ကဒါဖီ ရဲ့ သား ပြင်သစ်သမ္မတထံမှ ငွေ ပြန်တောင်း

လစ်ဗျား ကိစ္စအပေါ် ပြင်သစ်ရဲ့ တုံ့ပြန့်ပုံက တူနီရှားနဲ့ အီဂျစ် လူထုဆန္ဒပြပွဲတွေကလို ခပ်ရှော်ရှော် မဟုတ်တော့။ ဘာစိတ်ကူးပေါက်သွားတယ်မသိ၊ ယခု ရက်ပိုင်း ပြင်သစ် အတော် တိုးတက်လာတယ် ဆိုရမည်။

ပြင်သစ်သမ္မတ ဆာကိုဇီက ကဒါဖီ အစိုးရကို ဖိအားပေးလာသည်။ သူပုန်တွေကို အသိအမှတ်ပြုပြီး လေယာဉ် မပျံသန်းရ ဇုံကို တွန်းပေးနေသည်။ ဒီအတွက် ကဒါဖီ သားအဖက အရင် သမ္မတ ဆာကိုဇီ ရွေးကောက်ပွဲမှာ အနိုင်ရဖို့ ထောက်ပံ့ ပေးခဲ့တဲ့ ငွေတွေ ပြန်တောင်းနေသည်။

ကဒါဖီရဲ့ သား ဆာအိဖ် အယ်လ် အစ္စလာမ်က သမ္မတ ဆာကိုဇီ ကို “ကျူပ်တို့ပေးခဲ့တဲ့ ငွေတွေ ပြန်ပေး” ဟု အင်တာဗျူး တစ်ခုပြောရင်း အော်တောင်းသည်။ CNN သတင်းထောက်က ကဒါဖီ့ သားကို “အခု ပြင်သစ်က လစ်ဗျားမှာ ကြားဖြတ် အစိုးရ ဖြစ်ဖို့ တောင်းဆိုနေတယ် ခင်ဗျား သဘောထား ဘယ်လိုရှိလဲ” မေးကြည့်တော့ ဆာအိဖ် က

“ဆာကိုဇီ ဟာ သူရွေးကောက်ပွဲ ၀င်ပြိုင်ဖို့ လစ်ဗျားက ယူသွားတဲ့ ငွေတွေ အရင်ဆုံး ပြန်ပေးရမယ်။ ကျူပ်တို့ သူ ရွေးကောက်ပွဲ စည်းရုံးနိုင်ဖို့ ငွေအများကြီး ထောက်ပံ့ ပေးခဲ့တယ်။ ကျူပ်တို့မှာ အသေးစိတ် အချက်အလက်တွေ အတိအကျ ရှိတယ်။ အကုန်လုံး ဖွင့်ချလိုက်ဖို့ အသင့်ပဲ” ဟု ဆိုသည်။

ဆက်ပြီး သူက “အဲဒီ ပြောင်ချော်ချော်ရုပ်နဲ့ ဆာကိုဇီ ကို ပထမဆုံး ပြောချင်တာက လစ်ဗျားက ငွေတွေ ပြန်ပေးပါလို့။ လစ်ဗျားကို သူအမြဲကူပါမယ်ဆိုလို့ ကျူပ်တို့ ပိုက်ဆံတွေ ပေးလိုက်ရတယ်။ အခု သူက ကျူပ်တို့ကို စိတ်ပျက်အောင် လုပ်နေပြီ။ ကျူပ်တို့ ငွေတွေပြန်ပေးပါ။ ကျူပ်တို့မှာ ဘဏ်စာရင်း အတိအကျနဲ့ ငွေလွှဲတဲ့ အထောက် အထားတွေ အားလုံး ရှိပါတယ်။ မကြာခင် လူသိရှင်ကြား ဖွင့်ချပစ်မယ်” ဟု ပြောခဲ့သည်။

ပြီးခဲ့တဲ့ ရက်သတ္တပတ်များအတွင်း အနောက်နိုင်ငံများက ကဒါဖီ ရဲ့ ငွေကြေးပိုင်ဆိုင်မှု အားလုံးကို ချိတ်ပိတ်လိုက်သည်။ ကဒါဖီ သားအဖက အနောက်မှ ခေါင်းဆောင်အချို့ကို အရင် လက်ဖွာခဲ့သမျှ ပြန်လိုချင်နေကြသည်။ ကဒါဖီ သားအဖကို မြန်မြန်ှရှင်းပစ်မှပဲ သူတို့ သားအဖနဲ့ မကင်းတဲ့ သူတွေလည်း စိတ်ချမ်းသာနိုင်မည်။ ဒီအတွက် ယခု လုံခြုံရေးကောင်စီ လည်း အသက်ဝင်လာပြီ။

မောက္ခ နိုင်ငံတကာသတင်း Source: FP & CNN