ဇန်နဝါရီ ၃၀၊ ၂၀၂၀ (‌နေ့လည် ၂ နာရီ ခွဲ)
M-Media

• တိဘက်ဒေသမှာ ကိုရိုနာဗိုင်းရပ်စ်ပိုးသစ် ကူးစက်သူတစ်ဦးကို တွေ့ရှိရတယ်လို့ တရုတ်အာဏာပိုင်တွေက ဒီကနေ့မှာ သတင်းထုတ်ပြန်ခဲ့ပြီး၊ တရုတ်ပြည်မကြီးက ဒေသအားလုံးကို ရောဂါ ပြန့်နှံ့ရောက်ရှိသွားတာ ဖြစ်ပါတယ်။ ဇန်နဝါရီ ၂၉ ရက်နေ့အထိ အတည်ပြုထားတဲ့ ကူးစက်မှုအရေအတွက်ဟာ ၇၇၁၁ ခု ရှိလာပြီး သေဆုံးသူအရေအတွက်ကလည်း ၁၇၀ အထိ မြင့်တက်လာပြီ ဖြစ်ပါတယ်။ တရုတ်နိုင်ငံပြင်ပမှာတော့ နိုင်ငံပေါင်း ၁၉ နိုင်ငံကို ရောဂါပိုး ရောက်ရှိ ကူးစက်နေပြီ ဖြစ်ပါတယ်။
• ကမ္ဘာ့ကျန်းမာရေးအဖွဲ့ WHO အကြီးအကဲ Tedros Adhanom Ghebreyesus က ပြီးခဲ့တဲ့ရက်အနည်းငယ်အတွင်း အချို့နိုင်ငံတွေမှာ ရောဂါကူးစက်ပြန့်နှံ့မှုဟာ စိုးရိမ်စရာကောင်းနေပြီး နောက်ထပ် ကျယ်ပြန့်သွားမယ့် အလားအလာ ရှိနေတယ်လို့ ပြောကြားခဲ့ပါတယ်။ WHO ဟာ ဒီကနေ့မှာ အရေးပေါ်အစည်းအဝေး ပြုလုပ်မှာ ဖြစ်ပါတယ်။
• ဩစတေးလျနိုင်ငံက သိပ္ပံပညာရှင်တွေဟာ ဗိုင်းရပ်စ်ပိုးပုံတူကို ဖန်တီးနိုင်ခဲ့ပြီး ဒီဗိုင်းရပ်စ်ကို တိုက်ထုတ်နိုင်မယ့် နည်းလမ်းတွေကို ဆက်လက်ရှာဖွေသွားဖို့ ရှိနေပါတယ်။
• ဝူဟန်မြို့ကနေ ကယ်ထုတ်လာတဲ့ နိုင်ငံသား ၂၀၀ နီးပါးကို စမ်းသပ်စစ်ဆေးမှုတွေ ပြုလုပ်ခဲ့ပြီး ဗိုင်းရပ်စ်ပိုး ကင်းစင်းတယ်လို့ အမေရိကန်က ဒီကနေ့မှာ ပြောကြားလိုက်ပါတယ်။ အဲဒီလူတွေဟာ မနေ့က ကယ်လီဖိုးနီးယားပြည်နယ်က စစ်စခန်းကို ရောက်ရှိလာတာ ဖြစ်ပါတယ်။
• ကိုရိုနာဗိုင်းရပ်စ်သစ် တိုက်ဖျက်ရေး သမ္မတ ရှီကျင့်ဖျင်ရဲ့ ညွှန်ကြားမှုတွေကို အကောင်အထည်ဖော်ရာမှာ နှောင့်နှေးမှု၊ လစ်ဟာမှုတွေရှိတဲ့ အာဏာပိုင်တွေကို အရေးယူသွားမယ်လို့ တရုတ်ဗဟိုကော်မရှင်ရဲ့ စည်းကမ်းထိန်းသိမ်းရေးအဖွဲ့ (CCDI) က ထုတ်ပြန်ပြောကြားလိုက်ပါတယ်။ ဗိုင်းရပ်စ်တိုက်ဖျက်ရေးလုပ်ငန်းမှာ ငွေကြေးနဲ့ လိုအပ်တဲ့ အသုံးအဆောင်တွေ အလွဲသုံးစားလုပ်မှုတွေကိုလည်း ဖော်ထုတ်သွားမယ်လို့ ဆိုပါတယ်။
• မလေးရှားနိုင်ငံမှာ ရောဂါပိုးကူးစက်နေသူအရေအတွက်ဟာ ၈ ဦးအထိ မြင့်တက်လာခဲ့ပြီး လူအားလုံးဟာ တရုတ်နိုင်ငံသားတွေဖြစ်ပါတယ်။ ဆိုရှယ်မီဒီယာမှာ ဝူဟန်ဗိုင်းရပ်စ်အကြောင်း သတင်းမှားဖြန့်ဝေမှုအတွက် ပြည်နယ် ၃ ခုမှာ လူ ၄ ဦးကို ဖမ်းဆီးထိန်းသိမ်းလိုက်တယ်လို့ မလေးရှားအာဏာပိုင်တွေက ဒီကနေ့မှာ သတင်းထုတ်ပြန်ပါတယ်။
• ဝူဟန်ဗိုင်းပ်ရပ်စ် တားဆီးကာကွယ်ရေးမှာ အထောက်အကူဖြစ်စေဖို့အတွက် ဖေဖော်ဝါရီ ၁ ရက်နေ့ကနေစပြီး အိမ်ထောင်စုတစ်စုကို နှာခေါင်းစည်း ၄ ခုစီ ပေးဝေသွားဖို့ စင်ကာပူအစိုးရက စီစဉ်နေပါတယ်။ ဒီနှာခေါင်းစည်းတွေကို လိုအပ်တဲ့အခါမှ အသုံးပြုဖို့လည်း အာဏာပိုင်တွေက တိုက်တွန်းထားပါတယ်။
• ရောဂါအဓိကကူးစက်ဖြစ်ပွားရာ ဝူဟန်မြို့မှာ မြန်မာနိုင်ငံက ကျောင်းသား ၆၃ ဦး ရှိနေပြီး သူတို့ကို သီးသန့်လေယာဉ်နဲ့ ပြန်လည်ခေါ်ယူသွားမယ်လို့ မြန်မာအစိုးရက ဇန်နဝါရီ ၃၀ ရက်နေ့ မနက်ပိုင်းမှာ သတင်းထုတ်ပြန်ပါတယ်။ ပြန်ရောက်လာတဲ့သူတွေကို စနစ်တကျ ကျန်းမာရေးစောင့်ကြည့်စစ်ဆေးမှုတွေ လုပ်ဆောင်ဖို့ ပြင်ဆင်ထားတယ်လို့လည်း မြန်မာအာဏပိုင်တွေက ဆိုပါတယ်။

Ref: BBC, Aljazeera