ဒီဇင်ဘာ ၂၂၊ ၂၀၁၈
M-Media
– အစ္စလာမ့်ဘဏ္ဍာရေးလုပ်ငန်းကို ကမ္ဘာတစ်ဝှမ်း ပိုမိုဖြန့်ကျက် လုပ်ကိုင်နိုင်ဖို့အတွက် တူရကီ၊ မလေးရှားတို့နဲ့ ပူးပေါင်းကြိုးပမ်းသွားမယ်လို့ ကာတာနိုင်ငံက ပြောကြားလိုက်ပါတယ်။
ဘဏ်လုပ်ငန်းနဲ့ ငွေတိုက်စာချုပ်တွေအပါအ၀င် အစ္စလာမ့်ဘဏ္ဍာရေးလုပ်ငန်းရဲ့ ကမ္ဘာ့ဈေးကွက်ဟာ လက်ရှိတန်ဖိုး ကန်ဒေါ်လာ ၂ ထရီလီယံလောက် ရှိနေတာဖြစ်ပါတယ်။
Qatar Financial Centre ရဲ့ စီအီးအိုဖြစ်တဲ့ ယူဆက်ဖ် မိုဟာမက် အလ် ဂျိုင်ဒါက ဒိုဟာ၊ အစ္စတန်ဘူလ်နဲ့ မလေးရှားတို့ကို အချက်အခြာနေရာထားပြီး အစ္စလာမ့်ဘဏ္ဍာရေးလုပ်ငန်းကို ကမ္ဘာတစ်ဝှမ်း လွှမ်းခြုံနိုင်အောင် လုပ်ဆောင်သွားမယ်လို့ ဒိုဟာဖိုရမ်က အင်တာဗျူးမှာ ပြောကြားခဲ့ပါတယ်။
ဒီအစီအစဉ်သစ်အရ တူရကီဟာ ဥရောပ ဈေးကွက်၊ ကာတာက အရှေ့အလယ်ပိုင်းဈေးကွက်နဲ့ မလေးရှားက အာရှဈေးကွက်တွေမှာ အစ္စလာမ့်ဘဏ္ဍာရေးလုပ်ငန်းကို ဦးဆောင်ဦးရွက် ပြုရမှာ ဖြစ်ပါတယ်။
“ကျွန်တော်တို့လုပ်နေတဲ့ ဒီစီမံကိန်းအသစ်ဟာ ရည်မှန်းချက် ကြီးမားပါတယ်။ ကျွန်တော်တို့မှာ တူညီတဲ့ ရည်မှန်းချက်ရှိတယ်၊ တူညီတဲ့ တိုးတက်မှုအနေအထားတွေရှိတယ်။ ဒါ့ကြောင့် ဒီသုံးနိုင်ငံမှာ တော်တော်လေးကို အောင်မြင်ဖို့ရှိပါတယ်” လို့ ဂျိုင်ဒါက ထည့်သွင်းပြောကြားခဲ့ပါတယ်။
ရှရီအသ်နဲ့ကိုက်ညီတဲ့ ငွေတိုက်စာချုပ်ဈေးကွက် sukuk ဟာ ပြီးခဲ့တဲ့နှစ်အတွင်း ကမ္ဘာ့ဈေးကွက်ရဲ့ ၃၄ ရာခိုင်နှုန်းကို ရရှိခဲ့ပြီး skukuk လုပ်ငန်းကို ဦးဆောင်နေတဲ့ နိုင်ငံတွေထဲမှာ မလေးရှားနိုင်ငံလည်း ပါဝင်နေပါတယ်။ အပြန်အလှန် ပူးပေါင်းဆောင်ရွက်မှုကို မြှင့်တင်နိုင်ဖို့အတွက် မလေးရှားဟာ ၂၀၀၇ ခုနှစ်က ကာတာ၊ ဒူဘိုင်းတို့နဲ့ နားလည်မှုစာချွန်လွှာတွေကို လက်မှတ်ရေးထိုးခဲ့ပေမယ့် ပြီးခဲ့တဲ့နှစ်က စတင်ခဲ့တဲ့ ကာတာအပေါ် ပိတ်ဆို့မှုတွေကြောင့် လုပ်ငန်း အမှန်တကယ်ဖော်ဆောင်ရေးမှာ နှောင့်နှေး ကြန့်ကြာခဲ့ပါတယ်။
လန်ဒန်၊ ဟောင်ကောင်နဲ့ လူဇင်ဘတ်စတော့အိတ်ချိန်းတွေမှာ sukuk စနစ်ကို တွင်တွင်ကျယ်ကျယ်လုပ်ဆောင်နေပေမယ့် ဂျိုင်ဒီကတော့ဒီစနစ်ကို ဦးဆောင်တဲ့နိုင်ငံတွေဟာ မွတ်စလင်နိုင်ငံတွေ ဖြစ်သင့်တယ်လို့ ပြောကြားခဲ့ပါတယ်။
Ref: Nikkei
