အကြမ်းဖက် မီးရှို့ခံရသည့် ဥက္ကံမှ ဒုက္ခသည်များ နောက်ဆုံး အခြေအနေ

မေလ ၃၊ ၂၀၁၃
M-Media
သုတ

ဥက္ကံ ။ ။ ပြီးခဲ့သည့် ဧပြီလ ၃၀-ရက်နေ့က ဥက္ကံမြို့တွင် ဗလီ၊ အာရဗီစာသင်ကျောင်း၊ မွတ်စလင်မ်ဆိုင်ခန်းများ၊ အိမ်များ အကြမ်းဖက် ဖျက်ဆီးခံခဲ့ရမှုနှင့်ပတ်သက်၍ နောက်ဆုံးအခြေအနေများကို ဥက္ကံမြို့ခံများထံ ဆက်သွယ်မေးမြန်းထားတာဖြစ်ပါတယ်။

“အခြေအနေကတော့ နည်းနည်းတည်ငြိမ်သွားပါပြီ။ ပြန်လည်ထူထောင်ရေးအခြေအနေအတွက် ဘယ်လိုရှိနေလဲဆိုတော့ ပြန်လည်ထူထောင်မှုတော့ မလုပ်နိုင်သေးဘူး။ ကူညီမှု တချို့တော့ လာတယ်။ မနေ့ကတော့ အိုလမာအဖွဲ့တွေကလာတယ်။ မီးရှို့ခံရလုိ့ ပြာဖြစ်သွားတဲ့ မွတ်စလင်မ်အိမ်တွေကို တာလပတ်(ပလပ်စတစ်မိုးကာ)တွေပေးသွားတယ်။ နောက်ထပ် တစ်ခြားတော့ ဘာမှ မထူးခြားသေးဘူး။ မွတ်စလင်မ်အဖွဲ့ တချို့ လာရောက် ကူညီသွားတာပဲရှိတယ်။ ပုဂ္ဂလိကလာရောက် ကူညီတာမျိုးတော့ မရှိဘူး။ တစ်ခြားတော့ မလာဘူး။ တစ်ခြားအဖွဲ့တွေ နာမည်တွေတော့ ကျွန်တော် မသိဘူးဗျ။ မနေ့က ကား ၄-၅-၆ စီးတော့ လာသွားတယ်။ တစ်ခြား တော့ ကျွန်တော်တို့ ဘာမှ ပြန်မလုပ်နိုင်သေးပါဘူး။ မြို့ပေါ်မှာလည်း တစ်ခြားတော့ ထူးထူးခြားခြား မရှိပါဘူး။ နည်းနည်းတည်ငြိမ်နေပြီလို့ပဲ ပြောရမှာပါ။”လို့ ပြန်လည်ဖြေကြားခဲ့ပါတယ်။

ငြိမ်းချမ်းမှု တည်ဆောက်ရေးကွန်ရက် (PCN) ၏ သတင်းထုတ်ပြန်ချက်များအရ  ပဋိပက္ခများ ချုပ်ငြိမ်းရေးနှင့် ကယ်ဆယ် အကူညီပေးရေးကိစ္စရပ်များကို ကွင်းဆင်းဆောင်ရွက်ရာတွင် လက်ရှိ ဥက္ကံမြို့ အနီးတဝိုက်ရှိ ရွာ ၃ရွာဖြစ်သည့် ပနီပင် ရွာတွင် အိမ်ခြေ (၆လုံး) လူဦးရေ ၂၀ကျော်၊ ချောင်းသဲရွာတွင် အိမ်ခြေ (၁၆လုံး) လူဦးရေ ၉၀၊ ကျွဲပုန်းရွာတွင် အိမ်ခြေ (၄၉လုံး) လူဦးရေ ၂၃၅ဦး မီးရှို့ ဖျက်ဆီးခံခဲ့ရမှုများကြောင့် အိုးမဲ့အိမ်မဲ့ ဖြစ်ပြီး စုစုပေါင်း လူဦးရေ ၃၄၅ဦး စားသောက် နေထိုင်ရေးများ အခက်အခဲဖြစ်ပေါ်နေကြောင်း၊ PCN နှင့် အတူ ရွှေဝါရောင်သံဃာတော်များ ကွန်ရက်မှ လိုက်ပါ ခဲ့ပြီး အကူညီပေးရေး ကိစ္စရပ်များကို တိုက်ကြီး BD သွေးကူညီပေးရေးအဖွဲ့၊ ဂျိုးဖြူ ပရဟိတ အဖွဲ့ နှင့် တိုက်ကြီး NLD အဖွဲ့ဝင်များမှ အပြည့်အဝ ကူညီဆောင်ရွက်ပေးခဲ့တယ်လို့ သိရှိရပါသည်။

အရှင်ပဏ္ဍဝံသ (ဦးပြည်ကျော်) ရွှေဝါရောင်သံဃာတော်များကွန်ရက်

PCN မှနေ၍ လက်ရှိ ဒုက္ခသည်များအတွက် သောက်ရေသန့်၊ စောင်၊ ခြင်ထောင်၊ အခင်း၊ အကာ တာပေါ်လင်၊ နို့မှုန့်၊ ကြာဇံခြောက်၊ ခေါက်ဆွဲခြောက်၊ မုန့်ခြောက်၊ မုန့်စို၊ အချိုရည် အမျိုးမျိုး၊ အိုး၊ခွက်၊ ပန်းကန်များ၊ အမျိုးသမီးအသုံးအဆောင်၊ ကျားဝတ်၊ မဝတ်၊ ကလေးဝတ် အဝတ်အထည်များ အစရှိသည်တို့ကို လက်ရောက် လှူဒါန်းခဲ့ကြောင်း၊ ကမ်းမြှောင်အုပ်စု၊ မီးလောင်စခန်းရွာတွင် လည်း အိမ်ခြေ ၁၀လုံးမီးရှို့ခံခဲ့ရပြီး၊ ၂၄လုံးဖျက်ဆီးခံခဲ့ရသည်။ ဂုံညင်းတန်း သကြားစက်တွင်လည်း အိမ်ခြေ (၇)လုံး စုစုပေါင်း လူဦးရေ ၁၉၆ဦး ဒုက္ခရောက်နေကြပြီး ၄င်းတို့အတွက် အရေးပေါ် လိုအပ်ချက်များမှာ- ရေ အဓိကဖြစ်ကြောင်း၊  အနီးရှိ ဗလီဝတ်ကျောင်းနှင့် စာသင်ကျောင်းမှ ရေတွင်းရေကန်များပါ ဖျက်ဆီးခံခဲ့ရသဖြင့်၊ PCN သည် တိုက်ကြီး BD သွေး အကူညီပေးရေး အဖွဲ့ အကူအညီဖြင့် ရေရရှိရေး အတွက် ရေတွင်းတုံကင် တပ်ဆင်ခဲ့ပြီး ရေရရှိ အသုံးပြုနိုင်ရေးအတွက် အရေးပေါ်ဆောင်ရွက်ပေးခဲ့ကြောင်း၊ ပဋိပက္ခ စတင်ဖြစ်ပွားစဉ်က အမျိုးသမီးနှင့် တိုက်မိခဲ့သည့် အလံတိုင်ကျောင်းမှ ကိုရင်လေးထံ လူကိုယ်တိုင်တွေ့ဆုံ စကားပြောကြားဆွေးနွေးခဲ့ကြောင်း၊ ကိုရင်လေးနှင့် ကျောင်းမှလည်း အဆိုပါ ကိစ္စရပ်များဖြစ်ပေါ်မှုကို လိုလားခဲ့ခြင်းမရှိခဲ့၊ တိုက်မိသူနှင့်လည်း အဓိကပြသနာတက်ခဲ့ခြင်းမရှိဘဲ အဆိုပါ ကိစ္စကို အခွင့်ကောင်းယူ၍ လူစု၊ အကြမ်းဖက်၊ လုယက် မီးရှို့ခြင်းများကို ပြုလုပ်သူများက ကျူးလွန်ခဲ့ကြခြင်းဖြစ်သည် ဟု  လို့ PCN သတင်းထုတ်ပြချက်မှာ ဖော်ပြထားပါသည်။

ကိုးကား- PCN သတင်းထုတ်ပြန်ချက်