တရားဥပဒေ စိုးမိုးရေးအတွက် ပုသိမ်မြို့တွင် ဆန္ဒ ထုတ်ဖော်

ဇွန် ၃၊ ၂၀၁၃
M-Media
နေပိုင်

ပုသိမ် ။           ။   ဧရာဝတီတိုင်းဒေသကြီး ပုသိမ်မြို့တွင် ယနေ့မနက်ပိုင်းက ဆန္ဒထုတ်ဖော်ပွဲတစ်ရပ်ကို ပြုလုပ်ခဲ့ကြသည်။

ဆန္ဒထုတ်ဖော်ပြသရခြင်းမှာ ဘာသာပေါင်းစုံအတူ ယှဉ်တွဲနေထိုင်ရေး၊လယ်ယာမြေ မတရားအသိမ်းခံထားရမှုများနှင့် တရားဥပဒေစိုးမိုးရေး နှင့် မောင်ကျော်မျိုးလှိုင်နှင့်မအေးအေးမွန်တို့ လင်မယားအား ချမ်းမြေ့အေးကြို/ပို့ ယာဉ်ဖြင့်တိုက်မိပြီး နောက် တစ်နှစ်ကြာသည့် အထိ တာဝန်ယူမှု ကင်းမဲ့ခဲ့သော ချမ်းမြေ့အေး ယာဉ်လိုင်းအား ဆန္ဒပြခြင်း တို့အတွက် ဆန္ဒထုတ်ဖော်ကြခြင်းဖြစ်ကြောင်း သိရှိရပါသည်။

၂၀၁၃-ခုနှစ်၊ ဇွန်လ(၃)ရက်၊ ၁၃၇၅-ခုနှစ်၊ ကဆုန်လဆုတ်(၁၀)ရက်နေ့တွင် ဧရာဝတီတိုင်းဒေသကြီး ပုသိမ်မြို့တွင်ပြုလုပ်ခဲ့သော ဆန္ဒ ထုတ်ဖော်ပွဲတွင် မယ်သီလကျေးရွာ၊ဖိုး ကြာအိုင်ကျေးရွာ၊ ကုလားမတောင်၊ ဘုန်းကလေး၊ ကွင်းချောင်းလေး၊ ရေကျော်ကြီး၊ ဆိတ်ကြီး စသည့် ငပုတောမြို့နယ်အတွင်းရှိ ကျေးရွာများမှ ပူးပေါင်း ပါဝင်ခဲ့ကြပါသည်။ပန်းတနော်မြို့နယ်မှ လယ်သမားအစည်းအရုံးမှလည်း ပူးပေါင်းပါဝင်ခဲ့ကြပါသည်။

ယခု ဆန္ဒထုတ်ဖော်ပွဲမှာ အမှန်တရား ဖော်ထုတ်ရှင်းလင်းပွဲသာကြောင်းကွန်ရက်ပေါင်းစုံနှင့် လယ်သမားများ၊ အလုပ်သမားများ၊ ပြည်သူများ စုပေါင်း၍ အမှုမှန်ပေါ်ပေါက်ရေး၊ဘာသာပေါင်းစုံငြိမ်းချမ်းစွာ အတူယှဉ်တွဲနေထိုင်ရေး၊ လယ်ယာမြေများပြန်လည်ရရှိ ထွန်ယက် စိုက်ပျိုးနိုင်ရေးတို့အတွက် စုစည်းဆောင်ရွက်ကြခြင်း ဖြစ်သည်။တရားမျှတသော တရားဥပဒေစိုးမိုးရေးကို ရည်ရွယ်ပါကြောင်းကို ဆန္ဒပြပွဲ ဦးဆောင်သူများ ပြောပြသည်။

အဆိုပါဆန္ဒထုတ်ဖော်ပွဲ၌ ဘာသာပေါင်းစုံ အတူယှဉ်တွဲနေထိုင်နိုင်ရေးကွန်ရက်မှ ပြည်သူများသို့ ပန်ကြားချက်တစ်စောင် ထုတ်ပြန်ခဲ့ကြောင်းလည်း သိရသည်။ ယင်းပန်ကြားချက်အပြည့်အစုံမှာ –

၁။    မြန်မာနိုင်ငံအတွင်းမှီတင်းနေထိုင်ကြသည့်နိုင်ငံသားမှန်လျှင်လူမျိုး၊ဘာသာ၊အယူဝါဒ၊ယုံကြည်ချက်၊ ခံယူချက်မည်သို့ပင် မတူကွဲပြားစေကာမူ တို့မြန်မာနိုင်ငံသားဟူသော စိတ်ဓာတ်ဖြင့်အပြန်အလှန် လေးစားလိုက်နာသည်းခံ ခွင့်လွှတ်ငြိမ်းချမ်း ချစ်ကြည်စွာ အတူယှဉ်တွဲနေထိုင်ကြ၍ နိုင်ငံတော်ကိုသစ္စာထားရမည်။

၂။    အမျိုးဘာသာသာသနာကို ချစ်မြတ်နိုးစိတ်သည်မိမိလူမျိုး ဘာသာတွင်သာမကသူတစ်ပါး လူမျိုးတွင်လည်းရှိကြပေသည်။ မိမိသဒ္ဒါစိတ်ထက်သန် လွန်ကဲ အစွန်းရောက်မှုဖြင့် သူတစ်ပါးအမျိုး၊ ဘာသာ၊ သာသနာကိုထိပါးစော်ကားရာရောက်မည့် အပြုအမူ၊အပြောအဆို၊ အကြံအစည်မှန်သမျှကို ဆင်ခြင်စဉ်းစားသိနားလည်ကြစေလိုပါသည်။

၃။     မိမိနေထိုင်ရာတိုင်းဒေသကြီး၊မြို့နယ်၊ ရပ်ကွက်ကျေးရွာအတွင်းတွင် လူမျိုးရေး၊ ဘာသာရေး ပဋိပက္ခများဖြစ်ပေါ်စေရန်သွေးထိုး၊ လှုံ့ဆော် စည်းရုံး သိမ်းသွင်းမှုများကို တွေ့မြင် သိရှိရပါကခံစားမှုကိုရှေ့တန်းတင်၍ ကိုယ်တိုင်ပါဝင်ကျူးလွန်မှုမရှိစေရန် အထူးဂရုပြုရပါမည်။

၎။ ထိုသို့သောသွေးထိုးလှုံ့ဆော်စည်းရုံး သိမ်းသွင်းမှုများကိုတွေ့မြင်သိရှိရသည့် အတိုင်းသက်ဆိုင်ရာတာဝန်ရှိ အဖွဲ့အစည်းထံသို့လည်းကောင်း၊ ကျွန်ုပ်တို့ ဘာသာပေါင်းစုံ ငြိမ်းချမ်းစွာအတူ ယှဉ်တွဲနေထိုင်နိုင်ရေး ကွန်ရက်သို့လည်းကောင်း အသိပေးအကြောင်းကြားစေလိုပါသည်။ သက်သေခံအထောက်အထားရရှိပါကလည်းပေးအပ်စေလိုပါသည်။

၅။    မိမိနေထိုင်ရာတိုင်းဒေသကြီး၊ရပ်ကွက်၊ကျေးရွာအတွင်းတွင်လူမျိုးရေး၊ ဘာသာရေး ပဋိပက္ခ ဖြစ်စေမည့် ပြစ်မှုများ ဖြစ်ပွားနေပါက သက်ဆိုင်ရာ တာဝန်ရှိ အဖွဲ့အစည်းထံသို့လည်းကောင်း ကျွန်ုပ်တို့ဘာသာပေါင်းစုံ ငြိမ်းချမ်းစွာအတူယှဉ်တွဲ နေထိုင်ရေး ကွန်ရက်သို့လည်းကောင်း အသိပေး အကြောင်းကြးစေလိုပါသည်။ ကျွန်ုပ်တို့နှင့်ပူးပေါင်းကာ အမှန်တရားပေါ်ပေါက်ရေးကိုသာ ဦးတည်ညှိနှိုင်း ရှင်းလင်းစေလိုပါသည်။

၆။     ကျွန်ုပ်တို့ဘာသာပေါင်းစုံငြိမ်းချမ်းစွာအတူယှဉ်တွဲနေထိုင်ရေးကွန်ရက်(ယာယီ) ရုံးသို့အောက်ပါ ဖုန်းနံပါတ်များဖြင့် ဆက်သွယ်သတင်းပေးပို့၍ ပူးပေါင်းပါဝင်ဆောင်ရွက်စေလိုပါသည်။

ဖုန်း-၀၉၅၂၀၃၀၄၇၊ ၀၄၂၂၂၀၁၇၊ ၀၉၅၀၆၉၀၂၆ သို့ ဆက်သွယ်နိုင်ပါသည်။