ဇွန် ၁၊ ၂၀၁၈
M-Media
– ဥရောပကတင်ပို့တဲ့ စတီးနဲ့ အလူမီနီယံတွေအပေါ် အခွန်တိုးကောက်ဖို့ အမေရိကန်က ကြိုးစားမှုဟာ အန္တရာယ်ရှိတဲ့ ကစားပွဲတစ်ခုကို ကစားနေတာဖြစ်တယ်လို့ ဥရောပသမဂ္ဂရဲ့ ကုန်သွယ်ရေးဆိုင်ရာ အကြီးအကဲ စီစီလီယာ မာလ်မ်စထရောင်းက ပြောကြားလိုက်ပါတယ်။
အမေရိကန်သမ္မတ ဒေါ်နယ်ထရမ့်ဟာ ကုန်သွယ်ရေး မဟာမိတ်နိုင်ငံတွေဖြစ်တဲ့ ဥရောပသမဂ္ဂ၊ ကနေဒါနဲ့ မက္ကဆီကိုတို့က တင်သွင်းတဲ့ စတီးနဲ့ အလူမီနီယံတို့ကို အခွန်တိုးကောက်သွားမယ်လို့ မနေ့မှာ ကြေငြာခဲ့တာပါ။
စီစီလီယာ မာလ်စထရောင်းက ဒီလုပ်ရပ်ဟာ ဥရောပရဲ့ စီးပွားရေး ပြန်လည်ဦးမော့လာမှုနဲ့ အမေရိကန် စားသုံးသူတွေကို ထိခိုက်စေလိမ့်မယ်လို့ သတိပေးခဲ့ပါတယ်။
အမေရိကန်ရဲ့လုပ်ရပ်ကို တုန်ပြန်တဲ့အနေနဲ့ ဥရောပသမဂ္ဂဟာ သူတို့အခွန်တိုးကောက်မယ့် အမေရိကန်ကုန်ပစ္စည်း ၁၀ မျက်နှာစာ စာရင်းကို ထုတ်ပြန်ခဲ့ပြီး နာမည်ကျော် ဟာလီဒေဗစ်ဆင် ဆိုင်ကယ်ကနေ ၀ီစကီအထိ ပါဝင်ပါတယ်။
ကနေဒါနဲ့ မက္ကဆီကိုတို့ကလည်း အမေရိကန်ရဲ့ လုပ်ရပ်ကို ပြန်လည်တုန့်ပြန်သွားမယ်လို့ ထုတ်ပြန်ခဲ့ပါတယ်။
မာလ်မ်စထရောင်းက ဥရောပသမဂ္ဂအနေနဲ့ ဒီကိစ္စအတွက် ကမ္ဘာ့ကုန်သွယ်ရေးအဖွဲ့ (WTO) တိုင်ကြားသွားမယ်လို့ ဆိုပါတယ်။
ဒါပေမယ့် ငြိမ်ခံနေမှာမဟုတ်ဘဲ အမေရိကန်ကုန်ပစ္စည်းတွေအပေါ် အခွန်ကောက်သွားဖို့ကို မလုပ်မဖြစ် လုပ်ဆောင်သွားမှာဖြစ်ကြောင်း၊ ဒီကိစ္စကြောင့် အမေရိကန်-အီးယူ ကုန်သွယ်ရေးစစ်ပွဲ ဖြစ်မှာမဟုတ်ကြောင်းလည်း သူမက ထည့်သွင်းပြောဆိုခဲ့ပါတယ်။
Ref: BBC
