ကျောင်းဖွင့် ရာသီနှင့် မိတ္ထီလာ ရွှေ့ပြောင်း စခန်းများမှ ကလေးငယ်များ၏ ပညာရေး

မေ-၈ ၊ ၂၀၁၃
M-Media
ဆိုးပေ ရေးသားသည်။

ဒုက္ခသည် စခန်းမှ ကလေးငယ်တစ်ဦး (ဓါတ်ပုံ AP)

စခန်းများ

ကျောင်းဖွင့်ရာသီ နီးလာပြီဖြစ်သဖြင့် ကျောင်းများတွင်ဖွင့်ထားသော ဒုက္ခသည်စခန်းများကို အခြားနေရာများသို့ ရွှေ့ပြောင်းလိုက်ကြောင်း သိရသည်။ လောလောဆယ်တွင် မွတ်စလင် အများစုရှိသော စခန်းသုံးခုရှိပြီး ဗုဒ္ဓဘာသာဝင် အများစုနေထိုင်ကြသော စခန်းနှစ်ခုရှိသည်။ ကန့်ဘလူနှင့် ယင်းတော်တွင်လည်း အစိုးရက ဖွင့်ပေးထားခြင်း မဟုတ်သော်လည်း ရပ်မိရပ်ဖနှင့် စေတနာရှင်များမှ ကူညီပေးထားသော စခန်းနှစ်ခုလည်း ရှိနေပါသည်။

ပြန်လည် ပျိုးထောင်မှု အစီအစဉ်များ

ယခုအခါ အိမ်ရာများ မပျက်မစီး အကောင်းအတိုင်းရှိပြီး လုံခြုံစိတ်ချရပြီဖြစ်သော ရွာနှင့် ရပ်ကွက်များမှ မိသားစုများကို သက်ဆိုင်ရာ ရပ်ကွက်နှင့် ရွာအုပ်ချုပ်ရေးရုံးများနှင့်တဆင့် ချိတ်ဆက်ကာ ပြန်ခွင့်ပြုပြီဖြစ်သည်။ မိမိတို့၏ ဆွေမျိုးသားချင်းများအကူအညီဖြင့် တစ်ရပ်တစ်ကျေးသို့ ပြောင်းရွှေ့နေထိုင်လိုသူများကိုလည်း ခွင့်ပြုထားပြီဖြစ်သည်။ အိမ်ရာပျက်စီးဆုံးရှုံးခဲ့သူများအတွက် တန်ဖိုးအသင့် အိမ်များ ဆောက်လုပ်ရန် ရာထားချက်နှင့် အလှူရှင်အချို့ရှိသော်လည်း မြေနေရာအတွက် စေ့စပ်ညှိနှိုင်းမှုများ ပြုလုပ်နေရဆဲဖြစ်ကြောင်း သိရှိရသည်။

လက်ရှိအခြေအနေ

မိတ္ထီလာမြို့ ဆင်ခြေဖုံးရပ်ကွက်များနှင့် ရွာများတွင် နှစ်ဖက် အသိုင်းအဝိုင်းများကြား ပုံမှန် အေးချမ်း စပြုနေပြီဖြစ်သော်လည်း မြို့ပေါ် ရပ်ကွက်များမှာမူ မူလတည်ငြိမ်မှုသို့ ရောက်ရှိရန် အချိန်ပေး ဆောင်ရွက်ရဦးမည်ဖြစ်သည်။

ကလေးငယ်များ၏ ပညာရေး အခက်အခဲ

မိုးတပြိုက်နှစ်ပြိုက်ကျကာ ကျောင်းဖွင့်ရာသီ နီးကပ်လာပြီဖြစ်သော်လည်း ပဋိပက္ခတို့၏ မြေစာပင် ဖြစ်ခဲ့ရရှာသော စခန်းများရှိ အပြစ်မဲ့ ကလေးငယ်များ  အတွက်မူ ကျောင်းဖွင့်ရာသီမှာ ဝိုးတဝါးနှင့် မသေချာလှပေ။ နှစ်ဖက်အသိုင်းအဝိုင်းရှိ ကလေးငယ်များမှာ အခက်အခဲ အခြေအနေများ ကွဲပြားသော်လည်း တူညီမှု တစ်ခုမှာ မရေရာသော ကျောင်းဖွင့်ရာသီပင် ဖြစ်သည်။

အစိုးရနှင့် လူမှုရေးအဖွဲ့များ၏ ကူညီမှု အလျှင်အမြန်လိုအပ်

ဗုဒ္ဓဘာသာဝင် ကလေးငယ်များအတွက် ကျောင်းဖွင့်ရာသီ အမှီ ကျောင်းတက်ရန် အဓိက အခက်အခဲမှာ စရိတ်ပြဿနာဖြစ်သည်။ အရေးအခင်းများကြောင့် မိဘတို့၏ စီးပွားများ ပျက်ခဲ့ရပြီး စားဝတ်နေရေး အခက်အခဲက မိသားစုများ အတွက် နံပါတ်တစ် ဦးစားပေးဖြစ်နေသဖြင့် ကလေးငယ်များ၏ ပညာရေးမှာ ဒုတိယနေရာ ရောက်နေသည်မှာ မဆန်းလှပါ။ အခြေခံအဆင့် အစိုးရပညာရေးမှာ အခမဲ့ဖြစ်သော်လည်း ကလေးငယ်များအတွက် တစ်နှစ်ပတ်လုံး လိုအပ်မည့် ကျန်စရိတ်များနှင့် ထိုကလေးငယ်များ အလုပ်လုပ်ပါက မိသားစုအတွက် တနိုင်ဝင်ထမ်းမည့် ဝင်ငွေ လျော့မှုက စိန်ခေါ်မှုဖြစ်နေသည်။

စခန်းများရှိ မွတ်စလင်ကလေးငယ်များမှာမူ မိသားစု စားဝတ်နေရေး ကိစ္စအပြင် ကျောင်းများသို့ပင် သွားတက်ရောက်ရန်မှာ ခက်ခဲလွန်းနေပြီး စခန်းများအတွင်းတွင် ယာယီစာသင်ခန်းများ ကျောင်းဖွင့်ရာသီ အမှီဖွင့်ရန် အရေးတကြီးလိုအပ်နေပါသည်။ ကလေးငယ်များ၏ ပညာရေးတစ်နှစ် မအောက်စေရန် ပရဟိတလုပ်အားပေးများ သက်သက်ဖြင့်ဖွင့်လှစ်ရန် မလုံလောက်ဘဲ အစိုးရတာဝန်ရှိသူများမှ ဦးစီးစီစဉ်ပေးသော အသိအမှတ်ပြု အခြေခံပညာရေး သင်ရိုးနှင့် ဆရာများဖြစ်ရန် လိုအပ်နေပါသည်။

စခန်းများ၏ အထွေထွေ လိုအပ်မှုအတွက် သက်ဆိုင်ရာနှင့် အဖွဲ့အစည်းများ၊ စေတနာရှင်များမှ ကူညီဆောင်ရွက်ပေးနေသော်လည်း ကျောင်းဖွင့် ရာသီနီးသဖြင့် ကလေးငယ်များ၏ ပညာရေး အတွက် ပညာရေးဝန်ကြီးဌာနမှ ပါဝင်ဆောင်ရွက်ခြင်းမျိုး မရှိသေးဟုလည်း သိရပါသည်။ မည်သို့ပင်ဖြစ်စေကာမူ နှစ်ဘက် အသိုင်းအဝိုင်းမှ ကလေးငယ်များ အားလုံးသည် အပြစ်ကင်းစင်ကြပြီး အမိမြန်မာနိုင်ငံတော်၏ အနာဂတ် မျိုးဆက်များဖြစ်သဖြင့် သူတို့၏ ပညာရေးကိုလည်း အခြားအရေး ကိစ္စများကဲ့သို့ အလေးပေး အရေးစိုက် ဆောင်ရွက်ရမည်ဖြစ်သည်။ ထို့ကြောင့် နိုင်ငံတော်နှင့် လူမှု အဖွဲ့များရော စေတနာရှင် မိဘပြည်သူများပါ ကျောင်းဖွင့်ရာသီ အမှီ ကလေးငယ်များ၏ ပညာရေးကို အာရုံစိုက် ဆောင်ရွက် လှုပ်ရှားမှုများ ပြုလုပ်ကြပါရန် တိုက်တွန်းလိုက်ရပါသည်။