မတ် ၂၉၊ ၂၀၁၉
M-Media
– အစွန်းရောက် အကြမ်းဖက်ဝါဒကို တိုက်ဖျက်ဖို့နဲ့ နှစ်ဖက် အနီးကပ် ပူးပေါင်းဆောင်ရွက်ဖို့ သဘောတူညီချက်တစ်ခုကို ကမ္ဘာ့မွတ်စလင်လိဂ် MWL နဲ့ ရုရှားနိုင်ငံတို့က လက်မှတ်ရေးထိုးခဲ့ကြပါတယ်။
မနေ့က မော်စကိုမှာ ကမ္ဘာ့မွတ်စလင်လိဂ် အထွေထွေအတွင်းရေးမှူး ဒေါက်တာ မိုဟာမက် ဘင် အဘ်ဒူလ် ကရမ် အလ်-အီဆာနဲ့ ရုရှားလွှတ်တော်ဥက္ကဌ ဗီချက်စလက်ဗ် ဗိုလိုဒင်တို့ တွေ့ဆုံဆွေးနွေးမှုအတွင်း မတူညီတဲ့ အယူဝါဒတွေ၊ လူ့အဖွဲ့အစည်းတွေအကြား ဆွေးနွေးမှု ပိုမို တိုးမြှင့်ဆောင်ရွက်ရေး၊ ဆက်ဆံမှုတိုးမြှင့်ရေး ကိစ္စတွေကို ဆွေးနွေးခဲ့ကြပါတယ်။
လူ့အဖွဲ့အစည်းတွေအကြား အပြုသဘောဆောင်တဲ့ ပေါင်းစည်းမှု မြှင့်တင်ရာမှာ ဘာသာရေးခေါင်းဆောင်တွေရဲ့ အရေးပါမှုကိုလည်း ဆွေးနွေးခဲ့ကြပြီး ဗိုလိုဒင်က ကမ္ဘာ့မွတ်စလင်လိဂ်ရဲ့ ကမ္ဘာတစ်ဝှမ်း သြဇာညောင်းမှု၊ ကမ္ဘာလုံးဆိုင်ရာ သဟာဇတဖြစ်မှုကို မြှင့်တင်ရာမှာ ဦးဆောင်ဦးရွက်ပြုနိုင်မှုတွေအကြောင်း ချီးကျူးပြောဆိုခဲ့ပါတယ်။
အစွန်းရောက်ဝါဒ တိုက်ဖျက်ရေးနဲ့ သည်းခံမှု မြှင့်တင်ရေးတို့ကို ဦးစားပေးဆောင်ရွက်မယ့် သဘောတူညီချက်တစ်ခုကို MWL နဲ့ ရုရှား အစ္စလာမ့်ယဉ်ကျေးမှု၊ သိပ္ပံနှင့် ပညာရေး ရန်ပုံငွေအဖွဲ့တို့က လက်မှတ်ရေးထိုးခဲ့ကြပါတယ်။ ရုရှားနိုင်ငံက အစ္စလာမ့်အဖွဲ့အစည်းတွေနဲ့ မွတ်စလင်အများစုရှိရာ နိုင်ငံတွေအကြား အပြန်အလှန် ဆက်သွယ်ဆောင်ရွက်သွားဖို့လည်း သဘောတူညီချက်ထဲမှာ ပါဝင်ပါတယ်။
ဘာသာတရား၊ လူမျိုးနဲ့ အယူဝါဒတွေကို အခြေခံပြီး အစွန်းရောက်ကာ အကြမ်းဖက်ဝါဒအထိ ရောက်သွားမှုကို တားဆီးဖို့၊ အဖွဲ့အစည်းတွေအကြား လူသားချင်းစာနာထောက်ထားမှုကို အခြေတည်ပြီး ပူးပေါင်းဆောင်ရွက်ကာ လူ့အဖွဲ့အစည်းတွေကို ဆက်သွယ်ပေးဖို့၊ ငြိမ်းချမ်းရေးနဲ့ တည်ငြိမ်အေးချမ်းရေးကို အထောက်ကူဖြစ်စေမယ့် မူဘောင် သဘောတူညီချက်တွေအတိုင်း အကောင်အထည်ဖော် ဆောင်ရွက်ဖို့ကိုလည်း သဘောတူခဲ့ကြပါတယ်။
ရုရှား အစ္စလာမ့် ယဉ်ကျေးမှု၊ သိပ္ပံနှင့် ပညာရေး ရန်ပုံငွေအဖွဲ့ဟာ MWL ရဲ့ ရုရှားအခြေပြု ပရဟိတ လုပ်ငန်းတွေမှာ ပါဝင်ဆောင်ရွက်ဖို့လည်း သဘောတူခဲ့ပါတယ်။
အစ္စလာမ့်မစ်နိုင်ငံများ ပူးပေါင်းဆောင်ရွက်ရေးအဖွဲ့ (OIC) မှာ လေ့လာစောင့်ကြည့်သူအဖြစ် ရုရှားက ပါဝင်နိုင်ရေး ရုရှား-အစ္စလာမ်ကမ္ဘာ မဟာဗျူဟာအဖွဲ့တစ်ခုကို ၂၀၀၆ ခုနှစ်မှာ ဖွဲ့စည်းခဲ့ပါတယ်။ ရုရှားသမ္မတ ပူတင်က အစ္စလာမ်ကမ္ဘာဟာ ရုရှားရဲ့ ကူညီပံ့ပိုးမှုကို အပြည့်အ၀ ရမယ်လို့ အရင်က ပြောကြားထားပါတယ်။
Ref: Arab News
