သတိပေးစာများ….

လူဆိုသည်ကို အဓါပ္ပါယ်ဖွင့်ရသည်မှာ လွယ်ကူသည့်ကိစ္စတစ်ခုတော့ မဟုတ်ပေ။…………………..

လူဟူသည့် သတ္တ၀ါသည် အလွန်တရာ ဆန်းကြယ်လှသည်မှာတော့ သေချာပေသည်။ သူတပါးက ကိုယ့်ကို လှည့်စားမှာ၊ လိမ်ညာသွားမှာကို သေမလောက် ကြောက်ကြပေမဲ့ မျက်လှည့်ကိုကျတော့ ပိုက်ဆံပေးကြည့်တတ်ကြသည့် ကိစ္စမှာလည်း ဆန်းကြယ်ပေသည်။ သူတပါးက ကိုယ့်ကို ချိုးနှိမ်သွားမှာ၊ သူတပါး ခြေထောက်အောက်ကို ရောက်ရမှာ သေမလောက် စိုးရိမ်ကြပေမဲ့လို့လည်း အနှိပ်သည်ကို ပိုက်ဆံပေးနှိပ်ခိုင်းကြသည့် ကိစ္စလည်း အပါအ၀င်ပင် ဖြစ်သည်။ ပို၍ ထူးဆန်းသည်ကတော့ သူတပါး၏ တံတွေးထွေးရွံရှာခြင်းကို ခံရမှာ ကြောက်ကြသည့် သူများက ပယောဂဆရာ သို့မဟုတ် ပုဂ္ဂိုလ်တစ်ယောက်ယောက်ကို ပိုက်ဆံပေး၍ တံတွေးထွေးကာ မန်းမှုတ်ခိုင်းစေခြင်းပင် ဖြစ်သည်။

ထို့ပြင် မလုပ်နှင့်ဆိုသည့်အရာကိုမှ လုပ်ချင်သည်။ မစားနှင့်ဆိုလျှင် စားချင်သည်။ ( ကမ္ဘာဦးထဲက မစားသင့်သည့် အသီးကို စားမိ၍ ဒုက္ခရောက်ပုံများကို တွေးဆကြည့်ကြပါ။) ။ အချို့လူများကတော့ မလုပ်နှင့်ဆိုသော အရာကို ဗြောင်ပင်လုပ်သည်။ အချို့ကတော့လည်း သွယ်သွယ်ဝိုက်ဝိုက်၊ သိုသိုသိပ်သိပ်ပေါ့လေ……။

ကျွန်မတို့တွင် ကျွန်မတို့မိသားစုဝင်များ စုပေါင်း၍ ဖွင့်ထားသည့် စားသောက်ဆိုင်လေး တစ်ဆိုင်ရှိပါသည်။ ကျွန်မတို့ မြို့ကလေးတွင်တော့ ထိုကဲ့သို့သော ဆိုင်များကို လက်ချိုးရေကြည့်၍ပင် ရနိုင်လေသည်။ ကျွန်မတို့ မြို့လေးသည် အတန်ငယ် ကျဉ်းမြောင်းလှသော်လည်း နယ်စပ်မြို့တစ်မြို့ ဖြစ်သည့်အတွက် အစဉ်သဖြင့် စည်ကားနေတတ်ပေသည်။

စားသောက်ဆိုင်ဖြစ်သည့်အလျောက် လူ့အာဘော်များ ထွက်ကျစီးဆင်းရာ နေရာလည်း ဖြစ်ပေသည်။ လူ့ဘာဝအတိုင်း စားကြသောက်ကြရင်း ဘ၀အကြောင်း၊ မိသားစုအကြောင်း၊ သားရေးသမီးရေးအကြောင်း၊ အရောင်းအ၀ယ်အကြောင်း၊ သာကြောင်းမာကြောင်းများအပြင် ယုတ်စွအဆုံး ခွေးနှစ်ကောင်ကိုက်ကြသည့် အကြောင်းကိုပါ ထည့်သွင်းပြောတတ်ကြပေရာ စားသောက်ဆိုင်ဆိုသည်မှာ ဆည်းပူးသင်ယူမကုန်နိုင်သော ဗဟုသုတဟင်းလေးအိုးကြီးသဖွယ်ပင် ဖြစ်သည်ဟု အကဲပိုပိုနှင့် ဆိုချင်လည်း ဆို၍ရနိုင်သည့် အနေအထားမျိုးပင် ဖြစ်ပေသည်။

ကျွန်မတို့၏ ဆိုင်လေးတွင် သတိပေးစာများ ချိတ်ဆွဲထားပေသည်။ “ဆေးလိပ်မသောက်ရ။ အရက်၊ဘီယာ၊ မူးယစ်ဆေးများကို ဤဆိုင်အတွင်း သုံးစွဲခွင့်မပြု၊ အစားအစာများကို ပူပူနွေးနွေးချက်ပြုတ်ပေးနေပါသဖြင့် အနည်းငယ်စောင့်ဆိုင်းပေးကြပါရန်…” စသည်ဖြင့်ပေါ့လေ။ ကျွန်မတို့ဆိုင်ကို ၀င်လာသည့်လူတွေထဲက လူတစ်ချို့ကတော့ “သည်ဆိုင်က warning တွေ များလိုက်တာ” ဟု ဆိုချင်ဆိုကြလိမ့်မည်။

“ဆေးလိပ်မသောက်ရ” ဟု ကပ်ထားသော်လည်း ဆေးလိပ်သောက်လို့ရလားဟု တချို့လူများက ထပ်မေးတတ်သည်။ တချို့လူတွေဆိုလျှင် လွန်ကဲလာကာ မီးခြစ်ကိုပင် တောင်းတတ်ကြသေးသည်။ ထိုသို့မေးသောအခါမျိုးတွင် သတိပေးစာကို ကျွန်မ လက်ညှိုးထိုးပြတတ်သည်။ သို့သော် ထိုလူများက သူတို့သည် စာဖတ်တတ်သည့်အကြောင်းကို ပြန်ပြောလေရာ စာဖတ်တတ်သူတစ်ယောက်အဖို့ မေးစရာပင်မလိုကြောင်း ကျွန်မကလည်း ခပ်သွက်သွက်ပင် ပြန်ပြောရလေသည်။ ဟုတ်သည်လေ။ စာဖတ်တတ်နေလည်း မေးစရာမှမရှိတာကို…။

သည်ခုံမှာ မထိုင်ပါနှင့်ဟု ကျွန်မက အတန်တန်တားသည်ကို “ထိုင်တော့ ဘာဖြစ်သေးလဲ” ဟု ပြော၍ ခုံပေါ်ထိုင်ချသော လူတစ်ယောက်သည် ပြုတ်ကျသွားဖူးပါသေးသည်။ ခုံက အောက်ခံကြိမ်လေးတွေက ပြတ်ထွက်လုနီးပါး ဖြစ်နေသည့်အတွက် ပြန်ပြင်ဆင်ရန် သီးသန့်ထားရှိသော ခုံတစ်ခုံဖြစ်သည်။ အခြားခုံတွေနှင့် မရောနှောထားပါဘဲလျက် သူက ထိုခုံကိုမှ ထိုင်ချင်သည်တဲ့လေ။ “ထိုင်လိုက်တော့ အဲ့လိုပြုတ်ကျသွားတာပေါ့”  ဟုပဲ ကျွန်မ ပြန်ဖြေခဲ့ပါသည်။

နောက်ထပ်လူတစ်ယောက်ကတော့ နည်းနည်းလေးဆန်းသည်။ “ဖုန်းပြောချင်လို့ သီချင်းသံကို တိုးပေးပါဦး” တဲ့။ ထိုင်ရာမှပင် မထဘဲ ပြောနေသည်။ ထိုလူသည် ဘေးပတ်ဝန်းကျင်ကိုလည်း မြင်ဟန်မတူ။ သူသိသည်မှာ သူနှင့် သူဖုန်း အကြောင်းကိုပင် ဖြစ်လိမ့်မည်။ သူဖုန်းပြောရနိုင်ဖို့အတွက် သည်ဆိုင်၏ ဖွင့်ထားသော သီချင်းသံကိုပါ တိုးပေးရဦးမည်တဲ့။ ဒါက လူ့အခွင့်အရေးတဲ့လား။ အမှန်တကယ် ထိုသူလုပ်သင့်သည်က ဖုန်းကိုကိုင်ကာ အပြင်ထွက်၍ စကားသွားပြောရန်ပင် ဖြစ်သည်။ သို့သော်လည်း…..။

ကျွန်မက သီချင်းသံတိုးမပေးနိုင်ကြောင်း၊ အပြင်ထွက်ပြီး ပြောလျှင် ပို၍ အဆင်ပြေနိုင်ကြောင်း ပြောပြသည့်အခါတွင်တော့ “ ကျွန်တော်တို့က လာစားတဲ့ customer တွေနော” ဟူ၍ မျက်နာထိ မျက်နှာထားနှင့် ပြန်ပြောပါသည်။ “ ဟုတ်ပါတယ်၊ ကျွန်မတို့ဆီမှာ လာစားတဲ့အတွက်လည်း ကျေးဇူးတင်ပါတယ်။ အကိုတို့ကလည်း အဆင်ပြေလို့လာစားတယ်၊ ကျွန်မတို့ကလည်း တန်ရာတန်ကြေးရောင်းပေးတယ်၊ ဒီထက်ပိုတဲ့ ၀န်ဆောင်မှုမျိုးကိုတော့ ကျွန်မတို့ဆိုင်က မပေးနိုင်ပါဘူး၊ ဒါကြောင့် ကိုယ့်တစ်ယောက်တည်းအတွက်နဲ့တော့ ကျန်တဲ့သူတွေကို စိတ်အနှောင့်ယှက် မဖြစ်စေတာ ပိုကောင်းလိမ့်မယ်” လို့ ကျွန်မရိုးရိုးလေးပဲ ပြန်ပြောလိုက်ပါသည်။ ထိုလူက ကျွန်မကို မည်သို့ထင်သွားမလဲတော့ ကျွန်မ မပြောတတ်ပါ။

ကျွန်မကတော့ ထိုသို့သော လုမျိုးတွေအတွက် “ အသက်မရှုရ၊ စကားမပြောရ” ဆိုသည့် သတိပေးစာများကိုပါ ခပ်ငေါ့ငေါ့နှင့် ထည့်သွင်းရေးပေးစေချင်ပါသည်။ သို့သော် ထိုသို့ထပ်ရေးလိုက်ပါက ကျွန်မတို့ဆိုင်တွင် မည်သူမှ လာစားကြတော့မှာ မဟုတ်မှန်း သေချာပါသည်……။

ကျွန်မတို့ရောင်းသော အစားအစာများမှာ ချက်ချင်းချက်ပြုတ်ကြော်လှော်ရသည့် အစားအသောက်များ ဖြစ်သောကြောင့် တကယ်ကိုပင် လတ်လတ်ဆတ်ဆတ်နှင့် ပူပူနွေးနွေး စားရပါသည်။ ထို့ကြောင့် အနည်းငယ် ကြာကောင်းကြာလိမ့်မည်။ ထိုအကြောင်းကိုလည်း သတိပေးစာအဖြစ် ကပ်ထားပေးပြီး ဖြစ်သည်။ “နည်းနည်းတော့ ကြာမယ်နော” ဟု ကြိုပြီး မေတ္တာရပ်ခံထားသော်လည်း ၁၀မိနစ်ထက် ပိုလာလျှင်တော့ “မရနိုင်သေးဘူးလား” ဟု အော်ဟစ်တတ်ကြသည်။ လူတစ်ယောက်ဆိုလျှင် မှာထားသည့် ခေါက်ဆွဲများကို နောက်ကျမှရသည်ဆို၍ တစ်ပန်းကန်လုံးကို သွန်ပစ်ခဲ့ဖူးသည်။ သို့သော် သူသွန်သည်ကို ကျွန်မတို့ မသိမည်စိုး၍ ဆိုင်မှစားပွဲထိုးလေးကို ခေါ်ကာ သူသွန်ပစ်လိုက်သည့်အကြောင်းကို အာပေါင်အာရင်းသန်သန်နှင့် တကူးတကကို ပြောပြနေပါသည်။

အို… ဘယ်လိုလူတွေပါလိမ့်။ သူပိုက်ဆံပေး၍ သွန်ပစ်သည်ကို သိသော်လည်း ကျွန်မတို့ဆိုင်က ပစ္စည်းဖြစ်နေသည်မို့ စိတ်ထဲ တကယ်ပင် ၀မ်းနည်းသွားမိသည်။ သွန်ပစ်၍ ရသည်ဆိုခြင်းက သူ့အခွင့်အရေးပါ။ သို့သော် ကိုယ့်ကိုယ်ပိုင် လွတ်လပ်ခွင့်များသည် တပါးသူကို ထိခိုက်စေသည်ဆိုပါက ကောင်းသော လွတ်လပ်ခွင့်မဟုတ်မှန်းတော့ သဘောပေါက်သင့်ပေသည်။

ထိုသို့သော လူများအတွက် ကျွန်မတို့ဆိုင်ရှင်တွေက မည်သို့ဆက်ဆံပေးရမည်နည်း။ ကျွန်မအမြင်မှာတော့ လူသားတစ်ယောက်နှင့်တစ်ယောက် အပြန်အလှန်လေးစားကြလျှင် သည်လိုပြဿနာတွေကို ကြုံရမှာမဟုတ်ဟုပဲ မှတ်ချက်ချမိသည်။ သို့သော် ပြန်စဉ်းစားကြည့်တော့လည်း မည်သို့ဖြစ်နိုင်ပါမည်နည်း။ လူရယ်လို့ ဖြစ်လာကတည်းက ရန်ပွဲတွေ စစ်ပွဲတွေက ရှိနေပြီပဲလေ။

သို့သော်လည်း ကိစ္စတိုင်းတွင် “စည်း” ဆိုသည်က ရှိနေပေသေးသည်။ ဘုရားထဲသို့ဝင်လျှင် ဖိနပ်ချွတ်ရသည်။ “ဖိနပ်ချွတ်ပါ” ဟု ရေးထားပြောထားသော နေရာတွင် ဖိနပ်ချွတ်ရမည်။ “ကွမ်းတံတွေးမထွေးရ” ဟု ဆိုသော နေရာ၊ “အမှိုက်မပစ်ရ” ဆိုသော နေရာ စသည်ဖြင့် စည်းဘောင်လေးတွေကတော့ ရှိကြစမြဲပင်။ ပြဿနာ၏ အဖြေကတော့ ရှင်းရှင်းလေးပဲ ဖြစ်သည်။ ထိုအရာများကို မလိုက်နာနိုင်ပါက ထိုအရာများရှိသော နေရာသို့ မသွားမိစေရန်ပင် ဖြစ်သည်။ သွားမိခဲ့လျှင် လေးစားလိုက်နာရမည်က လူတစ်ယောက်၏ မွေးရာပါအသိနှင့် သင်စရာမလိုသည့် တာဝန်တစ်ခုသာ ဖြစ်ရပေမည်။

ကျွန်မတို့၏ ဆိုင်လေးမှ သတိပေးစာများသည် ထိုသူတို့အတွက် နာကျင်စရာများ ဖြစ်နေမည်လား သို့မဟုတ် အမြင်ကပ်စရာများ ဖြစ်နေမည်လား။ အသေအချာတော့ မပြောတတ်ပေ။ သို့သော် “ ဆေးလိပ်မသောက်ရ၊ အရက်၊ဘီယာ၊ မူးယစ်ဆေးများကို ဤဆိုင်အတွင်း သုံးစွဲခွင့်မပြု၊ အစားအစာများကို ပူပူနွေးနွေး ချက်ပြုတ်ပေးနေပါသဖြင့် အနည်းငယ်စောင့်ဆိုင်းပေးကြပါရန်..” စသည့် သတိပေးစာများထဲတွင်တော့ ထိုသူတို့၏ လွတ်လပ်ခွင့်ကို ချုပ်ချယ်သော စာသားမျိုးများ စိုးစဉ်းမျှပင် မပါဝင်ပါဟု စဉ်းစားမိပေသည်။ သည်စာတွေထဲမှာ ဘာများအမှားတွေ ပါနေသနည်း။

သူတို့၏ လွပ်လပ်ခွင့်ကို ချုပ်ချယ်မိသည်ပဲ ထားဦး။ “ကိုယ့်နေရာ၊ ကိုယ့်အရပ်ဒေသမှာ ကိုယ့်စည်းလေးတော့ ကိုယ်ထားဦးမှာပေါ့” ဟု ဆိုလျှင်ရော… ။ သည်ကိစ္စဟာလည်း ကျွန်မတို့ ကိုယ်ပိုင်လွပ်လပ်ခွင့်ပဲ မဟုတ်လား။ ယခုတော့ ကျွန်မလည်း လူပေါင်းစုံအကြောင်းကို ဖောက်သည်ချနေမိသည်(့ တနည်း) အတင်းပြောနေမိသည့် လူတစ်ယောက် ဖြစ်မှန်းမသိ ဖြစ်နေခဲ့လေပြီ။( ကျွန်မအပါအ၀င်ပေါ့လေ။ လူတွေက တယောက်တမျိုးစီချည်းပါပဲ။)

အများက “ဤ” ကို “ ကျွဲ” ဖတ်နေချိန်တွင် “ဤ” ကို “ဤ” ဟုသာ အရှိအတိုင်းဖတ်နေသည့်လူအား “စည်းအပြင်ဘက်ကလူ” ဟု ၀ိုင်းပြီး သမုတ်ကြတော့မည်ကို ကျွန်မ အသေအချာ ပြောရဲပါသည်။

Khalay