Blog

တနင်္လာနေ့ ဘောလုံးသတင်းများ

မတ် ၂၊ ၂၀၂၀
M-Media

လတ်တလောသမိုင်းတွင် မန်စီးတီး၏ အောင်မြင်မှုကို မည်သူမျှ မယှဉ်နိုင်

အင်္ဂလိပ်ဘောလုံးလောကရဲ့ လတ်တလောကာလမှာ မန်စီးတီးအသင်းရဲ့ အောင်မြင်မှုဟာ ပြိုင်ဘက်မရှိဘူးလို့ နည်းပြ ပက်ပ် ဂွါဒီယိုလာက ပြောကြားလိုက်ပါတယ်။ မန်စီးတီးဟား မနေ့က အက်စတွန်ဗီလာအသင်းကို ၂ ဂိုး ၁ ဂိုးနဲ့ အနိုင်ရကာ လိဂ်ဖလား Carabao Cup ကို ၃ နှစ်ဆက် ဆွတ်ခူးနိုင်ခဲ့တာပါ။ ဂွါဒီယိုလာဟာ မန်စီးတီးနဲ့ ပရီးမီးယားလိဂ် ၂ ကြိမ်၊ FA ဖလား တစ်ကြိမ်နဲ့ ကွန်မြူနတီဒိုင်း ၂ ကြိမ်ကိုလည်း ဆွတ်ခူးရရှိထားပါတယ်။ ဂွါဒီယိုလာက ပြီးခဲ့တဲ့ ၉ နှစ်အတွင်း ၈ နှစ်မှာ မိမိတို့ ဖလားရခဲ့ကြောင်း၊ ဥရောပဖလားကို ထည့်မတွက်ရင် ဒီကာလအတွင်း မိမိတို့လို ပြည်တွင်းအောင်မှုမျိုး ဘယ်အသင်းမှ မရဖူးကြောင်း၊ လီဗာပူးရဲ့ အအောင်မြင်ဆုံးအချိန် ၁၉၈၀ ပြည့်နှစ်တွေမှာ ဒီလိုမရှိခဲ့သလို၊ ဆာအဲလက်စ်ဖာဂူဆန်၊ မော်ရင်ဟို၊ အာဆင်ဝင်းဂါးတို့လည်း ဒီလို မရခဲ့ဖူးကြောင်း ပြောကြားခဲ့ပါတယ်။

နောက်ခံလူလိုဗရန်ကို ကလော့ပ်က ကာကွယ်ပြောဆို

ဝဒ်ဖို့အသင်းကို ရှုံးနိမ့်မှုမှာ နောက်ခံလူ လိုဗရန်ကို အပြစ်တင်တာဟာ မတရားဘူးလို့ လီဗာပူးလ်နည်းပြ ယာဂန်ကလော့ပ်က ပြောကြားလိုက်ပါတယ်။ စနေနေ့က ၃ ဂိုးပြတ်နဲ့ ဒီအရှုံးဟာ လီဗာပူးလ်အသင်းရဲ့ ၄၄ ပွဲဆက်တိုက် ရှုံးပွဲမရှိစံချိန် ကျိုးပျက်ရတဲ့ပွဲပါ။ ဒီအတွက် နောက်ခံအလယ်လူ လိုဗရန်ဟာ ဝေဖန်ခံခဲ့ရပြီး ကလော့ပ်ကတော့ အသင်းရှုံးနိမ့်မှုအတွက် တစ်ဦးတစ်ယောက်တည်းကို ပြစ်တင်လို့မရကြောင်း၊ မိမိတို့တစ်သင်းလုံး ကစားပုံမကောင်းခဲ့ကြောင်း၊ ဝက်ဖို့ဒ်အသင်းရဲ့ နောက်ခံလူ ၆ ယောက်ထားကစားပုံကလည်း မိမိတို့ကို အခက်တွေ့စေခဲ့ကြောင်း ထည့်သွင်းပြောဆိုခဲ့ပါတယ်။

ဘာကာနိုင်သော်လည်း ဇီဒိန်း မပျော်နိုင်

မနေ့က ဘာစီလိုနာအသင်းကို အနိုင်ရတာဟာ နှစ်မြို့ဖွယ်ရာအချိန်တစ်ခုဖြစ်တယ်လို့ ရီးယဲလ်နည်းပြ ဇီဒိန်းက ပြောကြားလိုက်ပါတယ်။ ရီးယဲလ်မက်ဒရစ်ဟာ ပြီးခဲ့တဲ့ လာလီဂါ ၂ ပွဲမှာ ၁ မှတ်သာ ရရှိထားပြီး၊ ပြီးခဲ့တဲ့တစ်ပတ် ချန်ပီယံလိဂ်မှာလည်း မန်စီးတီးကို ရှုံးနိမ့်ထားတာပါ။ မနေ့ကပွဲမှာတော့ ဗီနီစီယက်စ် ဂျူနီယာ၊ မာရီယာနိုတို့ရဲ့ ဂိုးတွေနဲ့ ဘာစီလိုနာကို အနိုင်ရခဲ့ပြီး ဘာစီလိုနာကို တစ်မှတ်ဖြတ်ကာ လာလီဂါကို ဦးဆောင်နိုင်ခဲ့ပါတယ်။ ဇီဒိန်းက ဒီ ၃ မှတ်ဟာ ဘာအပြောင်းအလဲမှမလုပ်ပေးနိုင်ကြောင်း ရှေ့ဆက်ရမယ့်ခရီးဟာ ရှည်လျားပြီး ပိုမိုခက်ခဲတဲ့ အခြေအနေတွေနဲ့ ကြုံတွေ့ရမှာဖြစ်ကြောင်း ထည့်သွင်းပြောကြားခဲ့ပါတယ်။

Ref: Goal, BBC

March 2, 2020
တစ်ပတ်အတွင်း သိပ္ပံနှင့် နည်းပညာသတင်းများ

မတ် ၂၊ ၂၀၂၀
M-Media

ဩစတေးလျက နေစွမ်းအင်သုံးဓာတ်အားကို ပြည်ပ တင်ပို့မည်

နိုင်ငံအတွင်း မြို့တစ်မြို့ကို ဓာတ်အားပေးပြီး ကျန်တဲ့ ဓာတ်အားကို ပင်လယ်အောက်ကနေ ကီလိုမီတာ ၃၈၀၀ အကွာအဝေး ကြိုးသွယ်ကာ စင်ကာပူနိုင်ငံအထိ တင်ပို့မယ် နေစွမ်းအင်သုံး ဓာတ်အားပေး စီမံကိန်းကြီးတစ်ခုကို ဩစတေးလျနိုင်ငံက စတင် အကောင်အထည်ဖော် ဆောင်ရွက်နေပါတယ်။.

ဩစတေးလျနိုင်ငံဟာ ကမ္ဘာ့တတိယအကြီးဆုံး ရုပ်ကြွင်းလောင်စာ တင်ပို့တဲ့ နိုင်ငံတစ်ခုဖြစ်ပြီး အခုစီမံကိန်းက ပြည့်ဖြိုးမြဲစွမ်းအင်ကို ပထမဆုံး တင်ပို့မှု ဖြစ်လာမှာပါ။ ဓာတ်အား ၁၀ ဂီဂါဝပ် ထုတ်လုပ်ပေးနိုင်မယ့် ဒီစီမံကိန်းကို နိုင်ငံမြောက်ပိုင်း တန့်နန့်ခရိက်ဒေသက မြေဧက ဟက်တာ ၁၅၀၀၀ အပေါ်မှာ ဆောက်လုပ်နေတာပါ။ ၂၀၃၀ ခုနှစ်ရောက်ရင် စင်ကာပူနိုင်ငံရဲ့ ဓာတ်အားသုံးစွဲမှု ၅ ပုံ ၁ ပုံကို ဖြည့်ဆည်းပေးမှာဖြစ်သလို ဒေသမြို့တော် ဒါဝင်ရဲ့ ဓာတ်အားထုတ်လုပ်မှုမှာ ရုပ်ကြွင်းလောင်စာ အသုံးပြုမှုကို သိသိသာသာ လျော့ချနိုင်မှာ ဖြစ်ပါတယ်။

ဝူဟန်ဗိုင်းရပ်စ်ကြောင့် တရုတ်နိုင်ငံတွင် လေထုညစ်ညမ်းမှု သိသိသာသာ ကျဆင်း

ကိုရိုနာဗိုင်းရပ်စ်သစ် ပြန့်နှံ့မှုရဲ့ နောက်ဆက်တွဲ စီးပွားရေး ကျဆင်းမှုကြောင့် တရုတ်နိုင်ငံမှာ လေထုညစ်ညမ်းမှု သိသိသာသာ ကျဆင်းသွားတယ်လို့ အမေရိကန်အာကာသအေဂျင်စီ နာဆာက ပြောကြားလိုက်ပါတယ်။ ဒီလျော့ကျမှုဟာ ဗိုင်းရပ်စ် အဓိကပြန့်နှံ့နေတဲ့ ၀ူဟန်မြို့နဲ့ ဟူဘေးပြည်နယ်တို့မှာ အလွန်သိသာပြီး တစ်နိုင်ငံလုံးမှာလည်း သိသိသာသာ လျော့ကျမှုရှိနေတာကို နာဆာကထုတ်ပြန်တဲ့ ဂြိုဟ်တုပုံရိပ်မှာ တွေ့ရပါတယ်။ နာဆာဟာ ၂၀၁၉ ခုနှစ် ပထမ ၂ လနဲ့ အခုနှစ် ပထမ ၂ လတို့ကို နှိုင်းယှဉ်ထုတ်ပြန်ခဲ့တာ ဖြစ်ပါတယ်။ ဗိုင်းရပ်စ် ပြန့်နှံ့မှုကြောင့် တရုတ်နိုင်ငံက တစ်ချို့မြို့တွေကို ပိတ်ထားပြီး ခရီးသွားလာမှုတွေ ရပ်ဆိုင်းထားတာ၊ စက်ရုံအလုပ်ရုံတွေ ပိတ်ထားရတာတွေက ကာဘွန်ထုတ်လွှတ်မှု လျော့ကျမှုရဲ့ အဓိကအကြောင်းအရင်းတွေ ဖြစ်ပါတယ်။

Uber က အမေရိကန်တွင် ရဟတ်ယာဉ်တက္ကဆီဝန်ဆောင်မှု စတင်တော့မည်

နယူးယောက်မြို့လယ်ကောင် မန်ဟတ်တန်ကနေ JFK နိုင်ငံတကာလေဆိပ်ကို ၈ မိနစ်နဲ့ ရောက်နိုင်မယ့် ရဟတ်ယာဉ် တက္ကဆီဝန်ဆောင်မှုကို အောက်တိုဘာ ၇ ရက်နေ့ကစတင်ပြီး ရရှိနိုင်တော့မယ်လို့ အငှားယာဉ်လုပ်ငန်း Uber က ကြေငြာလိုက်ပါတယ်။ မန်ဟတ်တန်ဟာ ကားအလွန်ကြပ်မှုကြောင့် နာမည်ကြီးပြီး JFK သွားဖို့အတွက် တစ်နာရီဝန်းကျင်လောက် ကြာမြင့်ပါတယ်။ Uber ရဲ့ တက္ကဆီ Uber Copter ဟာ လူ ၅ ဦး စီးနင်းနိုင်မှာဖြစ်ပြီး တစ်ဦးကို ဒေါ်လာ ၂၀၀ ကနေ ၂၅၀ ဝန်းကျင် ကျသင့်မှာ ဖြစ်ပါတယ်။ နေအိမ်ကနေ ရဟတ်ယာဉ်ကွင်းအထိ ကားနဲ့လာခေါ်တာ၊ လေဆိပ်ရောက်ရင် ထွက်ခွါဂိတ်ကို ကားနဲ့လိုက်ပို့တာလည်း ဒီဝန်ဆောင်မှုမှာ ပါဝင်မှာ ဖြစ်ပါတယ်။

Ref: Asia Times, BBC

March 2, 2020
COVID-19 ဗိုင်းရပ်စ်ကြောင့် အီရန်တွင် သေဆုံးသူ ၆၆ ဦး ရှိလာ (နောက်ဆုံးရသတင်းများ)
မတ် ၂၊ ၂၀၂၀ (ည ၇ နာရီခွဲ)
M-Media

ပံု – ကမ္ဘာတစ်ဝှမ်း ဗိုင်းရပ်စ်ပြန့်နှံ့မှု
- ဥရောပမှာ COVID-19 ဗိုင်းရပ်စ် အန္တရာယ်ကို အလယ်အလတ်အဆင့်ကနေ အမြင့်ဆုံးအဆင့်အထိ မြှင့်လိုက်ပါတယ်။ ဥက္ကဌ Ursula von der Leyen က ကူးစက်မှုတွေ ဆက်ဖြစ်နေတာကြောင့် ဒီလို အဆင့်မြှင့်လိုက်ရတာဖြစ်တယ်လို့ ပြောကြားခဲ့ပါတယ်။ လက်ရှိ ဥရောပမှာ ကူးစက်မှု ၂၁၉၉ ခု၊ သေဆုံးမှု ၃၈ ခု ရှိနေပြီး အများစုက အီတလီနိုင်ငံမှာ ဖြစ်ပါတယ်။
- အီရန်မှာ မနေ့က ထပ်မံကူးစက်မှုပေါင်း ၅၂၃ ခုရှိခဲ့ပြီး၊ သေဆုံးသူ ၁၂ ဦး ရှိခဲ့ပါတယ်။ ဒါ့ကြောင့် ကူးစက်သူအရေအတွက်ဟာ ၁၅၀၁ ဦးရှိကာ သေဆုံးသူက ၆၆ ဦး ရှိလာပါပြီ။ အီရန်အဓိပတိ အယာတိုလာ အလီခါမေနီရဲ့ အကြံပေးတစ်ဦးလည်း ဒီဗိုင်းရပ်စ်ကြောင့် သေဆုံးခဲ့ပါတယ်။ ဒုတိယသမ္မတ၊ COVID-19 ဗိုင်းရပ်စ် တိုက်ဖျက်ရေးအဖွဲ့ အကြီးအကဲတို့အပါအဝင် အီရန်အစိုးရက ထိပ်တန်းပုဂ္ဂိုလ်တစ်ချို့မှာလည်း ကူးစက်မှုတွေ ရှိနေပါတယ်။
- ဥရောပမှာ ချက်၊ စကော့တလန်၊ ဒိုမီနီကန်၊ အန်ဒိုရာ၊ အိုက်စ်လန်နဲ့ ပေါ်တူဂီတို့မှာ ပထမဆုံး ကူးစက်မှုတွေကို တွေ့ခဲ့ရပြီး၊ အရှေ့တောင်အာရှမှာတော့ အင်ဒိုနီးရှားက ၂ ဦး ကူးစက်နေကြောင်း ထုတ်ပြန်ခဲ့ပါတယ်။
- ဗိုင်းရပ်စ် ကာကွယ်တိုက်ဖျက်ရေးမှာ ပူးပေါင်းပါဝင်မှုမရှိတဲ့အတွက် နိုင်ငံအရှေ့ပိုင်းက ခရစ်ယာန်အသင်းတော် Shincheonji ရဲ့ တာဝန်ရှိသူတွေကို ဆိုလ်းမြို့တော်ဝန် ပက်ဝွန်ဆွန်းက လူသတ်မှုနဲ့ တရားစွဲဆိုလိုက်ပါတယ်။ ဗိုင်းရပ်စ်ကူးစက်မှုကို ဒီအသင်းတော်အဖွဲ့ဝင် ၁ ဦးမှာ ပထမဆုံး တွေ့ရတာဖြစ်ပြီး နိုင်ငံအတွင်း ကူးစက်မှု ၄ ထောင်ကျော်ရဲ့ ထက်ဝက်လောက်က ဒီအသင်းတော်အဖွဲ့ဝင်တွေ ဖြစ်ပါတယ် မြို့တော်ဝန် ပက်က အသင်းတော် တာဝန်ရှိသူတွေသာ ပူးပေါင်းဆောင်ရွက်ခဲ့မယ်ဆိုရင် သေဆုံးသူတွေ လျော့နည်းမယ်လို့ ပြောကြားခဲ့ပါတယ်။ အသင်းတော်တာဝန်ရှိသူတွေက ဗိုင်းရပ်စ်ကူးစက်မှုအတွက် ပြန်တောင်းပန်ထားပါတယ်။
- တောင်ကိုရီးယားမှာ မနေ့က ထပ်မံကူးစက်သူ ၅၀၀ နီးပါးရှိခဲ့ပြီး သေဆုံးသူ ၄ ဦး ရှိခဲ့ပါတယ်။ ဒါ့ကြောင့် စုစုပေါင်း သေဆုံးသူက ၂၂ ဦး ကူးစက်သူက ၄၂၁၂ ဦး ရှိလာတာပါ။
- တရုတ်နိုင်ငံမှာတော့ မနေ့က ကူးစက်မှု ၂၀၂ ခုရှိခဲ့ပြီး ဒါဟာ ဇန်နဝါရီနှောင်းပိုင်းကစလို့ တစ်ရက်တာ အနိမ့်ဆုံးပမာဏလည်း ဖြစ်ပါတယ်။ သေဆုံးသူ ၄၂ ဦးရှိခဲ့ပြီး စုစုပေါင်း တရုတ်နိုင်ငံမှာ သေဆုံးမှုဟာ ၂၉၁၂ ဦး ရှိလာတာ ဖြစ်ပါတယ်။ အဆိုးဝါးဆုံးကူးစက်ရာ ဝူဟန်မှာ ကူးစက်မှုတွေ သိသိသာသာ ကျဆင်းသွားတာကြောင့် ရောဂါပြန့်နှံ့ပြီးတဲ့နောက် ဆောက်လုပ်ခဲ့တဲ့ ယာယီဆေးရုံတစ်ခုကို ပထမဆုံး ပိတ်ပစ်လိုက်ပါတယ်။
Ref: Aljazeera
March 2, 2020
ရှင်ကျန်းပြည်နယ်မှ ဝီဂါများ လုပ်အားခေါင်းပုံဖြတ်ခံနေရ

မတ် ၂၊ ၂၀၂၀
M-Media

ဝီဂါများ၏လုပ်အားကို ခေါင်းပုံဖြတ်နေသည့် တရုတ်စက်ရုံတစ်ခု

-တရုတ်နိုင်ငံအနောက်ပိုင်း ရှင်ကျန်းဒေသက ဝီဂါမွတ်စလင်တွေဟာ ကမ္ဘာ့နာမည်ကျော်တံဆိပ်တွေကို ထုတ်လုပ်ပေးတဲ့ စက်ရုံတွေအပါအဝင် တရုတ်နိုင်ငံတစ်ဝှမ်းက စက်ရုံအလုပ်ရုံတွေမှာ အဓမ္မလုပ်အားခိုင်းစေမှုကို ခံနေရတယ်လို့ ဩစတေးလျအခြေစိုက် တတ်သိပညာရှင်များအဖွဲ့ Australian Strategic Policy Institute (ASPI) က ထုတ်ပြန်ပြောကြားလိုက်ပါတယ်။

အနည်းဆုံး ဝီဂါတစ်သန်းလောက်ဟာ ရှင်ကျန်းပြည်နယ်က တရုတ်အစိုးရဲ့ အကျဉ်းစခန်းတွေမှာ ပိတ်လှောင်ကာ ညှင်းပမ်းမှုတွေ ခံနေရတယ်လို့ ကမ္ဘာမီဒီယာတွေက ဖော်ပြခဲ့ကြပါတယ်။ တရုတ်ကတော့ ဒါကိုငြင်းပြီး အကျဉ်းစခန်းတွေမဟုတ်ဘဲ ပညာပေးစခန်းတွေသာ ဖြစ်တယ်လို့ ပြောကြားထားပါတယ်။

ASPI က ၂၀၁၇ ခုနှစ်ကနေ ၂၀၁၉ ခုနှစ်အတွင်း ရှင်ကျန်းပြည်နယ်ကနေ ဝီဂါ ၈ သောင်းကျော်လောက်ကို နိုင်ငံတစ်ဝှမ်းက စက်ရုံ၊ အလုပ်ရုံတွေဆီ ပို့ဆောင်ခဲ့တာကို တွေ့ရပြီး တစ်ချို့တွေဆိုရင် အကျဉ်းစခန်းတွေကနေ တိုက်ရိုက်ပို့ဆောင်ခဲ့တာဖြစ်တယ်လို့ အစီရင်ခံစာမှာ ဖော်ပြထားပါတယ်။

ဒီခိုင်းစေမှုကို ဗဟိုအစိုးရရဲ့ Xinjiang Aid ခေါင်းစဉ်အောက်မှာ ဆောင်ရွက်တာဖြစ်ပြီး Nike၊ Apple နဲ့ Dell တို့ အပါအဝင် ကမ္ဘာကျော်တံဆိပ် ၈၃ မျိုးလောက်ကို ပစ္စည်းထောက်ပံ့ပေးနေတဲ့ စက်ရုံတွေလည်း ပါဝင်ပါတယ်။

ပြန်အဖမ်းခံရမယ်ဆိုတဲ့ ခြိမ်းခြောက်မှုကြောင့် ဝီဂါတွေဟာ အဓမ္မလုပ်အားခိုင်စေမှုကို ငြင်းဆိုဖို့ ခက်နေကြောင်း၊ လူခေါ်ပေးတဲ့ ပွဲစားတွေ၊ ဒေသခံအာဏာပိုင်တွေကို ရှင်ကျန်းအစိုးရက ဆုကြေးပေးတယ်ဆိုတဲ့ အထောက်အထားတွေ တွေ့ရကြောင်း ASPI ရဲ့ အစီရင်ခံစာက ဆိုပါတယ်။ ဒါဟာ ‘ဝီဂါတွေအပေါ် ဖိနှိပ်မှု အသစ်တစ်မျိုး’ လို့ ASPI က သမုတ်ခဲ့ပါတယ်။

အစီရင်ခံစာကို ပူးတွဲရေးသားတဲ့ နသန် ရူဆာက ရှင်ကျန်းပြည်နယ်မှာ ဝီဂါနဲ့ အခြားလူနည်းစုတွေကို အခြားနေရာ ခေါ်ဆောင်သွားမှုဟာ လုပ်အားခေါင်းပုံဖြတ်ဖို့ဆိုတာ အလွန်သိသာနေကြောင်း အစီရင်ခံစာမှာ တွေ့ရလိမ့်မယ်လို့ ပြောကြားခဲ့ပါတယ်။

၂၀၁၇ ခုနှစ်ကပြီး တရုတ်နိုင်ငံ ပြည်နယ် ၉ ခုမှာရှိတဲ့ စက်ရုံ၊ အလုပ်ရုံ ၂၇ ခုလောက်ဟာ ဝီဂါတွေရဲ့ လုပ်အားကို ခေါင်းပုံဖြတ်နေတယ်လို့လည်း အစီရင်ခံစာက ဆိုပါတယ်။ ဝီဂါတွေကို တရုတ်စာ အဓမ္မသင်ကြားတာ၊ အလုပ်ချိန်ပြီးရင် ဦးနှောက်ကျင်းတာ၊ အဆက်မပြတ်စောင့်ကြည့်တာတွေ ရှိနေပြီး ဘာသာရေးကျင့်သုံးမှုကိုလည်း တာဝန်ရှိသူတွေက ပိတ်ပင်ထားပါတယ်။

ASPI က တရုတ်နဲ့ နိုင်ငံခြားကုမ္ပဏီတွေအနေနဲ့ သူတို့ဟာ လူ့အခွင့်အရေးချိုးဖောက်မှုတွေမှာ ပါဝင်နေတယ်ဆိုတာကို မသိတာမျိုး ဖြစ်နိုင်ပြီး တရုတ်နိုင်ငံက လုပ်ငန်းကွင်းစက်တွေကို ချက်ခြင်းလက်ငင်း သုံးသပ်စစ်ဆေးကြဖို့လည်း တိုက်တွန်းခဲ့ပါတယ်။

Nike အတွက် ပစ္စည်းတွေထုတ်လုပ်ပေးပြီး ASPI ရဲ့ စာရင်းထဲမှာပါဝင်တဲ့ စက်ရုံတစ်ခုကို ဝါရှင်တန်ပို့စ်သတင်းဌာနက သွားရောက်ရာမှာ စက်ရုံမှာ လျှပ်စစ်ဝါယာခြံစည်းရိုးတွေ၊ မျှော်စင်တွေ၊ ကင်မရာတွေ၊ ရဲစခန်းတွေရှိနေကာ အကျဉ်းထောင်တစ်ခုနဲ့ တူနေတာကို တွေ့ခဲ့ရပါတယ်။ အလုပ်လုပ်နေတဲ့ ဝီဂါအမျိုးတစ်ဦးကို မေးမြန်းရာမှာ စက်ရုံအတွင်း လမ်းလျှောက်လို့ရပေမယ့် ရှင်ကျန်းကို ပြန်လို့မရဘူးလို့ ပြောခဲ့ကြောင်း ဝါရှင်တန်ပို့စ် သတင်းဌာနက ဖော်ပြခဲ့ပါတယ်။

Nike နဲ့ Apple တို့က သူတို့ရဲ့ လုပ်ငန်းကွင်းဆက်မှာ ပါဝင်တဲ့ ဘယ်သူမဆို ဂုဏ်သိက္ခာရှိရှိ အလုပ်လုပ်နိုင်အောင် ဆောင်ရွက်သွားမှာဖြစ်ပြီး၊ နိုင်ငံတကာ အလုပ်သမားအခွင့်အရေးကိုလည်း လေးစားလိုက်နာသွားမယ်လို့ ထုတ်ပြန်ခဲ့ပါတယ်။

Ref: BBC

March 2, 2020
အွမ္မရာဗီဇာကြေးနှင့် ဝန်ဆောင်ခများကို အေးဂျင့်ဆီမှ ပြန်ထုတ်နိုင်ဟု ဆော်ဒီကြေငြာ

မတ် ၂၊ ၂၀၂၀
M-Media

-ပြည်ဝင်ခွင့် ယာယီပိတ်ပင်မှုကြောင့် ဝင်ခွင့်မရတဲ့ အွမ္မရာဘုရားဖူးခရီးသွားတွေ ပေးထားတဲ့ ဗီဇာကြေးနဲ့ ဝန်ဆောင်ခတွေကို ပြန်ထုတ်ပေးသွားမယ်လို့ ဆော်ဒီအာရေဗျ ဟဂျ်နှင့် အွမ္မရာဝန်ကြီးဌာနက ထုတ်ပြန်ကြေငြာလိုက်ပါတယ်။

ကမ္ဘာတစ်ဝှမ်း ပြန့်နှံ့နေတဲ့ ကိုရိုနာဗိုင်းရပ်စ်သစ် အန္တရာယ်ကြောင့် ဆော်ဒီအာရေဗျဟာ အခုနှစ် အွမ္မရာ ဘုရားဖူးခရီးစဉ်ကို ပြီးခဲ့တဲ့တစ်ပတ်မှာ ယာယီပိတ်ပင်လိုက်တာပါ။

အွမ္မရာဘုရားဖူးခရီးစဉ်အတွက် ငွေကြေးပေးအပ်ထားတဲ့ ကမ္ဘာတစ်ဝှမ်းက မွတ်စလင်ခရီးသွားတွေအနေနဲ့ သက်ဆိုင်ရာ အွမ္မရာအေးဂျင့်တွေဆီကနေ ဗီဇာကြေးနဲ့ ဝန်ဆောင်ခတွေကို ပြန်ထုတ်လို့ရပြီး အဲဒီအတွက် အီလက်ထရောနစ် ဝန်ဆောင်မှုလည်း ထားရှိပေးထားတယ်လို့လည်း ဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။

ဒီကိစ္စအတွက် ဝန်ကြီးဌာနကို မေးမြန်းလိုတယ်ဆိုရင် ဖုန်းနံပါတ် ၀၀၉၆၆-၉၂၀၀၀၂၈၁၄ ဒါမှမဟုတ် အီးမေးလ် [email protected] တို့ကို ဆက်သွယ်မေးမြန်းနိုင်တယ်လို့လည်း ဆိုပါတယ်။

အွမ္မရာဘုရားဖူးခရီးသွားတွေအပြင်၊ ကိုရိုနာဗိုင်းရပ်စ်သစ် ပြန့်နှံ့နေတဲ့ နိုင်ငံက ခရီးသွားတွေ၊ ပင်လယ်ကွေ့နိုင်ငံတွေက နိုင်ငံသားတွေကိုလည်း ဆော်ဒီက ပြည်ဝင်ခွင့် ပိတ်ပင်ထားပါတယ်။ ဒါပေမယ့် နိုင်ငံအတွင်း ၁၄ ရက်နေထိုင်ခဲ့ပြီး ရောဂါလက္ခဏာ မပြခဲ့သူတွေ၊ အလုပ်ဗီဇာ၊ စီးပွားရေးဗီဇာ၊ မိသားစု အလည်အပတ်ဗီဇာ ကိုင်ဆောင်ထားသူတွေကတော့ ပြည်ဝင်ခွင့် ရရှိမှာဖြစ်ပါတယ်။

Ref: Saudi Gazette

March 2, 2020