ရတနာပုံ မောင်စု (မန္တလေးတွင် ထွန်းတောက်ခဲ့သော ကြယ်တစ်ပွင့်)
ဦးမောင်စုအား မန္တလေးမြို့ ၂၆ ဘီလမ်း ချမ်းအေးသာဇံ အလယ်ရပ်ကွက်၌ အဖဦးသာဒွန်း အမိဒေါ်ကြည်တို့မှ (၁၉၀၁) နှစ်တွင် ဖွားမြင်၍ မောင်နှမ လေးယောက်အနက် အထွေးဆုံးသား ဖြစ်သည်။ မန္တလေးသား ဖြစ်သည့်အလျောက် “ရတနာပုံ မောင်စု” ဟူသော အမည်ကိုသာ အသက်ထက်ဆုံး အသုံးပြုခဲ့သည်။
မန္တလေးမြို့၊ ဝက်စလီကျောင်း (ယခု အထက-၁၆) တွင် အထက်တန်းပညာသင်ယူခဲ့၍ ကြိုးမဲ့ကြေးနန်းရုံး ၂၆-ဘီလမ်း (ယခု ဆက်သွယ်ရေးရုံး) တွင် တာဝန်ထမ်းဆောင်ခဲ့သည်။
စန္ဒယားနှင့် ဂီတာတီး အလွန်ကျွမ်းကျင်၍ ရုပ်ရှင်မင်းသားကြီး ခင်မောင်ရင် (ဗိုလ်အောင်ဒင် မင်းသား) နှင့် တေးဂီတနယ်တွင် အတူတကွ လှုပ်ရှားခဲ့သည်။ (COLUMBIA CO.,LTD.) တွင် ဓါတ်ပြား ၁၃ ချပ်ကို ကိုယ်တိုင်ရေး၊ ကိုယ်တိုင်တီး၊ ကိုယ်တိုင်ဆိုခဲ့သည်။
အသံသွင်းခဲ့သော ဓါတ်ပြားအချို့မှာ-
(၁) တစ်ရွာသား (၁၉၃၅)၊
(၂) နှစ်သွယ်စကြာ (၁၉၃၆)
(၃) လူပျိုစင် (၁၉၃၇)
(၄) ခါနွေဦး (၁၉၃၈)
(၅) ဂွတ်နိုက်ဒါလင် (၁၉၃၈)
(၆) လောကဤလူ့ဘုံ (၁၉၃၈)
(၇) မောင်တို့ရွာ (၁၉၄၁) တို့ဖြစ်ပြီး သက္ကရာဇ်ရှာမတွေ့သော (၁) ဇာတိချက်ကြွေ (၂) ညိုညိုလေး (၃) မြတ်နိုးသူ တို့မှာ မန္တလေး အလွမ်းပြေဟု လူသိများကျော်ကြားခဲ့သည်။
ရတနာပုံမောင်စု၏ ဓါတ်ပြားတေးသီချင်းများကို ယခုထက်တိုင်း မြန်မာ့အသံမှ မကြာခဏ လွှင့်ထုတ်ပေးလျက်ရှိရာ (၁) တစ်ရွာသား (၂) ခါနွေဦး (၃) လူပျိုစင် နှင့် (၄) ဇာတိချက်ကြွေတို့မှာ မရိုးနိုင်သော ခေတ်ဟောင်းတေးများ ဖြစ်သည်။
နိုင်ငံတော်အစိုးရမှ ကြီးမှူးကျင်းပသော ဆိုကရေးတီး ပြိုင်ပွဲ (၂၀၀၃) ဓမ္မတေးကဏ္ဋတွင် ၎င်း၏ “လောကဤလူ့ဘုံ” တေးကို ပြိုင်ပွဲဝင်တေးအဖြစ် သတ်မှတ်ပြဌာန်းခဲ့သည်။
ပြည်ထောင်စု မြန်မာနိုင်ငံတော် အစိုးရ၊ ပြန်ကြားရေး ဝန်ကြီးဌာနမှ ထုတ်ဝေသော “တေးရေးပညာရှင်ကြီးများ၏ ခေတ်ဟောင်းတေးများ အတွဲ-၂” တွင် ရတနာပုံ မောင်စု၏ အတ္ထုပ္ပတ္တိအကျဉ်းနှင့် ကိုယ်တိုင်ရေးဆိုသော တေးသီချင်းများကို ဖော်ပြခဲ့သည်။
ဦးမောင်စုသည် တေးဂီတပညာရှင် ဖြစ်ရုံသာမက ပန်းချီပညာတွင်လည်း နိုင်ငံကျော် ကမ္ဘာသိ ထူးချွန်ပြောင်မြောက်ခဲ့သောကြောင့် ထိုစဉ်က ၎င်း၏ (TRIBES OF BURMA) ပန်းချီကားများကို စထရင်းဟိုတယ် (STRAND HOTEL) မှ အများဆုံး ဝယ်ယူခဲ့သည်။ ရတနာပုံ မောင်စု၏ တိုင်းရင်းသားပန်းချီကားချပ်များကို ယခုအခါ နိုင်ငံတော်မှ အနုပညာပြတိုက် (အမျိုးသားပြတိုက်၊ ရန်ကုန်) တွင် ချိတ်ဆွဲပြသထားပြီး နိုင်ငံခြားပြတိုက်အချို့တွင်လည်း တွေ့မြင်ခဲ့သူများ ရှိသည်။ စစ်ကြိုခေတ်နှင့် စစ်ကြီးအပြီးတွင် ကုမ္ပဏီအဖွဲ့ အစည်းများနှင့် အသင်းများမှ ပြက္ခဒိန် ထုတ်လုပ်ရာတွင် လိုအပ်သည်များကို ဦးမောင်စုက ရေးဆွဲပေးခဲ့သည်။
ရန်ကုန်မြို့ ၁၅၇-လမ်း တာမွေတွင် အခြေချ နေထိုင်ခဲ့ပြီး ၁၉၆၅၊ အောက်တိုဘာ-၁၇ ရက်တွင် အရှင်မြတ်အမိန့်တော် ခံခဲ့၍ ရန်ကုန်မြို့ ကန်တော်ကလေး မွတ်စလင်သင်္ချိုင်းတွင် မြုပ်နှံခဲ့သည်။
ဇနီးဒေါ်ငြိမ်း (မန္တလေး) နှင့် ဒေါ်မြင့်မြင့် (ရန်ကုန်) ဖြစ်ပြီး သားသမီးများဖြစ်သော ဦးမောင်မောင် (ကြိုးမဲ့ ကြေးနန်း)၊ ဒေါ်ဖြူဖြူစု၊ ဦးသောင်းစု (သုတေသန/ဘာသာပြန် စာရေးဆရာ) တို့ ကျန်ရစ်သည်။
Credit -Ko Zaw Min Oo FB စာမျက်နှာ
