Blog

ဖေဖော်ဝါရီ ၂၂၊ ၂၀၂၀၁
M-Media

-မြန်မာနိုင်ငံမှာ ဒီမိုကရေစီ ပျက်သုဉ်းတာ၊ ရက်စက်ကြမ်းကြုတ်တာတွေ မြင်လာရတယ်လို့ ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်က ဒီကနေ့မှာ ပြောကြားလိုက်ပါတယ်။

လူ့အခွင့်အရေးကောင်စီရဲ့ ၄ ပတ်တာကြာမြင့်မယ့် အစည်းအဝေးကို ဂူတာရက်စ်က ဗီဒီယိုမိန့်ခွန်း ပေးပို့ခဲ့တာ ဖြစ်ပါတယ်။

“ဖိနှိပ်ညှင်းပမ်းမှုတွေကို ချက်ခြင်းလက်ငင်း ရပ်တန့်ဖို့ မြန်မာစစ်တပ်ကို ဒီနေ့ ကျွန်တော် တိုက်တွန်းပါတယ်။ အကျဉ်းသားတွေ လွှတ်ပေးပါ။ အကြမ်းဖက်မှုကို အဆုံးသတ်ပါ။ လူ့အခွင့်အရေးနဲ့ ပြီးခဲ့တဲ့ရွေးကောက်ပွဲက လူထုဆန္ဒကို လေးစားပါ။ စစ်တပ်က အာဏာသိမ်းမှုဟာ ခေတ်သစ်ကမ္ဘာမှာ နေရာမရှိတော့ပါဘူး” လို့ အတွင်းရေးမှူးချုပ်က ပြောပါတယ်။

ဒါ့အပြင် မြန်မာနိုင်ငံအတွင်း ဒီမိုကရေစီပျက်သုဉ်းတာ၊ ရက်ရက်စက်စက် အင်အားသုံးတာ၊ တရားလက်လွတ်ဖမ်းဆီးတာ၊ ဖိနှိပ်မှုတွေကို လူသိရှင်ကြား လုပ်ဆောင်တာကို တွေ့လာရတယ်လို့ ဂူတာရက်စ်က ဆိုပါတယ်။

“ပြည်သူတွေကို ကန့်သတ်ချုပ်ချယ်တာ၊ တိုက်ခိုက်တာတွေဖြစ်နေတယ်။ လူနည်းစုတွေအပေါ် ဆိုးဆိုးရွားရွားကျူးလွန်တာကိုလည်း အရေးယူမယ့်သူမရှိ ဖြစ်နေပါတယ်။ ရိုဟင်ဂျာတွေကို လူမျိုးစုလိုက် သုတ်သင်ရှင်းလင်းမှုလည်း ဒီအထဲမှာပါဝင်ပါတယ်”

Ref: Reuters

ဖေဖော်ဝါရီ ၂၂၊ ၂၀၂၁
M-Media

-ရွေးကောက်တင်မြှောက်ခံထားရတဲ့ အစိုးရထံ အာဏာပြန်အပ်ဖို့အတွက် ဥရောပသမဂ္ဂက အာဏာသိမ်းစစ်ကောင်စီကို တောင်းဆိုလိုက်ပြီး၊ အာဏာသိမ်းမှုနဲ့ တိုက်ရိုက်ပတ်သက်တဲ့သူတွေကို ပိတ်ဆို့အရေးယူသွားမယ်လို့လည်း ပြောကြားလိုက်ပါတယ်။

ဥရောပသမဂ္ဂ နိုင်ငံခြားရေးကောင်စီဟာ မြန်မာ့အရေးနဲ့ပတ်သက်ပြီး ဒီနေ့အစည်းအဝေးမှာ ထည့်သွင်းဆွေးနွေးခဲ့တာပါ။

“စစ်အာဏာသိမ်းမှုမှာ တိုက်ရိုက်ပါဝင်တဲ့သူတွေနဲ့ သူတို့ရဲ့ စီးပွားရေး အကျိုးစီးပွားရေးကို ပစ်မှတ်ထားပြီး အရေးယူဆောင်ရွက်ဖို့ ဥရောကသမဂ္ဂက အသင့်ရှိနေပါတယ်” လို့ အစည်းအဝေးအပြီး ထုတ်ပြန်တဲ့ ကြေငြာချက်မှာ ဖော်ပြထားပါတယ်။

နိုင်ငံတော်အတိုင်ပင်ခံ ဒေါ်အောင်ဆန်းစုကြည်၊ သမ္မတဦးဝင်းမြင့်နဲ့ ဖမ်းဆီးခံထားရသူတွေအားလုံးကို ပြန်လွှတ်ပေးဖို့အတွက်လည်း ဥရောပသမဂ္ဂက တောင်းဆိုခဲ့ပါတယ်။

“လူ့အခွင့်အရေး ချိုးဖောက်မှုတွေ၊ ဆန္ဒပြသူတွေအပေါ် တိုက်ခိုက်မှုတွေအတွက် ချက်ခြင်းလက်ငင်း အရေးယူဖို့ လိုအပ်ပါတယ်။ စစ်အာဏာသိမ်းမှုနောက်ပိုင်း အကြမ်းဖက်မှု မြင့်တက်လာတာကို မြင်လာရပါတယ်” လို့​ ဥရောပသမဂ္ဂ နိုင်ငံခြားရေးဝန်ကြီး ဂျိုးဆက်ပ် ဘော်ရဲလ်က ပြောပါတယ်။

ဘော်ရဲလ်ဟာ မန္တလေးမြို့မှာ ဆက်ကျော်သက် လူငယ်တစ်ဦးအပါဝင် ၂ ဦးသေဆုံးပြီး အများအပြား ဒဏ်ရာရခဲ့တဲ့ ပစ်ခတ်နှိမ်နှင်းမှုကိုလည်း ပြင်းပြင်းထန်ထန် ရှုတ်ချခဲ့ပါတယ်။

လက်ရှိတင်းမာမှုတွေကို လျှော့ချပြီး အရေးပေါ်အခြေအနေ ကြေငြာထားတာကို ပြန်ရုပ်သိမ်းဖို့၊ လွှတ်တော်ကို ချက်ခြင်း ပြန်လည်ခေါ်ယူဖို့၊ ဥရောပသမဂ္ဂက တိုက်တွန်းခဲ့သလို၊ ပါဝင်ပတ်သက်သူတွေအားလုံး ဒီပြဿနာကို ဆွေးနွေးညှိနှိုင်းမှုတွေကနေတစ်ဆင့် ဖြေရှင်းနိုင်ရေး ပံ့ပိုးကူညီသွားမယ်လို့ ဥရောပသမဂ္ဂရဲ့ ကြေငြာချက်မှာ ဖော်ပြထားပါတယ်။

​မြန်မာပြည်သူတွေကို ပေးအပ်နေတဲ့ လူသားချင်းစာနာထောက်ထားမှုဆိုင်ရာအကူအညီတွေကို ဆက်လက်ပေးအပ်သွားမှာဖြစ်ပြီး၊ လူထုထိခိုက်မယ့် အရေးယူမှုတွေကို ရှောင်ရှားသွားမယ်လို့လည်း ဥရောပသမဂ္ဂက ပြောကြားခဲ့ပါတယ်။

Ref: Bloomberg

ဖေဖော်ဝါရီ ၂၁၊ ၂၀၂၁
M-Media

-အာဏာသိမ်းစစ်ကောင်စီရဲ့ ဝါဒဖြန့် စာမျက်နှာတစ်ခုဖြစ်တဲ့ တပ်မတော်သတင်းမှန်ပြန်ကြားရေး Page ကို ဖယ်ရှားလိုက်တယ်လို့ Facebook က မနေ့မှာ ထုတ်ပြန်ပါတယ်။

သတင်းမှန်ပြန်ကြားရေးစာမျက်နှာဟာ အကြမ်းဖက်မှု တားဆီးရေးဆိုင်ရာ စည်းကမ်းတွေကို အကြိမ်ကြိမ်ချိုးဖောက်တဲ့အတွက် အခုလို ဖျက်ချလိုက်တာလို့ Facebook က ထုတ်ပြန်တဲ့ကြေငြာချက်မှာ ဖော်ပြထားပါတယ်။

“ကျွန်တော်တို့ရဲ့ မူဝါဒတွေနဲ့အညီ တပ်မတော်သတင်းမှန်ပြန်ကြားရေးစာမျက်နှာကို ဖယ်ရှားလိုက်တာ ဖြစ်ပါတယ်။ ဒီစာမျက်နှာဟာ အကြမ်းဖက်အောင် လှုံ့ဆော်မှု၊ စနစ်တကျ ထိခိုက်အောက် ဆောင်ရွက်မှု တားဆီးရေးဆိုင်ရာ စည်းကမ်းတွေကို အကြိမ်ကြိမ် ချိုးဖောက်ခဲ့တာဖြစ်ပါတယ်”

ဒီကိစ္စနဲ့ပတ်သက်ပြီး အာဏာသိမ်းစစ်ကောင်စီ ပြောရေးဆိုခွင့်ရှိသူကို မေးမြန်းဖို့ ကြိုးစားခဲ့ပေမယ့် ဆက်သွယ်လို့ မရဘူးလို့ ရိုက်တာသတင်းဌာနက ဖော်ပြပါတယ်။

ဖေဖော်ဝါရီ ၂၀ ရက်နေ့က မန္တလေးမှာ အာဏာသိမ်းမှု ဆန့်ကျင်ဆန္ဒပြသူတွေကို ရဲတပ်ဖွဲ့က ပစ်ခတ်မှုကြောင့် ၂ ဦး သေဆုံးခဲ့ပြီး အများအပြား ဒဏ်ရာရခဲ့ပါတယ်။

Facebook ဟာ ၂၀၁၈ ခုနှစ်တုန်းက အခုအာဏာသိမ်းခေါင်းဆောင်ဖြစ်တဲ့ ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်နဲ့ စစ်ခေါင်းဆောင်တွေ၊ စစ်တပ်အဖွဲ့စည်းတွေရဲ့ အကောင့် စုစုပေါင်း ၁၉ ခု၊ စစ်တပ်နဲ့ဆက်နွယ်တဲ့ အကောင့်၊ ဝါဒဖြန့်စာမျက်နှာ စုစုပေါင်း တစ်ရာကျော်လောက်ကို ဖယ်ရှားခဲ့ပါတယ်။

နိုဝင်ဘာရွေးကောက်ပွဲမတိုင်ခင်ကလည်း စစ်တပ်နဲ့ဆက်နွယ်တဲ့ ဝါဒဖြန့်ချီရေး အကောင့်တုနဲ့ ပေ့ချ်အတု စုစုပေါင်း ၇၀ လောက်ကို ဖြုတ်ချခဲ့ပါတယ်။

Ref: Reuters