ဟိုအရွက်ဒီအရွက် ကပ်တဲ့မျက်စိ သတိတော့ပြုပါ

ရှားစောင်းလက်ပတ်နဲ့ ကွမ်းရွက်တွေ ကပ်တဲ့ အခါမှာ သေချာမဆေးကြောပဲ ကပ်မိရင် မျက်လုံးထဲ ပိုးဝင်ပြီး ထိခိုက်နိုင်တယ်လို့ မျက်စိအထူးကုဆရာဝန်ကြီး ဒေါက်တာ ဦးတင်ဝင်းထံက သိရပါတယ်။
မျက်လုံးကို ထိတွေ့တဲ့ အရာဝတ္ထုမှန်သမျှက သန့်ရှင်းဖို့ လိုပါတယ်။ မျက်စိဆိုတာက အထိခိုက်မခံတဲ့ နေရာ ဖြစ်တဲ့အတွက် လက်လွတ်စပယ် မလုပ်သင့်ဘူးလို့ ဆိုပါတယ်။ နယ်မြို့တစ်ခုမှာ ရှားစောင်းလက်ပတ် နေ့တိုင်းကပ်ရာက မျက်စိကွယ် သွားတယ်ဆိုတဲ့ ဖြစ်ရပ်လည်း ရှိကြောင်း သိရတယ်။
ဒေါက်တာဦးတင်ဝင်းက ‘ရှားစောင်းလက်ပတ်တွေ၊ ကွမ်းရွက်တွေ ကပ်တာများလို့ အခိုးပွင့်တာ များပြီး မျက်စိကွယ်တာ မဖြစ်နိုင်ပါဘူး၊ မျက်စိနဲ့ပတ်သက်ပြီး ပြဿနာ တစ်ခုခု ဖြစ်လို့ တိုက်ဆိုင်ပြီး မျက်လုံးကွယ်တာပဲ ဖြစ်နိုင်တယ်၊ နောက်တစ်မျိုး ဖြစ်နိုင်တာက ကပ်တဲ့ ရှားစောင်းလက်ပတ်ကို သေချာစင်အောင် မဆေးလို့ မျက်လုံးထဲ ပိုးဝင်ပြီး ထိခိုက်သွားတာလဲ ဖြစ်နိုင်တယ်။ ဒီရှားစောင်းလက်ပတ်တွေ၊ ကွမ်းရွက်တွေက ရေနဲ့စင်အောင် သေချာဆေးပေမယ့်လဲ ရောဂါကင်းမယ်လို့ မပြောနိုင်ဘူး။ ကပ်ထားလို့ ရှိရင် မျက်လုံးကို မှိတ်ထားသင့်တယ်’ လို့ ရှင်းပြပါတယ်။
မျက်လုံးက တစ်ခုခုထိခိုက်မိရင် နီလာပြီး နီ၊ ကိုက်၊ မှုန်ဆိုတဲ့လက္ခဏာတွေ ဖြစ်တာ များတယ်လို့ သိရတယ်။ အဲသည်လိုတွေ ဖြစ်လာရင် ချက်ချင်းလုပ်လက်စ အလုပ်တွေကို ခဏနားပြီး အမှိုက်ဝင်နေရင်လည်း အမှိုက်ထွက်သွားအောင် မျက်လုံးကိုရေနဲ့ သေချာ ဆေးဖို့လိုပါတယ်။ ပဋိဇီဝ မျက်စဉ်းဆေးတွေ ထည့်တာလည်း ဂရုတစိုက် လုပ်သင့်တယ်လို့ ဆရာဦးတင်ဝင်းက အကြံပြုပါတယ်။