မေလ ၂၇၊ ၂၀၁၃
M-Media
သတင်း – ဆူးထက်
ကုရ်အာန် အသိပညာ ပြန့်ပွားရေး အဖွဲ့မှ ကြီးမှူး ကျင်းပသော “ဘာသာပေါင်းစုံ ချစ်ကြည်ရေး ညီညွှတ်ရေး နှင့် လူမူရေး သဟဇာတ ဖြစ်မှု” အခမ်းအနားကို မေလ (၂၆)ရက်နေ့က မွန်းလွဲ (၁း၃၀)နာရီတွင် ရန်ကုန်မြို့၊ ဗိုလ်တထောင်မြို့နယ်၊ ဆုတောင်းပြည့် အစ္စလာမ်ဝတ်ကျောင်းတော်၌ ကျင်းပပြုလုပ်ခဲ့ကြောင်း သတင်းရရှိသည်။
အဆိုပါ အခမ်းအနားသို့ ဗဟိုဘဏ် ဒုဥက္ကဌ အလ်ဟဂ်ျ ဦးသန်းလွင်၊ ဗုဒ္ဓဘာသာမှ သွေးမေတ္တာ ပရဟိတ အသင်း နာယက ရွှေသံလျင် ဆရာတော် အရှင်မေဂိယ၊ ခရစ်ယာန် ဘာသာမှ ဘာသာပေါင်းစုံ ချစ်ကြည်ရေး နာယက သိက္ခာတော်ရ ဒေါက်တာ စောမာဂေကြီး၊ သွေးမေတ္တာ ပရဟိတ အသင်းဥက္ကဌ ဆရာဦးမြတ်ကျော်၊ ကုရ်အာန် အသိပညာ ပြန့်ပွားရေး အဖွဲ့ ဥက္ကဌ မွဖ်သီ ဦးစန်းအောင် တို့မှ တက်ရောက် အမှာစကားပြောကြားခဲ့ပြီး ဖိတ်ကြားထားသော ဘာသာပေါင်းစုံမှ ဧည့်ပရိသတ် (၂၀၀) ကျော် တက်ရောက်ခဲ့ကြောင်း သိရသည်။
အခမ်းအနားတွင် ဗဟိုဘဏ် ဒုဥက္ကဌ အလ်ဟဂ်ျ ဦးသန်းလွင်မှ ဆွေးနွေးပြောကြားရာတွင် “ ဘာသာ၊ လူမျိုး သဟဇတဖြစ်ဖို့ ဘာသာအစွဲ၊ လူမျိုး အစွဲ၊ ပုဂ္ဂိုလ်စွဲ၊ ဒေသစွဲ၊ အတိတ်က အစွဲ ရှိနေသမျှ ကာလပတ်လုံး တိုင်းပြည်တိုးတက်ဖို့ ရာခိုင်နှုန်း တော်တော်နည်းမယ်” ဟု ထည့်သွင်းပြောကြားခဲ့သည်။
ဗုဒ္ဓဘာသာမှ သွေးမေတ္တာ ပရဟိတ အသင်း နာယက ရွှေသံလျင် ဆရာတော် အရှင်မေဂိယ မှ ငြိမ်းချမ်းရေး ရှူဒေါင့်မှ သြ၀ါဒ စကားမြွတ်ကြားရာတွင် “ ဘာသာပေါင်းစုံ ချစ်ကြည်ဖို့၊ ညီညွှတ်ဖို့ အတွက် အတူ လက်တွဲပြီး ငြိမ်းချမ်းရေးအတွက် ဘယ်လို တည်ဆောက်ကြမလဲ၊ ဗုဒ္ဓဘုရားရှင် ဟောကြားခဲ့သလို တခြား တခြားသော ဘာသာဝင်တွေမှာလည်း ဒီတရားကို လက်ခံ ကျင့်သုံးကြပါတယ်၊ အဲဒါကတော့ အခြား မဟုတ်ပါဘူး၊ မေတ္တာ တရားပါ၊ မကောင်းသော စိတ်ဟာ ဘယ်ဘာသာမဆို လောကရဲ့ ပျက်ဆီးခြင်းကို ဆိုးကျိုး ကိုခံစားရတယ် ၊ ဒီအခမ်းအနားကြီးဟာ မြန်မာနိုင်ငံမှာ ဘယ်ခေတ်ကမှ မပေါ်ဘူးသေးတဲ့ ဘာသာရေး အခမ်းအနားလို့ ပြောလို့ရပါတယ် ” ဟုထည့်သွင်းပြောကြားခဲ့သည်။
သွေးမေတ္တာ ပရဟိတ အသင်းဥက္ကဌ ဆရာဦးမြတ်ကျော်မှ အမှာ စကားပြောကြားရာတွင် “ ကျွန်တော်ဟာ၊ ကျွန်တော်တို့ သွေးမေတ္တာ ပရဟိတ အသင်းဟာ လောကပေါ်မှာ ရှိတဲ့ လူသား အားလုံးကို ကျွန်တော်တို့ အသင်းရဲ့ဆောင်ပုဒ်နဲ့ အညီ “ငါတို့ပြုသော ဤအမှုကိစ္စတို့သည်၊ ငါတို့ အတွက် မဟုတ်၊ ငါတို့ အမျိုးအတွက်လည်း မဟုတ်၊ ဖြူ၊မည်း(မသိ)၊ အနိမ့်၊ အမြင့် (မသိ)၊ တို၊ရှည် (မသိ) သက်ရှိအားလုံး အတွက်သာတည်း..” ဆိုပြီးတော့ ကျွန်တော်တို့ဟာ ဒီဆောင်ပုဒ်ကို လက်ကိုင်ထားပြီးတော့ လုပ်နေတာ ဖြစ်တဲ့ အတွက် ကျွန်တော်ရဲ့ မျက်စိထဲမှာ ဗုဒ္ဓဘုရားရှင်ရဲ့အဆုံးအမ အောက်မှာ ရှိနေတဲ့ အတွက် အားလုံးကို လူလို့ ပဲမြင်ပါတယ်၊အတူတကွ ငြိမ်းချမ်းစွာ လက်တွဲရင်း ငြိမ်းချမ်းခြင်းရဲ့ အကျိုးရလာဒ်တွေကို ဖော်ဆောင်ကြပါစို့လို့ ကျွန်တော် လူသား အားလုံးကို တောင်းဆိုရင်း နိဂုံးချုပ်အပ်ပါတယ် ခင်ဗျား” ဟု ထည့်သွင်းပြောကြားခဲ့သည်။
ကုရ်အာန် အသိပညာ ပြန့်ပွားရေး အဖွဲ့ ဥက္ကဌ ဦးစန်းအောင် မှ အစ္စလာမ်နှင့် ပတ်သက်၍ ရှင်းလင်းတင်ပြရာတွင် “ ကျွန်တော်ရဲ့ရှေ့မှာပြောကြားခဲ့သည့် ဘာသာရေးဆိုင်ရာ ဆရာတော်၊ ခေါင်းဆောင်တွေ အားလုံးရဲ့ တူညီတဲ့ အချက်က ကျွန်တော်တို့ တိုးတက် တည်ငြိမ်တဲ့ နိုင်ငံတော်ကြီး တည်ဆောက်ရေးမှာ မဖြစ်မနေ အရေးကြီးဆုံးက ဘာသာဝင်အားလုံးဟာ ငြိမ်းချမ်းစွာ အတူတကွ ယှဉ်တွဲ နေထိုင်ရေး ဖြစ်တယ် ဆိုတာ ကျွန်တော်နားလည် သဘောပေါက်မိပါတယ်၊ ကျွန်တော်လိုပဲ ယနေ့ကြွရောက်လာကြတဲ့ သူတွေ အားလုံးလည်း သဘောပေါက်မှာ ဖြစ်ပါတယ်၊ မကြာသေးမီက ဖြစ်ပွားခဲ့တဲ့ ပြဿနာတွေ မဖြစ်ပွားသေးခင်က အစ္စလာမ်နဲ့ ပတ်သပ်ပြီးတော့ လွဲမှားစွာ၊ စွပ်စွဲ ထွက်ပေါ်လာပါတယ်၊ ဒီလို စွပ်စွဲချက်တွေဟာ ပြဿနာဖြစ်ပွားလာအောင် တွန်းပို့ ပေးတဲ့ အဓိက အကြောင်းရင်းတွေပါ၊ တကယ့် တကယ်မှာ ကျွန်တော်တို့ အစ္စလာမ် ဘာသာဝင်တွေနဲ့ ဗုဒ္ဓဘာသာဝင်တွေကြားမှာ ဒီလို အခြေအနေတွေ မရှိခဲ့ပါဘူး၊ ဒီကောလဟာလတွေ၊ အထင် လွဲမှားတွေပေါ်မှာ ဖြစ်လာတဲ့ ပြဿနာတွေပါ၊ ဒီထက့် ချဲ့ထွင်လာပြီ ဆိုရင် အစ္စလာမ်မှာရှိတဲ့ အနေအထားတွေကို ဆွဲထုတ်ပြီး အခြားဘာသာဝင်တွေ မခံမရပ် ဖြစ်သွားအောင် လိမ်လည် လှည့်ဖြားလိုက်တဲ့ အခါ အမုန်းတရားတွေ ဖြစ်လာတယ်။
ဒီကနေ့ မီဒီယာတွေမှာရေးနေကြတယ် မွတ်စလင်တိုင်းသည် အကြမ်းဖက် သမား မဟုတ်သော်လည်း အကြမ်းဖက်သမား တိုင်းသည် မွတ်စလင်များ ဖြစ်ကြသည် ဟု မီဒီယာတွေမှာ ကျွန်တော်တို့ တွေ့လာရပါတယ်၊ အဲတော့ ဘယ်ဘာသာဝင်မဆို ဆရာတော်ကြီးတွေ ပြောခဲ့တဲ့ အထဲမှာလည်း ပါပါတယ် မိမိဘာသာတရားရဲ့လမ်းညွှန်ချက်နှင့် အညီ အဆုံးအမတွေကို ကျောခိုင်းသွေဖီမယ်ဆိုရင် အကြမ်းဖက်သမားတစ်ဦး ဖြစ်ဖို့ ရာခိုင်နှုန်းများပါတယ်၊ ဆိုလိုတာက ဘာသာတရား အားလုံးသည် အကြမ်းဖက်မူကို တားမြစ်တယ်၊ ဘယ်ဘာသာတရားရဲ့ ခေါင်းဆောင်ကမှ မင်းတို့ အကြမ်းဖက်ကြ၊ မင်းတို့ လူတွေ သတ်ကြ၊ မင်းတို့ အိမ်တွေ ဖျက်ဆီးကြ၊ ဘုရားကျောင်းတွေ ဖျက်ဆီးကြ လို့ မပြောပါဘူး၊ ဘာသာတရားတိုင်းက အမုန်း အာဃာတတွေကို တားမြစ်တယ်၊ ရန်ကို ရန်ခြင်း တုံ့နှင်းမူကို တားမြစ်ပါတယ်၊ ဒါကြောင့် ဘာသာတရားတွေရဲ့ အဆုံးအမတွေကို ကျောခိုင်းလိုက်မယ်ဆိုရင် အကြမ်းဖက်မူတွေက နေရာဝင်ယူလာပါလိမ့်မယ်။
အကြမ်းဖက်သမားတိုင်းက မွတ်စလင်များ ဖြစ်ကြသည် ဆိုလျှင် ကျွန်တော် မပြောချင်ဘဲနဲ့လည်း ပြောပါရစေ၊ ငြိမ်းချမ်းရေး ဗိသုကာ မဟာတမ ဂန္ဒီကို လုပ်ကြံသူဟာ မွတ်စလင် မဟုတ်ပါ၊ ရာဂျစ် ဂန္ဒီ အစရှိတဲ့ ခေါင်းဆောင်တွေကို လုပ်ကြံသူဟာ မွတ်စလင် မဟုတ်ပါ၊ ဗိုလ်ချုပ်အောင်ဆန်းနှင့် တကွ အာဇာနည် ခေါင်းဆောင်ကြီးများကို လုပ်ကြံခဲ့တဲ့ အကြမ်းဖက်သမားများဟာ မွတ်စလင် မဟုတ်ပါ၊ အစ္စရေး ၀န်ကြီးချုပ်ကို လုပ်ကြံသူများဟာ မွတ်စလင် မဟုတ်ပါ၊ ဗြိတိန်က အိုင်အာအေ လက်နက်ကိုင်အဖွဲ့များဟာ သည်များသည် မွတ်စလင် မဟုတ်ပါ၊ ဂျပန်မှ ရာကူဇာ ဂိုဏ်းသားများသည် မွတ်စလင် မဟုတ်ပါ၊ အမေရိကန် သမိုင်းမှာ ဖြစ်ပွားခဲ့တဲ့ အကြမ်းဖက်မူ အားလုံးဟာ မွတ်စလင်ကကြီးပဲ လုပ်ခဲ့တာတွေ မဟုတ်ပါဘူး၊ ဒါပေမယ့် မွတ်စလင်များ အနက်မှ အပြစ်မဲ့သူ ပြည်သူများကို တန်ဆာခံပြုလုပ် အကြမ်းဖက်မူများလည်း ရှိပါတယ်၊ ဒါကို ကျွန်တော်တို့ ဘယ်လို ပြင်ဆင်မလဲ၊ ကျွန်တော်တို့က မဟုတ်ပါဘူးလို့ တစ်ဖက်ကို ငြင်းနေပေမယ့် ကျွန်တော်တို့ မွတ်စလင်တွေ သိဖို့က ကိုယ်တွေကရော ဘာပြင်ရမလဲဆိုတာ အရေးကြီးလာပြီ ခုချိန်မှာ အတူတကွ ယှဉ်တွဲ နေထိုင်ဖို့ အတွက်ကို။
နောက်တစ်ခု စွပ်စွဲချက်က ဗလီများသည် စစ်စခန်းများ ဖြစ်သည်၊ စစ်သင်တန်းများ လုပ်နေပါသည် လို့ပြောကြပါတယ်၊ အခု တက်ရောက်လာသူတွေမှာ မွတ်စလင်မဟုတ်သူ ဘာသာခြား ညီနောင်တွေ အများကြီး ပါပါတယ်၊ ကျွန်တော်တို့ ဗလီမှာကြည့်ပါ၊ ကြိုက်တဲ့ နေရာကို လွတ်လပ်စွာ သွားလာနိုင်ပြီး ကြည့်ပါ၊ ဘာစစ်စခန်းမှ မရှိပါဘူး၊ ဘာလက်နက်မှ မရှိပါဘူး၊ ဘာမြေအောက်ခန်းမှ မရှိပါဘူး၊ ဘာသာတရားတွေရဲ့ အင်မတန် ငြိမ်းချမ်းစွာ လူ့အဖွဲ့အစည်းကို အကျိုးပြုတဲ့ ကိစ္စတွေကို ဆောင်ရွက်တဲ့ နေရာနဲ့ စစ်သင်တန်းနဲ့ လားလားမှ မအပ်စပ်ပါဘူး လို့ တင်ပြချင်ပါတယ်” ဟု ထည့်သွင်းပြောကြားခဲ့သည်။
ဗုဒ္ဓဘာသာမှ သွေးမေတ္တာ ပရဟိတ အသင်း နာယက ရွှေသံလျင်ဆရာတော် အရှင်မေဂိယ မှ “ အကြမ်းဖက်တာဟာ ဘယ်ဘာသာကပဲ လုပ်လုပ် မကောင်းပါဘူး၊ ပထမဆုံး ကိုယ်ကိုကိုယ်လောင်စေတယ်၊ နောက်ကိုယ်လုပ်လိုက်တဲ့ သူတွေ အားလုံး အပေါ်မှာ ပူလောင်စေတယ်၊ ဒုက္ခရောက်စေတယ်၊ ဘယ်ဘုရားရှင်တိုင်းကမှ ဒီလိုအကြမ်းဖက်မူတွေကို လက်မခံပါဘူး၊ မေတ္တာ၊ ဂရုဏာ နဲ့ ငြိမ်းချမ်းမူနဲ့ပဲ ဒီကမ္ဘာလောကကြီးကို တည်ဆောက်စေချင်ပါတယ်၊ ဘယ်ဘာသာကပဲ အကြမ်းဖက်မူတွေကို လုပ်လုပ် ဦးဇင်းတို့ကတော့ ရှုံ့ချမှာပါပဲ၊ ကိုယ့်ဘာသာရဲ့ ဘာသာသာသနာ တိုးတက်အောင်သာ ကဏ္ဍတိုင်းကို တိုးတက်အောင် ဆောင်ရွက် သွားဖို့ပဲ လိုပါတယ်၊ အစ္စလာမ် ဘာသာဝင်တွေ ဆိုပေမယ့် မြန်မာမြေပုံပေါ်မှာ နေကြတဲ့ သူတွေဆိုတော့ အကုန်လုံးက ညီအကို မောင်နှမတွေပဲပေါ့၊
အဲဒါကြောင့်မို့ တစ်ယောက်ရဲ့ အကျိုးစီးပွား ပျက်စီးသွားတယ် ဆိုရင်လည်း တစ်ယောက်က ခံစားရတာပါပဲ၊ အခုလို အစ္စလာမ်ဘာသာဝင်တွေ ဆင်းရဲ ဒုက္ခရောက်တယ်၊ အိုးအိမ် ပျက်ဆီး ဆုံးရှုံးတယ် ဆိုပေမယ့်လည်း ဦးဇင်းတို့ အကုန်လုံး စိတ်ဆင်းရဲ သောကရောက်ရတာပါပဲ၊ ဗုဒ္ဓဘာသာတွေ ဒီလို ဖြစ်ရင်လည်းပဲ အခြား ဘာသာတွေ သောက စိတ်ဆင်းရဲမူ ဖြစ်ကြမှာပဲလေ၊ အဲလိုမျိုး အပြန်အလှန် လေးစားမူတွေကို ယူပြီးတော့ ဦးဇင်းတို့ တည်ဆောက်မှ ဦးဇင်းတို့ မြန်မာနိုင်ငံကြီးက ရေရှည် တည်တံ့မှာဖြစ်တဲ့ အတွက် အဲဒါဟာ အင်မတန် အရေးကြီးပါတယ်၊ မေတ္တာတရား နဲ့တည်ဆောက်သွားရပါမယ်၊ သူလည်း သူဘာသာ တစ်မျိုး၊ ကိုယ်လည်း ကိုယ်ဘာသာတစ်မျိုး ဆိုရင် အခုလို နည်းနည်းလေး ထစ်ခနဲ ဆိုတာနဲ့ ဖြစ်ကြမှာပဲ၊ ဦးဇင်းတို့ကတော့ ငြိမ်းချမ်းရေး လိုလားတယ် ဒါကြောင့် ဘာသာပေါင်းစုံက အခုလိုပဲ ငြိမ်းငြိမ်းချမ်းချမ်းနဲ့ အားနဲ့အင်နဲ့ ဆောင်ရွက်မှသာ မြန်မာနိုင်ငံကြီး တည်ငြိမ်အေးချမ်းပြီး တိုးတက်မှာပါ၊ ဦးဇင်းတို့ ကိုယ့်ဘာသာ ကိုယ်သာသနာကို ကိုယ်လူမျိုးကို ပြောဆို ဆုံးမတဲ့ အခါ တနည်းအားဖြင့် ကိုယ့်အမျိုးကို ကိုယ်စောင့်တဲ့နေရာမှာ အခြား ဘာသာ သာသနာ ကိုတော့ မထိခိုက်အောင် ဦးဇင်းတို့က ပြောရမှာ ဖြစ်တယ်၊ ဗုဒ္ဓဘာသာ ရှု့ဒေါင့် လမ်းကြောင်းကနေပြီးတော့ ပြောဆို ဆုံးမ စည်းရုံးရမှာ ဖြစ်တယ်၊ အချို့က ဦးဇင်းတို့ ဗုဒ္ဓဘာသာဝင်ဆိုပေမယ့်လည်း ဘုန်းကြီးကျောင်း မရောက်တဲ့သူတွေလည်း အများကြီး ရှိတယ်လေ၊ အဲဒီ့ အခါကြတော့ ကိုယ့်ဘာသာ သာသနာရဲ့ ကျင့်ဝတ်တွေ၊ စည်းမျဉ်း စည်းကမ်းတွေကို မသိတဲ့ သူတွေလည်း အများကြီး ရှိတယ်၊ အဲဒီတော့ သံဃာတော်တွေ ဘက်ကလည်း တရားဟောကြားတဲ့ အခါမှာ ပုတုဇဉ် သဘာဝ အလျှောက်ပေါ့ အလွန်အကျူး ပြောမိတာ ရှိနိုင်ပါတယ်၊ အဲဒါတွေကို ဦးဇင်းတို့က ထိန်းသိမ်းပြီး ပြောရမှာ ဖြစ်တယ်၊ ဘာဖြစ်လို့လဲဆိုတော့ ကိုယ်ပြောလိုက်တဲ့ စကား တစ်ခွန်းက အခြား ဘာသာတွေအတွက် မကောင်းဘူး ထိခိုက်စေတယ် ပဋိပက္ခ အသွင် ဆောင်စေတယ် ဆိုရင် သတိထားပြီးပြောရမှာ ဖြစ်ပါတယ် ” ဟု M-Media သို့ပြောကြားခဲ့သည်။
ခရစ်ယာန် ဘာသာမှ ဘာသာပေါင်းစုံ ချစ်ကြည်ရေး နာယက သိက္ခာတော်ရ ဒေါက်တာ စောမာဂေကြီး မှလည်း “ဘာသာပေါင်းစုံမှာ ရှိကြတဲ့ နိုင်ငံသူ၊ နိုင်ငံသား အားလုံးဟာ ကိုယ့်ရဲ့ ဘာသာကို အမှန်တကယ် ကိုင်းရှိုင်းသလို အခြား ဘာသာများကို တကယ့် အမှန်တရားကို သိရှိမယ် ဆိုရင်တော့ တန်ဖိုးထားမှု၊ လေးစားမှု တိုးပွားလာပြီးတော့ တိုင်းပြည်အတွက် အင်အားကြီး ဖြစ်မယ်လို့ ဆရာအနေနဲ့ အလေးအနက် ယုံကြည်ပါတယ်၊ အဲဒါကြောင့် ဘာသာပေါင်းစုံ ချစ်ကြည်ရေးကို ကြိုးစားပြီး လုပ်ဆောင်နေတာ ဖြစ်ပါတယ်၊ ဒီလို ပဋိပက္ခတွေ စတင်ဖြစ်ပေါ်လာဖို့ အတွက် စတင် လှုံဆော် သွေးဆောင်နေတဲ့ အဖွဲ့အစည်းတွေ ရှိပါတယ်၊ ဆိုတော့ ဒီလို သွေးဆောင် လှုံဆော်သူတွေရဲ့ စကားကို နားမယောင်ဘဲနဲ့ တကယ့်ဘာသာတရားတွေရဲ့ သွန်သင်မူက ဘာလဲ ဆိုတာကို အမှန်တကယ် သိရှိပြီး လေ့လာထားမယ် ဆိုရင်တော့ လှုံဆော်မူတွေကနေ ရှောင်ရှားနိုင်မှာ ဖြစ်ပါတယ်၊ ဒီလှုံဆော်မူတွေဟာလည်းပဲ ရှိဆဲပဲ ဖြစ်ပါတယ်၊ ဒါကို အင်မတန် သတိထားဖို့လိုပါတယ်၊ အိမ်နီးနားချင်း တွေရဲ့ ဘာသာတရားတွေကို လေ့လာဖို့ သူတို့နဲ့ နှီးနှောပြီး နီးနီးကပ်ကပ် အခုလို နေပြီးတော့ ဘာသာတရားရဲ့ မွန်မြတ်တဲ့ အမှန်တရားတွေကို အချင်းအချင်း ဖလှယ်ခြင်းအားဖြင့် ဒီပဋိပက္ခတွေ မဖြစ်လာဖို့ အတွက်က ကြိုတင်ပြီးတော့ တားဆီးနိုင်မှာ ဖြစ်ပါတယ်၊ ဒီလို ဒီလို အစီအစဉ်မျိုးကို မြန်မာပြည် အတိုင်းအတာမှာ များများ စီစဉ်ပေးဖို့ ကောင်းပါတယ် ” ဟု M-Media သို့ပြောသည်။
ဘာသာပေါင်းစုံ ချစ်ကြည်ရေး ညီညွှတ်ရေး နှင့် လူမူရေး သဟဇာတ ဖြစ်မှု အခမ်းအနား ကျင်းပရခြင်းနှင့် စပ်လျဉ်း၍ ကုရ်အာန် အသိပညာ ပြန့်ပွားရေး အဖွဲ့မှ ဆရာဦးသန်းအောင်မှ “ မြန်မာနိုင်ငံသား ဘာသာဝင် အချင်းချင်း တစ်ဦးနဲ့ တစ်ဦး ငြိမ်းချမ်းစွာ အတူ ယှဉ်တွဲ နေထိုင်နိုင်ရေး အတွက် ဘာသာတစ်ခုနဲ့ တစ်ခုကြား အပြန်အလှန် သိနားလည် သဘောပေါက်ထားမယ်၊ အပြန်အလှန် လေးစားမူ၊ ယုံကြည်မူတွေနဲ့ ငြိမ်းချမ်းတဲ့ လူ့ဘောင်ကြီးကို တည်ဆောက်နိုင်မယ်လို့ ယူဆမိတဲ့အတွက်ကြောင့် အခုလို အခမ်းအနား ကျင်းပရခြင်း ဖြစ်ပါတယ်၊ ဘာသာပေါင်းစုံ အသီးသီးကနေ ရပ်ကွက်ကျေးရွာ အလိုက် နိုင်ငံတော်အဆင့်အထိ ဘာသာပေါင်းစုံ ချစ်ကြည် ညီညွှတ်ရေးနှင့် လူမူရေး သဟဇာတ ဖြစ်မှု၊ အပြန်အလှန်လေးစားမူနဲ့ ငြိမ်းချမ်းစွာ အတူယှဉ်တွဲ နေထိုင်မူတွေကို ဆောင်ရွက်နိုင်မယ်ဆိုရင် မြန်မာနိုင်ငံကြီးက ဒီထက့် ပိုပြီး လောကပါလ တရားတွေနဲ့ ညီတဲ့ ငြိမ်းချမ်းတဲ့ တိုင်းပြည် တစ်ခု ဖြစ်လာမယ်လို့ ယုံကြည်မိပါတယ်၊ ဒီ ဖြစ်ပေါ်ခဲ့တဲ့ အကြမ်းဖက်မူတွေကို ပြန်ကြည့်မယ်ဆိုရင် နားလည်မူ လွဲမှား သွားကြတဲ့ အပေါ်မှာ လူတွေက အသိမဲ့ ပါဝင်သွားကြတဲ့ သူတွေက များပါတယ်၊ တကယ်တော့ အားလုံးက ငြိမ်းချမ်းရေးကို လိုလားကြသူတွေ ဆိုတာကို အကြမ်းဖက်မူတွေ ဖြစ်ပြီးတဲ့နောက်မှာ သုံး၊လေးရက် တစ်ပတ်ကြာတဲ့ အခါမှာ ကိုယ့်အရပ် ကိုယ့်ဒေသက လူတွေ အားလုံးဟာ ငြိမ်းချမ်းစွာ အတူယှဉ်တွဲ နေထိုင်ကြတာကို တွေ့နေရပါတယ်၊ ဒီလိုမျိုး ဘာသာပေါင်းစုံက ညီနောင်တွေနဲ့ အခုလိုမျိုး ဆက်လက်ပြီး လက်တွဲပြီးတော့ မြန်မာနိုင်ငံ ခေတ်မှီ ဖွံ့ဖြိုး တိုးတက်တဲ့ ဒီမို ကရေစီနိုင်ငံ ဖြစ်ဖို့အတွက် တတတ်တအား ပါဝင်ပြီးတော့ လူသား အကျိုးပြု လုပ်ငန်းတွေကို စွမ်းစွမ်း တမံ ဆောင်ရွက်နိုင်ကြပါစေလို့ ဆန္ဒပြု လိုက်ပါတယ်” ဟု M-Media သို့ပြောသည်။
အခမ်းအနား ကျင်းပရေး ကော်မတီ ၀င်များထဲမှ ဒေါ်သိန်းသိန်းစိုးနှင့်ဒေါ်သိန်းခင် တို့မှလည်း “အခုလို ဘာသာပေါင်းစုံ ချစ်ချစ်ခင်ခင်နဲ့ အခုလို ကြားနာရတဲ့ အတွက် အရမ်းဝမ်းသာတယ်၊ အရမ်းထူးထူး ခြားခြားပဲ ၀မ်းသာတယ်၊ ဒီအသက်အရွယ်ရောက်မှ ဒီလို အခမ်းအနားမျိုးကို ပထမဦးဆုံး အကြိမ် ကြုံတွေ့ရတာပါ ဒီလိုမျိုး ချစ်ခင်သွားပါစေလို့လည်း ဆုတောင်းပါတယ်၊ ဒီလိုမျိုး ဘာသာပေါင်းစုံ ပေါင်းစုံ ဟောပြောပွဲတွေကို မြို့တိုင်း၊ ရွာတိုင်းမှာ ပြုလုပ်မယ်ဆိုရင်တော့ အရမ်းပဲကောင်းပါတယ်လို့ အကြံပေးချင်ပါတယ်” ဟု M-Media သို့ပြောသည်။
တက်ရောက်လာသူများထဲမှ ဆရာဦးဇော်အောင်မှလည်း “ အခုလို ဘာသာပေါင်းစုံချစ်ကြည်ရေး အခမ်းအနားတွေ များများ လုပ်ပေးသင့်ပါတယ်၊ အခုလို အခြား ဘာသာဝင် ပြည်သူတွေကို အစ္စလာမ်ဘာသာနဲ့ ပတ်သက်ပြီး အထင်မြင် လွဲမှားမူတွေကို ရှင်းလင်းတင်ပြလိုက်ခြင်း အားဖြင့် ဘာအကျိုးတွေရလာလည်းဆိုရင် အမြင်ရှင်းလာပြီး သံသယတွေပျောက်သွားမှာ ဖြစ်ပါတယ်၊ ဒီလို အထင်လွဲမှုတွေ၊ သံသယတွေ၊ မုန်းတီးမှုတွေ မရှိတော့ရင် ပြဿနာတွေ ဖန်တီးသူတွေက ဘယ်လောက်ပဲ လှုံဆော် လှုံဆော် ပြဿနာတွေ ထပ်ဖြစ်ပွားမှာ မဟုတ်ပါဘူး၊ ဒီလို ဗလီထဲမှာ ဘာသာပေါင်းစုံပွဲ ပြုလုပ်ကျင်းပမူတွေ အပေါ်မှာ အမျှော်မြင် နည်းပါးသူတွေ၊ ရေရှည် မမြင်နိုင်သူတွေကတော့ ဝေဖန်ကြမှာပါပဲ ” ဟု M-Media သို့ ပြောသည်။
တက်ရောက်လာသူများထဲမှ ဗုဒ္ဓဘာသာဝင် ရုပ်ရှင်သရုပ်ဆောင် မမိုခမ်းမှလည်း“ ဒီလိုပွဲမျိုးလေးတွေကို နေရာတိုင်းမှာ လုပ်စေချင်ပါတယ်၊ ဗလီတွေ၊ ပြီးတော့ ကျွန်မတို့ရဲ့ ဓမ္မာရုံတွေမှာလည်း လုပ်စေချင်ပါတယ်၊ ဒီလိုမျိုး များများ လုပ်ဖြစ်လေ ပိုပြီးတော့ မသိသေးတဲ့ သူတွေလည်း သိသွားတဲ့ သဘောပေါ့၊ လူအစုလေး သေးသေးလေးကနေ လူအများကြီးကို ဖွင့်ဟချက်တွေ သိစေချင်တယ်၊ ဒီလို ပွဲမျိုးလေးတွေကို အရမ်းလည်း သဘောကျပါတယ်၊ မသိနားမလည်တဲ့ အစွန်းရောက်တဲ့ သူတွေလည်း ရှိနေပါတယ်၊ အဲဒါကြောင့် နယ်တွေမှာလည်း ဒါမျိုးလေးတွေ လုပ်စေချင်ပါတယ်၊ ဒီလို မေတ္တာဓာတ်ခံ အဖွဲ့လေးတွေက ဟောပြောပွဲလေးတွေ ပြုလုပ်ပေးခြင်း ဖြင့် အစွန်းရောက်တဲ့ သူတွေလည်း သိသွား၊ နားလည် သွားရအောင်လို့လည်း အဲလိုမျိုး ကျွန်မအနေနဲ့ စည်းရုံး စေချင်ပါတယ်” ဟု M-Media သို့ပြောသည်။
