ပဲခူးတိုင်း ရွှေတောင်မြို့နှင့် နတ်တလင်းမြို့တို့တွင် ဗလီနှင့် မွတ်စလင်မ် အိမ်များအား ဖျက်ဆီးမည် သတင်း ထွက်ပေါ်နေမှုကြောင့် မြို့ခံများ စိုးရိမ်နေ

မတ်လ ၂၆၊ ၂၀၁၃
M-Media
KK

ပဲခူးတိုင်း ရွှေတောင်မြို့နှင့် နတ်တလင်းမြို့တို့တွင် ဗလီနှင့် မွတ်စလင်မ်အိမ်များအား အကြမ်းဖက်သမားများက ဖျက်ဆီးမည်ဟု သတင်းများထွက်ပေါ်နေသောကြောင့် မြို့ခံ လူထုမှာ စိုးရိမ်နေကြောင်းသတင်းရရှိသည်။

“ရွှေတောင်က ဗလီနှင့် မွတ်စလင်မ်အိမ်တွေကို ဒီနေ့ ဖျက်မယ်လို့ သတင်းထွက်နေတယ်။ အခုထိတော့ ဘာမှ မဖြစ်ဘူး။ ဒါပေမယ့် ငွေကြေးချမ်းသာတဲ့ မွတ်စလင်မ် အိမ်တွေရဲ့ စာရင်းတွေကို လိုက်စုနေတာ သိရတယ်။ ဒီနေ့ဆို ရွှေတောင်မှာ ဆိုင်တော်တော် များများလည်း ပိတ်ထားကြတယ်။ မဖွင့်ရဲကြဘူး။

ဒီရက်ပိုင်း ပဲခူးတိုင်းမှာ ဖြစ်နေတဲ့ ဗလီတွေနဲ့မွတ်စလင်မ်အိမ်တွေကို အကြမ်းဖက် ဖျက်ဆီး လုယက်နေမှုတွေဟာ တရားပွဲပြီးလို့ ပြန်တဲ့အချိန်တွေပဲဖြစ်နေတယ်။ ထူးတော့ ထူးဆန်းတယ်။ ပြီးတော့ ဦးခင်ညွန့်သွားနေတဲ့ လမ်းတလျှောက်လုံးလည်း ဖြစ်နေတယ်။ တော်တော်တော့ စဉ်းစားစရာပဲ။

ဗလီတွေ၊ မွတ်စလင်မ်အိမ်တွေကို ဒီလို အကြမ်းဖက် ဖျက်ဆီးခံနေရတာတွေကို အစ္စလာမ်ဘာသာရေး အဖွဲ့ကြီးအနေနဲ့ နေပြည်တော်ထိ သိအောင်ပြောပြပြီး ထိထိရောက်ရောက် ကိုင်တွယ်ဖြေရှင်းပေးစေချင်ပါတယ်။”လို့ ရွှေတောင်မြို့ခံတစ်ဦးက M-Media ကို ပြောပြလာပါတယ်။

အလားတူ ရွှေတောင်မြို့နည်းတူ နတ်တလင်းမြို့မှာလည်း ဗလီတွေနှင့် မွတ်စလင်အိမ်တွေကို ယနေ့ညပိုင်းတွင် ဖျက်ဆီးမည်ဟူသော သတင်းများထွက်ပေါ်နေသောကြောင့် နတ်တလင်းမြို့ရှိ မွတ်စလင်မ်များသည် သက်ကြီးရွယ်အိုများနှင့် ကလေးများကို ဘေးလွတ်ကင်းရာနေရာများသို့ ပြောင်းရွှေ့ထားကြောင်း၊ သို့သော် နတ်တလင်းတွင် ၀န်ကြီးရောက်နေ၍ ယခုကဲ့သို့ အကြမ်းဖက်မှုမျိုး ဖြစ်ပွားမလာစေရန် ကာကွယ်သွားမည်ဟု နတ်တလင်းမြို့နယ်အုပ်ချုပ်ရေးမှူးမှပြောကြားကြောင်းလည်း သိရသည်။