အဖွားတို့ခေတ်က ဆွမ်းထမင်းတစ်လုတ်

မေလ-၄၊၂၀၁၃
M-Media
ရေးသူ- O’Laie Manzu

နံနက်ဝေလီဝေလင်းအချိန်မှာ အဖွားဖြစ်သူဟာ ဘုန်းကြီး ဆွမ်းလောင်းပြီး အိမ်ထဲပြန်ဝင်လာကိုတွေ့တော့ ဘဝင်မကျတဲ့လေသံနဲ့

“နာနီး … ဘာလို့ ဘုန်းကြီးဆွမ်းသွားလောင်းနေရတာလဲ၊ အီမာန်ပျက်သွားမယ်။ ပတ်ဝန်းကျင်လေး ဘာလေးကြည့်ပါဦး” လို့ ကျနော်စောဒက တက်ခဲ့တယ်။

“အီမာန်…?”

မေးခွန်းထုတ်တဲ့ လေသံခပ်မြင့်မြင့်နဲ့ အဖွားက တုန့်ပြန်ခဲ့တယ်။ အနားကပ်လာပြီး ကျနော့်ရဲ့ရင်ဘတ်ကို လက်ညိုးနဲ့ ထောက်ကာ …

“အီမာန်ဆိုတာ ဒီမှာရှိတယ်။ အလ္လာဟ်အရှင်မြတ်က လွဲရင် ဘယ်သူမှမတွေ့ဘူး။ ပတ်ဝန်းကျင်က သိဖို့လည်းမလိုဘူး။ ပြဖို့လည်းမလိုဘူး။” လို့ ပြန်ဖြေပြီး မီးဖိုခန်းထဲသို့ဝင်သွားခဲ့တယ်။ အဖွားရဲ့အဖြေကို သဘောမကျတဲ့ မျက်နှာထိ မျက်နှာထားနဲ့ အဖွားကိုသာကြည့်နေခဲ့မိတယ်။

တစ်အောင့်လောက်အကြာ…နံနက်စာ စားပွဲမှာ ဝိုင်းထိုင်နေကြစဉ် အဖွားက ကျနော့်မျက်နှာကိုကြည့်ပြီး ဆိုင်းမဆင့်ဗုံမဆင့် …

“လူတွေက လုပ်ရပ်ကိုကြည့်ပြီးဝေဖန်ကြတယ်။ အနှစ်သာရကို မသိဘူး။ အဲဒီလို ကျိုးကြောင်းနားမလည်ဘဲ ထင်သလိုပြောတက်တဲ့ လူစားမျိုး ငါ့မြေးတို့မဖြစ်ရအောင် ကြိုးစားနေထိုင်ကြ” လို့ ပြောလိုက်တယ်။

အဖွားဘာကိုရည်ညွန်းပြောနေတယ်ဆိုတာကို အရိပ်အမွတ် လောက်တော့သဘောပေါက်လိုက်တယ်။ ဒါပေမယ့် ဆိုလိုရင်းရဲ့ လေးနက်မှုကိုတော့ ချက်ချင်းမသိလိုက်ဘူး။ မလောက်လေး မလောက်စား သိထားတဲ့ အတွေးအခေါ် အယူအဆတွေနဲ့ ဟုတ်လှပြီလို့ထင်နေတဲ့ ကျနော့်အဖို့ကတော့ အဖွားရဲ့ ဆိုလိုရင်းကိုလည်း လေးလေးနက်နက် စဉ်းစားဖို့ စိတ်ကူးမရှိခဲ့ဘူး။ နံနက်က အဖွားရဲ့ လုပ်ရပ်ကို ပြန်လည်ချေပဖို့ဘဲ ဆိုင်းပြင်းနေခဲ့တယ်။ အဖွားပြောနေတဲ့ လုပ်ရပ်တွေ၊ အနှစ်သာရတွေ၊ ကျိုးကြောင်းတွေက အစောက ဘုန်းကြီးဆွမ်းလောင်းတာကိုဘဲ တွေးမြင်မိတယ်။ ဒါတွေက အစ္စလာမ်ဘာသာဝင်တွေနဲ့ သက်ဆိုင်မှုမရှိဘူးလို့ ယူဆတဲ့ ကျနော်ကတော့ စကားဝိုင်းကို လိုရာဆွဲယူခဲ့တယ်။

“မွတ်စလင်တစ်ယောက် က ဘုန်းကြီးဆွမ်းလောင်းတဲ့ အလုပ်နဲ့ မဆိုင်ပါဘူး။ အဲဒီမှာ ဘာအနှစ်သာရမှလည်းမရှိဘူး။ နားလည်လို့လည်းမရဘူး။” လို့ချေပခဲ့တယ်။ ထမင်းဝိုင်းက အခြားမိသားစုဝင်တွေကတော့ လမ်းပျောက်နေသူတွေလို မျက်စေ့တွေဝေ့လည်လည်နဲ့ ဘာပြောလို့ ပြောရမှန်း မသိဖြစ်နေကြတယ်။

“ဒီမနက် နာနီး ဘုန်းကြီးဆွမ်းလောင်းတာကို ငါ့မြေးဘဝင်မကျဘူးဆိုတာ သိပါတယ်။ ဘုန်းကြီးတွေက ဆွမ်းခံထွက်ရင် ဘယ်သူဆီမှ တောင်းခံတာ မဟုတ်ဘူး။ စေတနာရှိရင် ပေးလို့ရတယ်။ အိမ်ရှေ့ရောက်လာသူတွေကို နာနီးဘယ်တုန်းကမှ လက်ခါလီ ပြန်မလွတ်ခဲ့ဘူး။”

“ကန်တော့ပါသေးတယ်လို့ပြောလိုက်ရင် နောက်အိမ်ရှေ့ဘယ်လာတော့မလဲ။ အခုတော့ ဆွမ်းတစ်ခါ လောင်းလိုက်တော့ နောက်ဆို နေ့တိုင်း အိမ်ရှေ့လာတော့မှာပေါ့”

“ဆွမ်းခံကြွတယ်လို့ပြောရတယ်။ ဗမာစကားမှာ လူကြီးကိုပြောတဲ့စကား၊ ရွယ်တူချင်းပြောတဲ့စကား၊ ဆရာသမားတွေကိုပြောတဲ့စကား တွေမှာ အသုံးအနှုန်းမတူကြဘူး။ ဒီလိုဘဲဘုန်းကြီးတွေကို ပြောတဲ့ စကားကလည်း သူ့အသုံးအနှုန်းနဲ့သူရှိတယ်။” ဟု ကျနော် စကားအသုံးအနှုန်းမှားသွားတာကို ချက်ချင်း ထောက်ပြပြီး ပြုပြင်ပေးခဲ့တယ်။ နောက်စကားပြန်ဆက်တဲ့အနေနဲ့…

“ကန်တော့ပါသေးတယ်ဆိုတဲ့ စကားလုံးက ရိုးရှင်းပေမယ့် နာနီးပါးစပ်ကပြောမထွက်ဘူး။ ဒါပေမယ့် အစောတုန်းက ဆွမ်းလောင်းလိုက်တာက အားနာလို့မဟုတ်ဘူး။ အလှူအဒါန်းလုပ်တာ။ ငါ့မြေးတို့ တစ်နေ့တစ်နေ့ သူငယ်ချင်းအပေါင်းအသင်းတွေကို လက်ဖက်ရည်တိုက်လိုက်၊ မုန့်ဝယ်ကျွေးလိုက် မလုပ်ကြဘူးလား။ အိမ်ဖိတ်ခေါ်ပြီး ထမင်းလက်စုံမစားကြဘူးလား။ သူတို့ရောဘာသာခြားတွေမဟုတ်ဘူးလား။ ဘာသာခြားဖြစ်လို့ ဖော်ဖော်ရွေရွေ မကျွေးမွေးရတော့ဘူးလား။ သေခြာစဉ်စားကြည့်ပါဦး။ ဘုန်းကြီးဆိုတာ လူ့တွေရဲ့ သမရိုးကျ တွယ်မက်တာတွေကို စွန့်လွတ်ပြီး တရားအားထုတ်နေကြတယ်။ သူ့ရဲ့ တရားကို လက်ခံတာမခံတာက အပထား။ ကောင်းမှုကုသိုလ်လုပ်တဲ့သူအတွက် ထမင်းတစ်လုပ် လှူဖို့လက်တွန့်မနေရဘူး။”

“ဘုန်းကြီး ကိုလှူတာ တခြားသာမန်လူတွေကို ကျွေးမွေးတာနဲ့တော့ ဘယ်တူမလဲ။” မတူဘူး ဆိုတာကို အဖွားရော ကျနော်ရော သဘောထားချင်း တိုက်ဆိုင်ပေမယ့် မတူပုံ မတူနည်းကတော့ သိသိသာသာ ခြားနားနေခဲ့ပါတယ်။

“ဘုန်းကြီးကို လှူတော့ သူများဘာသာကို အားပေးအားမြှောက်လုပ်ရာကြတယ်။ သာမာန်လူတွေကို ကျွေးမွေးတာက စားပြီးပြီးသွားရော။ ကောင်းကျိုးလည်း မရှိဘူး။ မကောင်းကျိုးလည်းမရှိဘူး။ မိတ်ဖွဲ့ ရင်းနှီးတာလောက်ဘဲရှိတယ်။”

“ဒါဆို ဘုန်းကြီးကို အလှူပေးတဲ့ ထမင်းတစ်လုတ်ကတော့ ဆိုးကျိုးတွေရှိတယ်လို့ ငါ့မြေးမြင်နေလား။”

အဖွားရဲ့မေးခွန်းကို ပြန်မဖြေဘဲ နှုတ်ခမ်းနှစ်လွှာ အားပါပါနဲ့ ပိတ်ထားလိုက်ပြီး လုပ်ကြံပြုံး ပြုံးပြလိုက်တယ်။ ထမင်းတစ်လုတ် အလှူပေးတာကို ပုံကြီးချဲ့ စောဒက တက်ပြီးဖြေမယ့် အဖြေအတွက် ကိုယ့်ကိုကိုယ့် ရှက်မိတယ်လို့တော့ မဟုတ်။ လေးနက်ပြီး သဘာဝကျတဲ့ အဖြေမျိုးမဟုတ်တဲ့ အတွက် ပြန်မဖြေခဲ့တာဘဲ ဖြစ်မယ်လို့ ဝိုးတဝါးသာမှတ်မိတော့တယ်။

အလှူအဒါန်းရဲ့ဆိုးကျိုးကို ရှာကြံပြီးပြန်ဖြေခဲ့မယ်ဆိုရင်လည်း …

“ပတ်ဝန်းကျင်မွတ်စလင်တွေ အထင်လွဲကုန်လိမ့်မယ်” တို့၊ “ကဲ့ရဲ့စရာတွေဖြစ်ကုန်လိမ့်မယ်” တို့၊ “မွတ်စလင်တွေနဲ့ အယူဝါဒခြင်းမတူတဲ့ ဘာသာရေးခေါင်းဆောင် ထမင်း တစ်လုတ်စာ အင်အား တိုးလာလိမ့်မယ်” တို့ အစရှိတဲ့ အပေါ်ယံ အတွေးအခေါ်နဲ့သာ အဖွားရဲ့မေးခွန်းကို တုန့်ပြန်လိုက်မိမှာပါ။ ကျနော် နှုတ်ဆိတ်နေပေမယ့် မကျေလည်တဲ့ အတွေးအခေါ်တွေနဲ့ နဘန်းလုံးနေတယ်ဆိုတာကို အဖွားက သတိပြုမိပုံပေါ်တယ်။

“ဘာသာခြားတိုင်း စည်းခြားထားဖို့မလိုဘူး။ ဘာသာရေးနဲ့ ပတ်သက်တဲ့ စကားပြောမယ်ဆိုရင်လည်း အမှန်တကယ် သိနားလည်ဖို့လိုတယ်။”

ကြုံရင် ကြုံသလို အမြဲ သွန်သင်ဆုံးမတက်တဲ့ အဖွားကတော့ စကားအစချီပြီး

“တမန်တော်ခေတ်မှာ မွတ်စလင်တွေ မကာမြို့တော်က ထွက်ပြေးတုန်းက ခရစ်ယာန်တွေ ကူညီပေးခဲ့တယ်။ တမန်တော်မြတ်ကလည်း ခရစ်ယာန် ဘုရားရှိခိုးကျောင်း တွေကို ကာကွယ်ပေးခဲ့တယ်။ နာနီးတို့ရဲ့ နှစ်ဘဝသခင် ကျေးဇူးရှင် တမန်တော်မြတ် က တကိုယ်ကောင်းမဆန်ခဲ့ဘူး။ အမြော်အမြင်ကြီးတယ်။ ဖော်ရွေတယ်။ ရက်ရောတယ်။ ရိုင်းပင်းကူညီတယ်။ အင်မတန်မွန်မြတ်တဲ့ ရှေ့ဆောင်လမ်းပြဘဲ။ အလ္လာဟ်အရှင်မြတ်က တမန်တော်မြတ်ကို မွတ်စလင်တွေ အတွက်ချည်း စေလွတ်ခဲ့တာမဟုတ်။ တမန်တော်မြတ်ကလည်း မွတ်စလင်တွေအ တွက်ချည်း  ကောင်းကျိုးပြုခဲ့တာမဟုတ်။ လူသားအားလုံးအတွက်။ နာနီးတို့ကလည်း ဘာဘဲလုပ်လုပ် ‘လူသားအားလုံးအတွက်’ ဆိုပြီး ကျယ်ကျယ်ပြန့်ပြန့် စဉ်စား လုပ်ကိုင်တက်ရမယ်။ နာနီးတို့ယုံကြည်တယ်ဆိုတာ ကြားဖူးနားဝနဲ့ ယုံကြည်တာမဟုတ်ဘူး။ ကိုရ်အာန်ကို နားလည်ဖို့လိုတယ်။ တမန်တော်မြတ်ရဲ စွန္နတ်တော် ပြုမှုကျင့်ကြံပုံတွေကို သိထားဖို့လိုတယ်။ လိုက်နာကျင့်သုံးဖို့လိုတယ်။ ဒါတွေကို မသိနားမလည်ဘဲ ကြားဖူးနားဝတွေကိုဘဲအားကိုးလို့မရဘူး။ နာနီးယုံကြည့်တဲ့ နာနီးရဲ့ အီမာန် [ယုံကြည်ချက်] က ဘုန်းကြီးကို ဆွမ်းတစ်လုတ်လှူလို့ ပျက်မသွားဘူး။ လျော့မသွား။ အကုသိုလ်မဖြစ်သွားဘူး ငါ့မြေး။ ဘေးပတ်ဝန်းကျင်ပြောတာကိုလည်း ဂရုစိုက်ဖို့မလိုဘူး။ ကုသိုလ်လုပ်တယ် အလှူအဒါန်းလုပ်တယ်ဆိုတာ မွန်မြတ်ပါတယ်။ တန်ရာတန်ရာ အကျိုးဆဝသ်ရပါတယ်။”

အဖွားရဲ့ ဘာသာရေးနဲ့ လူသားဝါဒတွေနှောင်ဖွဲ့ပြီး ပြောဆိုဆုံးမမှုတွေက အဲဒီအချိန်တုန်းက ကျနော့်နားထဲမှာ အပေါ်ယံသာ ကြားလိုက်မိသလိုဘဲ။ လူ့သဘာဝလို့ဆိုရမလား … ကျနော်ဦးနှောက်ကဘဲ အလုပ်ရှုပ်နေသလားမသိ။ အတွေးတွေက ဦးနှောက်ထဲမှာ ပလူပျံနေရော။ ဒါနဲ့ … ရေအကျိုး ဆယ်ပါးရပြီး ဆွမ်းအကျိုး ကတော့ငါးပါးပဲ ရကောင်းလားလို့ မကျေမနပ်စောဒက တက်လို့ ဘုန်းကြီးက ဆွမ်းချက်ရာမှာ ရေလည်းထည့်ရတဲ့အတွက် ဆွမ်းအကျိုး ငါးပါးအပြင် ရေအကျိုး ဆယ်ပါးလည်းပါလို့ စုစုပေါင်း ဆယ်ငါးပါးရတယ်လို့ ပုံဖော်ထားတဲ့ ဇာတ်ဝင်ခန်းလေးကို မျက်စေ့ထဲ ပြေးမြင်လိုက်မိတယ်။ ဒါပေမယ့် အယုံအကြည်ချင်း မတူကြတဲ့ ကျနော်တို့အဖို့ ဒီအကျိုး ဆယ့်ငါးပါးတော့ ရလိမ့်မယ်လို့မထင်။ ဘယ်သူက ဒီအကျိုးတွေ ချီးမြှင့်မှာလဲ အဖွားကို မေးခွန်းထုတ်ခဲ့ပြန်တယ်။

“ကောင်းတာကိုလုပ်တိုင်း အဲဒီကောင်းမှုရဲ့ အကျိုးရလဒ်ကို အလ္လာဟ်အရှင်မြတ်ကသာ ချီးမြှင့်ပေးမယ်ဆိုတာကို ငါ့မြေးမသေမချင်းမှတ်ထား။ အဲဒါကိုက အစောတုန်းက ငါ့မြေးပြောတဲ့ အီမာန်ရဲ့ အစိတ်အပိုင်းဘဲ။ အလ္လာဟ်အရှင်မြတ် တစ်ပါးတည်းကသာ အကျိုးဆဝသ် ချီးမြှင့်ပေးသနားနိုင်တယ်ဆိုတာကို ခိုင်ခိုင်မာမာယုံကြည်နေဖို့လိုတယ်။ နာနီးတို့ရဲ့လုပ်ရပ်အပေါ်မှာ အကျိုးဆဝသ်ချီးမြှင့်မယ်-မချီးမြှင့်ဘူးဆိုတာ အလ္လာဟ်အရှင်မြတ်ကသာ ဆုံးဖြတ်ပေးမှာ။ ကောင်းမူကုသိုလ် လုပ်ရမှာက နာနီးတို့တာဝန်ဘဲ။”

အဖွားဖြစ်သူရဲ့ သွန်သင်ဆုံးမမှုကို အတွန့်တက်ဖို့ စကားရှာမတွေ့ခဲ့။ အဖွားရဲ့ မွန်မြတ်တဲ့စိတ်ထားကို ပိုမိုလေးစားခဲ့တယ်။ အစ္စလာမ်ဘာသာအကြောင်း အဖွားလောက်လည်းမသိသေးတာကိုတော့ ဝန်ခံမိပါတယ်။ အီမာန်ဆိုတဲ့ ယုံကြည်မှုအကြောင်း လေးလေးနက်နက် စဉ်းစားဖြစ်ခဲ့တယ်။ အီမာန်အကြောင်း စေ့စေ့ပေါက်ပေါက်မသိဘဲ အီမာန်ပျက်နိုင်တယ်လို့ ပြောမိတဲ့အတွက်လည်း တွေဝေးခဲ့မိတယ်။

နောက်ရက် ဆွမ်းခံကြွလာတဲ့ ဘုန်းကြီးကိုတွေ့တော့ ဆွမ်းလောင်းဖို့ထွက်လာတဲ့အဖွား ဆီကပန်းကန်ကို

“ကျနော် သွားလောင်းပေးမယ်” လို့ယူခဲ့လိုက်တယ်။

တက်တက်ကြွကြွ ဆွမ်းလောင်းချင်လို့တော့ မဟုတ်ပေမယ့် လူကြီးဖြစ်သူ မနက်တိုင်း ဆွမ်းလောင်းနေတာ ပတ်ဝန်းကျင်ကမြင်သွားရင် မကောင်း။ ဘာဘဲဖြစ်ဖြစ် ပတ်ဝန်းကျင်ကို ဂရုစိုက်တယ်လို့ဘဲပြောပြော ပတ်ဝန်းကျင်ကမွတ်စလင်တွေ ဟိုပြောဒီပြော ပြောကြမှကိုတော့ စိုးရိမ်မိခဲ့တာ အမှန်ဘဲ။ မွတ်စလင်တွေအကြား ပြောစရာဖြစ်… သိက္ခာကျမယ်ဆိုလည်း ကျနော်သာလျှင် သိက္ခာကျပါစေတော့ ဆိုတဲ့ သဘောနဲ့ သူရဲကောင်းဝင်လုပ်တဲ့သဘောလည်း ပါခဲ့တာတော့ အမှန်ပါ။

ဘုန်းကြီးရှိရာ လမ်းလျှောက်သွားချိန်မှာ အဖွားက

“ဖိနပ်မစီးရဘူးနော်” ဟုသတိပေးလိုက်တယ်။

အနာနားရောက်တော့ ဘုန်းကြီးကို ပြုံးပြလိုက်ပေမယ့် ဘုန်းကြီးကတော့ ပြန်မပြုံးပြဘူး။ မျက်လွှာချထားပြီး ရှေ့ဆက်ခရီးနှင်လိုရာ အရပ်ကိုသာ တည့်တည့်မတ်မတ် မျက်နှာမူထားတယ်။ ဖိနိပ်ချွတ်ပြီး ခြေတစ်လှမ်းရှေ့တိုးလိုက်တယ်။ ပြီးတော့ သပိတ်ထဲကို ထမင်းတစ်ကော် အသာအယာထည့်လိုက်တယ်။ ဘဝတစ်သက်တာမှာ ဘုန်းကြီးပေါင်းမြောက်များစွာတွေ့ဖူးပေမယ့် အဲဒီအချိန်မှသာ တစ်ပေခန့်အကွာ အနားကပ်ဖူးတယ်။ တစ်ကိုယ်လုံးမှာ သင်္ကန်းနဲ့ သပိတ်သာပါရှိတဲ့ ဘုန်းကြီးရဲ့ပုံစံနဲ့ မျက်နှာအနေထားတည်ကြည်မှုဟာ တမူထူခြားနေသလိုဘဲ။ နှလုံးအေးရတယ်လို့ အတော်ကြာကြာ စိတ်ထဲမှာ စွဲမြဲနေခဲ့တယ်။

အစကတော့ ပတ်ဝန်းကျင်က မွတ်စလင်မိတ်ဆွေတွေ မမြင်ခင် ဆွမ်းလောင်းပြီး အိမ်ထဲ ကပြာကယာ ဝင်ပြေးမလို့ဘဲ။ ဒါပေမယ့် ဆွမ်းလောင်းပြီးတော့ အသက်ခပ်ပျင်းပျင်းရှုထုတ်လိုက်ပြီး ဘုန်းကြီး လမ်းတဖက်ကို ချိုးဝင် ပျောက်ကွယ်သွားတဲ့အထိ ထမင်းခွက်လေးကိုင်ကာ မားမားမက်မက်ရပ်ကြည့်နေမိတယ်။ တစ်သက်တာ ထူးထူးခြားခြား အလှူအဒါန်းလုပ်လိုက်ရတဲ့အတွက် ဂုဏ်မှောက်နေလို့လား၊ ပိတိ တွေနဲ့ ကြည်နူးနေမိလို့လားတော့ ကျနော်လည်း မမှတ်မိ။ သေခြာတာကတော့ ပတ်ဝန်းကျင်ကို ဂရုစိုက်ရမယ့် စိတ်ဓါတ် တခဏတာ ကွယ်ပျောက်သွားခဲ့တယ်။

အိမ်ထဲပြန်အဝင်မှာ အဖွားက ချိုချိုသာသာပြုံးပြပြီး ထမင်းပန်းကန်ယူသွားခဲ့တယ်။

နောက်ရက်တွေမှာလည်း ပုံမှန် ဆွမ်းလောင်းပေးဖြစ်ခဲ့တယ်။ ဘယ်အချိန်အထိ ကြာကြာ ဆက်ပြီး ဆွမ်းလောင်းပေးနေမလဲ ဆိုတာကိုတော့ ကျနော်လည်း မစဉ်းစားမိခဲ့။ ဘေးပတ်ဝန်းကျင်ပြောမှာ ကိုလည်း ကျနော်ဂရုမမူတော့။ တစ်ရက်တစ်ရက် အတွေးအခေါ် အယူဝါဒတွေ ကင်းရှင်းတဲ့ ထမင်းတစ်လုတ် အလှူလုပ်နေရတာကို ပိတိဖြစ်မိတယ်။ သိပ်မကြာပါဘူး သုံးလေးရက်လောက်ပြီးတော့ ဘုန်းကြီးလည်း အိမ်ရှေ့မှာ မရပ်တော့ဘူး။ မျက်စောင်းထိုးအိမ်က ဘုန်းကြီးကို သူတို့အိမ်ရှေ့ပင့်လိုက်ပုံပေါ်တယ်။ ကျနော်တို့ ဆွမ်းလောင်း ပေးနေတာကို အမြင်မတော်လို့လား၊ ဘာသာခြားဆွမ်းလောင်းတာကို မကြိုက်လို့လားတော့ ကျနော်တို့လည်းမသိ။

နှစ်အတော်ကြာကြာ အမှတ်တရလေးဖြစ်နေခဲ့တယ်။ အဖွားရဲ့ ဆုံးမမှုတွေကို ပြန်လည်ကြားယောင်မိတိုင်း သတိရနေမိတယ်။

အခုတလော ဘာသာရေးအရေးအခင်းတွေဖြစ်နေတော့ ပိုပြီးသတိရမိတယ်။ အဖွားသာရှိနေသေးရင် တစ်ချိန်က အဖွားမေးခွန်းကို မဖြေဘဲ နှုတ်ပိတ်နေခဲ့တဲ့ ကျနော် စောဒကတက်ပြီး အဖွားနဲ့ စကားဝိုင်း အတွန့်ရှည်ဖြစ်ဦးမယ်ထင်ပါတယ်။ အခုတော့…အဖွားကိုတမ်းတပြီး စိတ်ထဲမှာ ပြောနေမိတယ်

နာနီးရေ… သဘောထားမကြီးနိုင်တော့တာကိုတော့ နားလည်ပေးပါ။ နှစ်တွေလည်းကြာပြီ… ခေတ်တွေလည်းပြောင်းကုန်ပြီ မဟုတ်လား။ ဘုန်းကြီးတွေကလည်း အရင်လိုမဟုတ်တော့ဘူး။ ထမင်းတစ်လုတ်မပြောနဲ့ အနားကပ်ရမှာတောင် လက်တွန့်နေရပြီ။ ကြည်ညိုစရာဆိုတာတွေလည်း ခမ်းခြောက်ကုန်သလိုပါဘဲ။ အခုဆိုသင်္ကန်းခြုံထားတာတွေ့ရင် ရင်တထိတ်ထိတ်၊ အန္တာရယ် ရှိတယ်လို့ အချက်ပြနေသလို စိတ်ထဲမှာ တွေးထင်နေမိတယ်။ ဘုန်းကြီးမြင်ရင် အရင်ကလို နှလုံးမအေးတော့ဘူး။

 

**M-Media အယ်ဒီတာ အီးမေးလ်ကို O’Laie Manzu ပေးပို့လာသော ဝတ္ထုတို ဖြစ်ပါတယ်။

**M-Media သို့ သတင်း၊ဆောင်းပါး၊ ဘသာပြန်နှင့် ကာတွန်းများ ပေးပို့လိုလျှင် [email protected] သို့ ဆက်သွယ်ပေးပို့နိုင်ပါသည်။