“ငြိမ်းချမ်းမှု တည်ဆောက်ရေး ကွန်ရက်” မှ အကြမ်းဖက်မှုများကို ဆန့်ကျင်ရှုတ်ချ

ဇွန် ၁၁ ၊ ၂၀၁၃
M-Media
မောင်ပုည

အကြမ်းဖက်မှုများကို ဆန့်ကျင်ရှုတ်ချသည့် ကြေညာချက် တစ်စောင်ကို ငြိမ်းချမ်းမှုတည်ဆောက်ရေး ကွန်ရက် Peace Cultivation Network (PCN) က ဇွန်လ (၅) ရက်နေ့ နေ့စွဲဖြင့် ထုတ်ပြန်ကြေညာလိုက်ကြောင်းသိရှိရပါသည်။

အဆိုပါကြေညာချက်တွင်
– မလေးရှားနိုင်ငံအပါအဝင် ပြည်တွင်ရောက်ရှိသည့် အပြစ်မဲ့ မြန်မာနိုင်ငံသား မည့်သည့် လူမျိုး၊ မည်သည့်ဘာသာဝင်ကိုမဆို အကြမ်းဖက်တိုက်ခိုက်မှုများကို ပြင်းထန်စွာရှုတ်ချကြောင်း၊
– သက်ဆိုင်ရာ အစိုးရများမှ လူမျိုး/ဘာသာမခွဲခြားဘဲ မြန်မာနိုင်ငံသားအားလုံး ဘေးကင်းအောင် ကာကွယ်စောင့်ရှောက်ပေးရန်၊ အကြမ်းဖက်မှုများကို ထိရောက်စွာရေးယူဆောင်ရွက်ပေးရန် တောင်းဆိုကြောင်း၊
– မလေးရှားတွင် မြန်မာနိုင်ငံသားအချို့ အကြမ်းဖက်တိုက်ခိုက်ခံရမှုများကြောင့် ထိခိုက်နစ်နာမှုများနှင့် မြန်မာနိုင်ငံအတွင်း ဒေသအသီးသီးတွင် အကြမ်းဖက်တိုက်ခိုက်ခံရပြီး သေဆုံး၊ ဒဏ်ရာ ရခြင်းများ၊ အိုးအိမ် ဘာသာရေးအဆောက်အအုံများ ဖျက်ဆီးခံရသဖြင့် ပျက်ဆီး ဆုံးရှုံးမှုများအတွက် PCN မှ ဝမ်းနည်းကြောင်း၊
– လူမျိုးရေး ၊ ဘာသာရေး ပဋိပက္ခများ ဖြစ်စေရန် ရည်ရွယ်ဦးတည်သည့် လှုံ့ဆော်မှုများ၊ဝါဒဖြန့်မှုများ၊ မမှန်မကန် အကြောင်းအရာများဖြင့် သွေးထိုးပေးမှုများ၊ ကောလဟလ ထုတ်လွှင့်မှုများ၊ မီဒီယာကျင့်ဝတ်နှင့် မညီသော အချို့သတင်းဖော်ပြမှုများ နှင့် ပြည်သူ(လူမျိုး၊ဘာသာအားလုံး) တို့၏ အသက်အိုးအိမ်နှင့် သာသနိက အဆောက်အအုံများကို မင်းမဲ့စရိုက်ဆန်စွာ အကြမ်းဖက်တိုက်ခိုက်၊ သတ်ဖြတ်မီးရှို့၊ ဖျက်ဆီး၊ လုယက် အနိုင်အထက် ပြုမှုမှန်သမျှ အမြန်ဆုံးရပ်တံ့သွားရန် နှင့် ထပ်မံ့မဖြစ်ပွားစေရန် ငြိမ်းချမ်းရေးမြတ်နိုးသူ ပြည်သူ( လူမျိုးဘာသအားလုံး) အမျိုးသားရေးအသွင်ဖြင့် ကူညီတားဆီးပေးရန် မေတ္တာရပ်ခံကြောင်း၊
-အကြမ်းဖက် တိုက်ခိုက်မှုများမှာ ဖွဲ့စည်းပုံအခြေခံဥပဒေ၊ တည်ဆဲဥပဒေများနှင့် ဆန့်ကျင်နေပါသဖြင့် အေးချမ်းစွာနေ ထိုင်လိုသည့် နိုင်ငံသားအားလုံးအား လူမျိုး၊ဘာသာ မခွဲခြားဘဲ နိုင်ငံတော်မှ ကာကွယ်စောင့်ရှောက်ပေးပြီး အကြမ်းဖက်တိုကခိုက်မှုများကို ဖော်ထုတ်၍ တရားဥပဒေအရ ထိရောက်စွာ အရေးယူ ဆောင်ရွက်ပေးရန် ၊ ဘာသာပေါင်းစုံ ချစ်ကြည်ရေးအစီအစဉ်များကို မြန်မာမီဒီယာများမှ အမျိုးသားရေး အသွင်ဆောင်၍ ဖော်ပြပေးခြင်းဖြင့် တရားဥပဒေစိုးမိုးရေး၊ တည်ငြိမ်အေးချမ်းမှုကို ဖော်ဆောင်ပေးပါရန် တိုက်တွန်းတောင်းဆိုကြောင်း ကြေညာချက်မှာ ထည့်သွင်းဖော်ပြထားပါသည်။

ရန်ကုန်အခြေစိုက် ငြိမ်းချမ်းမူ တည်ဆောက်ရေးကွန်ရက်(Peace Cultivation Network (P.C.N) )သည်
(၁) ပြည်ထောင်စု မြန်မာနိုင်ငံသားများ၏ စွမ်းရည်တည်ဆောက်မှု (Capacity Building)၊ ပညာရေး နှင့် ဘဝနေထိုင်မှု အဆင့်အတန်းမြှင့်တင်ပေးရန်
(၂) ပြည်ထောင်စုဖွားအချင်းချင်းချစ်ကြည်ရင်းနှီးသောဆက်ဆံမှုများတည်ဆောက်ရန်
(၃) တရားဥပဒေ စိုးမိုးရေး။ တည်ငြိမ်အေးချမ်းရေးနှင့် ငြိမ်းချမ်းရေးလုပ်ငန်းစဉ်များတွင် တက်ကြွစွာ ပါဝင်ဆောင်ရွက်ရန်
(၄) ရည်ရွယ်ချက်တူ အခြား အဖွဲ့အစည်းများနှင့် ပူးပေါင်းဆောင်ရွက်ရန်
ရည်ရွယ်ချက်များဖြင့် လူမျိုးပေါင်းစုံ ဘာသာပေါင်းစုံ ဖြင့် ဖွဲ့စည်းထားသော ကွန်ရက်အဖွဲ့အစည်းတခုဖြစ်သည်။