Blog

ဇန်န၀ါရီ ၀၉၊ ၂၀၂၄

M-Media 

-ပါလက်စတိုင်း ပိုင်နက် တစ်ခုဖြစ်တဲ့ အနောက်ဖက်ကမ်းမှာ အစ္စရေးရဲတပ်ဖွဲ့က အသက် ၄ နှစ်အရွယ် ပါလက်စတိုင်း သမီးငယ်တစ်ဦးကို မနေ့က ပစ်သတ်လိုက်ပါတယ်။ 

ဟားမက်စ်ကို တုန့်ပြန်တယ်ဆိုတဲ့ ခေါင်းစဥ်နဲ့ ဂါဇာကမ်းမြှောင်မှာ အောက်တိုဘာ ၇ ရက်နေ့ကစတင်ပြီး လူသတ်ပွဲဆင်နွှဲနေတဲ့ အစ္စရေးဟာ အနောက်ဖက်ကမ်းမှာလည်း ပါလက်စတိုင်းတွေအပေါ် တိုးမြှင့်သတ်ဖြတ်မှုတွေ ပြုလုပ်လာပါတယ်။ 

ပါလက်စတိုင်းပိုင်နက်အတွင်းက အစ္စရေးရဲ့ စစ်ဆေးရေးဂိတ်တစ်ခုမှာ မနေ့က ကားတစ်စီးဟာ အစ္စရေးရဲတွေကို တိုက်သတ်ဖို့ ကြိုးစားခဲ့တာပါ။ 

ဒါကို တုန့်ပြန်တယ်ဆိုပြီး အစ္စရေးရဲတွေက မြင်မြင်သမျှ ကားတွေကို ပစ်ခတ်ခဲ့တဲ့အတွက် အခြားကားတစ်စီးမှာ ရှိနေတဲ့ အသက် ၄ နှစ်အရွယ် သမီးငယ် ရိုကိုင်ယာဟာ သေနတ်မှန်ပြီး သေးဆုံးခဲ့ပါတယ်။ 

ပါလက်စတိုင်းပိုင်နက် အနောက်ဖက်ကမ်းမှာ အစ္စရေးဟာ တရားမ၀င် ဂျူးအခြေချအိမ်ယာတွေ ကျူးကျော် တည်ဆောက်ထားသလို၊ စစ်ရေးဂိတ်တွေ ချထားကာ ပါလက်စတိုင်းတွေကို ဖိနှိပ်ညှင်းပမ်းမှုတွေ နှစ်ပေါင်းများစွာ လုပ်ဆောင်နေတာ ဖြစ်ပါတယ်။ 

Ref: Aljazeera 

ဇန်န၀ါရီ ၈၊ ၂၀၂၃
M-Media 

-ဂါဇာမှာ အစ္စရေးက ရည်ရွယ်ဆောင်ရွက်တဲ့ မူ၀ါဒကြောင့် ပါလက်စတိုင်းပြည်သူတွေဟာ အငတ်ဘေးဆိုက်လာတယ်လို့ လူ့အခွင့်အရေးအဖွဲ့ B’Tselem က ထုတ်ပြန်ပါတယ်။ 

B’Tselem အဖွဲ့ဟာ အစ္စရေးအခြေစိုက် အဖွဲ့တစ်ခုဖြစ်ပြီး ပါလက်စတိုင်းပိုင်နက်တွေဖြစ်တဲ့ အနောက်ဖက်ကမ်းနဲ့ ဂါဇာကမ်းမြှောင်တို့က အစ္စရေးရဲ့ လူ့အခွင့်အရေးချိုးဖောက် သတ်ဖြတ်မှုတွေကို ဖော်ထုတ်နေတာပါ။ 

ပါလက်စတိုင်းတွေ အငတ်ဘေးဆိုက်နေတာဟာ စစ်ပွဲရဲ့ ဘေးထွက်ဆိုးကျိုးကြောင့်မဟုတ်ဘဲ အစ္စရေးအစိုးရကိုယ်တိုင်က စီမံကိန်းချ ဆောင်ရွက်နေတာလို့ ထည့်သွင်းဖော်ပြခဲ့ပါတယ်။ 

“ကလေးတွေ စားဖို့လိုက်တောင်းနေတာ၊ တစ်လုပ်စာလှူတာကို ရဖို့ တန်းအရှည်ကြီးစီနေရတာ၊ အကူအညီပေးတဲ့ ထရပ်ကားတွေမှာ လူတွေ တိုး၀ှေ့နေတာတွေဟာ မယုံနိုင်စရာကောင်းတဲ့ မြင်ကွင်းတွေပါ။ အခြေအနေတွေဟာ မြန်မြန်ဆန်ဆန်ပဲ ဆိုးရွားလာနေပြီး အငတ်ဘေးအန္တရာယ်လည်း တကယ်ရောက်လာပါတော့မယ်။ အစ္စရေးကတော့ သူတို့ရဲ့မူ၀ါဒကို စွဲကိုင်ထားဆဲပါ” 

အစ္စရေးအနေနဲ့ မူ၀ါဒ ပြောင်းလဲဖို့ဟာ ကျင့်၀တ်တစ်ခုသာ မဟုတ်ဘဲ နိုင်ငံတကာ လူသားချင်း စာနာထောက်ထားမှု ဥပဒေအရ လုပ်ကိုလုပ်ရမယ့် ကိစ္စလို့လည်း B’Tselem အဖွဲ့က ထောက်ပြခဲ့ပါတယ်။

“ငတ်မွတ်ခေါင်းပါးမှုကို လက်နက်သဖွယ်အသုံးမပြုဖို့ တားမြစ်ပိတ်ပင်ထားပါတယ်။ အသက်ရှင်ရပ်တည်ဖို့ လိုအပ်တာတွေ အရပ်သားတွေက မရတော့ဘူးဆိုရင် စားနပ်ရိက္ခာနဲ့ လူသားချင်း စာနာထောက်ထားမှုဆိုင်ရာ အကူအညီတွေကို အဆီးအတားမရှိ မြန်မြန်ဆန်ဆန် ခွင့်ပြုပေးရမှာဟာ ပဋိပက္ခမှာ ပါ၀င်နေတဲ့ အဖွဲ့အစည်းတွေရဲ့ တာ၀န်ပါပဲ”

ဟားမက်စ်ကို လက်တုန့်ပြန်တယ်ဆိုတဲ့ခေါင်းစဥ်နဲ့ အောက်တိုဘာ ၇ ရက်နေ့က စတင်တဲ့ လူသတ်ပွဲမှာ အစ္စရေးဟာ ပါလက်စတိုင်းပြည်သူတွေကို အဓိက ပစ်မှတ်ထား သတ်ဖြတ်နေတာဖြစ်ပြီး အသတ်ခံရသူအရေအတွက်ဟာ ၂၃၀၀၀ ရှိလာပြီဖြစ်ပါတယ်။

အများစုဟာ အမျိုးသမီးတွေနဲ့ ကလေးငယ်တွေ ဖြစ်ပါတယ်။ 

Ref: Aljazeera 

ဇန်န၀ါရီ ၇၊ ၂၀၂၃

M-Media 

-အစ္စရေးက ဒုံးကျည်နဲ့ ပစ်ခတ်တိုက်ခိုက်ခဲ့ပြီးနောက် မြင်တွေ့ရတဲ့ ကားတစ်စီးဖြစ်ပါတယ်။

ဒီကားဟာ ဂျာနယ်လစ်တွေ လိုက်ပါသွားတဲ့ ကားဖြစ်ပြီး မနေ့က ဂါဇာတောင်ပိုင်း ခန်ယူနစ်မြို့မှာ အစ္စရေးက ပြုလုပ်ခဲ့တဲ့ တိုက်ခိုက်မှုကို သတင်းယူဖို့ အသွားမှာ ပစ်ခတ်ခံလိုက်ရတာ ဖြစ်ပါတယ်။ 

ဂါဇာက အလ်ဂျာဇီးရားသတင်းဌာနအကြီးအကဲရဲ့သားဖြစ်သူ ဂျာနယ်လစ် ဟမ်ဇာနဲ့ အခြားသတင်းထောက်တစ်ဦး အပါအ၀င် လူအချို့ သေဆုံးခဲ့ပါတယ်။ 

အစ္စရေးက ဂါဇာမှာ သတ်ဖြတ်ခဲ့တဲ့ ဂျာနယ်လစ် စုစုပေါင်း ၁၀၀ နီးပါး ရှိလာပြီဖြစ်ပါတယ်။ 

Ref: Aljazeera