောင်းခဲ့ပါတယ်။ ၀န်ကြီးနေနဲ့ ရခိုင်ပြည်မှာရောပြည်နယ်နဲ့ တိုင်းတွေမှာပါ နိုင်ငံတော်အတွက် လူငယ်တွေဟာ အရေးကြီးပါတယ်။ နိုင်ငံတော်အတွက် လူငယ်တွေ ၀ိုင်းလုပ်ပေးပါလို့ ပြောခဲ့ပါတယ်။ သူ့နေနဲ့ ကူညီနိုင်တဲ့ ဟာကို ကူညီပေးမယ်လို့ ပြောခဲ့ပါတယ်။ ဒီနေ့တွေ့တဲ့ ပွဲလေးဟာ နိုင်ငံတော် အကြီးအကဲတွေက ကျွန်တော်တို့ လူငယ်တွေနဲ့ တွေ့ပြီး လူငယ်တွေရဲ့ ခံစားချက်၊ ပြည်သူတွေရဲ့ ခံစားချက်ကို နားထောင်ပေးပြီးတော့ လိုအပ်တဲ့ ဟာတွေမှာ လုပ်ပေးသင့်ပါတယ်။ လူငယ်တွေဟာ နောင်တစ်ချိန်မှာ နိုင်ငံကို အုပ်ချုပ်မယ့်သူတွေ ဖြစ်ပါတယ်။ လူငယ်တွေကို မြေတောင်မြှောက်ပေးသင့်ပါတယ်” ဟု၎င်းမှ M-Media သို့ ထပ်လောင်းပြောကြားခဲ့သည်။
ရန်ကုန်အခြေစိုက်လူငယ် အရပ်ဖက် လူ့အဖွဲ့အစည်းမှ ပြည်ထောင်စု အစိုးရ အဖွဲ့သို့ လူငယ် အဖွဲ့အစည်းများ အပါအ၀င် အရပ်ဖက်လူ့ အဖွဲ့အစည်းများ အနေဖြင့် အုပ်ချုပ်ရေးပိုင်းနှင့် ပူးပေါင်း ဆောင်ရွက်ရမည့် အခြေအနေမျိုးတွင် ဖြစ်စေ၊ မိမိတို့ အဖွဲ့အစည်းများမှ ရင်ဆိုင်ကြုံတွေ့ရသော အခက်အခဲများအား ကူညီဖြေရှင်းပေးနိုင်ရန်နှင့် နိုင်ငံတော်၏ လုပ်ငန်းစဉ်များတွင် ကောင်းမွန်သော အကြံဥာဏ်များနှင့် ဝေဖန်မှုများ ပေးနိုင်ရန် အစိုးရနှင့် အရပ်ဖက် လူ့အဖွဲ့အစည်းများအကြား ပုံမှန်ဆက်ဆံရေး လမ်းကြောင်း တစ်ရပ် မဖြစ်မနေ ထားရှိ ဆောင်ရွက်ရန်လိုပါကြောင်း၊ ပြည်ထောင် စုသမ္မတမြန်မာနိုင်ငံတော်တွင် လူငယ်များ၏ အခန်းကဏ္ဍကိုအလေးထားသောအားဖြင့် သင့်လျော်သောဝန်ကြီးဌာနနှင့် တွဲဖက်၍ ( ဥပမာ- အားကစားနှင့် လူငယ်ရေးရာဝန်ကြီးဌာန) ကိုဖွဲ့စည်း၍ လူငယ်ရေးရာမှုဝါဒတစ်ရပ်ကို ရေးဆွဲအကောင်အထည် ဖော်သင့်ပါကြောင်း ထည့်သွင်း အကြံပြု တင်သွင်းခဲ့ကြောင်း သိရသည်။
ယင်းပွဲတွင် ပါဝင်ဆွေးနွေးခဲ့ကြတဲ့ အဖွဲ့အစည်းများမှာ-၁။ မြန်မာနိုင်ငံလူငယ်များအစည်းအရုံး၊ ၂။ Myanmar Youth Social and Eduction Local Focus၊ ၃။ ထောင်စုအလင်း(MLDO) ၊ ၄။ RenovatorYouth Network ၊ ၅။ Heart of Youth၊ ၆။ Unison Team၊ ၇။ Noble Mind Civil Group ၊၈။ Yangon Youth Network ၊ ၉။ Mizzima Youth Network ၊ ၁၀။ဂေဟာဟိတပတ်ဝန်းကျင်ထိန်းသိမ်းရေးလူငယ်ကွန်ရက်၊ ၁၁။ Point အဖွဲ့ ၊ ၁၂။ Chin Youth Network၊ ၁၃။ အဖြူရောင်တွဲလက်များ ၊ ၁၄။ လိုင်ဇာလမ်းလျှောက်အဖွဲ့ ၊ ၁၅။ပန်းပျိုးလက်လူငယ်စင်တာအဖွဲ့တို့ပါဝင်ကြောင်းသိရသည်။
