Blog

နိုဝင်ဘာ ၂၈၊ ၂၀၂၀
M-Media

-အမေရိကန်သမ္မတ ဒေါ်နယ်ထရမ့် ရာထူးကနေ မဆင်းခင်မှာ အီရန်ကို တိုက်ခိုက်နိုင်ဖွယ်ရှိတဲ့အတွက် အစ္စရေးစစ်တပ်က ပြင်ဆင်နေတယ်လို့ အမေရိကန်က မီဒီယာတစ်ချို့က ဖော်ပြပါတယ်။

၂၀၂၁ ခုနှစ် ဇန်နဝါရီလမှာ သမ္မတသစ် ဂျိုးဘိုင်ဒန် အာဏာလွှဲပြောင်းယူမှာပါ။ ထရမ့်က အိမ်ဖြူတော်က မဆင်းမီ အီရန်ရဲ့ နျူကလီးယား အဆောက်အဦးတွေကို တိုက်ခိုက်ဖွယ်ရှိတယ်လို့ အစ္စရေးအစိုးရက အမည်မဖော်လိုတဲ့ အရာရှိတွေကို ကိုးကားပြီး အမေရိကန်သတင်းဌာန Axios က ပြီးခဲ့တဲ့ရက်ပိုင်းမှာ ဖော်ပြခဲ့ပါတယ်။

အစ္စရေးအစိုးရဟာ ဒီအတွက် ပြင်ဆင်ထားဖို့ စစ်တပ်ကို ညွှန်ကြားထားပါတယ်။ တိုက်ခိုက်မှုခံရရင် အီရန်ဟာ ဆီးရီးယား၊ လက်ဘနွန်နဲ့ ဂါဇာတို့မှာရှိတဲ့ သူတို့ရဲ့ သစ္စာခံအဖွဲ့တွေကနေတစ်ဆင့် တုန့်ပြန်တိုက်ခိုက်မှုတွေ လုပ်လာလိမ့်မယ်လို့လည်း အစ္စရေးအစိုးရက တွက်ဆထားပါတယ်။

တိုက်ခိုက်မှုလုပ်ဖို့ ထရမ့်က ညွှန်ကြားထားတာကြောင့်မဟုတ်ဘဲ ဇန်နဝါရီ ၂၀ ရက်နေ့ သမ္မသစ်ဘိုင်ဒန် ကျမ်းသစ္စာမကျိန်ဆိုမီအထိ ကာလဟာ အကဲဆတ်တာကြောင့် အစ္စရေးအာဏာပိုင်တွေက ဒီလိုမျှော်လင့်ထားတာ ​ဖြစ်တယ်လို့ Axios ရဲ့ သတင်းမှာ ထည့်သွင်းဖော်ပြထားပါတယ်။

အစ္စရေးရုပ်သံ Chanel 13 က ထရမ့်ရဲ့ နောက်ဆုံးနေ့တွေမှာ အီရန်အပေါ် တိုက်ခိုက်မှုလုပ်ဖို့ အစ္စရေးနဲ့ အမေရိကန်တို့က စီစဉ်နေတယ်လို့ ပြီးခဲ့တဲ့ရက်ပိုင်းမှာ ဖော်ပြခဲ့သလို၊ New York Times သတင်းဌာနက ထရမ့်ဟာ အီရန်ရဲ့ အဓိက နျူဓာတ်ပေါင်းဖိုကို တိုက်ခိုက်ဖို့ စီစဉ်ခဲ့ပေမယ့် အရှေ့အလယ်ပိုင်းမှာ ဆိုးရွားတဲ့ စစ်ပွဲတစ်ခု ထပ်ဖြစ်လာလိမ့်မယ်ဆိုတဲ့ အကြံပေးတွေရဲ့ သတိပေးမှုကြောင့် ရှေ့ဆက်မတိုးခဲ့တာလို့ အခုလအစောပိုင်းမှာ ဖော်ပြခဲ့ပါတယ်။

အီရန်ကတော့ ဘယ်လိုတိုက်ခိုက်မှုမျိုးကိုမဆို ပြင်းပြင်းထန်ထန် လက်တုန့်ပြန်သွားမယ်လို့ ပြောကြားထားပါတယ်။

အီရန်တော်လှန်ရေးအစောင့်တပ်ဖွဲ့ရဲ့ ထိပ်တန်းအကြီးအကဲ ဗိုလ်ချုပ် ကာစင် ဆိုလိုင်မာနီဟာ အခုနှစ်အစောပိုင်းက အီရတ်မှာ လုပ်ကြံခံခဲ့ရပြီး အမေရိကန်က သူတို့လက်ချက်လို့ ဝန်ခံခဲ့ပါတယ်။ မနေ့ကလည်း အီရန်ထိပ်တန်းနျူသိပ္ပံပညာရှင်တစ်ဦး မြို့တော် တီဟီရန်အနီးမှာ လုပ်ကြံခံခဲ့ရပြီး အီရန်အာဏာပိုင်တွေက ဒါဟာ အစ္စရေးလက်ချက်လို့ စွပ်စွဲထားပါတယ်။

Ref: RT