၂၀၁၃ ခုနှစ်၊ ဇွန်လ။
M-Media
ရေးသူ-O’Laie Manzu
အလုပ်ရှင်က ဘာစိတ်ကူးပေါက်သလဲမသိ။ ရုံးဝန်ထမ်းတွေ အားလုံးကို နေ့လည်စာကျွေးတယ်။ နေ့လည်စာ စီစဉ်ထားမယ်ဆိုတော့ ကျနော်လည်း ဒီနေ့ထမင်း မထုတ်လာခဲ့ဘူးပေါ့။ နေ့လည်ပိုင်းမှ အချိန်တန်လို့ ဗိုက်ဆာဆာနဲ့ နားနေခန်းကို သွားကြည့်တော့ အစားအသောက်တွေ အားလုံးက ဟလာလ် မဟုတ်တဲ့ အသားတွေနဲ့။ သက်သက်လွတ်လေး၊ ပင်လယ်စာလေးများပါမလားလို့ မသိမသာလေးရှာကြည့်သေးတယ်။ ကြက်သား၊ အမဲသား၊ ဝက်သား တဝေဝေနဲ့ ခေါက်ဆွဲကျော်တွေ၊ ထမင်းကျော်တွေ ကိုပဲတွေ့တယ်။ ဒါနဲ့ ဟိုကြည့်ဒီကြည့် ကြည့်ပြီး ရေနွေးကြမ်းလေးတစ်ခွက်ဆွဲကာ ပြန်ထွက်လာတယ်။ အားလုံး နေ့လည်စာ ကိုယ်စီကိုယ်စီ စားသောက်ပြီးချိန်မှာ ကျနော်က ရေနွေးကြမ်းလေး တမြမြနဲ့ ကွန်ပြူတာ တဂေါက်ဂေါက်ခေါက်နေသေးတာ့ အစားအသောက်တွေကိုတာဝန်ယူ ဝယ်ထားပေးတဲ့ စာရေးမ က
“မစားဘူးလား၊ လက်နှေးရင်တော့ ကိုမျိုး ဗိုက်ဟောင်းလောင်း ဖြစ်သွားနိုင်တယ်နော်။ သွားစားနှင့်” လာပြောတယ်။
ကျနော်ကတော့ အားနာနာနဲ့
“ဟုတ်ကဲ့။ ကျေးဇူးဘဲ အမရေ။ ကျနော်ဒီဖိုင်တွဲလေးတွေ အပြီးသပ်လိုက်ဦးမယ်။” လို့ ပြန်ဖြေလိုက်တယ်။
အစားအသောက်တွေ ဝယ်ထားပေးရဲ့သားနဲ့ အပြင်ထွက်စားရင်လည်း မဟုတ်ပြန်။ မှာယူထားတဲ့ အစာတွေကလည်း ကျနော်မစားတဲ့ အသားတွေနဲ့ဆိုတော့ ဒီနေ့အဖို့ နေ့လည်စာသာ အငတ်ခံလိုက်မယ်လို့ စိတ်ဆုံးဖြတ်လိုက်တယ်။ ဟိုလိုလို ဒီလိုလိုနဲ့ လုပ်လက်စ အလုပ်ကိုပဲ ဆက်ပြီးလုပ်နေတယ်။ နေ့လည်စာ စားချိန်ကျော်ပြီး နာရီအနည်းငယ်အထိ ကျနော် သွားမစားတော့ ရုံးထုံးစမ်းအတိုင်း စကားရှာပြီး ‘ကိုမျိုးက သဌေးကျွေးတဲ့ နေ့လည်စာ မစားကြောင်း’ ရေးကြီးခွင်ကျယ် ပြောကြပါလေရော။ နောက်တော့မှ ကျနော်က ဟလာလ် မဟုတ်တဲ့ အစားအစာ မစားကြောင်း အဖြေရှာတွေ့သွားကြဟန်တူတယ်။ သူတို့ပြောနေကြတာကိုတော့ ဝိုးတိုဝါးတားသာကြားရတယ်။ တအောင့်လောက်အကြာမှာ အစားအသောက် ဝယ်ယူတဲ့ စာရေးမ က ရုံးခန်းထဲဝင်လာပြီး
“ဆောရီနော် ကိုမျိုး။ ကိုမျိုးက မွတ်စလင်ဆိုတာသိရင် သက်သက်လွတ်မှာပေးတာပေါ့။ စိတ်မရှိနဲ့နော်။ ကျမအခုဘဲ အသားမပါတာ တစ်ခုခု မှာပေးမယ်။ နာရီဝက်အတွင်း သူတို့လာပို့ပေးမှာပါ။” သူလည်းတော်တော် အားနာသွားပုံပေါ်တယ်။
“ရပါတယ်ဗျာ။ ကိစ္စမရှိပါဘူး။ ဒီနေ့မနက်စာ အဝစားလာတော့ ဗိုက်တောင်မဆာပါဘူး။”
ကျနော်ကလည်း အလုပ်ဝင်တာ ရက်ပိုင်းပဲရှိသေးတယ်။ အပိုစကားတွေလည်း မပြောတက်တော့ ကျနော် မွတ်စလင်မ်ဆိုတာ သူတို့လည်း မသိကြဘူး။ သိဖို့လည်း မလိုဘူး လို့ထင်တယ်။ ဘာသာရေးဆိုတာက ထုတ်ဖော်ပြဖို့လည်း မလိုအပ်ဘူးလေ။
ဟလာလ်မဟုတ်တဲ့ အစားအသောက်တွေကို မစားတဲ့ ကျနော်ကြောင့် အခြားသူတွေမှာ ဝန်ထုတ်ဝန်ပိုးလိုမဖြစ်စေချင်။ အလုပ်ပို လိုမျိုးလည်းမဖြစ်စေချင်ဘူး။ ဒါနဲ့ “ဗိုက်မဆာဘူး” လို့သာပြောပြီး နောက်ထပ် အစားအသောက်မဝယ်စေတော့ဘူး။
ဒီနေ့မှပဲ ဗိုက်ကလည်း အလိုက်မသိဖြစ်နေတယ်။ ဗိုက်ကလည်းဆာ နေ့လည်စာ အနားယူချိန်မှာ ဗိုက်မဆာသလို ဟိတ်ဟန်နဲ့ အလုပ်လုပ်နေတော့ နားချိန်လည်းမယူဖြစ်လိုက်။ နာရီတကြည့်ကြည့်နဲ့ ရုံးဆင်းချိန်ကို မျှော်နေလို့လားတော့မသိ… နေတာပိုရှည်သလို ခံစားရတယ်။
တစ်နေ့တာကုန်လို့ အိမ်ပြန်ရောက်တာနဲ့ မီးဖိုခန်းရှိရာဆီကို ဦးလှည့်တော့တာပေါ့။ ထမင်းစားပွဲပေါ်မှာ ခွက်လေးတစ်လုံးတွေ့တော့ ငတ်ကြီးကျနေသလို အပြေးအလွား ဖွင့်ကြည့်မိတယ်။ အငွေ့လေးတွေကလည်း ဝေ့လှိုင်ပြီးတက်လာတယ်။ ပူပူနွေးနွေး။ စားချင်စရာလေး။ ခေါက်ဆွဲနဲ့ဟင်းရည် … အနံ့ကတော့ နှာခေါင်းနဲ့မယဉ်လို့လားမသိ။ ထူးထူးခြားခြားဖြစ်နေတယ်။ အသားဖက်တွေကလည်း ပလူပေါ်နေတယ်ဆိုတော့ အသာလေး အဖုံးပြန် ဖုံးထားလိုက်တယ်။ နောက်မှ အိမ်မှာ ဘယ်သူရှိလဲ ကြည့်ဖို့သတိရလာမှ ဟိုကြည့်ဒီကြည့်ကြည့် နဲ့။ အဓိကကတော့ ထုံးစံအတိုင်း မိန်းမကို လိုက်ရှာတာပါ။
သားကလည်း ထုံးစံအတိုင်း ကွန်ပြူတာရှေ့မှာ ကစားနေတယ်။ သူ့အခန်းထဲ ကျနော်ဝင်လာတာ တွေ့တော့မှ နားရွက်မှာ ကပ်နေတဲ့ မိုက်ခရိုဖုန်းကို လက်လေးနဲ့ မတင်လိုက်ပြီ … “ဖေဖေ စလာမာလေးကွန်း” ဟု နှုတ်ဆက်တယ်။
“ဝါလေးကွန်းစလာမ်… မင်းအမေရော။”
“အလုပ်က ပြန်မလာသေးဘူး။ အစောတုန်းကပဲ ဖုန်းဆက်တယ်. နည်းနည်းနောက်ကျမယ်ဆိုပြီး။”
“ဒါနဲ့ အိမ်ရှေ့မှာ ခေါက်ဆွဲက ဘယ်ကရောက်လာတာလဲ။” သားချက်ထားတာမဟုတ်တာတော့သေခြာတယ်လေ။ တစ်နေနေရာရာက ရောက်လာတာဘဲဖြစ်ရမယ်လို့တွက်ထားပြီးသား။
“ဘေး နှစ်အိမ်ကျော်က… အိမ်သစ်တက်ပွဲ အလှူဆိုလား။ အိမ်တိုင်းကို လိုက်ပို့နေတာတွေ့တယ်။”
“ထင်သားဘဲ။ တစ်နေရာရာက လာပို့ထားတာဖြစ်မယ်လို့။ အဲဒါ မင်းစားလိုက်သေးလား။”
“ဟာ … ဖေဖေကလည်း … ဖေဖေတို့မစားခင် ဘယ်တုန်းက ဦးဦးဖျားဖျား ယူစားဖူးလို့လဲ”
သားကိုတော့ ယုံပါတယ်။ အစားအသောက် ဦးဦးဖျားဖျား လူကြီးတွေမစားခင် မယူစားရဘူးဆိုတဲ့ ထုံးတမ်းဓလေ့က ဆွဲမြဲနေတယ်လေ။
ဘေးအိမ်က အိမ်သစ်တက်ပွဲဆိုတော့ အလှူလုပ်တဲ့သဘော လည်းပါ။ အိမ်နီးနားချင်းတွေကိုလည်း မိတ်ဆက်ရာရောက်တဲ့ အနေနဲ့ လာပို့ထားတာနေမှာ။ ထူးဆန်းတဲ့အစားအစာကိုတော့ ဘုမသိဘမသိဘဲ အရမ်း အရမ်း မစားကြည့်ရဲဘူး။ ဒါကြောင့် လက်ကျန် အစားအသောက်လေးများရှိမလားလို့ မီးဖိုခန်းထဲမှာ မွေနှောက်နေခိုက် မိန်းမပြန်ရောက်လာတယ်။ …
“စိုး ရေ ဘေးအိမ်က ခေါက်ဆွဲလာပို့ထားတယ် အသားတွေနဲ့… ဘာလဲ မသိဘူး။”
မိန်းမကဖွင့်ကြည့်ပြီး …
“ဒါကြေးအိုးပဲ။ ဝက်သားတွေနဲ့”
ကျနော်ကတော့ ကြေးအိုးဆိုတာ ကြားသာကြားဖူးတာ မသိဘူးလေ။ တစ်ခါမှလည်း စားဖူးတာမဟုတ်။ ဝက်သားနဲ့ဆိုတော့ မစားရတာတော့ သေခြာတယ်။ သွန်ပြစ်ရမှာလည်း မဟုတ်ပြန်။ အခြားဘေးအိမ်ကို ပေးလိုက်ဖို့ကလည်း သူတို့က အိမ်တိုင်းကို လိုက်ပေးထားပြီးပြီးဆိုတော့ မကောင်းပြန်။ ဒါနဲ့ အိမ်နီးချင်း မွတ်စလင်မ်တစ်ယောက်ဆီ ဖုန်းဆက်လိုက်တယ်။
“အတ်စလာမို့အလိုင်ကွမ်း၊ ဟေ့ … အီစွတ်ဘိုင် … ခင်ဗျားတို့အိမ်မှာ အိမ်သစ်က ကြေးအိုးလာပို့သေးလား။”
“ကြေးအိုး။” အံအားသင့်တဲ့လေသံနဲ့ “ကျနော် ဒီနေ့ တစ်နေကုန် အိမ်မှာ ရှိနေတာဘဲ။ ဘာအိုးမှ လာမပို့ဘူး။ ဘာဖြစ်လို့လဲ။”
“အိမ်မှာ ဝက်သားနဲ့ ချက်ထားတဲ့ ကြေးအိုးတစ်ခွက် လာပို့ထားတာတွေ့လို့။ ခင်ဗျားတို့ဆီကိုလည်း လာပို့ထားလားလို့ မေးကြည့်တာပါ။”
“ခင်ဗျားကလည်း ဝက်သားဟင်း လာပို့လားလို့မမေးဘဲ ဘယ့်နယ် ကြေးအိုး ဆိုတော့ ကျနော်တောင် ကြောင်အံ့အံ့ဖြစ်သွားတာဘဲ။ ကျနော့်ရုပ်ကြီးနဲ့ ဘယ်သူက ဝက်သားဟင်းလာကြွေးပါ့မလဲ။”
“ဖြေးဖြေး… ကြေးအိုးဆိုတာက ဝက်သားနဲ့ချက်ထားတဲ့ ခေါက်ဆွဲနာမည်ကိုပြောတာ။”
“အော်… ကြံကြံဖန်ဖန်။ မကြားဖူးပါဘူး။ ခင်ဗျားတို့ကို မွတ်စလင်မ်မှန်းမသိလို့ နေမှပေါ့ဗျ။ ခင်ဗျားပုံကလည်း မွတ်စလင်မ်ပုံမှ မပေါက်တာ။ မုတ်ဆိတ်ထားဖို့ပြောတာ ခင်ဗျားက ကဂျီကကြောင်လုပ်နေတာကို။”
“တော်ပါဗျာ။ ဗိုက်ဆာနေတဲ့အထဲ မွတ်စလင်မ်ပုံဆိုတာမရှိပါဘူးဗျ။ မွတ်စလင်မ်ဖြစ်ကြောင်း မုတ်ဆိတ်နဲ့ သက်သေထုဖို့မလိုပါဘူးဗျ။ နောက်မှလူချင်းတွေပြောမှပဲ စကားပြန်ဆက်တာပေါ့။”
“ဒါကို ရေးကြီးခွင်ကျယ်လုပ်ပြီး အလုပ်ရှုပ်ခံမနေပါနဲ့ဗျာ။ သွန်လိုက်ပေါ့ဗျ။”
“နှမျောတယ်ဗျ။ ကိုယ်မစားပေမယ့် သွန်လိုက်လို့ ဘယ်ကောင်းမလဲ။ သွားပြန်ပို့တော့လည်း ကြီးကျယ်ရာကြတယ်ဗျ။ ထားလိုက်ပါတော့ … နောက်မှစကားပြောတော့မယ်ဗျာ။ အတ်စလာမို့အလိုင်ကွမ်း” ဟု နှုတ်ဆက်ကာ စကားဖြတ်လိုက်တယ်။
ဒါဆိုရင်တော့ တမင်သက်သက် အရွဲ့တိုက်ပြီး ဝက်သားလာပို့တာ မဟုတ်တာ သေခြာတယ်။ သံသယဆိုတာက တကယ့်ကြီးမားတဲ့ မိစ္ဆာကောင်ပဲမဟုတ်လား။ မာန်နတ်တွေ၊ ရှိုင်တွာန်တွေထက် ကြောက်ရတယ်။ ဒါကြောင့် ဘယ်ကိစ္စမဆို ထိပ်တိုက်ရင်ဆိုင်ပြီး သံသယ မိစ္ဆာကို အလဲထိုးတတ်တဲ့ အလေ့အကျင့်က ငယ်ငယ်ကတည်းက မိဘတွေ သွန်သင်ပေးခဲ့တယ်လေ။ သံသယကင်းစွာနဲ့ ကောက်ချက်ချလိုက်တယ်။ အီစွတ်ဘိုင်ပြောသလို ကျနော်တို့က မွတ်စလင်မ်ဆိုတာ မသိလို လာပို့တာဖြစ်မှာပေါ့။ အီစွတ်ဘိုင်က မုတ်ဆိတ် တစ်ထွာလောက်နဲ့ ဆိုတော့ လမ်းထိပ်ကကြည့်ရင်တောင်မွတ်စလင်မ် ဆိုတာ သိသာနေတယ်။ သူလည်း ကျနော့်လိုဘဲ ကရင်ကပြားတွေဆိုတော့ မုတ်ဆိတ်မပါရင် မွတ်စလင်မ်ဆိုတာသိမှာမဟုတ်ဘူး။ ကျနော်တို့ပတ်ဝန်းကျင်မှာကလည်း မုတ်ဆိတ်နဲ့ မွတ်စလင်မ် ဒွန်တွဲနေသလိုမှတ်ထားကြတာကို။ မုတ်ဆိတ်ထားလေ့ရှိတဲ့ ဟစ်ပီလမ်းသရဲတွေ၊ အားမရ်ှဂျာမန်တွေ၊ ဂျူးတွေ၊ တရုတ်ဖိုးဖိုးတွေ၊ ဒဿနာပညာရှင်တွေလည်း မရှိ။ မြန်မာနိုင်ငံမှာက အများအားဖြင့် ပန်ချာနဲ့ မွတ်စလင်မ်တွေဘဲ မုတ်ဆိတ်ထားကြတာကို။ ပန်ချာတွေကတော့ ခေါင်းပေါင်း ပါနေတော့ မွတ်စလင်မ်နဲ့ခွဲလို့ရတယ်။ ကျနော့်သားကတော့ မုတ်ဆိတ်လည်းမပါ … လူတွေပုံသေမှတ်ထားသလို ကုလားရုပ်လည်းမပေါက်တော့ မွတ်စလင်မ်မှန်းမသိဘဲ ပေးခဲ့တာနေမှာ။
ကျနော်တို့က မစားပေမယ့် အစားအသောက်ဆိုတာ ပြစ်ထုတ်ရမှာကို နမျောသလိုဖြစ်နေတယ်။ ဒီခွက်ကြီးက စားပွဲခုံပေါ်မှာ အတင်လျက်သားရှိနေတော့လည်း နေမထိထိုင်မသာဖြစ်နေပြန်ရော။ တစ်သက်လုံး ဝက်သားနဲ့ ခပ်ဝေးဝေးနေလာခဲ့တဲ့ ကျနော်တို့လင်မယားနှစ်ယောက်ကတော့ အနံ့ထူးထူးရှူရိုက်ရတော့ အနောက်တိုင်းသားတွေ ငါးပိအနံရတဲ့ မျက်နှာမျိုးနဲ့ တစ်ယောက်မျက်နှာတစ်ယောက်ကြည့်ပြီး ပြုံးသလိုလို မဲ့သလိုလို ဘာလုပ်ရရင်ကောင်းမလဲ လို့ အကြိတ်အနယ်စဉ်းစားကြတယ်။
အိမ်မှာမွေးထားတဲ့ ကြောင်ကလည်း မွတ်စလင်မ် ဟုတ်လားမဟုတ်လာတော့ကျနော်လည်းမသိ။ ကိုယ့်အိမ်မှာနေတယ် ဆိုတော့လည်း ဝက်သားတွေ သူ့ကိုမကျွေးချင်။ ကျနော်တို့မသိခိုက် ဟိုဟိုဒီဒီ အလှစ်သုတ်ပြီး ရှာစားတော့လည်း သူ့ဟာသူဘဲပေါ့။ ကျနော်ကတော့ မကျွေးဘူး။
မိန်းမက – “စားတဲ့လူ တစ်ယောက်ယောက်ကို ကျွေးလိုက်ပါ။ ပြန်သွားပို့ပေးတော့ ကြီးကျယ်ရာကြတယ်။ မျက်နှာပျက်စရာကြီး။ သူများက ခင်မင်ချင်လို့ပါဆိုနေမှ မိတ်က မဆက်ခင် ပျက်တော့မှာဘဲ။” ဟုပြောတယ်။ အီစွတ်ဘိုင်တို့လိုမွတ်စလင်မ်ဆိုတာသိရင်လည်း အိမ်သစ်တက်ပွဲ အလှူစာရင်းမှာတောင်ထည့်မှာမဟုတ်ဘူး။ ဘာသာမတူလို့ မိတ်မဖွဲ့ရတာလည်းမဟုတ်ပြန်ဘူး။ အစားတစ်လုပ်ကြောင့် တော့မဟုတ်ဘူး။ တချို့က ဝက်သားအကြောင်းပြပြီး ဘေးဖယ်ထားတက်တဲ့ အလေ့အထရှိတယ်လေ။
ကျောင်းတုန်းကလည်း သူငယ်ချင်းတွေ စုဝေးပြီးချက်ပြုတ်စားသောက်ကြတိုင်း ကျနော့် ကို မခေါ်ဘဲ ချန်ထားတက်ကြတယ်။ တစ်ခါတစ်ခါ စကားစုံတဲ့အခါဆိုရင် … “ဝက်သားဟင်းချက်စားလို့ မခေါ်တာပါ” တို့… “ဘီယာဝိုင်းထောင်လို့ မခေါ်တာပါ” တို့ ပြောတက်ကြတယ်။ အဲဒီတုန်းကလည်း ဝက်သားမစား-ဘီယာမသောက် ရလည်း လာခဲ့မယ်လို့ ပြောရပြန်ရင်လည်း အတင်းအဓ္ဓမ သူများမခေါ်ချင်တာကို ဇွတ်ဝင်သလိုဖြစ်နေပြန်ရော။ တခါတခါ ကျနော့် အဆောင်ကို သူငယ်ချင်တွေဖိတ်ရင်လည်း သိပ်မလာချင်ကြဘူး။ ကျောင်းသားတွေစုပြီး တွေ့ကြတာ ဘီယာဝိုင်းမထောင်ရင်လည်း ပျင်းခြောက်ခြောက်ကြီးဖြစ်နေတာကို။ စကားဝိုင်းထိုင်လိုက်၊ ရုပ်ရှင်ကြည့်လိုက်၊ ကာရာအိုအေဆိုလိုက် ဆိုပေမယ့် ဘီယာတွေ၊ အရက်တွေမပါတဲ့ ပါတီပွဲကိုတော့ သိပ်ပြီးတော့လည်း စိတ်ဝင်စားကြတာမဟုတ်ဘူး။ ဒီလိုနဲ့ တက္ကသိုလ် ကျောင်းသားဘဝ တလျှောက် အစားအသောက်နဲ့ စည်းခြားထားတဲ့ အရှုပ်တော်ပုံထဲမှာ မြောခဲ့ရပြီးပြီ။ အစားအသောက်ကို အကြောင်းပြပြီး ဘေးဖယ်ထားတာကိုလည်း ခံခဲ့ရတယ်။ အိမ်နီးချင်းအကြားမှာတော့ ဒီလိုဇာတ်လမ်းမျိုးတွေနဲ့ စည်းခြားထားတာတော့ အဖြစ်မခံနိုင်ဘူးလေ။
အတွေးတွေနဲ့ ချာချာလည်နေခိုက် မိန်းမဖြစ်သူ က
“နေဦး … တစ်ခုခုပြန်ချက်ပို့ပေးလိုက်မယ်။ မိတ်မပျက်သွားရအောင် … မဟုတ်ရင် တစ်ယောက်နဲ့တစ်ယောက် စကားတန့်သွားလိမ့်မယ်။”
မိတ်ဖွဲ့တုန့်ပြန်တဲ့ အကြံကောင်းတစ်ခု မိန်းမဖြစ်သူ စဉ်စားမိတဲ့အတွက် “ကောင်းတယ်၊ ကောင်းတယ်။” ဟု ဆိုကာ မီးဖိုခန်းအတွင်း ကူညီချက်ပြုတ်ပေးလိုက်တယ်။ မိတ်ဆွေလမ်းစ ပြန်ဖွင့်တဲ့နေနဲ့ မိန်းမက ခေါက်ဆွဲသုတ်လုပ်ပေးပြီး အိမ်က ထမင်းချိုင့်တစ်ခုထဲ ထည့်ပေးလိုက်တယ်။ သားကို သွားပို့ပေးခိုင်းမယ် ဆိုပေမယ့် သူက ငယ်သေးတော့ လယ်လယ်ဝယ်ဝယ် ရှင်းပြတက်မှာမဟုတ်ဘူးလေ။ ဒါနဲ့ လင်မယားနှစ်ယောက်လုံး သွားကြပါလေရော။
ဟိုရောက်တော့မှ
“အမ…။ ကျမ စိုးစိုးလွင်ပါ။ ဒါကတော့ ကျမအမျိုးသား ကိုမျိုးမင်း။ အမတို့နဲ့ ဒီဖက် နှစ်အိမ်ကျော်က။ ကြေးအိုလာပို့တာ ကျေးဇူးတင်တယ်။”
အိမ်ရှင်မ ဖြစ်ဟန်တူတဲ့ အသက် လေးဆယ်ကျော်အမျိုးသမီးအား မိတ်ဆက်လိုက်တယ်။
“ကျမတို့လည်း ပြောင်းရွေ့နေတာနဲ့ ဘယ်သူနဲ့မှ အေးအေးဆေးဆေးမတွေ့ဖြစ်သေးဘူး။ ကျမနာမည်က သဇင်ညိုပါ။ လာ… အိမ်ထဲဝင်ခဲ့လေ။”
“အိမ်ထဲတော့ မဝင်တော့ဘူး။ အိမ်မှာ လုပ်စရာလေးတွေ နည်းနည်းရှိသေးတယ်။”
“သြော်…”
“ဒီလိုအမရဲ့ ကျမတို့က ဝက်သားမစားတော့ ကြေးအိုးက နမျှောစရာကြီး”
စကားသံမှာ မသဇင်ညိုရဲ့ ပါးပြင်အား ခပ်ကြမ်းကြမ်း ရိုက်ထဲ့လိုသလို ပါးပြင်တစ်ခုလုံးနီရဲတက်လာတယ်။ ပို့ထားတဲ့အစားအသောက်ကို ပြန်ပေးတယ်ဆိုတော့ ဘယ်သူကမှ ကြိုက်နှစ်သက်မှမဟုတ်ဘူးလေ။ မသဇင်ညို အသက်မရှုတော့သလောက် ငြိမ်ကျသွားတယ်။
ကျနော့အမျိုးသမီးက ဆိုင်းငံ့မနေတော့ဘဲ စကား ဆက်လိုက်တယ်။
“တမျိုးမထင်ပါနဲ့ ကျမတို့က ဝက်သားမစားဘူးလေ။ ဒါပေမယ့် အမတို့လာပို့တာကို အရမ်းကျေးဇူးတင်ပါတယ်။ ပို့ထားတဲ့ အစားအသောက်ပြန်လာပေးရတာ မျက်နှာတော့ပူပါတယ်။ ဒါပေမယ့် ကျမတို့မစားလို့ ပြစ်ထုတ်ရမှာလည်း နမျောတယ်လေ။ စိတ်မရှိပါနဲ့အမ”
“ရပါတယ်။ ကျမတို့ကတော့ စားစေချင်တဲ့စေတနာနဲ့ပါ။ သွန်လိုက်လည်းရပါတယ်။ ပြန်လာပို့တာလည်း ကိစ္စမရှိပါဘူး။”
မသဇင်ညို၏တုန့်ပြန်မှုမှာ အသက်မဝင်သလိုပင်။ ဒါနဲ့ ကျနော်က
“ကျနော်တို့ကမွတ်စလင်မ်တွေမို့လို့ပါ။”
မွတ်စလင်မ်လို့ပြောလိုက်တော့မှ ထွေထွေထူးထူး ရှင်းပြစရာမလိုတော့။ မသဇင်ညို သဘောပေါက်လိုက်တဲ့ မျက်နှာရိပ် လွားခနဲပေါ်လာတယ်။ တဆက်တည်းမှ အားနာတဲ့အမူအရာ အဖြစ်ပြောင်းသွားတယ်။
“အားနာစရာကြီး။ ကျမတို့လည်းမသိပါဘူး။ မွတ်စလင်မ်တွေဆိုတာ အစကတည်းက သိတယ်ဆိုရင်တော့ တခြားတစ်ခုခုလုပ်ပေးမှာပေါ့။”
ထိုစဉ် အိမ်ထဲမှာ ထိုင်နေတဲ့ အမျိုးသားက
“မွတ်စလင်မ်ဆိုတာမသိလို့ပါ … ဈေးဆိုင်တွေမှာ ၇၈၆ ကပ်ထားသလို မွတ်စလင်အိမ်တွေမှာလည်း ၇၈၆ ကပ်ထားရင်တော့ ကျနော်တို့လည်း ခွဲခွဲခြားခြားသိမှာပေါ့။” ဟု တုန့်ပြန်သံနဲ့အတူ အိမ်ရှေ့တံခါးဝသို့ထွက်လာခဲ့တယ်။ အမျိုးသမီးဖြစ်သူက သူယောက်ျားဖက်လည့်လိုက်တယ်။ မျက်မှောက်ကြုတ်ပြလိုက်လား၊ အံကြိုက်ပြလိုက်သလားတော့မသိ။ ကျနော်တို့ကို ကျောခိုင်းထားတော့ သူ့မျက်နှာ အမူအရာကို မတွေ့ရ။ လင်မယားနှစ်ယောက် မျက်နှာချင်းဆိုင်ပြီး တစ်ယောက်ကိုတစ်ယောက်ကြည့်ပုံထောက်တော့ အချင်းချင်းအချက်ပြလိုက်တယ်ဆိုတာလောက်ပဲ ရိပ်မိလိုက်တယ်။
“ကျနော်တို့ မွတ်စလင်မ်ဖြစ်တယ်ဆိုတာ ကြေညာသလိုတော့ လုပ်ဖို့မလိုပါဘူး။ ဘယ်သူဘယ်သာဘာ ကိုးကွယ်တယ်ဆိုတာ အိမ်ရှေ့ဆိုင်းဘုတ်ချိတ်ဖို့လည်း မလိုပါဘူးဗျ။ ရင်ထဲမှာ ရှိရင်ရပါတယ်။ ဆိုင်တွေမှာ ၇၈၆ ရေးတပ်တယ်ဆိုတာ ဟလာဟ်အစားအသောက် တွေရောင်းတယ်ဆိုတဲ့ သင်္ကေတဗျ။ ဟလာလ်ဆိုတာက စားပိုင်ခွင့်ရှိတယ် ဆိုတဲ့သဘောကိုဆိုလိုတာပါ။ မွတ်စလင်ဆိုင်ဖြစ်တယ်ဆိုပြီး ကြွေးကျော်တဲ့သဘောမဟုတ်ဘူးဗျ။” ခပ်ရင့်ရင့်ပြောတဲ့သဘောကိုဆောင်တဲ့ ပြောဆိုသံကို ကျနော်ကလည်း ဖြေရှင်းချက်တွေ ဝေါ်ခနဲ့ အန်ချလိုက်တယ်။ ကျနော်စကားအဆုံးတွင် အိမ်ရှင်အမျိုးသားမှ လက်ကမ်းနှုတ်ဆက်သည့်သဘောဖြင့်
“ကျနော်က သီဟလင်းပါ။ တွေ့ရတာဝမ်းသာပါတယ်။”
“တွေ့ရတာဝမ်းသာပါတယ်။ ကျနော်က မျိုးမင်းပါ။”
“၇၈၆ အကြောင်းကျနော်သိပါတယ် ကိုမျိုးမင်း။ ‘အလ္လာအရှင်ရဲ့ အမည်နဲ့အစပြုပါတယ်’ ဆိုတဲ့ အဓိပ္ပါယ်ပေါက်တယ်ဆိုတာလည်း ကျနော် သိပါတယ်။ ဒါက မွတ်စလင်ဖြစ်ကြောင်းကြေငြာတဲ့ သဘောလိုဖြစ်နေတာဘဲမဟုတ်လား။ ‘စားခွင့်ရှိသည်’ တို့၊ ‘ဟလာလ်’ တို့၊ ‘လူမျိုးဘာသာမရွေးစားသုံးနိုင်သည်’ တို့ လို ရေးသားထားရင်တော့ တမျိုးပေါ့ဗျာ။”
“မွတ်စလင်ဆိုင်မှာ ၇၈၆ ဆိုတာရေးထားတာတွေ၊ အာရဗီဘာသာစကားနဲ့ရေးထားတဲ့ ဘာသာရေးစာတွေ ချိတ်ဆွဲထားကြသလို၊ ဗုဒ္ဓဘာသာ၊ ဟိန္ဒူဆိုင်တွေမှာဆိုရင် ဘုရားစင်ရှိတယ်။ ခရစ်ယာန်ဆိုင်တွေမှာဆိုရင် လက်ဝါးကပ်တိုင် ရှိကြတာဘဲမဟုတ်လား။”
ကိုသီဟလင်းက စကားလမ်းကြောင်းလွဲတဲ့အနေနဲ့
“မိတ်ဖွဲ့ဖွဲ့ချင်း ဘာသာရေးအကြောင်းပြောတာကတော့ နည်းနည်းဂွကျတယ်ဗျ။ အထဲဝင်ပါလား အေးအေးဆေးဆေး စကားထိုင်ပြောကြတာပေါ့။”
အမြင်မတူတဲ့ ဘာသာရေးပြစ်လုံးတွေနဲ့အတူ မိတ်ဆက်မိတဲ့အတွက် စကားဆုံးအောင်တော့ပြောဆိုသင့်တယ်လို့ ယူဆမိတယ်။ ဒီလို့စကားဖြတ်လိုက်ကြရင် တစ်ယောက်နဲ့တစ်ယောက်လမ်းတွေ့တောင် နှုတ်ဆက်ရမှာ ခက်နေကြလိမ့်မယ်လေ။ မိတ်ဖွဲ့ဖို့လာတာဘဲမဟုတ်လား။ မိန်းမဖက်လည့်ကြည့်လိုက်တော့… မိန်းမက အလိုက်သိသိနဲ့…
“အကိုပဲဝင်သွားပါ။ စိုး ကတော့ မသဇင်ကို ခေါက်ဆွဲပေးပြီးပြန်လိုက်တော့မယ်။”
ဒီလိုနဲ့ ကိုသီဟလင်းခေါ်ရာသို့ အိမ်ထဲ လိုက်ဝင်သွားခဲ့တယ်။ နာရီဝက်ခန့်လောက် မိတ်ဖြစ်ဆွေဖြစ် မိတ်ဆက်စကားပြောပြီးမှ အိမ်ပြန်ခဲ့တယ်။ သူတို့ကလည်း ဝက်သားပါတဲ့ကြေးအိုးပို့မိလို့ အားနာ။ ကျနော်တို့ကလည်း ပြန်သွားပေးလိုက်ရတဲ့အတွက်အားနာ။ မျက်နှာပူကြတာပေါ့။
အစားအသောက်ဆိုတာ မိတ်ဖွဲ့တဲ့နေရာမှာ အရေးကြီးတဲ့ အခန်းကဏ္ဍကပါဝင်သလို အခန့်မသင့်ရင်လည်း မိတ်ပျက်နိုင်တယ်လေ။ အရင်က အစားအသောက်ကြောင့် စည်းခြားတာတွေအကြိမ်ကြိမ်ခံ ခဲ့ရတော့ အစားတစ်လုပ်နဲ့ ဘာသာရေးအကြောင်းပြပြီး လူ့အသိုင်းအဝိုင်းမှာ ဘေးဖယ်မခံရဖို့အတွက် အမြဲဆိုသလို သတိပြုနေထိုင်ရတဲ့ ပြဿနာကလည်း မသေးလှပါဘူး။
ရက်အနည်းငယ်ကြာတော့ ကျနော်တို့ခေါက်ဆွဲထည့်ပေးလိုက်တဲ့ ချိုင့်နဲ့ အစားအသောက်တွေလာပို့ပေးတယ်။ အဲဒီနောက်ပိုင်းမှာတော့ ကျနော်တို့ မကြာမကြာ အစားအသောက်လေး ထူးထူးဆန်းဆန်း လုပ်စားတဲ့အခါမျိုးမှာ အပြန်လှန် ပေးပို့ဖြစ်တယ်။ ကြေးအိုးတစ်ခွက်ကြောင့် မိတ်မပျက်သွားတဲ့အတွက်တော့ စိတ်ပေါ့မိပါတယ်။
O’Laie Manzu
၂၀၁၃ ခုနှစ်၊ ဇွန်လ
