မတ် ၁၂၊ ၂၀၂၀
M-Media

-တော်၀င်အသိုင်းအဝိုင်းက ထိပ်တန်းပုဂ္ဂိုလ်တစ်ချို့ကို ဆော်ဒီအိမ်ရှေ့မင်းသား မိုဟာမက် ဘင် ဆလ်မန်ရဲ့ လတ်တ​လော ဖမ်းဆီးမှုဟာ လာမယ့်နိုဝင်ဘာလ G20 ထိပ်သီးအစည်းအဝေးပွဲမတိုင်ခင် ဘုရင်ဖြစ်လာရေး ရည်မှန်းချက်နဲ့ ဆောင်ရွက်တာဖြစ်တယ်လို့ နီးစပ်တဲ့ ရင်းမြစ်တွေကို ကိုးကားပြီး Middle East Eye သတင်းဌာနက မနေ့မှာ ဖော်ပြခဲ့ပါတယ်။

ဘင် ဆလ်မန်ဟာ ဦးလေးဖြစ်သူ မင်းသား အဟ်မဒ် ဘင် အဘ်ဒူလ် အဇစ်၊ အိမ်ရှေ့မင်းသားဟောင်း အစ်ကိုဝမ်းကွဲ မင်းသား မိုဟာမက် ဘင် နာယက်ဖ်တို့အပါအဝင် တော်ဝင်အသိုင်းအဝိုင်းက ဩဇာရှိသူ တစ်ချို့ကို အာဏာသိမ်းဖို့ ကြိုးစားတယ်ဆိုတဲ့ ခေါင်းစဉ်နဲ့ ​ပြီးခဲ့တဲ့တစ်ပတ် သောကြောနေ့က စတင်ဖမ်းဆီး ထိန်းသိမ်းခဲ့တယ်လို့ အမေရိကန်မီဒီယာတွေက ဖော်ပြခဲ့ကြတာပါ။

ဒီသတင်းတွေနဲ့ပတ်သက်ပြီး ဆော်ဒီအစိုးရက တရားဝင် ထုတ်ပြန်ရှင်းလင်းတာမျိုး မရှိသေးပါဘူး။ ဘုရင်ဆလ်မန် သေဆုံးသွားတာကြောင့် အိမ်ရှေ့မင်းသားက အရိုက်အရာဆက်ခံဖို့ ကြိုးစားတယ်လို့ သတင်းတွေ ထွက်လာခဲ့ပေမယ့် ​နိုင်ငံခြား သံတမန်တွေကို ဘုရင် ဆလ်မန်က လက်ခံတွေ့ဆုံတဲ့ ဓာတ်ပုံတွေ တနင်္ဂနွေနေ့မှာ ထွက်ပေါ်လာခဲ့ပါတယ်။

ဒီကိစ္စနဲ့ နီးစပ်တဲ့ ရင်းမြစ်တစ်ချို့က ဘင် ဆလ်မန်ဟာ ဖခင်ကွယ်လွန်ချိန်အထိ မစောင့်ဘဲ လာမယ့် နိုဝင်ဘာလ ရီယာ့ဒ်မှာကျင်းပမယ့် G20 ထိပ်သီးအစည်းအဝေးမတိုင်ခင် ဘုရင်ဖြစ်လိုတဲ့ ရည်ရွယ်ချက်ရှိနေတယ်လို့ ပြောကြားခဲ့ပါတယ်။ ထုံးတမ်းစဉ်လာအရ ဘုရင် ဆလ်မန်ရဲ့ ညီဖြစ်သူ ထီးနန်းဆက်ခံမှာကြောင့် ဖခင်မကွယ်လွန်ခင် အရိုက်အရာကို ဆက်ခံတာက ပိုပြီး တရား၀င်မယ်လို့ အိမ်ရှေ့မင်းသားက မှတ်ယူနေတာ ဖြစ်ပါတယ်။

ဘင် ဆလ်မန်ရဲ့ ဘုရင်ဖြစ်ရေး စီမံကိန်းဟာ ၂၀၁၇ ခုနှစ်က ညီအစ်ကိုဝမ်းကွဲ မိုဟာမက် ဘင် နာယက်ဖ်ကို အိမ်ရှေ့မင်းသားနေရာကနေ ဖယ်ရှားတဲ့အချိန်ကတည်းက စတင်ခဲ့တာပါ။

ပူးပေါင်းဖို့စည်းရုံး

ဘုရင်ဆလ်မန်ရဲ့ တစ်ဦးတည်းသောညီအရင်း မင်းသား အဟ်မဒ်ကို မဖမ်းဆီးခင် သူ့ရဲ့ဘုရင်ဖြစ်ရေး စီမံကိန်းကို ထောက်ခံဖို့ ဘင် ဆလ်မန်က ခေါ်ယူပြောဆိုခဲ့တယ်လို့ သတင်းရင်းမြစ်တွေက ဆိုပါတယ်။

ဘုရင် ဆလ်မန်၊ အိမ်ရှေ့မင်းသား၊ တော်ဝင်မိသားစုက ထိပ်တန်းပုဂ္ဂိုလ်တွေ ပါဝင်တဲ့ အဲဒီဆွေးနွေးမှုမှာ အဟ်မဒ်က သူ့အနေနဲ့ ဘုရင်ဖြစ်လိုတဲ့ဆန္ဒမျိုး မရှိပေမယ့် ဒီအစီအစဉ်ကို မထောက်ခံနိုင်ကြောင်း အခြား ဘုရင်ဖြစ်ထိုက်သူတစ်ဦး ဘုရင်ဖြစ်ရေးကိုသာ လိုလားကြောင်း ပြောကြားခဲ့ပါတယ်။

မင်သားအဟ်မဒ်နဲ့ တော်ဝင်မိသားစုက လူတစ်ချို့ အာဏာသိမ်းဖို့ကြံတယ်ဆိုတဲ့ သတင်းတွေလည်း မဟုတ်ဘူးလို့ ရင်းမြစ်တွေက ဆိုပါတယ်။ မင်းသားဟာ ဘုရင်အရိုက်အရာ ဆက်ခံမယ့်သူကို အတည်ပြုရွေးချယ်ပေးရတဲ့ Allegiance Council က အဖွဲ့ဝင်တစ်ဦးလည်း ဖြစ်ပါတယ်။

နိုင်ငံခြား အမဲလိုက်ခရီးစဉ်ကနေ ပြီးခဲ့တဲ့ တစ်ပတ် ကြာသာပတေး​နေ့ကမှ ပြန်ရောက်လာတဲ့ မင်းသား အဟ်မဒ်ကို သောကြာနေ့မနက် နန်းတော်မှာလာတွေ့ဖို့ ဘုရင် ဆလ်မန်က ဖိတ်ကြားခဲ့ပြီး သွားတွေ့တဲ့အချိန်မှာပဲ ဖမ်းဆီးလိုက်တာ ဖြစ်ပါတယ်။

ထောက်ခံမှုကျဆင်း

ကိုရိုနာဗိုင်းရပ်စ် စိုးရိမ်မှုကြောင့် အွမ္မရာဘုရားဖူး ခရီးသွားတွေနဲ့ ပြည်ပခရီးသွားတွေအပေါ် ဆော်ဒီအစိုးရက ပြည်ဝင်ခွင့် ပိတ်ပင်မှုအပေါ် ဝေဖန်ပြောဆိုတာတွေလည်း ရှိနေပါတယ်။

Tanturah Winter ပွဲတော်ရဲ့ တစ်စိတ်တစ်ပိုင်းဖြစ်တဲ့ Persian Night ဂီတပွဲတော်ကို စီစဉ်ထားတဲ့အတိုင်း မတ်လ ၅ ရက်နေ့မှာ ကျင်းပခွင့်ပြုခဲ့တာကို ထောက်ပြပြီး ဆော်ဒီအစိုးရရဲ့ ခရီးသွားလာမှု ပိတ်ပင်တာဟာ တစ်ခြားရည်ရွယ်ချက် ရှိနိုင်တယ်လို့ ကျွမ်းကျင်သူတွေက သုံးသပ်ခဲ့ကြပါတယ်။

အိမ်ရှေ့မင်းသား မိုဟာမက် ဘင် ဆလ်မန်ရဲ့ အာဏာဆုပ်ကိုင်ရေး ဆောင်ရွက်မှုဟာ ၂၀၁၇ ခုနှစ်ကတည်းက စတင် ပေါ်ပေါက်ခဲ့တာပါ။ အဲဒီအချိန်က ခြစားမှုတိုက်ဖျက်ရေးခေါင်းစဉ်နဲ့ တော်ဝင်အသိုင်းအ၀ိုင်းကလူတွေ၊ စီးပွားရေးလုပ်ငန်းရှင်တွေကို ဖမ်းဆီး စစ်ဆေးခဲ့ပါတယ်။

ငယ်ရွယ်ပြီး ပြုပြင်ပြောင်းလဲလိုစိတ်ရှိတဲ့ မင်းသားတစ်ပါးရဲ့ ဆောင်ရွက်ချက်ဆိုပြီး ဒီကိစ္စမှာ ဘင် ဆလ်မန်ဟာ တော်တော်များများရဲ့ ထောက်ခံမှုကို ရရှိခဲ့ပါတယ်။ ဒါပေမယ့် နောက်ပိုင်း ဘင် ဆလ်မန်ရဲ့ လုပ်ရပ်တွေ၊ နိုင်ငံရေးနဲ့ စီးပွားရေးမှာ တိုးတက်မှုရအောင် မဆောင်ရွက်နိုင်တာတွေကြောင့် အခုတစ်ကြိမ်ကြိုးပမ်းမှုမှာတော့ ဘင် ဆလ်မန်ဟာ ထောက်ခံမှုကျဆင်းလာမယ်လို့ လေ့လာဆန်းစစ်သူတွေက သုံးသပ်ခဲ့ကြပါတယ်။

Ref: MIddle East Eye

မတ် ၁၁၊ ၂၀၂၀
M-Media

-မက္ကာနဲ့ မဒီနာမှာရှိတဲ့ မြင့်မြတ်ရာနေရာတွေကို လာရောက်ကြတဲ့ ခရီးသွားတွေ အလွယ်တကူ လမ်းကြောင်းရှာဖွေနိုင်ရေး ထားရှိပေးထားတဲ့ Touchscreen လမ်းညွှန်ဘုတ်တွေကို အာဏာပိုင်တွေက အသုံပြုးခွင့် မပေးတော့ပါဘူး။

ဆော်ဒီအာဏာပိုင်တွေဟာ COVID-19 ဗိုင်းရပ်စ်ပိုး ပြန်နှံ့မှု တားဆီးကာကွယ်ရေးလုပ်ငန်းတွေကို ပြီးခဲ့တဲ့ သီတင်းပတ်က စတင်လုပ်ဆောင်ခဲ့တာပါ။ အွမ္မရာဘုရားဖူးခရီးစဉ်ကို ယာယီပိတ်ထားလိုက်သလို၊ မက္ကာက မတ်စ်ဂျစ်ဟရမ် ဗလီဝတ်ကျောင်းတော်နဲ့ မဒီနာက တမန်တော်မြတ် ဗလီဝတ်ကျောင်းတော်တွေကိုလည်း ပိုးသတ်သန့်ရှင်းမှုတွေ ပြုလုပ်ခဲ့ပါတယ်။ မြင့်မြတ်ရာနေရာတွေ နေ့စဉ်သန့်ရှင်းမှု လုပ်ငန်းကိုလည်း အကြိမ်ရေ တိုးမြှင့် လုပ်ဆောင်နေပါတယ်။

မြင့်မြတ်ရာနေရာတွေ လုံခြုံရေးနဲ့ ထိန်းသိမ်းစောင့်ရှောက်ရေးအဖွဲ့ရဲ့ ညွှန်ကြားရေးမှူး အလီ ဘင် ဟာမစ် အလ်-နာဖီက Touchscreen လမ်းညွှန်ဘုတ်တွေ အသုံးပြုခွင့် ရပ်ဆိုင်းလိုက်တာဟာ ဗိုင်းရပ်စ်ပြန့်နှံ့မှုကို တားဆီးကာကွယ်ရေး၊ လာရောက်လည်ပတ်သူအတွက် ငြိမ်းချမ်းတဲ့ ပတ်ဝန်းကျင်တစ်ခု ဖော်ဆောင်ရေး ဆောင်ရွက်မှု ဖြစ်တယ်လို့ ပြောကြားခဲ့ပါတယ်။ ကြီးမားတဲ့ တီဗီစခရင်နဲ့ အချက်အလက်တွေ ပြသတာလို ဒစ်ဂျစ်တယ်လမ်းညွှန်စနစ်တွေကိုတော့ ဆက်လက်ထားရှိသွားမယ်လို့ သူက ဆိုပါတယ်။

ဆော်ဒီအရေဗျမှာ ကိုရိုနာဗိုင်းရပ်စ်သစ် ကူးစက်သူအရေအတွက်ဟာ စုစုပေါင်း ၂၁ ဦး ရှိလာပြီး သေဆုံးမှုတော့ မရှိသေးပါဘူး။

Ref: Arab News