ဖေဖော်ဝါရီ ၁၂၊ ၂၀၁၉
M-Media
– မတ်လရွေးကောက်ပွဲမှာ ၀န်ကြီးချုပ်လောက်အဖြစ် ၀င်ရောက်ယှဉ်ပြိုင်ဖို့ ဘုရင့်အမတော်ရဲ့ အမည်စာရင်းတင်သွင်းမှုကို ထိုင်းရွေးကောက်ပွဲကော်မရှင်က မနေ့မှာ ပယ်ချလိုက်ပါတယ်။
လက်ရှိ ထိုင်းဘုရင် ၀ိဇိယလောင်ကွန်ရဲ့ အမတော်ဖြစ်တဲ့ သက်တော် ၆၇ နှစ်အရွယ် မင်းသမီး အူဘိုလ်ရတ္တနာ ရာဇကံယာ သီရိဝဒ်ဟာနာဟာ Thai Raksa Chart ပါတီကို ကိုယ်စားပြုပြီး ၀န်ကြီးချုပ်နေရာ ၀င်ရောက်ယှဉ်ပြိုင်ဖို့အတွက် ပြီးခဲ့တဲ့တစ်ပတ်မှာ အမည်စာရင်းတင်သွင်းခဲ့တာပါ။ Thai Raksa Chart ပါတီဟာ ၀န်ကြီးချုပ်ဟောင်း သက်ဆင်ရဲ့ မဟာမိတ်တွေ ပူးပေါင်းထူထောင်ထားတဲ့ပါတီ ဖြစ်ပါတယ်။
ထိုင်းနိုင်ငံရေးစနစ်အရ တော်ဝင်အသိုင်းအ၀ိုင်းကလူတွေဟာ နိုင်ငံရေးမှာ ပါဝင်လို့မရဘဲ မင်းသမီး အမည်စာရင်းတင်သွင်းပြီး နာရီပိုင်းအကြာမှာပဲ ထိုင်းဘုရင်က ကြေငြာချက်တစ်စောင်ထုတ်ပြန်ကာ ဒီကိစ္စကို သဘောမတူကြောင်း ပြောကြားခဲ့ပါတယ်။
မနေ့က ထိုင်းရွေးကောက်ပွဲကော်မရှင်ကနေ ထုတ်ပြန်တဲ့ ၀န်ကြီးချုပ်လောင်းစာရင်းမှာ မင်းသမီး အူဘိုလ်ရတ္တနာရဲ့အမည် ပါဝင်လာခြင်း မရှိပါဘူး။
တော်ဝင်အသိုင်းအ၀ိုင်းဟာ နိုင်ငံရေးရဲ့ အထက်မှာရှိပြီး၊ နိုင်ငံရေးမှာ ကြားနေရမှာဖြစ်တာကြောင့် မင်းသမီးရဲ့ အမည်စာရင်းတင်သွင်းမှုကို ပယ်ချခဲ့တာဖြစ်တယ်လို့ ကော်မရှင်က ထုတ်ပြန်တဲ့ ကြေငြာချက်မှာ ဖော်ပြထားပါတယ်။
မတ်လ ၂၄ ရက်နေ့မှာ ကျင်းပမယ့် ရွေးကောက်ပွဲဟာ ၂၀၁၄ ခုနှစ် စစ်တပ်က အာဏာသိမ်းပြီးနောက် ပထမဆုံး ကျင်းပမယ့် ရွေးကောက်ပွဲဖြစ်ပြီး အာဏာသိမ်းစစ်ခေါင်းဆောင် လက်ရှိဝန်ကြီးချုပ် ပရာယွတ် ချန်အိုချာလည်း ၀န်ကြီးချုပ်အဖြစ် ၀င်ရောက်ယှဉ်ပြိုင်မှာ ဖြစ်ပါတယ်။
မင်းသမီးကို ၀န်ကြီးချုပ်လောင်းအဖြစ် အမည်စာရင်းတင်သွင်းခဲ့တဲ့ Thai Raksa Chart ပါတီကို ဖျက်သိမ်းဖို့ တောင်းဆိုမှုတွေ ရှိပေမယ့် ထိုင်းရွေးကောက်ပွဲကော်မရှင်ရဲ့ မနေ့ကထုတ်ပြန်မှုမှာ ဒီကိစ္စအကြောင်း ထည့်သွင်းပြောဆိုခြင်း မရှိပါဘူး။
အူဘိုလ်ရတ္တနာဟာ အမေရိကန်နိုင်ငံသားတစ်ယောက်ကို လက်ထပ်ခဲ့တာကြောင့် ထီးမွေနန်းမွေနဲ့ တော်ဝင်အမှတ်သညာကို စွန့်လွှတ်ခဲ့ရသူ ဖြစ်ပါတယ်။ အိမ်ထောင်ကွဲပြီးနောက်ပိုင်း ထိုင်းနိုင်ငံကို ပြန်ရောက်လာခဲ့ပြီး ပြည်သူတွေကတော့ သူမကို တော်ဝင်မင်းသမီးတစ်ဦးအဖြစ် ဆက်ဆံကြပါတယ်။
Ref: CNA
