ဆရာ ဝင်းတင့်ထွန်းခင်ဗျား
ဆရာရေးသားတဲ့ ဗမာပြည်နိုင်ငံရေးပါတီ အဖွဲ့အစည်း အသင်းအပင်းများ အညွှန်းစာအုပ် ကို ဖတ်ရှုရပါတယ်။ (မဖတ်ရသေးသူများ ဖတ်နိုင်ရန် ပူးတွဲ ပေးပို့လိုက်ပါတယ်)။ ဆရာရေးတဲ့စာအုပ်တွေဟာ ရွှေလို တန်ဖိုးထားရတာမို့ ကျနော် အမြဲတန်ဖိုးထား ဖတ်ပါတယ်။ ဆရာသည် သမိုင်းဆိုင်ရာ စာအုပ်အများအပြားကို ရေးခဲ့သူဖြစ်တဲ့အပြင် တိုင်းပြည်အတွက် အနစ်နာခံခဲ့သူ လေးစားအပ်သော ခေါင်းဆောင်တစ်ဦးလည်းဖြစ်ပါတယ်။ အခုလည်း လေးစားလျှက်ပါ။
ဆရာဝင်းတင့်ထွန်းက သူ့စာအုပ်သည် ပြီးပြည့်စုံသည်ဟု မဆိုနိုင်ပါဟု ဝန်ခံထားသော်လည်း မြန်မာ့လွတ်လပ်ရေး သမိုင်းမှာ ဖဆပလနှင့် လက်တွဲရုံတင်သာမက ဖဆပလ၏ လက်ရုံးပါတီတစ်ခုအနေနှင့် ထင်ထင်ရှားရှား ရပ်တည်တိုက်ပွဲဝင်ခဲ့တဲ့ ဗမာမွတ်စလင် ကွန်ဂရက် (Burmese Muslim Congress)ကို စာအုပ်ထဲမှာ ထည့်သွင်းဖေါ်ပြထားခြင်း မရှိတဲ့အတွက် ဝမ်းနည်းမိသလို အံ့သြမိရပါတယ်။ တစ်ကယ်တော့ ဆရာကြီးဦးရာဇတ်ပင်လျှင် မြန်မာမွတ်စလင် ကွန်ဂရက်ရဲ့ အမတ်တစ်ဦးအဖြစ် ရွေးကောက်ပွဲဝင်ခဲ့သူပါ။
ဗိုလ်ချုပ်အောင်ဆန်းက စစ်အပြီး မန္တလေးခရီးစဉ်မှာ မြန်မာမွတ်စလင် အဖွဲ့အစည်းတွေ အကွဲကွဲအပြားပြားနှင့် လွတ်လပ်ရေးတိုက်ပွဲဝင်ကြမည့်အစား အားထားလောက်သော အင်အားတစ်ရပ်ဖြစ်လာအောင် တစ်စုတစ်စည်းတည်း ပေါင်းစည်းလုပ်ကိုင်ကြရန် ဆရာကြီး ဦးရာဇတ်ကို မေတ္တာရပ်ခံချက်အရ မြန်မာမွတ်စလင် အဖွဲ့အစည်းပေါင်းစုံ၊ ခေါင်းဆောင်ပေါင်းစုံကို ဆရာကြီးက ဖိတ်ခေါ်ပြီး ၁၉၄၅ခု ဒီဇင်ဘာ ၂၅ မှာ ပျဉ်းမနားတွင် ဖွဲ့စည်းခဲ့သော နိုင်ငံရေးအဖွဲ့အစည်းတစ်ရပ်ဖြစ်ပါတယ်။ ဆရာကြီးဦးရာဇတ်က ဗမာမွတ်စလင် ကွန်ဂရက်ရဲ့ ပထမဆုံး ဥက္ကဖြစ်ပါတယ်။ ဒီအဖွဲ့ကို အကြောင်းပြုပြီး နိုင်ငံအဝှမ်းက အမြို့မြို့အနယ်နယ်မှာ မြန်မာမွတ်စလင် နိုင်ငံရေးလှုပ်ရှားမှုတွေ ဖေါ်ဆောင်ရုံမက ဗမာမွတ်စလင် အမျိုးသမီးအဖွဲ့၊ ဗမာမွတ်စလင် လူငယ်အဖွှဲ့ ဆိုတာတွေလည်း ခြိမ့်ခြိမ့်သဲ အစီအရီ ပေါ်ပေါက်ခဲ့ပါတယ်။ (မြန်မာ့သမိုင်းမှာ မြန်မာအသင်းချုပ်GCBA(General Council of Burmese Association)ကို အတုယူပြီး မြန်မာမွတ်စလင် အသင်းချုပ်ကြီး GCBMA(General Council of Burmese Muslim Association) ပေါ်ပေါက်ခဲ့သလို မြန်မာမွတ်စလင် ပညာရေးအဖွဲ့ချုပ်၊ မြန်မာမွတ်စလင် နိုးကြားရေးအဖွဲ့အပြင် အခြားမြန်မာမွတ်စလင်အဖွဲ့အစည်းတွေ အများအပြားလည်း ရှိခဲ့ပါတယ်။ ရှိစေတော့။)
ဗမာမွတ်စလင်ကွန်ဂရက်သည် မြန်မာ့လွတ်လပ်ရေးအတွက် ဖဆပလအလံတော်အောက်မှာ ဖဆပလ၏ လက်ရုံးပါတီအဖြစ် တိုက်ပွဲဝင်ခဲ့ပြီး မြန်မာမွတ်စလင် လူဦးရေများသော ဒေသများတွင် မြန်မာမွတ်စလင်တွေအတွက် တွဲဖက်အတွင်းရေးမှူးနေရာကိုပင် တမင်ရာထား နေရာပေးခံရသော အဖွဲ့အစည်းဖြစ်ပါတယ်။ တစ်ကယ်တော့ ဖဆပလသည် အဖွဲ့ချုပ်ဖြစ်သည်နှင့်အညီ ပါတီအများအပြားက တွဲဖက်လုပ်ဆောင်ကြရာမှာ ဗမာမွတ်စလင်ကွန်ဂရက်သည် ဖဆပလတည်ထောင်ကာစမှစ၍ ဦးနုလက်ထက်မှာ ဖဆပလနှစ်ခြမ်းကွဲပြီး ဖျက်သိမ်းလိုက်သည်အထိ ဖဆပလနှင့် အရှည်ကြာဆုံး လက်တွဲပြီး တိုင်းကျိုးပြည်ကျိုးဆောင်ခဲ့တဲ့ အင်မတန် ထင်ရှားသော နိုင်ငံရေးပါတီကြီး တစ်ခုလည်း ဖြစ်ပါတယ်။ ဒီလိုထင်ရှားပြီး မြန်မာ့လွတ်လပ်ရေးတိုက်ပွဲသမိုင်းမှာ ဘယ်လိုမှ ဖယ်ချန်ထားလို့မရတဲ့ ဗမာမွတ်စလင်ကွန်ဂရက်ကို ဆရာဝင်းတင့်ထွန်းက ဘယ်လိုလုပ် ချန်လှပ်ထားခဲ့နိုင်ပါသနည်းဆိုတာကို မေးခွန်းထုတ်မယ်ဆိုရင် လက်ခံနားလည်ပေးကြမယ်လို့ မျှော်လင့်ပါတယ်။ တစ်ကယ်တော့ သမိုင်းဆိုတာ မှတ်တမ်းတင်ဖို့၊ သင်္ခန်းစာထုတ်ယူတတ်ဖို့သာဖြစ်ပါတယ်။ သမိုင်းကို ဘယ်လိုလူစွမ်းကောင်းကမှ ပြန်ပြင်နိုင်ရိုး၊ ဖုံးကွယ်ထားတာမျိုး လုပ်လို့ မရနိုင်ပါဘူး။
ဆရာ့ရဲ့ အမှောင်ကြားက ဗမာပြည်စာအုပ်မှာလည်း တကသကို သန္ဓေတည် စတင်ဖွဲ့စည်းတာကအစ၊ တက္ကသိုလ်မှာ God save The King အစား တို့ဗမာအစည်းအရုံး သီချင်းဆိုဖို့ တက္ကသိုလ်အာဏာပိုင်တွေ အရေးယူမှာကို မကြောက်ဘဲ ပထမဆုံး အဆိုတင်သွင်းတာကအလည်၊ တကသ၊ ဗကသ၊ တက္ကသိုလ်ကျောင်သားသပိတ်တွေနှင့် ပတ်သက်ပြီး သမိုင်းမှာ ဘယ်လိုမှ ဖယ်ချန်လို့မရတဲ့ ဦးရာရှစ်ရဲ့ အင်မတန် အရေးပါလှတဲ့ အခန်းကဏ္ဍတွေကိုတောင် မြန်မာမွတ်စလင်ဖြစ်လို့ တမင်မှိန်ထား၊ ချန်လှပ်ထားတာလားလို့ မေးခွန်းထုတ်ရမဲ့အချက်တွေ ရှိခဲ့ပါတယ်။ သို့သော် စာအုပ်တစ်အုပ်ထဲမှာ အားလုံးကို ဖေါ်ပြဖို့က မဖြစ်နိုင်ဘူးဆိုတာကို နားလည်ပြီး မထောက်ပြခဲ့ပါဘူး။
အခုစာအုပ်မှာကျတော့ နယ်စပ်က အင်မတန်သေးငယ်သော အဖွဲ့အစည်း၊ မနေ့တစ်နေ့ကမှ ပေါ်ပေါက်လာသော အဖွဲ့အစည်း စသဖြင့် အဖွဲ့ပေါင်းစုံကို ထည့်သွင်းထားပေမဲ့ ကာလရှည်ကြာစွာ ရပ်တည်နေဆဲဖြစ်တဲ့ MLOB(Muslim Liberatoin Organization of Burma)နှင့် ABMU(All Burma Muslim Union)လို မြန်မာမွတ်စလင် အဖွဲ့အစည်းတွေကိုလည်း ချန်လှပ်ထားတာ ထပ်တွေ့ရပြန်တော့- – –
ဆရာဝင်းတင့်ထွန်းခင်ဗျား။ မြန်မာမွတ်စလင်တွေရဲ့ သမိုင်းဆိုတာဟာ ဆရာဝင်းတင့်ထွန်းမြင်တဲ့ သမိုင်းမှာ တန်းမဝင်၊ စာရင်းမပေါက်များ ဖြစ်နေပါသလားဆရာ။ ဘယ့်အတွက်ကြောင့် ဗမာမွတ်စလင် ကွန်ဂရက်ကို ချန်လှပ်ထားရပါသလဲ ဆရာ။
လေးစားစွာဖြင့်
အောင်တင်
မေလ (၂၂) ၂၀၁၂
ဗမာပြည်နိုင်ငံရေးပါတီ အဖွဲ့အစည်း အသင်းအပင်းများ အညွှန်းစာအုပ် PDF Version
