စိတ်မချမ်းမြေ့ဖွယ် ပဲခူးရေကြီးမှု နှင့် စိတ်ကြည်နူးဖွယ် ရေဘေးကူညီစောင့်ရှောက်မှုများ

၂ဝ၁၁ ခုနှစ် ဇူလိုင်လတွင် ပဲခူးမြို့ရေဘေးသတင်းကို စိတ်မချမ်းမြေ့ဖွယ် ကြားသိခဲ့ရပြီးနောက်မှာတော့ နောက်ဆက်တွဲသတင်းအဖြစ် ကြည်နူးဖွယ် ပဲခူးမြို့မွတ်စ်လင်မ် ရေဘေးကယ်ဆယ်ရေး ဆောင်ရွက်မှုသတင်းကို ဆက်လက်သိရှိရမှာဖြစ်ပါတယ်…

နှစ်စဉ်နီးပါး ရေကြီးလျှက်ရှိသော ပဲခူးမြို့ဟာ ယခုနှစ်မှာလည်း အစဉ်အလာမပျက် ဇူလိုင်၂၁ရက်နေ့ကစပြီး ရေကြီးလာပါတယ်။ တစ်မြို့လုံးတော့ရေကြီးတာမဟုတ်ပါဘူး။ ပဲခူးမြို့ရှိ အနိမ့်ပိုင်းနေရာများဖြစ်တဲ့ ကျွန်းသာယာ၊ ခေါင်းဆေးကျွန်း၊ စက်ပိုင်း၊ မဇင်း၊ အိုးလေးစု၊ ပြည်တော်သာ၊ ကလျာဏီ၊ ဇိုင်းတောင်/မြောက်၊ ကျောက်ကြီးစု စသောရပ်ကွက်များတွင်မိုးကြီးရေလျှံမှု့ကြောင့် ရေဘေးနစ်မြုပ်ခြင်း ဖြစ်ခဲ့ပါသည်။

အရေးပေါ်ရေဘေး ကယ်ဆယ်ရေးဋ္ဌာနများအဖြစ် ပဲခူးမြို့ရှိ သာသနာ့ဗိမ္မာန်၊ ဘုန်းကြီးကျောင်းများနှင့် အစ္စလာမ်ဘာသာဝင်များ၏ ဒါရ်ဂါ၊ ဗလီ စသောနေရာများတွင် ဖွင့်လှစ်ပြီး ကယ်ဆယ်စောင့်ရှောက်မှုများ  ပြုလုပ်ခဲ့ကြပါသည်။

ပဲခူးမြို့ရှိ မွတ်စလင်မ်ရေဘေးကယ်ဆယ်ရေးကော်မတီကို ဖွဲ့စည်းဆောင်ရွက်ရာတွင် ပဲခူးမြို့ရှိ အစ္စလာမ်ဘာသာရေးအဖွဲ့ကြီး၎ဖွဲ့၊ ပန်းလှိုင်ဗလီ၊ မဇင်းဗလီ၊ ဒါရ်ဂါဗလီ၊ ၅လမ်းဂျာမေဗလီ ဂေါပကဝင်များနှင့် မြို့မိမြို့ဖများ ပူးပေါင်း၍ ကော်မတီဖွဲ့စည်းကာ ရံပုံငွေ စုဆောင်းခြင်းများကို အရေးပေါ်ပြုလုပ်ခဲ့ကြပါတယ်။

၎င်းကော်မတီတွင် သဘ်လီဂ်ဂျမာသ်လူငယ်များနှင့် တွရီကာအဖွဲ့မှ လူငယ်များမှ ညီညီညွတ်ညွတ် လုပ်အားဒါနပြုခဲ့ကြတာကိုလည်း ကြည်နူးဖွယ်တွေ့မြင်ခဲ့ရပါတယ်။

ရေဘေးဒုက္ခသည်များအတွက် မနက်ထမင်းထုတ် ၁၅၀၀၊ ညနေ၁၅၀၀…တစ်နေ့ အထုတ် ၃၀၀၀ကို ၄ ရက်တိုင် ဝေငှခဲ့ကြပါတယ်။ ထမင်းဟင်းများကို ပဲခူးမြို့ ဒါရ်ဂါဗလီဝတ်ကျောင်းတော်မှ တာဝန်ယူချက်ပြုတ်၍ အထုတ်များပြင်ဆင်ထုတ်ပိုးကာ ရပ်ကွက်များသို့အိမ်တိုင်ရာရောက် လှေများဖြင့် တာဝန်ခံများမှ လိုက်လံပို့ပေးခြင်းဖြင့် လှူဒါန်းမှုပြုခဲ့ကြပါတယ်။

ပဲခူးမြို့မှတာဝန်သိအစ္စလာမ်သာသနာဝင်များသည် ယခုအခါတွင် လူမှုရေးထောက်ပံ့ကူညီမှု ကော်မတီ၊ သွေးလှူရှင်များအဖွဲ့၊ ပညာရေးနှင့်ဒအ်ဝဟ်ရေးရာမိသားစု၊ ပညာရေး ကူညီစောင့်ရှောက်မှုကော်မတီ များဖွဲ့ကာ ကျန်းမာရေနှင့်ပညာရေးအတွက် ထောက်ပံ့ငွေများထုတ်ပေးခြင်း ပညာရေးကဏ္ဍတွင်လည်း ကျောင်းအပ်နှံရေးကိစ္စများကို ငွေကြေးစိုက်ထုတ်သုံးစွဲခြင်း၊ ၁ဝတန်းအခမဲ့ကျူရှင်ဖွင့်လှစ်သင်ကြားခြင်း၊ ၁ဝတန်းအောင်ကျောင်းသားများအား ဂုဏ်ပြုဆုပေးပွဲကျင်းပခြင်း၊ ဘာသာရေးနှင့်ပက်သက်၍ နှစ်စဉ်နွေရာသီ အစ္စလာမ်ဘာသာရေး၊ ယဉ်ကျေးမှု နှင့် စာရိတ္တမြှင့်တင်ရေးသင်တန်းများ ဖွင့်လှစ်ခြင်း၊ အာရ်ဘီ(သဂ်ျဝီးဒ်) ကုရ်အာန်အဖတ်သင်တန်း၊ အာရ်ဘီသဒ္ဒါသင်တန်း နှင့် စကားပြောသင်တန်း များဖွင့်လှစ်ခြင်းစသော အလ္လာဟ်နှစ်မြို့သောလုပ်ငန်းများကို စုပေါင်းဆောင်ရွက်နေကြကာ နောင်မကြာမီကာလတွင်လည်း လူမျိုးဘာသာမရွေး ကျန်းမာရေး ကူညီမှုလုပ်ငန်းများ ဆောင်ရွက်ရန် စိုင်းပြင်းလျှက် ရှိပါတယ်။

“(အို-မွတ်စလင်မ်အပေါင်းတို့) အသင်တို့သည် မိမိတို့နှစ်သက်ကြကုန်သော ဥစ္စာပစ္စည်းများအနက်မှ၊ လှူဒါန်းသုံးစွဲခြင်း မပြုသမျှ ကာလပတ်လုံး၊ မြင့်မြတ်သော ကိုယ်ကျင့်တရားကို အစစ်အမှန်(၏အကျိုးကျေးဇူး)ကို မည်သည့်နည်းနှင့်မျှ ရယူနိုင်မည် မဟုတ်ပေ။’’ စူရာဟ် ၃ အာယတ် ၉၂

“ဆာလောင်နေသောဝမ်းခေါင်းကိုဖြည့်စွမ်းပေးခြင်းသည် အမွန်မြတ်ဆုံးသောအလှူဒါနဖြစ်သည်” ဆိုသည့်တမန်တော်မြတ်ကြီးရဲ့ ဟဒီးစ်တော် နှင့်

“လူသားအကျိုးဆောင်ရွက်သူသည်အကောင်းဆုံးသောသူဖြစ်သည်”

ဆိုသည့်ဟဒီးစ်တော်များအရ…အထက်ပါကူညီစောင့်ရှောက်မှုများအား ကာယအား၊ ဉာဏအား၊ ဓနအား တို့ဖြင့်ကူညီစောင့်ရှောက်သူများအား အရှင်မြတ်ဖက်တော်မှ နှစ်သက်ကျေနပ်မှုရရှိလိမ့်မည်ဟု မျှော်လင့်မိပါသည်။