ဧပြီ ၁၃၊ ၂၀၁၉
M-Media
– ဆူဒန်အာဏာရှင် အိုမာရ် အလ်-ဘရှီးရ်ကို ဖြုတ်ချပြီး စစ်ကောင်စီ အကြီးအကဲအဖြစ် တက်လာတဲ့ စစ်ခေါင်းဆောင် အောင်ဝဒ် အစ်ဗနေ့ အောက်ဖ်ဟာ ၂၄ နာရီအတွင်းမှာပဲ ရာထူးကနေ နှုတ်ထွက်သွားခဲ့ပြီး တိုင်းပြည်အကျိုးအတွက် ဒီလိုဆောင်ရွက်ရတာဖြစ်တယ်လို့ ပြောကြားခဲ့ပါတယ်။
ဆူဒန်ပြည်သူတွေဟာ ဘရှီးရ်ှနှုတ်ထွက်ပေးရေး ၅ လနီးပါးကြာ ဆန္ဒပြခဲ့ပြီးတဲ့နောက်ပိုင်း ကြာသာပတေးနေ့မှာ အောက်ဖ်ဦးဆောင်တဲ့ စစ်တပ်က အာဏာသိမ်းကာ ဘရှီးရ်ကို ဖမ်းဆီး အကျဉ်းချခဲ့ပါတယ်။ ဒါပေမယ့် ဖွဲ့စည်းပုံ အခြေခံဥပဒေကို ရပ်ဆိုင်းကာ ၂ နှစ်တာ အသွင်ကူးပြောင်းရေး ကာလ သတ်မှတ်ပြီး တိုင်းပြည်ကို စစ်ကောင်စီက အုပ်ချုပ်သွားမယ်လို့ အောက်ဖ်က ရုပ်သံကနေ တိုင်းပြည်ကို ပြောကြားခဲ့ပါတယ်။
ပြည်သူတွေက အောက်ဖ်ဦးဆောင်တဲ့ စစ်ကောင်စီကို ဆက်လက်ဆန္ဒပြနေကြတာကြောင့် ၂၄ နာရီမပြည့်ခင်မှာပဲ အောက်ဖ်ဟာ စစ်ကောင်စီ အကြီးအကဲအဖြစ်ကနေ နှုတ်ထွက်ကြောင်း ကြေငြာခဲ့ပါတယ်။
“စစ်ကောင်စီ အကြီးအကဲဖြစ်တဲ့ ကျွန်တော့်အနေနဲ့ ရာထူးကနေ နှုတ်ထွက်ကြောင်း ကြေငြာလိုပါတယ်။ ဒါဟာ တိုင်းပြည်ကို ထိခိုက်စေနိုင်တဲ့ ကိုယ်ကျိုးထက် တိုင်းပြည်ကောင်းကျိုးအတွက် ဆောင်ရွက်တာပါ။ ခင်ဗျားတို့အားလုံး ပူးပေါင်းဆောင်ရွက်ပြီး အဖြေတစ်ခုကို လျင်လျင်မြန်မြန်နဲ့ ရှာဖွေဖို့ အကြံပြုလိုပါတယ်”
စစ်ကောင်စီ အကြီးအကဲနေရာအတွက် ဒုတိယဗိုလ်ချုပ်ကြီး အဘ်ဒဲလ် ဖာတာ ဘူရ်ဟန်ကို အောက်ဖ်က ခန့်အပ်ခဲ့ပြီး ဘူရ်ဟန်ဟာ တိုင်းပြည်ကို တည်ငြိမ်အောင် ထိန်းကြောင်းနိုင်မယ်ဆိုတာ ယုံကြည်ကြောင်း၊ စစ်တပ်အတွင်း ညီညွတ်ရေးအတွက် အခုလို နှုတ်ထွက်ခဲ့တာဖြစ်ကြောင်း ထည့်သွင်း ပြောဆိုခဲ့ပါတယ်။
ဘူရ်ဟန်ဟာ စစ်ဦးစီး အရာရှိချုပ်နဲ့ ကြည်းတပ် အကြီးအကဲအဖြစ် ပြီးခဲ့တဲ့ ဖေဖော်ဝါရီလက ဘရှီးရ်ရဲ့ တာဝန်ပေးခြင်းကို ခံခဲ့ရသူပါ။ ဒါပေမယ့် ဘရှီးရ်အစိုးရနဲ့ ဆူဒန်စစ်တပ်မှာ အစွန်းအထင်း အကင်းဆုံးအဖြစ် သတ်မှတ်ခံထားရသူ ဖြစ်ပြီး ဆန္ဒပြပြည်သူတွေနဲ့ ဆက်ဆံရေး အဆင်ပြေဆုံးသူလည်း ဖြစ်ပါတယ်။
နိုင်ငံအနောက်မြောက်ပိုင်း ဒါဖာရ်ဒေသမှာ ၂၀၀၃ ခုနှစ်ကနေ ၂၀၀၈ ခုနှစ်အထိ ဖြစ်ပွားခဲ့တဲ့ မတည်ငြိမ်မှုအတွင်း ဘရှီးရ်၊ အောက်ဖ်တို့အပါအ၀င် ဆူဒန်အစိုးရနဲ့ စစ်တပ်က တာဝန်ရှိသူတွေဟာ စစ်ရာဇ၀တ်မှုတွေ ကျူးလွန်ခဲ့တဲ့တယ်လို့ စွပ်စွဲ ခံခဲ့ရပါတယ်။
Ref: Aljazeera
