မေ ၁၃၊ ၂၀၁၈
M-Media
– အင်ဒိုနီးရှားနိုင်ငံရဲ့ ဒုတိယအကြီးဆုံးမြို့ ဆူရာဘာယာမှာ ဒီကနေမနက်ပိုင်းက ခရစ်ယာန်ဘုရားကျောင်း ၃ ခုမှာ အသေခံဗုံးခွဲမှု ဖြစ်ပွားခဲ့တာကြောင့် အနည်းဆုံး လူ ၁၁ ဦး သေဆုံးခဲ့ပါတယ်။
ပထမဆုံး ပေါက်ကွဲမှုဟာ မနက် ၇ နာရီခွဲမှာ ဖြစ်တာဖြစ်ပြီး အဲ့ဒီနောက် ၁၀ မိနစ်အတွင်းမှာ နောက်ထပ် နှစ်ခု ဖြစ်ပွားခဲ့တာပါ။ ဒဏ်ရာရသူတွေ တော်တော်များများ ရှိနေတာကြောင့် သေဆုံးသူအရေအတွက်ကလည်း မြင့်တက်လာနိုင်ပါတယ်။
အင်ဒိုနီးရှားထောက်လှမ်းရေး အာဏာပိုင်တွေက ဒီတိုက်ခိုက်မှုတွေဟာ IS ကိုအားကျတဲ့ Jemmah Anshrut Daulah အဖွဲ့ရဲ့လက်ချက် ဖြစ်နိုင်တယ်လို့ ပြောကြားခဲ့ပါတယ်။ ဒါပေမယ့် တိုက်ခိုက်မှုလုပ်တယ်လို့ အခုအချိန်အထိ ဘယ်အဖွဲ့အစည်းကမှ ထုတ်ပြန်ခြင်း မရှိသေးပါဘူး။
မြို့တွင်းက အခြား ခရစ်ယာန်ဘုရားကျောင်းတစ်ခုမှာလည်း မပေါက်ကွဲသေးတဲ့ဗုံးကို ရဲတပ်ဖွဲ့က ရှင်းလင်းခဲ့ရပါတယ်။ လက်ရှိ ဒေသတွင်းက ခရစ်ယာန်ဘုရားကျောင်းတွေ ခေတ္တပိတ်ထားဖို့ ရဲတပ်ဖွဲ့က အမိန့်ထုတ်ပြန်ထားပြီး မြို့တွင်းမှာ ပြုလုပ်ဖို့ရှိနေတဲ့ အစားအသောက်ပွဲတော်ကြီးကိုလည်း ပယ်ဖျက်လိုက်ရပါတယ်။
မြို့တော် ဂျကာတာဆင်ခြေဖုံးက လုံခြုံရေးအဆင့်မြင့် ထောင်တစ်ခုမှာ IS အဖွဲ့ဝင် အကျဉ်းသားတွေက ပြီးခဲ့တဲ့ရက်ပိုင်းအတွင်း ဆူပူကာ အကြမ်းဖက်တိုက်ဖျက်ရေး အထူးအဖွဲ့ဝင် ၅ ဦးကို သတ်ဖြတ်ခဲ့ပြီးတဲ့နောက် ဒီတိုက်ခိုက်မှု ပေါ်ပေါက်လာတာ ဖြစ်ပါတယ်။ အဲဒီ ထောင်ဆူပူမှုဟာ ၃၆ နာရီ ကြာမြင့်ခဲ့ပါတယ်။
Ref: CNA
