ရခိုင် သတင်းဌာန ၂ ခုမှ သတင်း ၃ ပုဒ် မှန်ကန်မှု မရှိကြောင်း ရဲတပ်ဖွဲ့မှ သတင်းထုတ်ပြန်

ဇန်နဝါရီ ၁၈ ၊ ၂၀၁၃
M-Media

ရခိုင် သတင်းဌာနများဖြစ်သော Arakan Review သတင်းဌာန မှ သတင်း ၂ ပုဒ် နှင့် ဘင်္ဂလားဒေရ်ှအခြေစိုက် နီရဉ္စရာသတင်းဌာနမှ  သတင်းတစ်ပုဒ်တို့မှာ မှန်ကန်မှု့ မရှိကြောင်းကိုမြန်မာနိုင်ငံရဲတပ်ဖွဲ့ရဲ့ တရားဝင်သတင်း ထုတ်ပြန်လျက်ရှိသော ရဲဇာနည် FB စာမျက်နှာတွင် ဖော်ပြထားကြောင်းကို တွေ့ရှိရပါသည်။

ရဲဇာနည် စာမျက်နှာမှ ဖော်ပြချက်အပြည့်အစုံမှာ အောက်ပါအတိုင်းဖြစ်ပါသည်။

၁။ နီရဉ္စရာသတင်းဌာနမှသတင်းမှာ မှန်ကန်မှုမရှိ

နေပြည်တော်၊ ဇန်န၀ါရီ ၁၈
၁၀-၁-၂၀၁၃ ရက်နေ့ထုတ် နီရဉ္စရာသတင်းဌာနမှ ““နစကတပ်ဖွဲ့ဝင်ပစ်ခတ်၍ ဘင်္ဂလားဒေ့ရှ် နိုင်ငံသား တစ်ဦးပျောက်ဆုံး”” ခေါင်းစဉ်ပါ ဖော်ပြချက်အား စိစစ်ခဲ့ရာ ၁၁-၁-၂၀၁၃ ရက်နေ့ ၁၅၃၀ အချိန်မှ ၁၇၀၀ အချိန်ထိ မောင်တောမြို့၊ ခရိုင်အုပ်ချုပ်ရေးမှူးရုံး အစည်းဝေးခန်းမတွင်ပြုလုပ်သည့် အစည်းအဝေးတွင် နယ်စပ်ဒေသ လူဝင်မှုစစ်ဆေးရေး ကွပ်ကဲမှုဌာနချုပ် ကွပ်ကဲရေးမှူးမှ မှန်ကန်မှုမရှိကြောင်း ပြောကြားခဲ့သည်ဟု သိရှိရသည်။

၂။ Arakan Review သတင်းဌာနမှသတင်းမှာ မှန်ကန်မှုမရှိ

၁၀-၁-၂၀၁၃ ရက်နေ့ထုတ် Arakan Review သတင်းဌာနမှ ““ ဓါတ်ငွေ့ပိုက်လိုင်း သွယ်တန်းရေး စားဝတ်နေရေးဖယ်ရှားပေး”” ခေါင်းစဉ်ပါ သတင်းအားစိစစ်ခဲ့ရာ ရခိုင်ပြည်နယ်၊ ကျောက်ဖြူမြို့နယ်မှ တရုတ်နိုင်ငံ၊ ကူမင်းမြို့ ရေနံနှင့်သဘာဝဓါတ်ငွေ့ပိုက်လိုင်း သွယ်တန်းခြင်း လုပ်ငန်းခွင်တွင် ပင်လယ်ရေအောက်ပိုက်လိုင်း သွယ်တန်းရာ လမ်းကြောင်း တစ်လျောက် ရေအောက်ကြမ်းပြင် ရှင်းလင်းရေးအား ဒေ၀ူးကုမ္ပဏီလက်အောက်ရှိ Dhardi ကုမ္ပဏီမှ ရေအောက်ရှင်းလင်းရေး သင်္ဘောဖြင့် ကျောက်ဖြူမြို့နယ်၊ မြဒေးကျွန်း ရေနက်ဆိပ်ကမ်းမှ နဂါးမှော်ကျောက်တန်းအထိ ပင်လယ်ကူး သင်္ဘောကြီးများ ၀င်ထွက်မည့်လမ်းကြောင်း ရှင်းလင်းရေးဆောင်ရွက်ရာ အဆိုပါနေရာများတွင် ငါးဖမ်းခြင်းမပြုရန် တားမြစ်ထားခြင်းမရှိကြောင်း၊ ဒေသခံများမှ ငါးဖမ်းလျက်ရှိပြီး ရေလမ်းကြောင်း ပျက်စီးမှုမရှိကြောင်း၊ သန္တာကျောက်တန်းကြီးများ ပျက်စီးမှုမရှိကြောင်း၊ ငါးဖမ်းကွက်များလည်း ပျက်စီးမှုမရှိကြောင်းနှင့် အဆိုပါသတင်းများမှာ မှန်ကန်မှုမရှိကြောင်း သိရှိရသည်။

၃။ Arakan Review သတင်းဌာနမှသတင်းမှာ မှန်ကန်မှုမရှိ

၁၃-၁-၂၀၁၃ ရက်နေ့ထုတ် Arakan Review သတင်းဌာနမှ ဖော်ပြပါရှိသည့် ““ ရခိုင်လူမျိုး အစိုးရတပ်သားတစ်ဦးအား ဘင်္ဂလီများ အကြမ်းဖက်တိုက်ခိုက်၊ လက်နက်များလုယူ ထွက်ပြေး””သတင်းတွင် တပ်မတော်သားတစ်ဦးအား ဘင်္ဂလီလူမျိုးမှ ဓါးဖြင့်ခုတ်ခဲ့သည်မှာ မှန်ကန်သော်လည်း လက်နက်များ လုယူထွက်ပြေးသည့် သတင်းမှာ မှန်ကန်မှုမရှိကြောင်း သိရှိရသည်။