မေလ-၁၄၊ ၂၀၁၃
M-Media
သတင်း- ညိုမင်း
“ရှမ်းပြည်နယ်မှ အစ္စလာမ်ဘာသာဝင် အလှူရှင်များ စုပေါင်း၍ မိထ္တီလာ ဒုက္ခသည်သို့ လူမျိုးဘာသာမရွေး ဒုတိယ အကြိမ် သွားရောက်လှူဒါန်း”
မတ်လအတွင်းကဖြစ်ပွားခဲ့သော မိထ္တီလာအကြမ်းဖက်မှုမှ ဒုက္ခသည်များအား လူမျိုးဘာသာမခွဲခြားဘဲ ရှမ်းပြည်နယ် တောင်ပိုင်းနှင့် အရှေ့ပိုင်းရှိ အစ္စလာမ် ဘာသာဝင် စေတနာရှင် အလှူရှင်များမှ စုပေါင်း၍ ဒုတိယအကြိမ်အဖြစ် (၁၁- ၅-၂၀၁၃)ရက်နေ့တွင် သွားရောက်ပေးပို့လှူဒါန်းခဲ့ကြောင်း သိရပါသည်။
အလှူရှင်အဖွဲ့သည် မိတ္ထီလာမြို့ ဗဟိုကယ်ဆယ်ရေးနှင့် ပြန်လည်နေရာ ချထားရေး ဒုက္ခသည်စခန်း(၄)ခု၊ ဇီးပင်ပေါက်၊ က္ကုကိုပေါက်၊ ဘုရားလေးကုန်း၊ ယင်းတော်နှင့် ရမည်းသင်းမြို့အနီးရှိ ရွာတန်း ဒုက္ခသည်များ အသီးသီးထံသို့ အ၀တ်အထည်၊ စားသောက်ကုန်၊ လူသုံးကုန်ပစ္စည်းနှင့် ဆေးပစ္စည်းများ လှူဒါန်းခဲ့ကြောင်းသိရှိရပါတယ်။
ရှမ်းပြည်နယ်တောင်ပိုင်းရှိ အစ္စလာမ်ဘာသာဝင် စေတနာရှင် အလှူရှင်များမှ မိထ္တီလာ ဒုက္ခသည်များအား ထိရောက်စွာကူညီ လှူဒါန်းနိုင်ရေး အတွက် တောင်ကြီးမြို့ပေါ်ရှိ ရှမ်းပြည်နယ် အစ္စလာမ်ဘာသာရေးဆိုင်ရာ အဖွဲ့အစည်း အသီးသီးမှ တာဝန်ရှိသူများ၊ အခြားမြို့များမှ အဖွဲ့ဝင်များ၊ တောင်ကြီးမြို့ပေါ်ရှိ မြို့မိမြို့ဖများနှင့် ပန်းသေးမိသားစုဝင်များ၊ လူမှုရေးအသင်း အဖွဲ့ဝင်များ အလှူရှင်များအားလုံး စုပေါင်းပါဝင်ကာ ကူညီလှူဒါန်းရေးကော်မတီတရပ်ကို (၂၄-၃-၂၀၁၃)ရက်နေ့တွင် ဖွဲ့စည်းခဲ့ပြီး အလှူငွေလက်ခံခြင်း၊ အ၀တ်အထည်နှင့် စားသောက်ကုန်များလက်ခံခြင်းကို စတင်ဆောင်ရွက်ခဲ့ခြင်းဖြစ်ပါသည်။
“ပထမဆုံးအနေနဲ့ မိထ္တီလာဒုက္ခသည်တွေကို ကူညီရေးအတွက် ကော်မတီတစ်ရပ်ကို ဖွဲ့စည်းပြီး အလှူရှင်တွေပေးပို့လှူဒါန်းလာတဲ့ အ၀တ်အထည်တွေ၊ စားသောက်ကုန်၊ လူသုံးကုန် ပစ္စည်းတွေကို တောင်ကြီးမြို့ပေါ်က မြို့ဦးဗလီမှာ စုစည်းထားရှိပါတယ်။ နောက်ပြီး အဲဒီမှာ အမျိုးသား အမျိုးသမီးဝတ်၊ ကလေးဝတ်၊ အသစ်- အဟောင်းစသဖြင့် အထည်တွေကို မြို့ပေါ်ကစေတနာရှင်လုပ်အားပေးအဖွဲ့တွေနဲ့ စနစ်တကျ သီးသန့်ခွဲပြီး အထုတ်တွေ ထုတ်ပိုးပါတယ်။ နောက် စားသောက်ကုန်တွေ၊ လူသုံးကုန်တွေကိုလည်း စနစ်တကျ လှူဒါန်းပြီး ခွဲဝေပေးနိုင်အောင် မိထ္တီလာမြို့မှာရှိတဲ့ ဗဟိုကယ်ဆယ်ရေးနှင့်ပြန်လည်နေရာချထားရေးကော်မတီကို ဆက်သွယ်ပြီး၊ ဒုက္ခသည်စခန်းတွေမှာရောက်ရှိနေတဲ့ ဒုက္ခသည် အရေအတွက်ကို စုံစမ်းပြီးမှ အဓိက လိုအပ်တာတွေကို ဖြည့်ဆည်းပေးနိုင်အောင် ထိရောက်စွာ လှူဒါန်းနိုင်အောင် ကြိုတင်ပြင်ဆင်ခဲ့ပြီးမှ အခုလို ပေးပို့လှူဒါန်း ခဲ့ခြင်းဖြစ်ပါတယ်။ ပထမအကြိမ်အနေနဲ့( ၁၀.၄.၂၀၁၃ )ရက်နေ့မှာ ဇီးပင်ပေါက်၊ ရွာမွန်သာ၊ ကုက္ကိုပေါက်၊ ယင်းတော်၊ ဆူးလေကုန်း၊ ရွာတန်းနဲ့ မိထ္တီလာမြို့က ဒုက္ခသည်စခန်းတွေကို သွားရောက်လှူဒါန်းခဲ့တယ်။
အခုကတော့ဒုတိယအကြိမ်ပေးပို့လှူဒါန်းခြင်းဖြစ်ပါတယ်။ နောက်ထပ်ကိုလည်း ပြန်လည်နေရာချထားပေးတဲ့အချိန်မှာ နေအိမ်ဆောက်လုပ်ရေးနဲ့အခြား လိုအပ်ချက်တွေရှိလာမှာဖြစ်တဲ့အတွက်လည်း ကော်မတီအနေနဲ့ အဲဒီလိုအပ်မှုများကို ကူညီပံ့ပိုးပေးနိုင်ဖို့၊ ထပ်မံလှူဒါန်းနိုင်ဖို့ အလှူငွေနဲ့ တခြားအစီစဉ်တွေကိုလည်း ကြိုတင်ပြင်ဆင်ဆောင်ရွက်ထားပါတယ်” ဟု မိထ္တီလာဒုက္ခသည်များ ကူညီရေးကော်မတီ အဖွဲ့ဝင် ဦးထွန်းညွှန့်မော်က ပြောပြခဲ့ပါတယ်။
ဒုက္ခသည်များ ကူညီရေးကော်မတီဝင်များ၊ ဒုက္ခသည်များထံ ကိုယ်တိုင် သွားရောက်ခဲ့ သူများနှင့်လည်း တွေ့ဆုံမေးမြန်း ထားချက်များကို စုစည်းတင်ပြလိုက်ပါတယ်။
ထိုသို့ မိထ္တီလာဒုက္ခသည်များအား လှူဒါန်းပေးပို့ရာတွင် ရှမ်းပြည်နယ်တောင်ပိုင်းရှိ တောင်ကြီး၊ ထုံးဖို၊ အေးသာယာ၊ ရွှေညောင်၊ ညောင်ရွှေ၊ ရပ်စောက်၊ ဟဲဟိုး၊ အောင်ပန်း၊ ကလော၊ ပင်လောင်း အစရှိသောမြို့များမှ အစ္စလာမ် ဘာသာဝင် စေတနာရှင်များ၏ လှူဒါန်းမှုများ၊ ရှမ်းပြည်အရှေ့ပိုင်းရှိ ကွန်ဟိန်း၊ မိုင်းပျဉ်း၊ ကျိုင်းတုံ၊ တာချီလိတ် စသောမြို့များမှ အစ္စလာမ်ဘာသာဝင် စေတနာရှင်၊ အလှူရှင်များ၏ လှူဒါန်းမှုများ အားလုံး စုပေါင်းပါဝင်လှူဒါန်းမှုဖြစ်ကြောင်း၊ ဒုက္ခသည်များ အားလုံးအတွက် အဆင်ပြေစေရန် ရည်ရွယ်ပြီး၊ စားဝတ်နေရေးနှင့် အဓိကလိုအပ်ချက်များအတွက် လူမျိုးဘာသာမရွေး ကူညီပံ့ပိုး လှူဒါန်းခြင်းဖြစ်ကြောင်းကိုလည်း မိထ္တီလာ ဒုက္ခသည်များကူညီရေးကော်မတီအဖွဲ့ဝင် အလ်ဟာဂ်ျဆရာ ဦးသန်းမောင်မှ ပြောပြပါတယ်။
“ပထမအကြိမ် (၁၀.၄.၂၀၁၃ )ရက်နေ့က သွားရောက်လှူဒါန်းတော့ သွားတိုက်တံ၊ သွားတိုက်ဆေး၊ ဆပ်ပြာစတဲ့ အခြေခံ လူသုံးကုန်တွေကနေ ဆန်၊ ဆီ၊ ဆား၊ ခေါက်ဆွဲခြောက်၊ ရေသန့်စတဲ့ စားသောက်ကုန်၊ အ၀တ်အထည် ၊ အိုးခွက် ပန်းကန်၊ စောင်၊ ခြင်ထောင် စတဲ့ ပစ္စည်းတွေ အဓိကပါဝင် လှူဒါန်းခဲ့ပါတယ်။ လိုအပ်နေတဲ့ တစ်ချို့ပစ္စည်းတွေကိုတော့ ဒုက္ခသည်များကူညီရေးကော်မတီက လက်ခံရရှိထားတဲ့ အလှူငွေတွေထဲကနေ ၀ယ်ယူလှူဒါန်းခဲ့တာပါ။ ပထမအကြိမ်မှာ လှူဒါန်းခဲ့တဲ့ ပစ္စည်းစုစုပေါင်းတန်ဖိုးက ကျပ်သိန်း(၅၀)လောက် တန်ဖိုးရှိမယ်ခန့်မှန်းပါတယ်၊
အ၀တ်အထည်ဟောင်းတွေလည်းပါနေတာဆိုတော့လေ။ အခု ဒုတိယအကြိမ်မှာတော့ လှူဒါန်းမှု ခန့်မှန်းတန်ဖိုးက ကျပ်သ်ိန်း(၁၀၀)ကျော်တန်ဖိုးရှိပါတယ်။ မိထ္တီလာဒုက္ခသည် စခန်း(၄)ခုမှာရှိတဲ့ လူမျိုးမရွေး ဘာသာ မရွေးနဲ့ တခြားရွာတွေမှာ ရောက်နေသူတဲ့ သူတွေကို ရှမ်းပြည်နယ်က အစ္စလာမ်ဘာသာဝင် အလှူရှင်များအားလုံး ကိုယ်စား ကော်မတီ အနေနဲ့ အခုလို ကူညီလှူဒါန်းမှုလုပ်ခဲ့တာပါ” ဟုလည်း မိထ္တီလာဒုက္ခသည်များ ကူညီရေး ကော်မတီ အဖွဲ့ဝင်များဖြစ်တဲ့ ဦးသန်းထွန်းနှင့် ဦးခင်မောင်ဦးတို့မှ ပြောပြခဲ့ပါတယ်။
ယခုလိုစုပေါင်းသွားရောက်လှူဒါန်းမှုကိုမေးမြန်းကြည့်ရာမှာတော့ “ပထမအကြိမ်တုန်းကလိုပဲ ကျွှန်တော်တို့ မနက်ဖြန်သွားမယ်ဆိုတော့ ညနေဖက်မှာကြိုတင်ပြီး ဒုက္ခသည်စာရင်းနဲ့အညီ ပေးပို့ လှူဒါန်းမယ့်ပစ္စည်းတွေ ကားတွေပေါ်ကို တင်ထားပြီး မနက်အစော(၅)နာရီကျော်မှာ တောင်ကြီးကနေအတူတူထွက်ခွာသွားပါတယ်။ ပထမအကြိမ်က ကား(၄)စီးနဲ့သွားပို့ခဲ့တယ်။ အခု ဒုတိယအကြိမ်မှာလည်း အရင်တစ်ခေါက်လိုပဲ စီစဉ်ပြီး ကား(၅)စီးသွားပို့ပါတယ်။
ကားတစ်စီးနဲ့ကော်မတီအဖွဲ့ဝင်တစ်ချို့ပါတဲ့ အဖွဲ့ငယ်လေးလေးတစ်ဖွဲ့က ဇီးပင်ပေါက်၊ က္ကုကိုပေါက်၊ ဘုရားလေးကုန်းမှာရှိနေတဲ့ ဒုက္ခသည်တွေအတွက်သွားပို့တယ်၊ နောက်ကားတစ်စီးနဲ့အဖွဲ့ ယင်းတော်နဲ့ ရမည်းသင်းမြို့နားက ရွာတန်းဒုက္ခသည်တွေအတွက်သွားပို့ပါတယ်။ ကျန်တဲ့ကား(၃)စီးနဲ့အဖွဲ့ဝင်တွေကတော့ မိထ္တီလာမှာရှိတဲ့ ဒုက္ခသည်စခန်း(၄)ခုကို သွားပို့လှူဒါန်းခဲ့ပါတယ်” လို့လည်း ကော်မတီအဖွဲ့ဝင် ဦးစိုးစိုးငယ်မှ သွားရောက်ပို့ဆောင်ပေးခဲ့မှုကိုပြောပြခဲ့ပါတယ်။
ဒုက္ခသည်စခန်းများရှိ ဒုက္ခသည်များ၏ ကျန်းမာရေးအခြေအနေနှင့်ပတ်သက်ပြီး ယင်းတော်ရွာရှိ ဒုက္ခသည်များ၏ ကျန်းမာရေးကို မကြာခဏ စေတနာဖြူစင်စွာဖြင့်သွားရောက်ကြည့်ရှုကုသပေးနေသော ဒေါက်တာဦးမျိုးလင်းထွန်းကို မေးမြန်းကြည့်ရာမှာ “ ကျွန်တော်ကတော့ ယင်းတော်မှာရှိတဲ့ လူနာတွေကို မကြာခဏသွားရောက်ကြည့်ရှု ကုသပေးဖြစ်ပါတယ်။ ကျန်းမာရေးပိုင်း အနေနဲ့ကတော့ အဓိက ၀မ်းပျက် ၀မ်းလျှောဖြစ်တာကြုံရပါတယ်။ တချို့အသက်ကြီးပိုင်း လူနာတွေကတော့ နှလုံး၊ သွေးတိုး၊ ဆီးချို ဖြစ်နေတဲ့သူတွေကို လိုအပ်သလို ကုသပေးရပါတယ်။ ဆေးဝါးနဲ့ လိုအပ်တာတွေကိုတော့ နယ်စုံက အလှူရှင်တွေက အသီးသီး လာရောက်လှူဒါန်းကျပါတယ်။ နောက်အထူးသဖြင့် မန်းလေးက အလှူရှင်တွေလည်း အခုရက်ပိုင်းမှာ ယင်းတော်ကို ဆေးပစ္စည်းတွေ လာလှူတယ်လို့ မနေ့က ယင်းတော်ရောက်တုန်း သိခဲ့ရပါတယ်။ မန်းလေးဆေးအဖွဲ့မှ ဆရာဝန်များလည်းလာရောက် ကူညီပေးနေတာရှိသလို အခုယင်းတော်မှာရွာက ဆရာဝန်တစ်ဦးရှိနေတယ်၊ အဲဒီဆရာဝန်က နေ့တိုင်း လူနာတွေကိုကြည့်ပေး ကုသပေးနေပါတယ်။ မိထ္တီလာမှာရှိတဲ့ ဒုက္ခသည် စခန်းတွေမှာလည်း ကျန်းမာရေးစောင့်ရှောက်မှုအနေနဲ့ သူနာပြုဆရာမတွေနဲ့ ဆရာဝန်တွေ အလှည့်ကျ ကြည့်ရှုကုသပေးနေတယ် မန်းလေးဆေးအဖွဲ့ကလည်း လာရောက် ကူညီပေးနေတယ်လို့သိရပါတယ်” ဟု ပြောပြခဲ့ပါတယ်။
ဒုက္ခသည် စခန်းအသီးသီးရှိ ဒုက္ခသည်များ၏ အဓိကလိုအပ်ချက်များနှင့် ပတ်သက်၍ ထင်မြင်ယူဆချက်များကို ဒုက္ခသည်စခန်းများသိုသွားရောက်လေ့လာခဲ့သူတစ်ဦးအား မေးမြန်းကြည့်ရာမှာတော့ “ကျွှန်တော်မြင်ခဲ့ ကြားခဲ့ရတာတွေကတော့ တကယ်စိတ်မကောင်းစရာပါ။ ကျွန်တော့် အမြင်ပြောရရင် ဒီလိုကြုံခဲ့ရသူတွေအနေနဲ့ သူတို့ရဲ့အနာဂတ်မဲ့သလို သူတို့ခံစားနေရတယ်။ ဘာဆက်လုပ်ရမလဲ၊ ဘာဖြစ်လာမလဲ၊ ဘယ်လိုနေထိုင်သွားရမယ်။ ဒုက္ခသည်စခန်းမှာ ဘယ်လောက်ကြာကြာ နေရအုံးမယ်ဆိုတာ သူတို့ ဘာမမသိနိုင်သေး၊ မပြင်ဆင်နိုင်သေးတဲ့ အခြေအနေပေါ့ဗျာ။ အိမ်ကိုပြန်နေခွင့်ရတဲ့ မိတ်ဆွေတယောက်နဲ့တွေ့တော့ သူတို့ရဲ့စားဝတ်နေရေးက အခုအဆင်ပြေနေတယ်။
ဒါပေမယ့် သူတို့ အလုပ်ပြန်လုပ်ချင်တယ်။ လုပ်ငန်းတွေက ဘာမှပြန်စလို့ကိုမရသေးတာမျိုး၊ ကားသမားဆိုလည်း ကားပြန်မမောင်းနိုင်၊ ဂိတ်ကကုန်မတင်ပေးလို့ကားပြေးမဆွဲနိုင်သေးတာမျိုး၊ တချို့အလုပ်သမားလေးတွေဆိုလည်း မိမိတို့အလုပ်ရှင်တွေဆီမှာ အလုပ်ပြန်ဆင်းချင်ပေမယ့် ပြန် မဆင်းနိုင်သေးတာမျိုး၊ နောက်မြို့တွင်းမှာ ဈေးရောင်း-ဈေးဝယ် လုပ်ဖို့ အဆင်မပြေသေးတာတွေ၊ အနည်းငယ်သာပျက်စီးခဲ့တဲ့ ဗလီဝတ်ကျောင်းတော်တွေမှာ ပုံမှန်ဝတ်ပြုခွင့် ပြန်လည် ခွင့်ပြုပေးစေချင်တာတွေ၊ သောကြာနေ့ဝတ်ပြုမှုကို ယင်းတော်နဲ့ အနားက အခြားရွာတွေကို သွားရောက် ၀တ်ပြုနေရတဲ့အတွက် ဗလီမှာဝတ်ပြုမှု အဆင်ပြေစေချင်တာ၊ မကြာခင် ဇွန်လဆန်းမှာ ကျောင်းတွေပြန်ဖွင့်တော့မှာဖြစ်တဲ့ အတွက် ကလေးငယ်တွေရဲ့ပညာရေး အတွက်ပူပန်တာ၊ ဇူလိုင်လဆန်းမှာ ကျရောက်မယ့် အစ္စလာမ် ဘာသာဝင်များရဲ့ ဥပုသ်လအတွက် ကြိုတင်စိုးရိမ်မိနေတာ စတဲ့ သူတို့ လက်တွေ့ကြုံတွေ့ခံစားနေရတာတွေကိုပြောပြခဲ့တယ်။ အထူးသဖြင့် မိထ္တီလာမြို့မှာက တစ်ဦးနဲ့တစ်ဦး၊ တစ်ဖက်နဲ့တစ်ဖက်က စိုးရိမ်မှုလွန်ကဲနေတာကိုတွေ့ရတော့၊ ကျွှန်တော်ယူဆမိတာကတော့ အားလုံး ငြိမ်းချမ်းစွာ ယှဉ်တွဲနေထိုင်ဖို့ အတွက်၊ နှစ်ဖက်စလုံးက သံသယတွေ၊ အမုန်းတရားတွေကို အမြန်ဆုံးချေဖျက်ပြီး၊ တစ်ဖက်နဲ့တစ်ဖက် အသိုင်းဝိုင်းနှစ်ခုလုံး ယုံကြည်မှု တည်ဆောက်ကျရပါမယ်။ ဒီအချက်က နှစ်ဖက်အသိုင်းအ၀ိုင်းအတွက် အဓိကအကျဆုံးနဲ့ အမြန်ဆုံးအကောင်အထည်ဖော်ဖို့လိုအပ်နေတယ်လို့မြင်ပါတယ်။
နောက်တစ်ခုက အခြေအနေအရ မိထ္တီလာကထွက်ခွါလာခဲ့ရပြီး ဇီးပင်ပေါက်၊ ကုက္ကိုပေါက်နဲ့ ရွာမွန်သာ၊ ဘုရားလေးကုန်း၊ ဆူးလေကုန်းစတဲ့ မိထ္တီလာအနီးနားကရွာတစ်ချို့မှာရောက်ရှိနေထိုင်နေရတဲ့ ဒုက္ခသည်တွေအတွက်ကိုလည်း အလှူရှင်တွေထောက်ပံ့ကူညီပေးဖို့ ပိုပြီးလိုအပ်နေတာ မြင်ခဲ့ရပါတယ်။ သူတို့အဓိကလိုအပ်နေတာက ဆန်၊ ဆီ၊ ဆား စတဲ့ စားသောက်ကုန်ပေါ့နော်။ သူတို့လိုအပ်ချက်ကို အလှူရှင်တွေအနေနဲ့ တတ်နိုင်သမျှ ကူညီပေးဖို့ပြောကြား အကူညီတောင်းခံတာမျိုးရှိခဲ့ပါတယ်။
ယင်းတော်မှာဆိုရင် တစ်ချို့ရွာခံအိမ်တွေက ဒုက္ခရောက်လာတဲ့ကိုယ့်ဆွေမျိုးတွေကို အိမ်မှာခေါ်ထားကြတယ်။ အဆင်မပြေပေမယ့်သူတို့မှာရှိတာလေးနဲ့သူတို့အိမ်မှာ ခေါ်ထားတဲ့ ဆွေမျိုးတွေကို ကျွေးမွေးနေတယ်။ ကြာလာတော့ ခေါ်ပြီးကျွေးမွေးပေးနေတဲ့ ရွာခံအိမ်တွေက အဆင်မပြေမှု ပိုများလာတယ်ပေါ့ဗျာ။ ဒါပေမယ့် ရွာခံအ်ိမ်တွေက သူတို့ခေါ်ထားတဲ့သူတွေအတွက် သူတို့အခုအခက်ခဲဖြစ်နေတယ်ဆိုပြီးတော့ ထုတ်ဖော်ပြောတာမျိုးတော့မရှိဘူးပေါ့ဗျာ။ ဒီလိုမျိုးလေးတွေ တွေ့ခဲ့၊ ကြုံခဲ့ရတော့ ယင်းတော်က ရွာခံအိမ်တွေမှာရောက်နေတဲ့ ဒုက္ခရောက်နေသူတွေအတွက်ကိုလည်း အထူးပြုပြီးတတ်နိုင်သမျှ အားလုံးဝိုင်းဝန်း ကူညီပေးကျမယ်ဆိုရင် လိုအပ်ချက်တွေနည်းပြီး သူတို့အားလုံး ပိုမိုအဆင်ပြေသွားမယ်လို့ထင်ပါတယ်” ဟုလည်း ဒုက္ခသည်စခန်းများကို သွားရောက် လေ့လာခဲ့သူ တစ်ဦးမှ သူ၏ထင်မြင်ယူဆချက်များကို ပြောပြပေးခဲ့သည်။
