Blog

ဖေဖော်၀ါရီ ၂၃၊ ၂၀၂၄
M-Media

-လက်နက်ကိုင် ပဋိပက္ခအတွင်း ကာကွယ်ပေးရမယ့်သူတွေကို အများဆုံးသတ်ဖြတ်တဲ့ မှတ်တမ်းဆိုးတစ်ခုကို အစ္စရေးက ရရှိသွားပါတယ်။

ပါလက်စတိုင်းနိုင်ငံ ဂါဇာကမ်းမြှောင်မှာ ပြီးခဲ့တဲ့နှစ် အောက်တိုဘာ ၇ ရက်နေ့ကစတဲ့ အစ္စရေးရဲ့ တစ်ကျော့ပြန်လူသတ်ပွဲအတွင်း အသတ်ခံရသူ ပါလက်စတိုင်းအရေအတွက်ဟာ ၃ သောင်းနီးပါး ရှိလာပြီဖြစ်ပါတယ်။

၅ လကျော်အတွင်း ကလေးငယ်တွေ၊ ဂျာနယ်လစ်၊ ဆေးဘက်ဆိုင်ရာ ၀န်ထမ်းတွေ၊ ကုလရဲ့ အကူအညီပေးရေးလုပ်သားတွေကို အစ္စရေးရဲ့ သတ်ဖြတ်မှုဟာ ကမ္ဘာမှာဖြစ်ခဲ့တဲ့ လက်နက်ကိုင် ပဋိပက္ခတွေအတွင်း အများဆုံးဖြစ်တယ်လို့ ပါလက်စတိုင်းဆိုင်ရာ ကုလအကူအညီပေးရေးအဖွဲ့ UNRWA ရဲ့ ဖေဖော်၀ါရီ ၂၂ ရက်နေ့ ထုတ်ပြန်ချက်မှာ ဖော်ပြပါတယ်။

UNRWA အဖွဲ့နဲ့ ၀န်ထမ်းတွေကို အစ္စရေးက နည်းမျိုးစုံနဲ့ နှောက်ယှက်၊ ဒုက္ခပေးနေတာကိုလည်း ထုတ်ပြန်ချက်မှာ အသေးစိတ် ရေးသားထားပါတယ်။

အစ္စရေးဟာ UNRWA က ဖွင့်ထားတဲ့ အသက်မွေး၀မ်းကျောင်းသင်တန်းတွေကို ပိတ်ခိုင်းခဲ့ပြီး၊ ၁၉၅၂ ခုနှစ်မှာ ဂျော်ဒန်က ပေးထားတဲ့ ပါလက်စတိုင်းပိုင် အရှေ့ဂျေရုစလင်က ရုံးခန်းနေရာအတွက် အစ္စရေးက ဒေါ်လာ ၄ ဒဿမ ၅ သန်း ဆက်ကြေးတောင်းပါတယ်။

အရှေ့ဂျေရုစလင်မှာ ၇၅ နှစ်ကြာ လည်ပတ်ခဲ့တဲ့ UNRWA ရုံးချုပ်ကို အစ္စရေးက ပိတ်ခိုင်းတာ၊ အဖွဲ့ရဲ့ နိုင်ငံတကာ ၀န်ထမ်းတွေကို ဗီဇာရုပ်သိမ်းတာ၊ ကုလ အကူအညီပေးရေးလုပ်ငန်းအတွက် အခွန်သက်သာခွင့်ကို ရုပ်သိမ်းမယ်လို့ ခြိမ်းခြောက်တာ၊ ပါလက်စတိုင်းတွေဆီသွားမယ့် အကူအညီတွေကို အစ္စရေး အကောက်ခွန်က သိမ်းဆည်းတာ စသဖြင့် ပါလက်စတိုင်းတွေ အကူအညီမရဘဲ ဒုက္ခရောက်အောင် အစ္စရေးဖက်က လုပ်ဆောင်နေတာတွေကိုလည်း ထုတ်ပြန်ချက်မှာ ထည့်သွင်းဖော်ပြထားပါတယ်။

UNRWA အကြီးအကဲ ဖိလစ် လာဇာရီနီက အစ္စရေးရဲ့ ဒီလုပ်ရပ်တွေကိုကြည့်ရင် မိမိတို့အဖွဲ့ကို ဖျက်ဆီးရှင်းလင်းဖို့ ရည်ရွယ်တယ်ဆိုတာ ထင်ရှားတယ်လို့ ပြောကြားခဲ့ပါတယ်။

အောက်တိုဘာ ၇ ရက်နေ့က ပါလက်စတိုင်း လွတ်မြောက်ရေးအဖွဲ့ ဟားမက်စ်ရဲ့ အစ္စရေးထဲ၀င်ရောက်တိုက်ခိုက်မှုမှာ UNRWA ၀န်ထမ်းတွေ ပါ၀င်တယ်လို့ အစ္စရေးက စွပ်စွဲထားပြီး လက်ရှိအချိန်အထိ အထောက်အထား အတိအကျ မပြနိုင်သေးပါဘူး။

အစ္စရေးရဲ့ ဒီစွပ်စွဲချက်ကြောင့် အမေရိကန်အပါအ၀င် အစ္စရေးမဟာမိတ်နိုင်ငံတွေက UNRWA ကို ပေးနေတဲ့ အကူအညီတွေကို ရပ်ဆိုင်းခဲ့ပါတယ်။

Ref: Aljazeera

ဖေဖော်၀ါရီ ၂၄၊ ၂၀၂၄

M-Media 

-ဂါဇာကမ်းမြှောင်တောင်ပိုင်း ရာဖာမြို့က ဗလီ၀တ်ကျောင်းတော်ပျက်တစ်လုံးမှာ ပါလက်စတိုင်းတွေ သောကြာနေ့ ၀တ်ပြုဆုတောင်းနေကြတာကို ဖေဖော်၀ါရီ ၂၃ ရက်နေ့က မြင်တွေ့ရတာ ဖြစ်ပါတယ်။ 

ဂါဇာက အခြားဗလီတွေလိုပဲ ဒီဗလီ၀တ်ကျောင်းတော်ဟာလည်း အစ္စရေးရဲ့ တိုက်ခိုက်ဖျက်ဆီးခြင်းကို ခံခဲ့ရတာ ဖြစ်ပါတယ်။ 

ပြီးခဲ့တဲ့နှစ် အောက်တိုဘာ ၇ ရက်နေ့က ဂါဇာမှာစတင်တဲ့ အစ္စရေးရဲ့ တစ်ကျော့ပြန်လူသတ်ပွဲအတွင်း ပါလက်စတိုင်း ၃ သောင်းနီးပါး အသတ်ခံထားရပြီး ကမ်းမြှောင်တစ်ခုလုံးက အဆောက်အဦး ၈၅ ရာခိုင်နှုန်းလောက်ကိုလည်း အစ္စရေးက တိုက်ခိုက်ဖျက်ဆီးထားပါတယ်။ 

Ref: Aljazeera

ဖေဖော်၀ါရီ ၂၀၊ ၂၀၂၄

M-Media 

-ဂါဇာကမ်းမြှောင်မြောက်ပိုင်းက ကုလရဲ့ ကူညီထောက်ပံ့မှုတွေကို ရယူဖို့ စောင့်ဆိုင်းနေတဲ့ ပါလက်စတိုင်းလူအုပ်ကို အစ္စရေးက သေနတ်နဲ့ ပစ်တာကြောင့် အနည်းဆုံး တစ်ဦးသေဆုံးပြီး အများအပြား ဒဏ်ရာရသွားပါတယ်။ 

ဂါဇာစီးတီးမြို့ အနောက်ပိုင်းမှာ ဖေဖော်၀ါရီ ၁၉ ရက်နေ့က ဖြစ်ပွားတဲ့ အဲဒီအဖြစ်အပျက်အတွင်း ရာနဲ့ချီတဲ့ ပါလက်စတိုင်းပြည်သူတွေ ကျည်ကွယ်ရာကို ပုန်းရှောင်တာ၊ သေနတ်မှန်ပြီး သေဆုံး၊ ဒဏ်ရာရတာ စတဲ့ ပုံရိပ်တွေဟာ ဆိုရှယ်မီဒီယာမှာ ပြန့်နှံ့လာခဲ့ပါတယ်။  

တိုက်ခိုက်မှုအတွင်း အနည်းဆုံး ၁၀ ဦး ဒဏ်ရာရခဲ့တယ်လို့ ပါလက်စတိုင်းသတင်းဌာန Wafa က ဖော်ပြပါတယ်။ 

“ကလေးတွေကို ကျွေးမွေးချင်လို့ ဂျုံလေးဘာလေး ရလိုရငြား အများနည်းတူ သွားခဲ့တာပါ။ ဒါပေမယ့် သေနတ်နဲ့ အပစ်ခံလိုက်ရပါတယ်။ ဗုံးတွေနဲ့လည်းပစ်သလို၊ တင့်ကားတွေလည်း ကျွန်တော်တို့ဆီကို ဦးတည် မောင်းလာခဲ့ပါတယ်” လို့ ပါလက်စတိုင်းတစ်ဦးက ပြောပါတယ်။ 

ကုလရဲ့ အကူအညီပေးရေး ထရပ်ကားတွေနား သွားရောက်တန်းစီသူတွေကို အစ္စရေးတပ်ဖွဲ့တွေက တိုက်ခိုက်တာဟာ တစ်ပတ်အတွင်း နှစ်ကြိမ်မြောက်ဖြစ်ပါတယ်။ 

ပြီးခဲ့တဲ့နှစ် အောက်တိုဘာ ၇ ရက်နေ့က စတင်တဲ့ အစ္စရေးရဲ့ တစ်ကျော့ပြန် လူသတ်ပွဲကြောင့် ဂါဇာမှာ လူပေါင်း ၂၉၀၀၀ လောက် သေဆုံးထားပါတယ်။

Ref: Aljazeera