မေ ၂၊ ၂၀၂၀
-မေလ ၄ ရက်နေ့ကစပြီး စီးပွားရေးလုပ်ငန်းအများစုကို ပြန်လည်လုပ်ကိုင်ခွင့် ပေးတော့မယ်လို့ မလေးရှားဝန်ကြီးချုပ် မုဟ်ယစ်ဒင် ယာစင်က မနေ့မှာ ပြောကြားလိုက်ပါတယ်။
Covid-19 ပြန့်နှံ့မှုကြောင့် မလေးရှားဟာ မတ်လ ၁၈ ရက်နေ့ကစလို့ တိုင်းပြည်ကို တံခါးပိတ်ခဲ့ပြီး နိုင်ငံအတွင်း ရွေ့လျားသွားလာမှု ကန့်သတ်မိန့် ထုတ်ပြန်ခဲ့တာပါ။ အဲဒီနောက် ဒီအမိန့်ကို ၄ ကြိမ်အထိ သက်တမ်းတိုးခဲ့ပြီး မေလ ၁၂ ရက်နေ့မှာ ကုန်ဆုံးမှာ ဖြစ်ပါတယ်။
မနေ့က ရုပ်သံကထုတ်လွှင့်တဲ့မိန့်ခွန်းမှာ ဝန်ကြီးချုပ် မုဟ်ယစ်ဒင်က မေလ ၄ ရက်နေ့က စတင်ပြီး စီးပွားရေးလုပ်ငန်းအများစုကို ပြန်ခွင့်ပေးမယ်လို့ ပြောကြားခဲ့ပါတယ်။
“ကျန်းမာရေး ဝန်ကြီးဌာနရဲ့ အကြံပြုချက်၊ ကောက်ယူရရှိတဲ့ အချက်အလက်တွေ၊ ကမ္ဘာကျန်းမာရေးအဖွဲ့ WHO က ထုတ်ပြန်ထားတဲ့ လမ်းညွှန်ချက်တွေကို အခြေခံပြီး စီးပွားရေးလုပ်ငန်းတွေကို သတိကြီးကြီးထား ပြန်လည်ဖွင့်ခွင့်ပေးဖို့ အစိုးရက ဆုံးဖြတ်ခဲ့တာ ဖြစ်ပါတယ်။ တင်းကြပ်တဲ့ ကျန်းမာရေးဆိုင်ရာ စံနှုန်းတွေကိုတော့ လိုက်နာရပါမယ်”
လူအများကြီး စုဝေးရတဲ့ လုပ်ငန်းတွေ၊ အခမ်းအနားတွေ၊ အားကစားပြိုင်ပွဲတွေကို ဆက်လက်ပိတ်ထားမှာ ဖြစ်ပါတယ်။ ဘာသာရေးအခမ်းအနားတွေကို လုပ်ခွင့်ပေးမှာ မဟုတ်သေးဘဲ၊ ရမ်ဇာန်ဥပုသ်လအကုန် ဝါကျွတ်အီးဒ်ပွဲတော်အတွက် ပြည်သူတွေ နေရပ်ပြန်တာကိုလည်း ခွင့်ပြေမှာ မဟုတ်ဘူးလို့ ဝန်ကြီးချုပ်က ထည့်သွင်း ပြောဆိုခဲ့ပါတယ်။ ပြည်နယ်ကျော်ပြီး ခရီးသွားလာမှုကိုလည်း မလေးရှားက ဆက်လက်ပိတ်ထားမှာ ဖြစ်ပါတယ်။
မနေ့ကအထိ မလေးရှားနိုင်ငံမှာ Covid-19 ကူးစက်သူအရေအတွက် ၆၀၀၂ ဦး ရှိခဲ့ပြီး ၆၉.၅ ရာခိုင်နှုန်းဖြစ်တဲ့ ၄၁၇၁ ဦးက ပြန်လည်သက်သာသွားပြီ ဖြစ်ပါတယ်။ ကူးစက်မှုနှုန်းဟာ ပြီးခဲ့တဲ့ သီတင်းပတ်ကစလို့ သိသိသာသာ ကျဆင်းသွားပြီး ကျန်းမာရေးဝန်ကြီးဌာန ညွှန်ကြားရေးမှူး ဒေါက်တာ ဟီရှမ် အဘ်ဒူလာက မိမိတို့ဟာ အကြီးအကျယ် ပြန့်နှံ့မှုကာလကို ကျော်လွန်ကာ ပြန်လည်ထူထောင်တဲ့ကာလကို ရောက်ရှိနေပြီလို့ ပြီးခဲ့တဲ့ရက်ပိုင်းမှာ ပြောကြားခဲ့ပါတယ်။
တိုင်းပြည်ကို တံခါးပိတ်ပြီး ရွေ့လျားသွားလာမှုကန့်သတ်တဲ့ ကာလအတွင်း နိုင်ငံဟာ တစ်ရက်ကို ရင်းဂစ် ၂.၄ ဘီလီယံ ဆုံးရှုံးပြီး စုစုပေါင်း ၆၃ ဘီလီယံ ဆုံးရှုံးထားတယ်လို့ ဝန်ကြီးချုပ်က ဆိုပါတယ်။
ခွင့်ပြုမယ့်လုပ်ငန်းတွေနဲ့ ဆက်လက်ပိတ်ပင်ထားမယ့် လုပ်ငန်းတွေ၊ လှုပ်ရှားမှုတွေကို National Security Council ဝဘ်ဆိုက်မှာ သွားရောက်ကြည့်ရှုနိုင်မှာ ဖြစ်ပါတယ်။
Ref: CNA
