ဆန္ဒထုတ်ဖော်မှုတစ်ရပ်ကို ပုသိမ်မြို့တွင် အမျိုးသားဒီမိုကရေစီကွန်ရက်မှ ဦးဆောင်ပြုလုပ်မည်

ဇွန် ၁၊ ၂၀၁၃
M-Media
နေပိုင်

ပုသိမ် ။ ။ ဧရာဝတီတိုင်းဒေသကြီး၊ ပုသိမ်မြို့တွင် အမျိုးသားဒီမိုကရေစီကွန်ရက်မှဦးဆောင်ပြီး ဆန္ဒထုတ်ဖော်မှုတစ်ရပ်ကို ဇွန်လ ၃-ရက်နေ့တွင် ပြုလုပ်မည်ဖြစ်ကြောင်း သတင်းရရှိသည်။

ယင်းကဲ့သို့ ဆန္ဒထုတ်ဖော်မှုပြုလုပ်ရခြင်းမှာ ပုသိမ်မြို့တွင်ဖြစ်ပွားခဲ့သော ယာဉ်တိုက်မှုတစ်ခုတွင် ယာဉ်ကြီးနှင့် ယာဉ်ငယ် တိုက်မှုဖြစ်သော်လည်း ငွေအင်အားတောင့်တင်းသော ယာဉ်ကြီးပိုင်ရှင်ဘက်မှ ဘက်လိုက် စစ်ဆေးမှု ပြုလုပ်ခဲ့ခြင်းကြောင့်ဖြစ်သည်ဟု သိရသည်။ အဆိုပါ ဘက်လိုက်စစ်ဆေးခဲ့မှုကြောင့် ယာဉ်ငယ်၏ ယာဉ်မောင်းဖြစ်သူ ကျော်မျိုးနိုင်မှာ တရားခံအဖြစ် ရောက်ရှိနေရပြီး ယင်းကဲ့သို့ မတရားပြုလုပ်မှုအပေါ် တရားဥပဒေစိုးမိုးမှုရှိစေရေးအတွက် ဆန္ဒထုတ်ဖော်ကြမှာဖြစ်ပါတယ်။ ၎င်းမတရားဘက်လိုက်မှုနှင့်အတူ မတရားသဖြင့် အသိမ်းခံထားရသော လယ်ယာမြေများ ပြန်လည် လုပ်ကိုင်နိုင်ခွင့်ရရှိရေး၊ ခေတ်နောက်ပြန်ဆွဲသူတချို့၏ အတ္တများကြောင့် မလိုလားအပ်သော ပဋိပက္ခများဖြစ်ပွားနေခြင်း၊ ဘာသာပေါင်းစုံ အတူယှဉ်တွဲနေနိုင်ထိုင်ရေးတို့အတွက်ပါ ဆန္ဒထုတ်ဖော်ပြမည်ဖြစ်ကြောင်း အမျိုးသားဒီမိုကရေစီကွန်ရက်(NDN)၏ ဥက္ကဌဖြစ်သူ ဦးသန်းဝင်းမှ ပြောပြပါတယ်။

ယခုကဲ့သို့ဆန္ဒထုတ်ဖော်မှုအား မြို့နယ်၊ ခရိုင်၊ တိုင်းအဆင့်ထိ တင်ပြ အကြောင်းကြားခဲ့သော်လည်း ကျောင်းဖွင့်ရက်နှင့် တိုက်ဆိုင်နေခြင်းကြောင့် ခွင့်ပြုချက် မပေးကြောင်း၊ ယခုအခါ ဒုတိယအကြိမ်အဖြစ် ထပ်မံတင်ပြ၍ ခွင့်ပြုမိန့် တင်သွင်းထားကြောင်း၊ခွင့်ပြုချက်မရရှိပါကလည်း မိမိတို့စီစဉ်ထားသော ဆန္ဒထုတ်ဖော်ပွဲအား မဖြစ်မနေ အောင်မြင်အောင် ဆောင်ရွက် သွားမည်ဖြစ်ကြောင်း ခွင့်ပြုချက်မရရှိသည့်အတွက် ထိုနေ့တွင်တားဆီးမှုများရှိလာပါက ငြိမ်းချမ်းစွာဖြေရှင်းမည် ဖြစ်ကြောင်းကိုလည်း ဦးသန်းဝင်းမှ ဆက်လက်ပြောပြခဲ့ကြောင်း သိရပါတယ်။