အစ္စလာမ်ဘာသာဝင် အယောင်ဆောင်၍ အလှူငွေ လိမ်လည် ကောက်ခံသူ မန္တလေးမြို့ ဂျွန်းဗလီဝင်း အတွင်း၌ ဖမ်းဆီးရမိ

မေလ-၂၉၊ ၂၀၁၃
M-Media
သုတ

မန္တလေး ။         ။      အစ္စလာမ်ဘာသာဝင်တစ်ဦးအဖြစ် အယောင်ဆောင်၍ အလှူငွေ လိမ်လည်ကောက်ခံနေသူ တစ်ဦးအား ၈၂လမ်း ၊ ၂၇လမ်းနှင့် ၂၈လမ်းကြားရှိ ဂျွန်းဝင်းအတွင်း၌ ယနေ့ ဖမ်းဆီးရမိသဖြင့် အမှတ်(၈)မြို့မရဲစခန်းသို့ ပို့ဆောင်ဖမ်းဆီးထားကြောင်း သတင်းရရှိသည်။

ယင်းဖြစ်စဉ်နှင့်စပ်လျဉ်း၍ ဂျွန်းဗလီဝင်း အတွင်းနေထိုင်သူ ဂျွန်းဗလီ တာဝန်ရှိသူတစ်ဦးအား ဆက်သွယ်မေးမြန်းခဲ့ပါတယ်။

“မွတ်စလင်မ်အယောင်ဆောင်တယ်ဆိုတာ ဒီလိုပါ။ အလှူငွေကောက်ခံတာကို သက်ဆိုင်ရာ အဖွဲ့တွေက တာဝန်ခံ ကဒ်ထုတ်ပေးတာရှိတယ်လေ။ အဲဒီကဒ် မှာက အလှူငွေကောက်ခံခွင့်လို မျိုး ထောက်ခံချက် ဆိုတာမျိုးလည်းပါတယ်လေ။ သူက အဲဒီကဒ်နဲ့ အလှူငွေလိုက်ကောက်နေတယ်။ ဒီကဒ်က တကယ်တမ်းတော့ အာလင်မ်(အစ္စလာမ်ဘာသာရေးဘွဲ့ရ ပညာရှင်) တွေကိုသာ ထုတ်ပေးတဲ့ကဒ်ပါ။ အဲဒီကဒ်နဲ့ အလှူငွေလိုက်ကောက်နေတော့ မသင်္ကာတာနဲ့ ခေါ်ယူပြီးမေးမြန်းကြတယ်။ သူ့နာမည်ကို မုဟမ္မဒ်အလီလို့ပြောတယ်။ သူ့ကို ဘာသာရေးစာကို ဖတ်ခိုင်းတော့ သူက မဖတ်နိုင်ဘူး။  ဒီကိစ္စနဲ့ပတ်သက်ပြီးတော့ ကျွန်တော်တို့ကလည်း ဒါဟာ မဖြစ်သင့်ဘူး သက်ဆိုင်ရာ ပို့ပြီးဖြေရှင်းတာ အသင့်တော်ဆုံးဆိုပြီး စခန်းကို ပို့လိုက်ပါတယ်။ အမှတ်(၈) မြို့မ ရဲစခန်းကို ပို့လိုက်ပါတယ်။

စခန်းမှာ သူ့ကို မေးတော့လည်း သူ့နာမည်ကို မုဟမ္မဒ်အလီလို့ပြောတယ်။ ကတ်ပြားထဲမှာတော့ မုဟမ္မဒ်ရှဖီးလို့ ရေးထားတယ်။ သူ့ကို မေးတဲ့အချိန်မှာလည်း ကွဲလွဲချက်တွေက အများကြီးပဲ။ သူက ဘာသာရေးပညာလည်း မတတ်ဘူးဖြစ်နေတယ်။ ကျွန်တော်တို့က ဒီကိစ္စကို ရှုပ်ထွေးလာမှာလည်း စိုးတယ်။ ဒါကြောင့် ဥပဒေနဲ့အညီ ရှင်းတာကောင်းတယ်လို့ပဲ ယူဆပြီး စခန်းပို့လိုက်တာပါ။

သူလာတာက ဟော်ကုန်းဝင်းထဲက လာတာလုိ့သိရပါတယ်။ သူ့နေရပ်လိပ်စာအတိအကျ သူပြောတာကတော့ သူ့နာမည်က ဇော်မင်းအောင်၊ အသက်က ၂၀-နှစ်၊ အဖေနာမည် ဦးသိန်းထွန်း၊ အမေနာမည်က ဒေါ်ချိုပါ။ နေတာက မကွေးတိုင်း၊ ချမ်းမြေသာယာကျေးရွာက မွတ်စလင်မ် သုဿာန်ထဲမှာနေတယ်လို့ ပြောတယ်။ သူက ကျပန်းလုပ်ငန်းလုပ်တယ်လို့ပြောပါတယ်။ သူ့ကို မေးမြန်းတဲ့အခါမှာ ဘာသာရေးစာပေ ကလိမာဟ်တောင် မသိဘူးဆိုတော့ ခက်ပါတယ်။ ကဒ်မှာတော့ မော်လ၀ီဘွဲ့ရလို့ ရေးထားတယ်။

ဟုတ်ကဲ့ ပြောပါတယ်။ ဒီကတ်ကို သူ ဘယ်လိုရလဲဆိုတော့ ဟော်ကုန်းဝင်းထဲမှာ တည်းခိုခန်းတစ်ခုရှိတယ်။ အဲဒီမှာက အခုလိုအလှူငွေကောက်ခံသူတွေ အများစုတည်းကြတယ်။ အဲဒီမှာနေတဲ့ ပုဂ္ဂိုလ်ကြီးတစ်ယောက်ကနေ သူ့ဓါတ်ပုံကို ကပ်ပြီး လုပ်ပေးလိုက်တာလို့ပြောပါတယ်။ သူလာတာကတော့ ကုရ်သာ (အင်္ကျီအရှည်) နဲ့ လာတာပါပဲ။

ရန်ကုန်က မော်လ၀ီများအဖွဲ့ချုပ်ကို ကျွန်တော်တို့ ဖုန်းဆက်မေးတဲ့အခါ ဒီကဒ်ဟာ ဘာသာရေးအရ မော်လ၀ီများကိုသာ ထုတ်ပေးတာပါ။ သာမန်လူကိုထုတ်ပေးတာ မရှိဘူးလို့ မော်လ၀ီများအဖွဲ့ချုပ်က ဖြေကြားပါတယ်။

သူ့မှာက မှတ်ပုံတင်လည်းမပါဘူး။ တစ်ခြား ဘာအထောက်အထားမှလည်းမပါဘူး။ ကျွန်တော်တို့ သူ့ကို ဘယ်လိုလုပ်ဝေခွဲလို့ရမလဲ။ ပြီးတော့ ကလိမာဟ် (အစ္စလာမ်ဘာသာဝင်များ မသိမဖြစ် သက်ဝင်ယုံကြည်ရသော ဝန်ခံချက်) တောင် လုံးဝ မဖတ်တတ်ဘူးဆိုတော့ ဘယ်လိုလုပ် မွတ်စလင်မ်လို့ ပြောလို့ရမလဲ။ မွတ်စလင်မ်မှန်ရင် ကလိမာဟ်တစ်ခုလောက်ကတော့ သူသိရမယ်။ ကလိမာဟ်တောင် မဖတ်တတ်တဲ့အပြင် ကုရ်သာဝတ်လာတယ်။ အိတ်တစ်လုံးပါတယ်။  ငွေ ၅၀၀၀ ပါတယ်။ ဆိုင်ကယ်တစ်စီးကိုလည်း ဟော်ကုန်းဝင်းထဲက ငှားလာတယ်လို့သိရတယ်။ အဲဒီ ဆိုင်ကယ်ကိုလည်း ရဲစခန်းမှာ လွှဲအပ်ခဲ့ပါတယ်။

နောက်တစ်ခု သူယူလာတာရှိသေးတယ်။ ကျွန်တော်က ဒီ ဂျွန်းဗလီဆေးခန်းမှာလည်း တာဝန်ရှိသူတစ်ယောက်ပါ။ ကျွန်တော်တို့မှာက ဆင်းရဲသားတွေကို ဆေးကုသခွင့်စာအုပ် ထုတ်ပေးထားတာရှိပါတယ်။ မိုးညှင်းက အမျိုးသမီးတစ်ယောက်ကို ထုတ်ပေးထားတဲ့စာအုပ်လည်း သူ့ဆီမှာပါလာတယ်။ အဲဒါကို သူက အဲ့ဒီအမျိုးသမီးရဲ့ကိုယ်စားဆိုပြီး လာထုတ်တယ်။ ကျွန်တော်တို့ ဆေးခန်းမှာက ဆေးကုဖို့ တကယ်လိုအပ်တဲ့သူကို လိုအပ်တဲ့ဆေးဝါးကအစ ဆရာဝန်ထောက်ခံချက်ပါရင် ထုတ်ပေးတာ။ အဲဒါကိုပါ သူက ယူလာတဲ့အတွက် သူလိမ်လည်တာက ပေါ်လွင်နေတယ်။ သူ့မှာ မှတ်ပုံတင်ဘာညာ အထောက်အထားလည်း ပါမလာတော့ ကျွန်တော်က သူ့ကို စွပ်စွဲလို့ မရဘူး။ မှတ်ပုံတင်ပါမှ ကျွန်တော်တို့က သူဟာ ဗုဒ္ဓဘာသာဝင်ဖြစ်တယ်၊ မွတ်စလင်မ်ဖြစ်တယ်လို့ ပြောလို့ရမယ်လေ။

အဲဒီအမျိုးသမီးရဲ့ စာအုပ်ကို သူရလာတာက ဆေးရုံအောက်ထပ်ကနေ သူ့ကို ပေးလိုက်တယ်လို့ပြောတယ်။ ဆေးရုံဆိုတာ မန္တလေး ပြည်သူ့ဆေးရုံကြီးကို ပြောတာပါ။ သူ့ဆီက ပြန်တွေ့ထားတဲ့ အထောက်အထားတွေကိုလည်း ကျွန်တော်ပို့ပေးပါမယ်။ အခုတော့ သူ့ကို ရဲစခန်းမှာ ပို့ထားလိုက်ပါပြီ။ ကျွန်တော်တို့ကတော့ တရားဥပဒေအရသာ ဖြေရှင်းလိုပါတယ်”လို့ M-Media ရဲ့ မေးမြန်းချက်ကို ဖြေကြားခဲ့ပါတယ်။