ဇူလိုင် ၃၁၊ ၂၀၂၃
M-Media
-သြစတေးလျနဲ့ နယူးဇီလန်နိုင်ငံမှာ ကျင်းပနေတဲ့ ၂၀၂၃ အမျိုးသမီး ကမ္ဘာ့ဖလားမှာ မော်ရိုကို အမျိုးသမီးအသင်း သမိုင်းမှတ်တမ်းသစ်တွေ တစ်ခုပြီးတစ်ခု ရရှိနေပါတယ်။
မော်ရိုကိုအမျိုးသမီးအသင်းဟာ ၁၉၉၈ ခုနှစ်လောက်ကမှ စတင်ပြီး ကမ္ဘာ့ဘောလုံးလောကထဲကို ၀င်ရောက်လာတာပါ။ တတိယအကြိမ်မြောက် အာဖရိကဖလား အမျိုးသမီး ဘောလုံးပြိုင်ပွဲမှာ ၀င်ရောက်ယှဥ်ပြိုင်ခဲ့တာ ဖြစ်ပါတယ်။
ဒါပေမယ့် မော်ရိုကို ဘောလုံးအဖွဲ့ချုပ်ရဲ့ ထောက်ပံ့ကူညီမှု လုံလုံလောက်လောက် မရခဲ့တာကြောင့် ဒေသတွင်း အိမ်ဖြည့်အသင်း အဆင့်ထက် မပိုခဲ့ပါဘူး။
ပြီးခဲ့တဲ့ နှစ်အနည်းငယ်အတွင်းမှာတော့ အခြေအနေဟာ အကောင်းဖက်ကို ပြောင်းလဲခဲ့ပါတယ်။ ၂၀၂၀ ခုနှစ် တူနီးရှားနိုင်ငံမှာ ကျင်းပခဲ့တဲ့ အာဖရိက ၅ နိုင်ငံ အမျိုးသမီး ဘောလုံးပြိုင်ပွဲမှာ မော်ရိုကိုအသင်းဟာ တန်ဇန်းနီးယားကို အနိုင်ရပြီး ဗိုလ်စွဲခဲ့ပါတယ်။
၂၀၂၂ ခုနှစ် အိမ်ရှင်အဖြစ် လက်ခံကျင်းပခဲ့တဲ့ အာဖရိကဖလား အမျိုးသမီးဘောလုံးပြိုင်ပွဲအတွက် မော်ရိုကိုအမျိုးသမီးအသင်းဟာ အသေအချာ ပြင်ဆင်ခဲ့ပြီး အောင်မြင်မှုလည်း ရခဲ့ပါတယ်။
ပထမဆုံးအသင်း
အာဖရိကဖလားမှာ ဆီမီးဖိုင်နယ်အထိ တက်ရောက်နိုင်ခဲ့တဲ့ မော်ရိုကိုအမျိုးသမီးအသင်းဟာ ၂၀၂၃ ခုနှစ် အမျိုးသမီး ကမ္ဘာ့ဖလား ဘောလုံးပြိုင်ပွဲကို ၀င်ရောက်ခွင့်ရတဲ့ ပထမဆုံး မြောက်အာဖရိကနဲ့ အာရပ်နိုင်ငံအဖြစ် မှတ်တမ်း၀င်ခဲ့ပါတယ်။
၂၀၂၂ ခုနှစ် အာဖရိကဖလားမှာ မော်ရိုကိုအမျိုးသမီးအသင်းဟာ ဖိုင်နယ်အထိ တက်ရောက်နိုင်ခဲ့ပြီး တောင်အာဖရိကအသင်းကို ရှုံးကာ ဒုတိယနဲ့သာ ကျေနပ်ခဲ့ရပါတယ်။
“ကမ္ဘာ့ဖလားမှာ ၀င်ရောင်ယှဥ်ပြိုင်ခွင့်ရတဲ့ ပထမဆုံး အာရပ်အသင်း ဖြစ်တဲ့အတွက် ဂုဏ်ယူမိပါတယ်။ ပုံရိပ်ကောင်းရဖို့၊ ရရှိထားတဲ့ အောင်မြင်မှုတွေကို ချဲ့ထွင်ဖို့ ကျွန်မတို့ ပုခုံးပေါ်မှာ တာ၀န်တစ်ခု ရှိနေပြီဆိုတာကိုလည်း နားလည်ပါတယ်” လို့ မော်ရိုကို အသင်းခေါင်းဆောင် ဂီဇ်လာနီ ချက်ဘက်က ပြောပါတယ်။
ပထမဆုံးနိုင်ပွဲ
ဇူလိုင်လ နောက်ဆုံးပတ်ကစတင်ကာ ကျင်းပနေတဲ့ ကမ္ဘာ့ဖလား အမျိုးသမီး ဘောလုံးပြိုင်ပွဲမှာ မော်ရိုကိုအသင်းဟာ ကိုလံဘီယာ၊ ဂျာမနီ၊ တောင်ကိုရီးယားတို့နဲ့ တစ်အုပ်စုတည်း ကျရောက်နေပါတယ်။
အတွေ့အကြုံနည်းတဲ့ မော်ရိုကိုအသင်းအတွက် နောက်တစ်ဆင့်တက်ဖို့ မလွယ်ကူတဲ့ အခြအနေမျိုးဖြစ်ပြီး အုပ်စုဖွင့်ပွဲမှာလည်း ဂျာမနီအသင်းကို ၆ ဂိုး ပြတ်နဲ့ ရှုံးနိမ့်ခဲ့ပါတယ်။
ဒါပေမယ့် ဒုတိယပွဲတော့ ခြင်္သေ့မတွေဟာ သမိုင်း၀င်နိုင်ပွဲကို ရယူနိုင်ခဲ့ပါတယ်။
တောင်ကိုရီးယားအသင်းကို အကြိတ်အနယ်ကစားပြီး ၁ ဂိုး ဂိုးမရှိနဲ့ အနိုင်ရခဲ့တာဖြစ်ပါတယ်။ ကမ္ဘာ့ဖလား နောက်ဆုံးအဆင့်မှာ မော်ရိုကိုအသင်းရဲ့ ပထမဆုံး နိုင်ပွဲလည်း ဖြစ်ခဲ့ပါတယ်။
ပထမဆုံး ပု၀ါဆောင်း ကစားသမား
မော်ရိုကိုအမျိုးသမီးတွေအတွက် နောက်ထပ် သမိုင်းသစ်ရေးထိုးနိုင်ခဲ့သူကတော့ နောက်ခံလူ နူဟိုင်လာ ဘန်ဇီနာ ဖြစ်ပါတယ်။
ကမ္ဘာ့ဖလားပြိုင်ပွဲမှာ ဟီဂျဘ်ပု၀ါဆောင်းပြီး ၀င်ကစားတဲ့ ပထမဆုံးအမျိုးသမီးအဖြစ် ဘန်ဇီနာတစ်ယောက် မှတ်တမ်း၀င်ခဲ့ပါတယ်။ အုပ်စုအဖွင့်ပွဲစဥ် ၂ ပွဲစလုံး ပထမ ၁၁ ယောက်စာရင်းမှာ ပါ၀င်ခဲ့ပြီး ခြေစွမ်းကောင်းကိုလည်း ပြသနိုင်ခဲ့ပါတယ်။
“ဘန်ဇီနာနေရာကို ငါလည်းရောက်နိုင်တာပဲလို့ (မော်ရိုကို) မိန်းကလေးတွေ တွေးလာကြမယ်။ မူ၀ါဒ ချမှတ်သူတွေ၊ ဆုံးဖြတ်ချက် ချမှတ်သူတွေကလည်း ဒီအောင်မြင်မှုကို အသိအမှတ်ပြုပြီး၊ ပြိုင်ပွဲမှာ အမျိုးသမီးတွေ၊ မိန်းကလေးငယ်တွေ ပိုမိုပါ၀င်လာအောင် အခွင့်အလမ်းတွေ ဖန်တီးပေးဖို လိုအပ်နေပြီလို့ ပြောလာကြတော့မှာပါ” လို့ Muslim Women in Sports Network အဖွဲ့ကို ပူးတွဲတည်ထောင်သူ အက်စ်မာ ဟီလာလ်က ပြောပါတယ်။
မော်ရိုကို အမျိုးသမီးအသင်းဟာ သြဂုတ်လ ၃ ရက်နေ့မှာ အုပ်စုဗိုလ် ကိုလံဘီယာအသင်းနဲ့ နောက်ဆုံးပွဲစဥ် ကစားရမှာဖြစ်ပြီး နောက်ထပ် သမိုင်းသစ် ရေးထိုးနိုင်မလားဆိုတာကို စောင့်ကြည့်ရမှာ ဖြစ်ပါတယ်။
Ref: Olympics.com/Wiki
