ဒီဇင်ဘာ ၃၁၊ ၂၀၁၉
M-Media
-အာဏာရှင်ဟောင်း အိုမာရ် အလ်-ဘရှီးရ် လက်ထက်မှာ ဆန္ဒပြ ပြည်သူတစ်ဦးကို ညှင်းပမ်းသတ်ဖြတ်ခဲ့တဲ့ ထောက်လှမ်းရေးအရာရှိ ၂၉ ဦးကို ဆူဒန်တရားရုံးက မနေ့မှာ သေဒဏ်ချမှတ်လိုက်ပါတယ်။
ဘရှီးရ်အစိုးရဆင်းပေးဖို့ ပြည်သူတွေက အကြီးအကျယ် ဆန္ဒပြခဲ့ကြတဲ့ ဇန်နဝါရီလ နှောင်းပိုင်းက နိုင်ငံအရှေ့ပိုင်း ကာဆာလာပြည်နယ်မှာ ကျောင်းဆရာ အဟ်မဒ် အလ်-ခီရ်ကို ဆူဒန်ထောက်လှမ်းရေးက ဖမ်းသွားပြီး ညှင်းပမ်းသတ်ဖြတ်ခဲ့တာပါ။
အစာအဆိပ်သင့် သေဆုံးသွားတာလို့ အာဏာပိုင်တွေက ထုတ်ပြန်ခဲ့ပေမယ့် နောက်ပိုင်း စုံစမ်းစစ်ဆေးမှုအရ ညှင်းပမ်းမှုကနေ ရတဲ့ဒဏ်ရာကြောင့် သေဆုံးသွားတယ်ဆိုတာကို တွေ့ခဲ့ရပါတယ်။
ဒီကိစ္စနဲ့ပတ်သက်ပြီး ထောက်လှမ်းရေးတာဝန်ရှိသူ ၂၉ ဦးကို ကြိုးပေးကွပ်မျက်ဖို့ ဆူဒန်တရားရုံးက မနေ့မှာ အမိန့်ချခဲ့ပြီး အခြား ၄ ဦးကို ထောင်ဒဏ် ၃ နှစ်စီ ချမှတ်ခဲ့ပါတယ်။ ၇ ဦးကိုတော့ တရားသေ လွှတ်ပေးခဲ့ပါတယ်။
နိုင်ငံရေး လေ့လာသုံးသပ်သူတွေက ဒီအမိန့်ချမှတ်မှုဟာ ဆူဒန်နိုင်ငံရဲ့ ဒီမိုကရေစီအသွင်ကူးပြောင်းရေးကို လမ်းခင်းပေးတာလို့ သုံးသပ်ခဲ့ကြပါတယ်။ တရားရုံးအရှေ့မှာ ဆူဒန်ပြည်သူတွေက အလ်-ခီရ်ရဲ့ဓာတ်ပုံတွေကိုင်ကာ စုဝေးခဲ့ကြပြီး အမိန့်ချပြီးနောက်မှာတော့ အောင်ပွဲ ခံခဲ့ကြပါတယ်။
ဒါဟာ အာဏာရှင် အလ်-ဘရှီးရ် ပြုတ်ကျရေး လူထုဆန္ဒပြမှုမှာ အာဏာပိုင်တွေရဲ့ နှိပ်စက်ညှင်းပမ်းမှုနဲ့ပတ်သက်ပြီး ပထမဆုံး အရေးယူနိုင်တာ ဖြစ်ပါတယ်။ ၂၀၁၈ ခုနှစ် ဒီဇင်ဘာနှောင်းပိုင်းကနေ စတင်ကာ ဧပြီလမှာ ပြီးဆုံးခဲ့တဲ့ အာဏာရှင်ပြုတ်ကျရေး ဆူဒန်ပြည်သူတွေရဲ့ ဆန္ဒပြမှုအတွင်း အနည်းဆုံး ၁၇၇ ဦးသေဆုံးခဲ့ပါတယ်။ ဧပြီလမှာတော့ အာဏာရှင် ဘရှီးရ်လည်း ပြုတ်ကျသွားခဲ့ပါတယ်။
Ref: Aljazeera
