Blog

ဧပြီ ၁၂၊ ၂၀၂၀
M-Media

-Covid-19 ကူးစက်နေတဲ့ လူနာထံကနေ ဗိုင်းရပ်စ်ပိုးဟာ ၄ မီတာ (၁၂ပေကျော်) အကွာအဝေးမှာ လေထဲအထိ ရောက်ရှိနေတာကို သုတေသနအသစ်တစ်ခုမှာ တွေခဲ့ရပြီး ဒါဟာ လူတစ်ဦးနဲ့တစ်ဦးအကြား ၆ ပေခြားရမယ်ဆိုတဲ့ အကြံပြုချက်ထက် ၂ ဆ များနေတာ ဖြစ်ပါတယ်။

ဘေဂျင်း စစ်ဆေးသိပ္ပံ တက္ကသိုလ်က တရုတ်သိပ္ပံပညာရှင်တွေဟာ Covid-19 လူနာတွေကို တင်ထားရာ ဆေးရုံက ပစ္စည်းတွေကို ဓာတ်ခွဲစမ်းသပ်ရာကနေ ဒီလို တွေ့ရှိခဲ့တာဖြစ်ပြီး သူတို့ရဲ့ တွေ့ရှိချက်ကို အမေရိကန် ကူးစက်ရောဂါ ကာကွယ်တားဆီးရေးဌာန (CDC) က ထုတ်ဝေတဲ့ Emerging Infectious Diseases ကျန်းမာရေးဂျာနယ်မှာ ဖော်ပြခဲ့ပါတယ်။

လူနာနဲ့ ၁၂ ပေအကွာလောက်မှာ တွေ့ရတဲ့ ဗိုင်းရပ်စ်ပိုးဟာ ကူးစက်နိုင်စွမ်းမရှိဘူးလို့ လက်ရှိ ကမ္ဘာ့ ဆေးဘက်ဆိုင်ရာ ပညာရှင်တွေက ခံယူထားကြတာပါ။

ဒါပေမယ့် ဝူဟန်မြို့ကဆေးရုံမှာ ပြုလုပ်ခဲ့တဲ့ အခု သုတေသနမှာတော့ ဗိုင်းရပ်စ်တွေဟာ​ ဆေးရုံရဲ့ ကြမ်းပြင်မှာ သွားစုနေတာ၊ ကွန်ပျူတာ မောက်စ်တွေ၊ အမှိုက်ပုံးတွေ၊ ကုတင်တန်းတွေနဲ့ တံခါးဘုသီးတွေမှာ ပြန့်နှံ့နေတာ၊ ကျန်းမာရေးဝန်ထမ်းတွေစီးတဲ့ ဖိနပ် ဆိုလ်းပြားတွေမှာ ကပ်နေတာတွေကို တွေ့ခဲ့ရပါတယ်။

လေကနေတစ်ဆင့် ပြန့်နှံ့မှု

ဗိုင်းရပ်စ်ပါဝင်ပြီး အလွန်သေးငယ်တဲ့ အမှုန်အမွှားလေးတွေဟာ လူနာနဲ့ ၁၂ ပေအကွာက လေပေါ်မှာ လွင့်နေတာကိုလည်း သိပ္ပံပညာရှင်တွေက စမ်းသပ်တွေ့ရှိခဲ့ပါတယ်။

လူနာရဲ့ နှာချေမှု၊ ချောင်းဆိုးမှုကနေ ထွက်လာတဲ့ အစက်ကလေးတွေဟာ မြေပြင်ပေါ်ကို မြန်မြန်ဆန်ဆန် ကျသားတတ်ပေမယ့် အလွန်သေးလွန်းတဲ့ အမှုန်လေးတွေကတော့ လေပေါ်မှာ နာရီများစွာ ပျံလွင့်နေနိုင်တယ်လို့ သုတေသန ပညာရှင်တွေက ပြောကြားခဲ့ပါတယ်။ ကြိုတင်ကာကွယ်မှုတွေ လုပ်ဆောင်ထားတဲ့အတွက် ကျန်းမာရေးဝန်ထမ်းတွေမှာ ဒီအခြေအနေမျိုးကနေ ကူးစက်တာ မရှိဘူးလို့လည်း ဆိုပါတယ်။

အခုတွေ့ရှိချက်အရ ရောဂါကူးစက်နေတယ်လို့ သံသယရှိသူကို နေအိမ်တွေမှာ သီးသန့်ခွဲထားတာမျိုးဟာ ကောင်းမွန်တဲ့ ကာကွယ်တားဆီးမှုမျိုးမဟုတ်ဘဲ ပတ်ဝန်းကျင်ကို ဗိုင်းရပ်စ်တွေ ပိုမိုပြန့်နှံစေလိမ့်မယ်လို့ တရုတ် သုတေသန ပညာရှင်တွေက ထည့်သွင်း ပြောဆိုခဲ့ပါတယ်။

Covid-19 ဟာ လူနာရဲ့ ခန္ဓာကိုယ်ကထွက်တဲ့ အရည်တွေကို တိုရိုက်ထိတွေ့မှ ကူးစက်တယ်လို့ ယေဘူယျအားဖြင့် ပညာရှင်တွေက ယူဆထားပြီး လေထဲကနေတစ်ဆင့် ကူးစက်နိုင်တယ်ဆိုတဲ့ ကိစ္စမှာတော့ ပညာရှင်တွေအကြား ငြင်းခုံမှုတွေ ရှိနေပါတယ်။

ကမ္ဘာ့ကျန်းမာရေးအဖွဲ့ WHO က လေထဲကနေတစ်ဆင့် ကူးစက်နိုင်ချေ မရှိဘူးလို့ ပြောကြားထားပါတယ်။

Ref: AFP

ဧပြီ ၁၁၊ ၂၀၂၀
M-Media

-Covid-19 ကြောင့် ကမ္ဘာတစ်ဝှမ်း သေဆုံးမှုအရေအတွက်ဟာ မနေ့က ၁ သိန်းကျော်လာခဲ့ပြီ ဖြစ်ပြီး ကူးစက်သူက ၁.၆ သန်း ကျော်လာပါပြီ။

သေဆုံးမှု စုစုပေါင်းရဲ့ ၇၀ ရာခိုင်နှုန်းဟာ ဥရောပတိုက်က ဖြစ်ပါတယ်။ ဗိုင်းရပ်စ်ကြောင့် ကမ္ဘာတစ်ဝှမ်း လူပေါင်း သန်း ၄ ထောင်လောက် လှုပ်ရှားသွားလာမှု ကန့်သတ်ခံထားရပြီး ကမ္ဘာ့ကျန်းမာရေးအဖွဲ့ WHO က ဒီကန့်သတ်မှုတွေကို စောစောစီးစီး မဖြေလျော့ဖို့အတွက် သတိပေးထားပါတယ်။

အမေရိကန်မှာ မနေ့ကသေဆုံးသူ ၂၁၀၈ ဦးရှိခဲ့ပြီး တစ်ရက်အတွင်း ကမ္ဘာ့စံချိန်တင် သေဆုံးမှုပါ။ ကူးစက်သူ အရေအတွက်ကလည်း သန်းဝက်ကျော်လာပြီး ကမ္ဘာပေါ်မှာ ကူးစက်မှုအများဆုံးနိုင်ငံလည်း ဖြစ်လာပါတယ်။

ဗိုင်းရပ်စ်ဒဏ်ကို အကြီးအကျယ် ခံစားနေရတဲ့ စပိန်နဲ့ အီတလီတို့မှာတော့ ပြီးခဲ့တဲ့ ရက်ပိုင်းအတွင်းက သေဆုံးမှု၊ ကူးစက်မှုအရေအတွက်တွေ တစ်ဖြည်းဖြည်း လျော့ကျလာပါတယ်။

Ref: AFP