မေ ၂၉၊ ၂၀၁၈
M-Media
– မိမိတို့အစိုးရဟာ နိုင်ငံရဲ့ ဖွဲ့စည်းပုံအခြေခံဥပေဒကို ဆက်လက်စောင့်ထိန်းသွားမှာဖြစ်ပြီး လူမျိုးစုံ၊ ဘာသာစုံရဲ့ အခွင့်အရေးကိုလည်း အာမခံပေးသွားမယ်လို့ မလေးရှားဝန်ကြီးချုပ် မဟာသီယာ မိုဟာမက်က ပြောကြားလိုက်ပါတယ်။
ဒီကနေ့မှာကျရောက်တဲ့ Wesak Day (ဗုဒ္ဓနေ့) အထိမ်းအမှတ် နှုတ်ခွန်းဆက်စကားမှာ မဟာသီက ဒီလို ပြောကြားခဲ့တာဖြစ်ပြီး နိုင်ငံသားတွေအနေနဲ့ ဘာသာလူမျိုး မတူကွဲပြားမှုကို လေးစားရမယ်လို့လည်း ဆိုပါတယ်။
“ဒီလို ကွဲပြားမှုကို သည်းခံရုံသာမက လက်ခံတာမျိုးကို ကျွန်တော်တို့ ကျင့်သုံးရပါမယ်။ မလေးရှားမှာ လူများစု၊ လူနည်းစု ဘယ်သူပဲဖြစ်ဖြစ် လူမျိုးတိုင်းရဲ့ အခွင့်အရေးကို အခြေခံဥပဒေ၊ တိုင်းပြည်ရဲ့ ဥပဒေတွေနဲ့ ထိန်းသိမ်းကာကွယ်ပေးထားပါတယ်”
ဘာသာစကား၊ ယဉ်ကျေးမှု၊ ဘာသာအယူဝါဒ၊ လူမျိုး မတူကြတဲ့ မလေးရှားနိုင်ငံသားတွေဟာ သူတို့ရဲ့ ဘာသာရေးဆိုင်ရာ ဓလေ့ထုံးတမ်းတွေကို မျှဝေခံစားကြတယ်လို့လည်း မဟာသီက ထည့်သွင်းပြောဆိုခဲ့ပါတယ်။
“ဒါဟာ မလေးရှားရဲ့ ထူးခြားမှုပါ။ မလေးရှားမှာ ဘာသာရေးလွတ်လပ်ခွင့်ကို ကျင့်သုံးနေတယ်ဆိုတဲ့ သက်သေသာဓကလည်း ဖြစ်ပါတယ်”
ဘာသာရေးလွတ်လပ်ခွင့်ကို ထိန်းသိမ်းကာကွယ်ရမှာဖြစ်ပြီး ဒါမှသာ လူမျိုးရေး သဟဇာဖြစ်မှုနဲ့ ငြိမ်းချမ်းရေးကို ပျက်ဆီးစေတဲ့ လုပ်ရပ်မျိုးတွေ ဖြစ်လာမှမဟုတ်ဘူးလို့လည်း ၀န်ကြီးချုပ်ကဆိုပါတယ်။
“Wesak Day ဟာ ဗုဒ္ဓဘာသာကိုတည်ထောင်သူ ဂေါတမ ဗုဒ္ဓကို အောက်မေ့သတိရတဲ့အနေနဲ့ ကျင်းပတာပါ။ ဒါပေမယ့် ဒီနေ့ရဲ့ အရေးပါတဲ့သင်ခန်းစာ အခြားလူတွေအပေါ် အကောင်းပြုရမယ်ဆိုတာပါ။ ကျွန်တော်တို့အားလုံးရဲ့ ကြိုးပမ်းအားထုတ်မှုတွေကြောင့် တိုင်းပြည်ဟာ ဖွံ့ဖြိုးပြီး သာယာဝပြောတဲ့နိုင်ငံတစ်ခု ဖြစ်လာမယ်လို့ ကျွန်တော် မျှော်လင့်ပါတယ်”
မလေးရှား စီးပွားရေးဝန်ကြီး ဒါတွန် ဆရီ အဇ်မင် အလီကလည်း အခုနှစ် Wesak နေ့ဟာ မလေးပြည်သူတွေရဲ့ အပြောင်းအလဲကို တောင့်တမှုနဲ့ တိုက်ဆိုက်နေတာကြောင့် သမိုင်းဝင် နေ့ထူးနေ့မြတ်ဖြစ်တယ်လို့ ပြောကြားခဲ့ပါတယ်။
မလေးရှာဟာ ဗုဒ္ဓနေ့ကို နိုင်ငံရဲ့ တရားဝင်ရုံးပိတ်ရက်အဖြစ် သတ်မှတ်ပေးထားပါတယ်။
Ref: The Star
