ဇန်နဝါရီ ၂၀၊ ၂၀၂၀
M-Media
-3D နည်းပညာနဲ့ ဆောက်လုပ်ထားတဲ့ အိမ်တွေနဲ့ ရပ်ကွက်တည်ဆောက်ကာ ဝင်ငွေနည်းသူတွေကို ထားမယ့် စီမံကိန်းတစ်ခုကို မက္ကဆီကိုနိုင်ငံမှာ အကောင်အထည်ဖော်နေပါတယ်။
နိုင်ငံမြောက်ပိုင်း တာဘက်စ်ကိုပြည်နယ်က ဝေးလံခေါင်ဖျားတဲ့ ဒေသတစ်ခုမှာ ဆောင်ရွက်နေတာဖြစ်ပြီး လက်ရှိမှာ အိမ် ၂ လုံးနဲ့ စတင်ထားပေမယ့် ၂၀၂၀ နှောင်းပိုင်းလောက်ကျရင် အဲဒီရပ်ကွက်မှာ နေအိမ် ၅၀ လောက်အထိ ရှိလာဖို့ ရည်မှန်းထားပါတယ်။
တာဘက်စ်ကိုပြည်နယ်ဟာ ရေကြီးရေလျှံတာ၊ ငလျင်လှုပ်တဲ့ ဒေသဖြစ်ပြီး 3D အိမ်တွေဟာ ဒီလိုအန္တရာယ်တွေကို ခံနိုင်အောင် ဖန်တီးထားတာ ဖြစ်ပါတယ်။
စီမံကိန်းဖော်ဆောင်နေတဲ့ အကျိုးအမြတ်မယူတဲ့အဖွဲ့ New Story ကို ပူးတွဲတည်ထောင်သူ စီအီးအို ဘရတ် ဟဂ်လာက စီမံကိန်းဆောင်ရွက်နေတဲ့ဒေသက မိသားစုတွေဟာ တစ်နေ့ကို ၃ ဒေါ်လာလောက်ဝင်ငွေနဲ့သာ ရပ်တည်နေကြသူတွေဖြစ်တယ်လို့ ပြောကြားခဲ့ပါတယ်။
၂၀၁၄ ခုနှစ်က တည်ထောင်ခဲ့တဲ့ New Story အဖွဲ့ဟာ နေစရာမရှိတဲ့သူတွေကို ကူညီဆောင်ရွက်ပေးနေတဲ့ အဖွဲ့ဖြစ်ပြီး တောင်အမေရိကနဲ့ မက္ကဆီတို့မှာ နေအိမ်ပေါင်း ၂၇၀၀ ကျော် ဆောက်လုပ်ပေးထားပါတယ်။ အခု စီမံကိန်းက 3D နည်းပညာနဲ့ ပထမဆုံး ဆောင်ရွက်မှုလည်း ဖြစ်ပါတယ်။
3D နည်းပညာနဲ့ဆောက်လုပ်တဲ့ အိမ်တွေဟာ သာမန်အိမ်ဆောက်လုပ်ချိန်ထက် ၂ ဆလောက် ပိုမြန်သလို၊ ကွန်ကရစ်အရောကလည်း ရိုးရိုးကွန်ကရစ်တွေထက် ပိုမိုတောင့်တင်းမာကျောပါတယ်။
အဲဒီနေအိမ်ဟာ စကွဲယားပေ ၅၀၀ ကျယ်ဝန်းပြီး အိပ်ခန်း ၂ ခန်း၊ ရေချိုးခန်းတစ်ခန်း၊ ဧည့်ခန်းတစ်ခန်းနဲ့ မီးဖိုဆောင် တစ်ခန်း ပါဝင်ပါတယ်။ စျေးနှုန်းကို သတ်မှတ်ရခြင်း မရှိသေးပေမယ့် နေထိုင်တဲ့ မိသားစု ဝင်ငွေရဲ့ ၂၀ ရာခိုင်နှုန်းကနေ ၃၀ ရာခိုင်နှုန်းလောက်သာ အရစ်ကျ ပေးသွားရမှာ ဖြစ်ပါတယ်။
စီမံကိန်းမှာ အသုံးပြုမယ့် 3D ပရင်တာကို အမေရိကန်အခြေစိုက် ကုမ္ပဏီတစ်ခုက ၃ နှစ်ကြာ ဖန်တီးခဲ့ရတာဖြစ်ပြီး Vulcan II လို့ အမည်ပေးထားပါတယ်။ Vulcan II ပရင်တာဟာ ၅၀၀ စကွဲယားပေရှိတဲ့ အိမ် ၂ လုံးကို တစ်ပြိုင်တည်း တည်ဆောက်နိုင်ကာ အကြီးဆုံး စကွဲယားပေ ၂၀၀၀ ရှိတဲ့ အိမ်အထိ တည်ဆောက်နိုင်ပါတယ်။
3D ပရင်တာတွေဟာ စျေပေါပြီး၊ ဆောက်လုပ်မှု မြန်ဆန်တာကြောင့် အနာဂတ် ဆောင်လုပ်ရေးလုပ်ငန်းမှာ အလားအလာကောင်းတွေ အများကြီးရှိနေပါတယ်။
Ref : CNN
