ဝါသနာနဲ့ အားမလိုအားမရမှုတွေကြောင့် မြန်မာစာကို လေ့လာဖြစ်သူ ကိုသန်းမင်းထိုက် (Ph.D Candidate)-Part-1

MMSY မိသားစုဝင်တဦးဖြစ်သူ ကိုသန်းမင်းထိုက် ကို မ၀ိုင်း တွေ့ဆုံ အင်တာဗျူးထားသည်ကို ဖော်ပြပေးလိုက်ပါတယ်။

ကိုသန်းမင်းထိုက်ဟာ ရန်ကုန်တက္ကသိုလ်မှာ မြန်မာစာအထူးပြု ပါရဂူဘွဲ့(Ph.D) တက်ရောက်နေတဲ့ ဂုဏ်ယူဖွယ် ထူးချွန်မွတ်စလင်မ် လူငယ်တစ်ဥိးပဲဖြစ်ပါတယ်။

အပိုင်း(၁)

မေး –  စလာမ်ပါ အစ်ကို။

ဖြေ –    ၀အလိုင်းကွန်းမ်စလာမ်

မေး – ထူးချွန်မွတ်စလင်မ်လူငယ်ကဏ္ဍအတွက် အင်တာဗျူးလုပ်မှာဆိုတော့ အမေးဖြေကဏ္ဍလေး စလိုက် ရအောင်နော်။

ဖြေ –    ဟုတ်ကဲ့။

မေး – အစ်ကို့ရဲ့ နာမည်လေးပြောပြပါလား။ မြန်မာနာမည်ရော၊ အာရဗီနာမည်ရောပေါ့။

ဖြေ –    ဟုတ်ကဲ့ ကျွန်တော့်ရဲ့ မြန်မာနာမည်က သန်းမင်းထိုက်ပါ။ အာရဗီနာမည်ကတော့ မုဟမ္မဒ်ဖိုင်သွလ္လာဟ်။

မေး – မွေးရပ်ဇာတိနဲ့ မွေးသက္ကရာဇ်ကရော။

ဖြေ –    မွေးရပ်ဇာတိကတော့ သာကေတပါပဲ။ မွေးသက္ကရာဇ်က ၂၅-၂- ၁၉၇၇ ပါ။

မေး – သန်းမင်းထိုက်ဆိုတာ နာမည်အရင်းပဲလား။ စာတွေရေးတော့ရော။

ဖြေ –    ဟုတ်ကဲ့ နာမည်ရင်းပါ။ စာရေးတော့လည်း သန်းမင်းထိုက်ဆိုတဲ့နာမည်ကို မြန်မာစာနဲ့တွဲပြီးတော့ သန်းမင်းထိုက်(မြန်မာစာ) ဆိုတဲ့နာမည်နဲ့ ရေးပါတယ်။

မေး –  မြန်မာစာမေဂျာပေါ့နော်။

ဖြေ –    ဟုတ်ကဲ့ မြန်မာစာမေဂျာပါ။

မေး –  ဟုတ်ကဲ့ ဒါဆို ကိုသန်းမင်းထိုက်ရဲ့ မိဘတွေနဲ့ ညီအစ်ကို မောင်နှမတွေရော ပြောပြလို့ရမလား။ လက်ရှိဘယ်မှာနေလဲ။

ဖြေ –    ညီအစ်ကိုမောင်နှမ(၅)ယောက်ရှိတယ်။ ကျွန်တော်က အကြီးဆုံး။ အားလုံးကတော့ ဘွဲ့ရပြီးပါပြီ။ မိဘတွေကတော့ အဖေက ဦးမြသန်း( စာရေးဆရာမောင်သဲနီ)။ အမေက ဒေါ်မြစိန်ပါ။ နေတာကတော့ မိဘတွေနဲ့အတူ ဒေါပုံမှာ နေပါတယ်။

မေး – ကိုသန်းမင်းထိုက်ရဲ့ ပညာရေးအခြေအနေကိုလည်း ပြောပြပါဦး။ ငယ်ငယ်ကတည်းက အခုလက်ရှိထိ ပညာသင်ကြားခဲ့တဲ့ အခြေအနေလေးပေါ့။

ဖြေ –    ငယ်ငယ်က ကျောင်းစနေတာကတော့ သာကေတ အ.မ.က(၁)မှပါ။ မူလတန်းကျောင်းသားဘ၀မှာ တော့ ပညာရည်ချွန်ဆုတွေ ရခဲ့ဖူးတယ်။ ဒါပေမယ့် အဲဒီကနေ အလယ်တန်းကျောင်းပြောင်းတဲ့အချိန် ကျတော့  ပညာရေးက ထူးထူးချွန်ချွန်တော့ မဟုတ်ဘူး။ သာမန်ပဲပေါ့။ (၅)တန်းမှာ ဒေါပုံကို ပြောင်းတယ်။ (၆)တန်းရောက်တော့ နယ်ကိုပြောင်းရတယ်။ နယ်ဆိုတာက စစ်ကိုင်းတိုင်း ရေဦးဘက်။ အဖေက ဆည်မြောင်းဌာနက S.A. E ဆိုတော့ ၈၈ အရေးခင်းနောက်ပိုင်းမှာ နယ်ဘက်ကိုတာဝန်ကျ လို့ ပြောင်းရတာ။ အဲဒီကနေ (၈)တန်းနှစ်ရောက်တော့ အဖေက တောင်တွင်းကြီးကို ပြောင်းရပြန် တယ်။ အဲဒီနှစ်မှာပဲ အဖေလည်း ဟဂ်ျသွားဖြစ်တော့ မိသားစုကို ရန်ကုန်မှာပဲ ပြန်ထားမယ်ဆိုပြီး (၈)တန်းမှာတစ်ခါ ရန်ကုန်ပြန်ရောက်လာတာပေါ့။ အဲဒီလို လျှောက်ပြောင်းနေရတော့ မကြာခဏ ဆိုသလို ခံစားမှုအသစ် ဖြစ်တယ်။ သူငယ်ချင်းအပေါင်းသင်းကလည်း အသစ်၊ ဆရာကလည်း အသစ်။ နယ်နဲ့ ရန်ကုန် အကူးအပြောင်းမှာ နည်းနည်းလေးကွာခြားမှုရှိနေတယ်။ နယ်ကိုရောက်တော့လည်း ရန်ကုန်သား မြို့သားဆိုပြီး သူတို့ရဲ့အမြင်ကတစ်မျိုး။ နောက်ပြီး ကိုယ်ပြောတာဆိုတာနဲ့ သူတို့ပြောဆို ဆက်ဆံတာတွေက ကွာခြားတယ်။ ဟိုမှာနည်းနည်း အသားကျပြီးမှ ရန်ကုန်ပြန်ရောက်လာတော့ စရိုက်တွေက နည်းနည်းကွဲသွားပြီ။ အဲဒီတုန်းက ရန်ကုန်မှာ (၈)တန်းပြန်တက်ရတာ။ အ-လ-က (၄)၊ ဒေါပုံမှာ။ ဖြစ်ချင်တော့ ကျွန်တော်က နယ်ပြောင်းလည်းဖြစ် ကျောင်းအပ်ချိန်ကလည်း နောက်ကျတော့ နှစ်ကျတွေချည်းပဲ ထားတဲ့အခန်းထဲမှာ ကျွန်တော့်ကိုထားခံရတယ်။ သိပ်လည်းမပျော်ဘူး။ သူငယ်ချင်း အပေါင်းအသင်းလည်း မရှိဘူး။ နောက်ဆုံး စာထဲမှာပါ သိပ်အာရုံမရှိတော့ဘူး။ စာသင်တဲ့ဆရာ၊ ဆရာမတိုင်းကလည်း တစ်ခန်းလုံးကိုခြုံပြီး မနှစ်က သင်ပြီးသားလို့ သတ်မှတ်ပြီး ကွက်ကျော်သင်တာ တို့ တော်ရိလျော်ရိသင်တာတို့၊ မနှစ်က မှတ်စုရှိပြီးသားမဟုတ်လားလို့ပြောပြီး မှတ်စုအသစ်မပေး တော့တာတို့ အဲဒီလိုမျိုးတွေလုပ်တော့ ကြွားလိုက်ရဦးမယ် ကျွန်တော် ၈ တန်းနှစ်မှာ ကျရောဗျ။

မေး –  သြော် …. အစ်ကိုတို့တုန်းက (၈)တန်းက အစိုးရစစ် စာမေးပွဲဖြစ်မယ်နော်။

ဖြေ –     ဟုတ်တယ် အစိုးရစစ်။ (၈)တန်းမှာ တစ်နှစ်ကျပြီးတော့– နောက်–အဲဒီစစ်ကိုင်းတိုင်းကိုပဲ ပြန်ပြောင်း ရတယ်။ အဲဒီမှာပဲ (၈)တန်း ပြန်တက်တယ်။ ပြန်တက်တဲ့နှစ်မှာတော့ ဂုဏ်ထူး(၂) ဘာသာပါတယ်။ သင်္ချာနဲ့ သမိုင်း။ အဲဒီ အ-ထ-က(၁) ရေဦးကနေပဲ ဆယ်တန်းအောင်တယ်။ ဆယ်တန်းအောင်ပြီးတဲ့ အခါမှာလည်း ပုံမှန်ဆို မုံရွာဒီဂရီကောလိပ်တက်ရမှာ။ ဒါပေမဲ့ အဖေက တစ်ခါ လားရှိုးပြောင်းရတယ်။ အဲဒါနဲ့ လားရှိုးမှာ ကျောင်းတက်ရတယ်။ First Year ကို လားရှိုးကောလိပ်မှာ တက်တယ်။ အခုတော့ ဒီဂရီကောလိပ်ဖြစ်သွားပြီပေါ့။ ပထမနှစ်မှာ ပါဠိဂုဏ်ထူးနဲ့အောင်တယ်။ အောင်ပြီးသွားတော့ တစ်ခါ ပဲခူးကို ပြောင်းရပြန်တယ်။

မေး – ဒါဆို အစ်ကို နယ်တွေတော်တော်စုံသွားပြီ။

ဖြေ –     ဟုတ်တယ်။ မန္တလေး ချောင်းဝင်းကိုလည်း အဖေပြောင်းခဲ့ရဖူးတယ်။ ဒါပေမဲ့ မိသားစုက မပြောင်းဖြစ်တော့ ကျွန်တော် အလည်တစ်ခေါက်ပဲ ရောက်လိုက်တယ်။ နောက်ပိုင်းမှာ မွန်ပြည်နယ် မုဒုံနယ်က ၀င်းဖနုံဆည်စီမံကိန်းမှာလည်း အဖေလုပ်ခဲ့သေးတယ်။ အဖေ့အလုပ်ကိစ္စနဲ့ ကျွန်တော် နယ်တော်တော်များများမှာ နေခဲ့ရဖူးတယ်။ အတွေ့အကြုံတွေ၊ ဗဟုသုတတွေတော့ အများကြီး ရတာပေါ့။ ဒါပေမဲ့ ဆိုးတာတော့ ရန်ကုန်ပြန်ရောက်တော့ ငယ်ပေါင်းကြီးဖော် သူငယ်ချင်း မရှိတော့သလိုဖြစ်သွားတယ်။ အဖေက ပဲခူးကိုပြောင်းရတဲ့အချိန်မှာ ရန်ကုန်နဲ့လည်း တော်တော်နီးသွားပြီဆိုတော့ ညီအစ်ကိုမောင်နှမတွေအကုန်လုံးကို ဘာသာရေးလောကနဲ့ နီးနီးစပ်စပ်ရှိဖို့ ရန်ကုန်မှာပဲ အထိုင်ချတော့မယ်လို့ ဆုံးဖြတ်လိုက်တယ်။ ကျွန်တော်တို့မိသားစု ရန်ကုန်မှာ နေကြတယ်။ အဖေကတော့ လာလိုက် သွားလိုက်ပဲ။ နောက်တော့ ဆည်မြောင်းဌာန ဦးစီးမှူးဘ၀က အလုပ်ထွက်လိုက်တယ်။ အဖေလည်း စိတ်ကုန်သွားတယ်နဲ့တူပါတယ်။ ဒီတော့ ကျွန်တော်လည်း Second Year ကို ရန်ကုန်အရှေ့ပိုင်းတက္ကသိုလ်မှာတက်တယ်။ အဲဒီကအောင်တော့ ဂုဏ်ထူးတန်းပါသွားတယ်။ ဂုဏ်ထူးတန်းက (၃)နှစ်ထပ်တက်တယ်။ အဲဒီကနေပြီးတော့တစ်ခါ မဟာဝိဇ္ဇာတန်းကို ရန်ကုန်တက္ကသိုလ်မှာ ပြောင်းတက်ခဲ့တယ်။ အဲဒီတုန်းက အရှေ့ပိုင်းတက္ကသိုလ်မှာပဲ ဆက်တက်မယ်ဆို တက်လို့ရပါတယ်။ ရန်ကုန်တက္ကသိုလ်ဆိုတာက ကျွန်တော့်အတွက် ငယ်ငယ်ထဲက မက်ခဲ့တဲ့ အိပ်မက်လေ။ အဓိပတိလမ်း၊ ဂျပ်စင်၊ RC ၊ ကံ့ကော်ပင်တန်း၊သစ်ပုတ်ပင် —ဒါတွေက သီချင်းတွေ၊ ၀တ္ထုတွေ၊ ရုပ်ရှင်တွေထဲကတစ်ဆင့် လွှမ်းမိုးနေတာကိုး။ ဒါကြောင့် ရန်ကုန်တက္ကသိုလ်ကို ပြောင်းတက်ချင်ခဲ့တာ။

နောက်တစ်ခုက ရန်ကုန်တက္ကသိုလ်မြန်မာစာဌာနမှာ ဆရာကြီးဒေါက်တာ ခင်အေး (မောင်ခင်မင်-ဓနုဖြူ)က ပါမောက္ခ-ဌာနမှူး ဖြစ်နေတဲ့အချိန်။ ဆရာကြီးလက်ထက်မှာ ဆရာကြီးရဲ့တပည့်ဖြစ်ချင်တာ လည်း ပါတာပေါ့။ အဲဒီနှစ်ခုကြောင့် ပြောင်းလိုက်ရပေမဲ့ အရှေ့ပိုင်းတက္ကသိုလ် မြန်မာစာဌာနက ဆရာ၊ဆရာမတချို့က ကျွန်တော်ပြောင်းတာကို သိပ်သဘောမတူကြဘူး။ ဌာနက မွေးထုတ်ထားတဲ့ အတော်ဆုံးကျောင်းသားသုံးယောက်တစ်ခါတည်း ပြောင်းသွားကြတာဆိုတော့ စိတ်မကောင်းဖြစ်ကြ တာပါ။ ခြေစုံကန်သွားတယ်၊ ဘာညာပေါ့။ ပါမောက္ခဆရာမကြီးကို ကျွန်တော်ရှင်းပြတယ်။ ကျွန်တော်တို့က ခြေစုံကန်တာမဟုတ်ဘူးလို့။ အရှေ့ပိုင်းတက္ကသိုလ်၊ မြန်မာစာဌာနရဲ့ဂုဏ်ကိုဆောင်ဖို့ အတွက် ရန်ကုန်တက္ကသိုလ်ကို သွားတာပါလို့။ ဆရာမကြီးကတော့ နားလည်ပေးပါတယ်။ ရန်ကုန်တက္ကသိုလ်ကို ကျွန်တော်တို့ ပြောင်းတဲ့နှစ်က အထူးခြားဆုံးပဲ။ ဆရာကြီးဦးခင်အေးရဲ့ လက်အောက်မှာ ဆရာ၊ဆရာမတွေလည်း အညီညွတ်ဆုံး အတက်ကြွဆုံး ကာလတွေဖြစ်မယ်လို့ ထင်တယ်။ စာတမ်းတွေ၊ ဆွေးနွေးပွဲတွေဆိုတာလည်း ကျွန်တော်တို့အရင်က ကျောင်းသားတွေ အဲလောက်မလုပ်ခဲ့ရသလို နောက်ပိုင်းနှစ်သမားတွေလည်း မလုပ်ရတော့ဘူး။ ကျွန်တော်တို့တက်တဲ့ ၂ နှစ်မှာ ဆရာကြီးက သူလုပ်ပိုင်ခွင့်ရှိသမျှ အစွမ်းကုန်ပျိုးထောင်ပေးခဲ့ပုံရတယ်။ ဒီလိုနဲ့ မာစတာ ၂ နှစ်၊ semester ၄ ခု တက်ရတာမှာ Grade 4 (၁၃)ခု  ရတယ်။  (၈)ခုပါရင်တောင်မှပဲ  MRes ဆက်တက်ဖို့ ကွာလီဖိုင်းဖြစ်တယ်ဆိုတော့ ကျွန်တော်လည်း မထူးဘူး ဆက်တက်မယ်ဆိုပြီး တက်ဖြစ်ပြန်တယ်။

မေး – MRes ဆိုတာက ဘာလဲအစ်ကို။

ဖြေ –    Master of Research …. ။ ဒါက နောက်ပိုင်းမှ ပေါ်လာတဲ့ ကြားခံဘွဲ့တစ်ခုပါ။ ပါရဂူဘွဲ့ကို အရင်က ဆရာ၊ ဆရာမတွေပဲ ၀င်ခွင့်ဖြေပြီး လျှောက်လို့ရတယ်လေ။ နောက်ပိုင်းမှာ ဆရာ မဖြစ်သေးတဲ့ ကျောင်းသားတွေအနေနဲ့လည်း ထူးချွန်ရင် ထူးချွန်သလို တက်ခွင့်ရအောင် တစ်နှစ်သုတေသနဘွဲ့ တစ်ခု ထားပေးထားတာ။ ဒါပေမဲ့လည်း အဲဒီအတန်းတက်ခွင့်ရလို့၊ နောက်ပြီး ကျမ်းလည်းပြုနိုင်ပြီး ကျမ်းအောင်လို့ ပါရဂူတန်းကို တန်းပြီးတက်နိုင်တာတော့ မဟုတ်သေးဘူး။ ၀င်ခွင့်အတွက် နှုတ်ဖြေ(viva) ရှိသေးတယ်။ တော်တော်များများက အဲဒီမှာ ပြုတ်ကျန်ခဲ့တာလည်း ရှိတာပေါ့။ နောက်ပိုင်းမှာဆို ၂ နှစ်ဖြေလို့ မအောင်ရင် ပါရဂူအတွက် ဖြေခွင့်မရှိတော့ဘူးတို့ ဘာတော့ တဖြည်းဖြည်းတင်းကြပ်လာတယ်။ ကျွန်တော်တို့ရှေ့မှာကလည်း နည်းနည်းဖောင်းပွထားတာတွေ ရှိတာကိုး။ ထားပါတော့။ အဲဒီ MRes အတွက်က ကျောင်းလိုတော့ မတက်ရဘူး။ ကျမ်းကြီးကြပ်သူ (Supervisor) ချပေးထားတယ်။ ကျွန်တော့်ကျမ်းကြီးကြပ်သူက အဲဒီအချိန်က ပါမောက္ခဌာနမှူး ဆရာမကြီး ဒေါ်ခင်ဆွေမြင့်။ ကျမ်းခေါင်းစဉ်ကတော့ ‘မြန်မာကဗျာနှင့်ပန်းသင်္ကေတ’ဆိုတဲ့ခေါင်းစဉ်ပါ။

မေး – ‘မြန်မာကဗျာနှင့် ပန်းသင်္ကေတ’ ဟုတ်လား။

ဖြေ –    ဟုတ်တယ်။ ပန်းလေးတွေကို ကဗျာတွေထဲမှာ စာဆိုတွေက ထည့်ရေးကြတယ်။ အဲဒါ ဘယ်လို အဓိပ္ပာယ်၊ ဘယ်လို တင်စားမှုတွေနဲ့ ရေးထားတာလဲဆိုတာကို လေ့လာတာ။ MRes ပြီးသွားတဲ့ အခါကျတော့ Ph.D ဆက်တက်ရတယ်။ (၅)နှစ်တက်ရတယ်။ အဲဒါ ပညာရေးလမ်းကြောင်း သက်သက်ပေါ့။ နောက် …

မေး – ခဏလေးအစ်ကို။ တစ်ခုလောက် ပြန်မေးပါရစေ။ ခုနက အစ်ကိုပြောသွားတယ်။ first year က လားရှိုးမှာ။ နောက် second year က ရန်ကုန်မှာ။ အဲဒါပြီးတော့ ဂုဏ်ထူးတန်း (၃)နှစ်။ အဲဒီ (၃)နှစ်ပြီးတော့မှ MRes က သီးခြားလား။

ဖြေ –    အဲဒီမတိုင်ခင် Master (၂)နှစ်တက်ရတယ်။ M.A ဘွဲ့ယူပြီးတော့မှ MRes က သီးသန့်ဘွဲ့တစ်ခုအနေနဲ့ တစ်နှစ်တက်ရတာ။ မဟာသုတေသနဘွဲ့လို့တော့ မြန်မာလိုသုံးကြတယ်။

မေး – အခု ပါရဂူဘွဲ့အတွက်က နောက်ထပ်(၅)နှစ်ပေါ့။ ဒါဆို အစ်ကို ကျောင်းတက်ခဲ့တဲ့ နှစ်အတွေ့အကြုံ ကလည်း တော်တော်များသွားပြီပေါ့နော်။ အခုဆို အစ်ကိုက ပါရဂူဘွဲ့အတွက် လုပ်နေတဲ့အခါမှာရော ဘယ်လိုကြိုးစားခဲ့ရတာမျိုးတွေရှိခဲ့လဲ။ နည်းနည်းပြောပြပေးပါဦး။

ဖြေ –    ဟုတ်ကဲ့ … အခုကျွန်တော်လုပ်နေတဲ့ ကျမ်းခေါင်းစဉ်ကတော့ ဘာသာဗေဒနဲ့ ပတ်သက်တာပေါ့။ Master ဒုတိယနှစ်ရောက်တော့ Major ခွဲရတယ်လေ။ Literature နဲ့ Language တစ်ခုခုကို ရွေးရတော့မယ်ဆိုတော့ ကျွန်တော်က language ကို ရွေးခဲ့တယ်။ ကျွန်တော်က နဂိုကတည်းက စာပေကို စိတ်ဝင်စားတဲ့သူ။ ဒါပေမဲ့ ဆက်ပြီး ကိုယ့်ဘာသာကိုယ်လေ့လာလို့ရတယ်။ ဘာသာစကားပိုင်းကျတော့ စာအုပ်ဖတ်ရုံနဲ့ မလွယ်ဘူးလေ။ ဒါကြောင့် ဘာသာစကားဘက်ကို ကျွန်တော်ယူလိုက်တာ။ အခု ပါရဂူကျမ်းတင်တော့ ခေါင်းစဉ်က “မြန်မာဘာသာစကား၏ စကားလုံးဖွဲ့ပုံကို သမူဟဘာသာဗေဒရှုထောင့်မှ လေ့လာခြင်း”။ သမူဟဘာသာဗေဒ(Integrational Linguistics) ဆိုတာက ဒီဘက်မှာ နည်းနည်းစိမ်းနေတယ်။ ဂျာမန်က ဆရာတစ်ယောက်က စခဲ့တာ။ အဲဒါက သင်္ချာမှာရှိနေတဲ့ set theory ကို ဘာသာစကားနဲ့ ချိတ်ပြီးလေ့လာတာ။

မေး – သြော် set က (၁၀)တန်းတုန်းကတော့ သင်ဖူးလိုက်တယ်။ သိပ်တော့ မမှတ်မိတော့ဘူး။

ဖြေ –    ဟုတ်တယ် ဘာသာစကားကို set theory နဲ့တွဲပြီး နယ်ပယ်(၂)ခုကို ရောပြီးတော့ လေ့လာတာ ဆိုတော့ နည်းနည်းတော့ခက်တယ်။ ကြားထဲမှာ စာတမ်းတွေလုပ်ထားတော့ အားလုံး အဆင်ပြေပါ တယ်။ ကျွန်တော့်ရဲ့ကျမ်းကြီးကြပ်သူ (Supervisor) ကိုယ်တိုင်က ဂျာမနီမှာသွားပြီး အဲဒီဘာသာရပ်ကို သင်လာခဲ့တာ။ ဆရာ့နာမည်က ဒေါက်တာကိုလေးတဲ့။ ပုသိမ်တက္ကသိုလ်က ပါမောက္ခ။ အခုတော့ ဆရာက နိုင်ငံခြားတက္ကသိုလ်တစ်ခုမှာ ဧည့်ပါမောက္ခဖြစ်နေတယ်။ ဆရာကိုယ်တိုင်ကလည်း ဒီခေါင်းစဉ်နဲ့ ကျွန်တော့်ကို လုပ်စေချင်တယ်။ မင်းလုပ်ပါလားလို့ မေးတယ်။ ကျွန်တော်ကလည်း နောက်ပိုင်းကိုယ့်အောက်အငယ်တွေ ဒီဘာသာရပ်ကို ဆက်သင်နေရမယ်ဆိုရင် ကိုးကားစရာ ကျမ်းတစ်ခု ရှိသွားအောင် လုပ်ပေးချင်တဲ့ စိတ်ဖြစ်တယ်။ ဘာကြောင့်လဲဆိုတော့ ကိုယ်ကိုယ်တိုင် ဖတ်စရာ၊ လေ့လာစရာ မြန်မာလိုစာအုပ် မရှိဘူးလေ။ ခက်ခဲမယ်ဆိုတာတော့ ကြိုတွက်ထားပြီးသား ပါပဲ။ ဒီတော့ ဂျာမနီက အင်္ဂလိပ်လိုရေးထားတဲ့ စာအုပ်တွေကိုပဲ အဓိက ဖတ်ရတယ်။ အင်တာနက်က ရှာတော့လည်း တော်တော်နည်းတယ်။ အခုကံဆိုးချင်တော့ ဆရာက ကိုရီးယားက တက္ကသိုလ်တစ်ခု ကို ရောက်သွားတယ်။ အခုတော့ ရန်ကုန်တက္ကသိုလ်က လက်ရှိပါမေက္ခ ဒေါက်တာအောင်မြင့်ဦးက ကျွန်တော့်ရဲ့ Supervisor အသစ်ဖြစ်လာတယ်။ ဆရာကလည်း မြန်မာစာနဲ့ ပထမဦးဆုံး ပါရဂူဘွဲ့ရခဲ့ သူပါ။ လူတော်တစ်ယောက်ပါပဲ။ ဒါပေမဲ့ ယူထားတဲ့ခေါင်းစဉ်အပေါ်မှာတော့ ကျမ်းကပုံပေါ်အောင် တော်တော်အားစိုက်ရဦးမယ့်သဘောရှိတယ်။

မေး – အဲဒီတော့ အစ်ကိုပိုပြီးတော့ လေ့လာဖြစ်တာပေါ့နော်။ ရှေ့မှာ အားကိုးစရာမရှိဘူးဆိုတော့။

ဖြေ –    ဟုတ်တယ်။ ပိုတော့ စူးစိုက်လေ့လာဖြစ်သွားတာပေါ့။ တစ်ခါတစ်ခါ အားကိုးရာမဲ့သလိုလို၊ အဖော်မဲ့ သလိုလို၊ အခက်အခဲကြုံရတာတွေက ဘာနဲ့တူသလဲဆိုတော့ ငယ်ငယ်က ရဟတ်စီးရသလိုပဲ။ လှိုက်ခနဲ ရင်ဖိုပြီး ခံစားရခက်သွားရတာမျိုးဆိုပေမဲ့ အောက်ရောက်တဲ့အခါကျတော့ အဲဒီအရသာကို ကြိုက်နေမိတာမျိုး။ ကျွန်တော်လည်း အခက်အခဲဆိုတာမျိုးကို နည်းနည်းတော့ သဘောကျတတ်နေပြီ။

ကျော်လွှားနိုင်မှုရဲ့ အရသာကို လိုချင်လို့လေ။

မေး – ဒီတော့ အစ်ကိုက ဒီခေါင်းစဉ်နဲ့ပတ်သက်ပြီး ပထမဦးဆုံးစတင်သူပေါ့နော်။

ဖြေ –    ဟုတ်ကဲ့ ပြောလို့ရပါတယ်။

မေး – ဟုတ်ကဲ့ပါအစ်ကို။ ပြီးတော့ အစ်ကို့ရဲ့ သာသနာ့ရေးရာနဲ့ပတ်သက်ပြီး သင်ယူခဲ့မှုနဲ့ လုပ်ဆောင်ချက်လေးတွေကို ပြောပြပေးပါဦး။

ဖြေ –    သာသနာရေးပညာက ကျောင်းသီးသန့်တော့ မတက်ခဲ့ဖူးပါဘူး။ ငယ်ငယ်တုန်းက မဒရဆာလည်း ကောင်းကောင်းမတက်ခဲ့ရပါဘူး။ များသောအားဖြင့် အိမ်မှာ အဖေက သင်ပေးတယ်။ မဒရဆာကို ထားတော့ထားတယ်။ ထားပေမယ့် ဆရာအပြောင်းအလဲတွေနဲ့။ ဆရာတစ်ယောက် ပြောင်းသွားလိုက် အစကနေ ပြန်သွားလိုက်နဲ့ ရှေ့မတက်နိုင်တော့ဘူး။ အဲဒါနဲ့ ထွက်လိုက်ပြီး နောက်ဆုံး ကိုယ့်ဘာသာ ကိုယ်ပဲ ဖတ်တော့တယ်။ နောက်ပိုင်းကျမှ အစ္စလာမ်ဓမ္မဗိမာန်မှာ သင်တန်းလေးတွေတက်တယ်။ အငယ်တန်းကို (၁၉၈၆)ခုနှစ်မှာ တက်တယ်။ အဲဒီတုန်းက(၉)နှစ်သားပဲ ရှိသေးတယ်။ ၁၉၈၇ မှာ တစ်ကြိမ် ထပ်တက်တယ်။ ပြီးတော့ အဖွဲ့အစည်းတွေကလုပ်တဲ့သင်တန်းတွေ တက်တယ်။ အစ္စလာမ်သာသနာရေးရာကောင်စီကလုပ်တဲ့  စာစစ်ပွဲတို့၊ နောက် အိုလမာအဖွဲ့ကလုပ်တဲ့ စာစစ်ပွဲတို့ အဲဒါလေးတွေ ၀င်တက်၊ ၀င်ဖြေလုပ်တယ်။ အရင်က ရမသွာန်လဆိုရင် အစ္စလာမ်သာသနာရေးရာ ကောင်စီဌာနချုပ်မှာ ဆရာကြီးဃာဇီဟာရှင်မ်ရဲ့ ဟောပြောပွဲတွေ ရှိတတ်တယ်။ တစ်နှစ်မှာတော့ ဗုခါရီဟောပြောပို့ချမှုသင်တန်းဆိုပြီး လုပ်တယ်။ ရမသွာန်တစ်လလုံး စ၊လယ်ဆုံး တက်တဲ့သူကိုပဲ သင်တန်းဆင်းလက်မှတ်ပေးတယ်။ အဲဒီတုန်းက ကျွန်တော့်အဖေလည်းတက်တယ်။ ဆရာမဒေါ်ခင်စန်းလွင်တို့လည်း တက်တယ်။ ကျွန်တော်က အငယ်ဆုံးသင်တန်းသားပေါ့။

မေး – အဲဒီတုန်းက အစ်ကိုက အသက်ဘယ်လောက်လဲ။

ဖြေ –    (၁၀)နှစ်လောက်ပဲရှိသေးတယ်။ ၁၉၈၇ တုန်းက။

မေး – သြော် … ဟုတ်ကဲ့ပါ။

ဖြေ –    အဲဒါပြီးတော့ စာပေမှတ်ကျောက်တင်ပြိုင်ပွဲတွေ၊ တမန်တော်နေ့အခမ်းအနားပြိုင်ပွဲတွေ ၀င်ပြိုင်တယ်။ ကေရာအသ်ပြိုင်တယ်၊ ဟောပြောပွဲပြိုင်တယ်။ အဲဒါမျိုးတွေ ပြိုင်တယ်။ နောက်ပိုင်း နယ်တွေရောက် သွားတော့ အဲဒီမှာတော့ ဘာမှ သင်ယူစရာမရှိဘူး။ ကိုယ့်ဘာသာကိုယ် စာအုပ်ဖတ်တာတွေလောက်ပဲ ရှိတယ်။ ရန်ကုန်ဘာသာရေးအသိုင်းအ၀ိုင်းနဲ့တော့ အဆက်မပြတ်ဘူး။ ဘာလို့လဲဆိုတော့ အဖေက ဒီဘက် ဘာသာရေးအသိုင်းဝိုင်းနဲ့ အဆက်အသွယ်ရှိနေတော့ စာတွေနဲ့ ဒီဘက်က လှုပ်ရှားမှု သတင်း တွေ ပို့ပေးတာတို့ အခွေတွေပို့ပေးတာတို့ လုပ်ပေးကြတယ်။ ပြီးတော့ မန္တလေးက အဖေ့မိတ်ဆွေတချို့ ကလည်း တရားခွေတွေ ကူး ကူးပေးတယ်။ ကျွန်တော်တို့လည်း နားထောင်၊ ဟိုဘက်က မွတ်စလင်မ် အသိုင်းအ၀ိုင်းကိုလည်း ပြန်ဖြန့်ပေါ့။ အဲလို လုပ်ဖြစ်တယ်။ အဲဒီအချိန်က ကျွန်တော်တုိ့က စစ်ကိုင်း တိုင်း၊ ရေဦးမြို့လေးမှာ။ ၈ တန်းတစ်နှစ် ရန်ကုန်မှာလာနေတော့ ဘာသာရေးအသိုင်းအ၀ိုင်းနဲ့ ပြန်ပြီးထိစပ်မှုရှိလာတယ်။ နောက် ၁၉၉၅ မှာ ဆယ်တန်းစာမေးပွဲအောင်ပြီးတော့ ရန်ကုန်မှာ ခဏလာနေတယ်။ အဲဒီအချိန်က မြန်မာမွတ်စလင်မ်ဘာသာရေးလောကမှာ ထူးခြားပြောင်းလဲမှု လေးတွေ နည်းနည်းဖြစ်နေတဲ့ကာလပေါ့။  အဲဒီတုန်းက အစ္စလာမ်ဓမ္မဗိမာန်မှာ သဂ်ျဝီဒ်သင်တန်း တက်တယ်။ ဆရာအဏ္ဏ၀ါမောင်စိန် သင်တာ။ ဆရာဦးမြတ်သူဆီမှာ အာရဗီသင်တယ်။ မအူကုန်း ဘက်က အိမ်တစ်အိမ်မှာ။ ဒါပေမဲ့ ၂ ပတ်လောက်သင်ပြီး ဆရာ့အမေဆုံးသွားလို့ မော်လမြိုင်ကို ပြန်သွားရာကနေ ပြန်မဆက်ဖြစ်တော့ဘူး။ ၁၉၉၈-ခုနှစ် လားရှိုးက ပြန်ပြောင်းလာတော့မှ အစ္စလာမ် ဓမ္မဗိမာန်မှာ သက်ကြီးသင်တန်းဝင်တက်တယ်။ နောက်ပြီးတော့ အာရဗီသဒ္ဒါက ဆရာသက်ဝေဆီမှာ တက်တယ်။ နောက် တစ်ခြမ်းပဲ့ဗလီမှာ ဆရာမုဖ်သီဦးမြင့်သိန်းသင်တဲ့ အရဗီသဒ္ဒါ သင်တန်းတက် တယ်။ နောက် ၁၉၉၉-ခုနှစ်မှာ အစ္စလာမ်ကောင်စီကဖွင့်တဲ့ အစ္စလာမ့်ရေးရာအဆင့်မြင့်သင်တန်း တက်တယ်။

မေး – ဇုံသင်တန်းတွေလား။ ဘယ်ဇုံမှာတက်ခဲ့တာလဲဟင်။

ဖြေ –    ဟုတ်တယ် ဇုံသင်တန်း၊ သန်လျင်မှာ လုပ်တာ။ အဲဒီတုန်းက အစ္စလာမ်သာသနာရေးရာကောင်စီရဲ့ ဥက္ကဋ္ဌကြီးဖြစ်တဲ့ ဟာဂျီဦးသိန်းက ဦးစီးပြီးလုပ်တာ။ သူကိုယ်တိုင်ကော၊ အခုလက်ရှိ ဥက္ကဋ္ဌဖြစ်နေတဲ့ အလ်ဟာဂ်ျဦးညွန့်မောင်သျှိန်ကော၊ နောက်တော့ ပသီဦးကိုကိုလေးကော သူတို့တွေသင်ကြတာ။ နောက်ပိုင်း ၂၀၀၅-မှာ (၅၁)ကြိမ်မြောက် အန်ဆွာရီ သင်တန်းတက်တယ်။ အစ္စလာမ်ဓမ္မဗိမာန်မှာပဲ မောင်လာနာအုမရ်မြင့်နိုင်ဆီမှာ အရဗီသဒ္ဒါသင်တန်းထပ်တက်တယ်။ ဆရာဦးမြ၀င်းသင်တဲ့ Islamic Study in English သင်တန်းတွေကိုလည်း တက်ခဲ့တယ်။ များသောအားဖြင့် ဘာသာရေးအသိုင်း အ၀ိုင်းကလုပ်တဲ့ သင်တန်းလေးတွေ၊ ပြိုင်ပွဲလေးတွေမှာ ပါဝင်ရင်း စာအုပ်စာပေတွေဖတ်ရင်း ဒီလိုပဲ လေ့လာဆည်းပူးခဲ့တာပါ။

မေး – အစ်ကို အခုလိုပြောပြလို့ သတိရသွားလို့ တစ်ခုလောက်မေးပါရစေနော်။ အခုလို ပြိုင်ပွဲလေးတွေမှာ ၀င်ပြိုင်ခြင်းကလည်း မွတ်စလင်မ်လူငယ်တွေအတွက် ပိုပြီးအထောက်အကူပြုနိုင်မယ်လို့ အစ်ကို ထင်ပါသလား။

ဖြေ –    အများကြီးဖြစ်တာပေါ့။ အများကြီးအထောက်အကူပြုပါတယ်။ ကျွန်တော်တို့ဆိုရင် အဲဒီအတွေ့အကြုံ တွေကြောင့် တော်တော်များများနေရာတွေမှာ ရင့်ကျက်တည်ငြိမ်မှုရတယ်။ ဥပမာ – ကျောင်းတို့၊ တက္ကသိုလ်တို့မှာ စာတမ်းဖတ်ပွဲဆိုရင် အများကြီးအထောက်အကူပြုတယ်။ တစ်ချို့က စာတမ်းဖတ်ရ မယ်ဆိုရင် ကြောက်နေတယ်။ ကျွန်တော်တို့ဆို ရဲသွားပြီ။  ငယ်ငယ်တုန်းကတည်းက ဟောပြောပွဲတို့ ကဆွီဒါတို့ စသဖြင့်ပေါ့ မကြာမကြာဝင်ပြိုင်ခဲ့ဖူးတော့ စင်အတွေ့အကြုံတွေ အများကြီးရှိတယ်။ ပြီးတော့ ဟောပြောပြိုင်တယ်ဆိုလည်း အချက်အလက်တွေလိုတယ်။ အဲဒီတော့ ပြိုင်ပွဲဝင်တဲ့ ကလေး တစ်ယောက်အနေနဲ့ အဲဒီအချက်အလက်တွေကို ကိုယ်ကိုယ်တိုင် သိလို့မဟုတ်ဘဲ တစ်ယောက်ယောက်က ရေးပေးလို့ပဲဖြစ်စေ၊ ကိုယ့်ဘာသာကိုယ် စာအုပ်ထဲက ရှာဖွေရတာပဲဖြစ်စေ အဲဒါကို ဖတ်ရကျက်ရ အကြိမ်ကြိမ်လေ့ကျင့်ပြီး အလွတ်ပြန်ပြောရတာတွေရှိတော့ ခေါင်းထဲစွဲသွားစေတာပေါ့။

မေး – ကိုယ်ကိုယ်တိုင် လေ့လာရတဲ့အကျိုးရသွားတာပေါ့နော်။

ဖြေ –    ဟုတ်တယ် …. ဒါကြောင့် ဒီလိုပြိုင်ပွဲလေးတွေက ဘာသာရေးအသိတွေကို တိုးစေပြီး ကိုယ်ရည်ကိုယ်သွေးလည်း မြှင့်တင်ပေးနိုင်တယ်လို့ ထင်တယ်။

မေး – ဟုတ်ကဲ့ပါအစ်ကို။ နောက်ပြီးတော့ အစ်ကိုက အိမာမသ်သင်တန်းလည်းသွားတက်ထားရတယ်။ ပါကစ္စတန်နဲ့မလေးရှားမှာလို့ ကြားဖူးထားတယ်။ အဲဒီအတွေ့အကြုံလေးရော၊ အဲဒီကနေ ဘာအသိပညာတွေရခဲ့လဲ ပြောပြပေးပါဦး။

ဖြေ –    ပါကစ္စတန်က ၂၀၀၂-ခုနှစ်က သွားတာ။ အဲဒါက ပထမဦးဆုံး နိုင်ငံခြားခရီးစဉ်ပေါ့။ ပြောမယ်ဆိုရင်တော့ နည်းနည်းတော့လန့်တာပေါ့ဗျာ။ ဒါပေမယ့် နောက်ထပ် (၂)ယောက်ပါတယ် သွားကြတုန်းက။ တစ်ယောက်က ကိုသန့်ဇင်ထွေး၊ နောက်တစ်ယောက်က ကိုမျိုးဝင်း။

မေး – သြော် …. ဟုတ်ကဲ့။

ဖြေ –    ၃ ယောက်အတူတူသွားတာဆိုတော့ တိုင်တိုင်ပင်ပင်လည်းရှိတယ်။ သိပ်တော့ အခက်အခဲ မတွေ့ခဲ့ ဘူး။ ဟိုရောက်တော့ အတွေ့အကြုံတွေကတော့ အများကြီးရတယ်။ အိမာမသ်သင်တန်းက Training Camp လည်းဖြစ်တော့ တာဝန်အလှည့်ကျယူတဲ့ စနစ်နဲ့ လေ့ကျင့်ပေးတယ်။ ဘာတာဝန်တွေရှိလဲ ဆိုတော့ မနက်စောစောထပြီး အဆောင်တစ်ခုလုံးကို ဖဂျရ်ဖတ်ဖို့ လိုက်နှိုးရတဲ့တာဝန်၊တစ်နေကုန် ဆွလာသ်အချိန်တွေအတွက် အာဇာန်ပေးဖို့ တာဝန်၊ အီမာမ်လုပ်ပြီး ဆွလာသ် ဦးဆောင်ပေးဖို့တာဝန်။ ဖဂျရ်အပြီး ၅ မိနစ်လောက် ဘာသာရေးအကြောင်းအရာတစ်ခုခုပြောရတဲ့ တာဝန်။ နောက်–ဖဂျရ်ဆွလာသ် ပြီးတာနဲ့ အားကစားလုပ်ကြရတယ်။ အဲဒီမှာ တစ်ယောက်က ဦးဆောင်ပြီး မောင်းပေးရတယ်။ စာသင်ခန်းမှာ MC လုပ်ဖို့ တစ်ယောက်က တာဝန်ယူရတယ်။ အဲဒီလူကပဲ workshop အချိန်ဆိုရင် Chairman လုပ်ရတယ်။ MC လုပ်တဲ့အခါ ၀င်မယ့်ဆရာအသစ်ကို မိတ်ဆက် ပေးရတယ်။ ပြီးရင် တစ်ခါတည်း ဆရာကို ကြိုပြောရတာက – အချိန်တစ်နာရီရမယ်။ ဆရာ့စာသင်ချိန် က ၄၅ မိနစ်၊ ၁၅ မိနစ်က အမေး-အဖြေ အချိန်ပါလို့။ ဆရာက စာသင်ရင်း ၄၅ မိနစ်ထက်ကျော်သင် ရင် MC လုပ်တဲ့ကျောင်းသားက “အချိန်ပြည့်ပြီ”လို့ ချက်ချင်းထပြောရတာ။ ပြောလည်းပြောကြတယ်။ အားမနာဘူး။ ဆရာကလည်း ပြောလိုက်တာနဲ့ တိခနဲရပ်လိုက်တယ်။ များသောအားဖြင့်တော့ သူ့ဟာနဲ့သူ အချိန်ကိုက်ဖြစ်ကြတာ များတယ်။ အချိန် လေးစားကြတယ်။ Projector နဲ့ Powerpoint နဲ့ သင်ကြတာဆိုတော့  အချိန်ကွက်တိဖြစ်အောင် ကြိုတင်ပြင်ဆင်ထားတဲ့သဘောရှိတယ်။ နောက်တော့ တစ်နေကုန်အတွက် ကျောင်းသားတွေအားလုံးကို ဦးဆောင်ရတဲ့ Leader တာဝန်ကို တစ်ယောက်က ယူရတယ်။ အပြင်လေ့လာရေးတွေ ဘာတွေ သွားတာပဲဖြစ်ဖြစ် စာသင်ခန်းမှာပဲဖြစ်ဖြစ် အားလုံးက သူ့အမိန့်အတိ်ုင်းပဲ လိုက်နာရတယ်။ ဘယ်နှနာရီအတန်းပြန်တက်မယ်၊ ဘယ်အချိန် ဘယ်နေရာမှာ ပြန်ဆုံကြမယ်။ အဲဒါ သူ့ဆုံးဖြတ်ချက် အတိ်ုင်းပဲ။ ညကျရင် အိရှာဟ်အပြီးမှာ evaluation အစီအစဉ်ရှိတယ်။ တစ်နေ့တာအတွက် မကျေနပ်တာတွေ ရင်ဖွင့်ကြ၊ feedback ပေးကြ၊ ဝေဖန်တာတွေ၊ ချီးကျူးတာတွေလုပ်ကြ အဲဒါမျိုးလုပ်တာတွေကို Leader လုပ်ရတဲ့လူက Report ပြန်လုပ်ရတယ်။ နောက်ရက်ကျတော့ သင်တန်းတာဝန်ခံတွေက လိုအပ်ချက်ရှိတာတွေကို ပြင်ဆင်ဖြည့်ဆည်းလိုက်လျောပေးတယ်။ အဲဒီလိုပဲ နေ့တိုင်း သွားတာ။ ဒီတော့ ရှိတဲ့တာဝန်တွေကို သင်တန်းသားတိုင်း လုပ်ဖူးအောင် အလှည့်ကျ ခွဲယူရတာ။ ဘယ်ဟာတော့မလုပ်ချင်ဘူးလို့ ငြင်းလို့မရဘူး။ နောက်ပိုင်း နှစ်တွေ ကျွန်တော်ကြားတာတော့ အဲလောက်သိပ်မလုပ်တော့ဘူးကြား တယ်။ နောက်တစ်ခု ကျွန်တော်တို့တုန်းက ဒဟ်ဝဟ်လက်တွေ့ဆိုတာရှိတယ်။ လက်ကမ်းစာရွက်လေး တွေ သူတို့လုပ်ပေးထားတယ်။ အဲဒါတွေကိုယူပြီး မြို့ထဲပတ်ရတာ။ အဖွဲ့တွေခွဲပြီး အိမ်တွေ၊ ဆိုင်တွေ မှာသွားပြီး အစ္စလာမ်အကြောင်း တင်ပြရတယ်။ မွတ်စလင်မဟုတ်တဲ့သူတွေကိုပဲ ရွေးချယ်ပြီးပြောရ တယ်။ နောက် နိုင်ငံခြားသားတွေ တွေ့ရင်လည်း ပြောပေါ့။ ပြန်ရောက်ရင် Report တင်ရတယ်။ ဘယ်တွေ သွားခဲ့တယ်။ ဘယ်လို တုန့်ပြန်မှုတွေရခဲ့တယ်။ ပြန်ပြီးသုံးသပ်ချက်၊ လိုအပ်ချက် အဲဒါတွေပါ တစ်ခါတည်း ရေးရတယ်။ poster competation တို့ ဘာတို့လည်း ရှိသေးတယ်။ အဖွဲ့ခွဲပြီး လုပ်ကြရတာ။ နောက် စာစောင်တစ်ခု လုပ်ကြရတယ်။ ဆောင်းပါး၊ ၀တ္ထု၊ ကဗျာ တွေနဲ့ အင်တာဗျူး တွေကို ကျောင်းသားတွေကပဲ ၀ိုင်းလုပ်ကြရတယ်။ ကျွန်တော်က အဲဒီမှာ အယ်ဒီတာအဖြစ် တာဝန်ယူတယ်။ နောက် အင်္ဂလိပ်လို ကဗျာတစ်ပုဒ်ရေးတယ်။ အင်တာဗျူးတစ်ခုလုပ်ပေးတယ်။ တချို့ကတော့ ကိုယ်ပိုင်ရေးတွေရော၊ ဖြတ်ညှပ်ကပ်တွေရော အစုံပေါ့။ ၀ိုင်းရေးကြတယ်။ အဲဒီလို လက်တွေ့ဆန်ဆန်လေ့ကျင့်ပေးတာလေးတွေကြောင့် ဒီသင်တန်းက တော်တော်ပဲ ထူးခြားပါတယ်။

မေး – အဲဒီတော့ ပါကစ္စတန်သင်တန်းနဲ့ မလေးရှားသင်တန်းက အတူတူပဲလား။

ဖြေ –    မတူဘူး ကွဲတယ်။ ပါကစ္စတန်သင်တန်းက နည်းနည်းအဆင့်မြင့်တယ်။ ပါကစ္စတန်သင်တန်းက လက်ရှိ ရေပန်းစားနေတဲ့ အကြောင်းအရာတွေကို အစ္စလာမ့်ရှုထောင့်ကနေ တင်ပြတာမျိုးတွေသင်တာ။ ဥပမာပြောရရင် ပတ်ဝန်းကျင်ထိန်းသိမ်းရေး၊ လူ့စွမ်းအားအရင်းအမြစ်ဖွံ့ဖြိုးရေး၊ ဂလိုဗယ်လိုက်ဇေးရှင်း၊ Time Manangement ၊ Leadership ၊ Islamic Banking system စတာတွေ ကို အစ္စလာမစ် ရှုထောင့်ကနေ သင်တာများတယ်။ မလေးရှားမှာကျတော့ ဒီဘက်က အစ္စလာမ် ဓမ္မဗိမာန်တို့လို အလ်အဇ်ဟရ်ကဖွင့်တဲ့ ရဗ္ဗာနီသင်တန်းတို့လို ဘာသာရေးသင်တန်းတွေကတောင် မြင့်သေးတယ်။ အကြောင်းအရာတွေကို ပြောတာပါ။ သင်ကြားမှုနည်းစနစ်ကတော့ သင်ထောက်ကူ တွေ ဘာတွေက ကျွန်တော်တို့ဆီက သူတို့လို မသုံးနိုင်သေးဘူး။

မေး – အစ်ကိုတို့ သင်တန်းကာလက ဘယ်လောက်လဲ။

ဖြေ –    တစ်လပဲ။ ၂ နေရာစလုံးအတူတူပဲ။

မေး – အစ်ကိုတို့သွားရတဲ့ သင်တန်း title ကရော။

ဖြေ –    Title ကတော့ အီမာမသ်ပဲ။ မလေးရှားရော ပါကစ္စတန်ရော။ ပါကစ္စတန်က အစ္စလာမ်မာဘတ်မှာရှိတဲ့ နိုင်ငံတကာ အစ္စလာမ့်တက္ကသိုလ် IIU မှာ တက်ရတယ်။ Dawah Academy က စီစဉ်တာ။ မလေးမှာ ကျတော့လည်း IIU ပဲ။ IIUM ပေါ့။ မလေးလို UIA လို့လည်း အတိုကောက်ခေါ်တယ်။ ဒါပေမယ့် ဒီမှာကျတော့ RISEAP(Regional Islamic Da’wah Council of Southeast Asia and the Pacific) က ဦးဆောင်စီစဉ်တာ။ နှစ်ခုစလုံးက နိုင်ငံတကာအစ္စလာမ့်တက္ကသိုလ်တွေမှာ လုပ်ပြီးတော့ ဒအ်ဝဟ်နဲ့ သက်ဆိုင်တဲ့ အဖွဲ့အစည်းတွေက ဦးဆောင်တယ်။ ခေါင်းစဉ်ကျတော့ အီမာမသ်သင်တန်းလို့ ပေးထားတယ်။ အဲဒီတူညီမှုက ထူးခြားတယ်။

မေး – အဲဒီ မလေးမှာ သွားတက်ရတာက မကြာသေးဘူးထင်တယ်နော်။ ၂၀၁၀ ထဲမှာပဲထင်တယ်။

ဖြေ –    ဟုတ်တယ် မကြာသေးဘူး။ ၂၀၁၀ ထဲမှာပါပဲ။ ရမသွာန်တောင်မှ ဟိုမှာ ၂-ရက် ၃-ရက်လောက် နေခဲ့ရတယ်။

မေး – ဟုတ်ကဲ့အစ်ကို။ ဒါကတော့ အစ်ကို့ရဲ့ သာသနာ့ရေးရာနဲ့ပတ်သက်တာလေးတွေပေါ့။ နောက်တစ်ခုက အစ်ကိုက စာတွေလည်းရေးတယ်လေ။ အပြင်မှာလည်းရေးတယ်လေ။ အဲလိုစာတွေရေးဖြစ်ဖို့ ဒီစာပေလောကထဲကို အစ်ကို ဘယ်လိုပုံစံနဲ့ရောက်ရှိလာလဲ။ အဲဒါလေးတွေလည်း ပြောပြပေးပါဦးလား။

ဖြေ –    စာရေးတာကတော့ ငယ်ငယ် (၈)တန်းလောက်ကတည်းက စာစရေးတယ်။ ကဗျာလေးတွေရေးတယ်။ အဲဒီအချိန်တုန်းကတော့ ဘယ်မဂ္ဂဇင်းမှာမှ မပါသေးဘူး။ သီချင်းရေးတယ်။ သီချင်းရေးတာကတော့ ကော်ပီပေါ့နော်။ ပြီးတော့ (၈)တန်းမှာ ဆရာကန်တော့ပွဲလုပ်တော့ ဆရာကန်တော့ပွဲသီချင်းရေးခဲ့ရဖူး တယ်။ သူငယ်ချင်းတွေက ကျွန်တော်သီချင်းရေးမှန်းသိတော့ ၀ိုင်းရေးခိုင်းကြတာ။

မေး – သီချင်းတွေရေးတော့ အပြင်လူတွေ အဆိုတော်တွေ ဆိုဖို့ရေးတာလား။

ဖြေ –    အဲလိုမျိုးတော့မဟုတ်ပါဘူး။ ကိုယ်တိုင် ၀ါသနာပါလို့ ရေးတာပါ။ အဲဒီကနေ ၀ါသနာစခဲ့တာပေါ့။ မကြာခင်ကတော့ အိန္ဒိယသီချင်းသံစဉ်နဲ့ ကော်ပီသီချင်း ၂ ပုဒ်ရေးပေးဖူးတယ်။ သူတို့က အပျော်တမ်းလုပ်ကြတာဆိုတော့ သိပ်တော့ မပေါက်ပါဘူး။ ဟိုအရင်တုန်းကတော့ ကချင်ပြည်နယ်က တိုင်းရင်းသားအဆိုတော်တစ်ယောက် ကျွန်တော့်သီချင်း အပုဒ် ၃၀ လောက်ကို စာချုပ်ချုပ်ပြီး ယူသွားဖူးတယ်။ ဘာတွေလုပ်ပစ်လိုက်လဲတော့ မသိဘူး။ ကျွန်တော်လည်း နောက်ပိုင်းမှာ အဲဒီဘက်ကို သိပ်အာရုံမရှိတော့ပါဘူး။ ထားပါတော့။ အဲဒီလိုနဲ့ အထက်တန်းကျောင်းသားဘ၀မှာ ဆုပေးပွဲတွေ ပြန်တက်ရတယ်။ ဆုပေးပွဲတွေတက်ရတာ ပညာရေးအတွက် မဟုတ်ဘူး။ စာစီစာကုံးပြိုင်ပွဲတွေအတွက်တက်ရတာ။ တစ်နှစ်ကို (၃)ပွဲလောက်တော့ တက်ခဲ့ရတယ်။ အဲဒါကတော့ (၉)တန်း (၁၀)တန်းလောက်ကပေါ့။ နောက် ရန်ကုန် ပြန်ရောက်တဲ့အချိန်ကျမှ မဂ္ဂဇင်းတွေကို ပို့ဖြစ်တယ်။ ပထမဦးဆုံး မောင်မောင်သိန်းမှုခင်းမဂ္ဂဇင်းမှာ “ကုမုဒြာရဲ့ မာန်ခဲသံ”ဆိုတဲ့ ကဗျာလေး စပါလာတယ်။ နောက်ပိုင်းမှာတော့ ကဗျာတော်တော်များများရေးဖြစ်တယ်။ နောက်ပြီး တော့ ၀တ္ထုတိုတွေ၊ တစ်မျက်နှာဝတ္ထုတွေ ရေးတယ်။ အပျိုမ၊ မှုခင်းစုံ၊ သပြေ၊ ကနောင်၊ ဂျစ်တူးကလေး စာစောင် စတဲ့နေရာတွေမှာ ရေးခဲ့တယ်။ သောကြာစာစောင်မှာ ဟာသ၀တ္ထုလေးတွေ ပုံမှန်ရေးဖြစ်တယ်။ ဆောင်းပါးလေးတချို့လည်း ရေးခဲ့တယ်။ အခုနောက်ပိုင်း News Watch အထိပေါ့။ အရှေ့ပိုင်းတက္ကသိုလ်နှစ်လည် မဂ္ဂဇင်းမှာလည်း ကျောင်းတတ်တဲ့အချိန်က ကလောင်ခွဲ ၃/၄ မျိုးနဲ့ရေးခဲ့တယ်။

မေး – အဲဒါဆို အစ်ကို့ရဲ့ ကလောင်ခွဲလေးတွေပြောပြပါဦး။

ဖြေ –    အဲဒီတုန်းက ကလောင်ခွဲတွေက နှိုင်းမဲ့စံ၊ နဒီချမ်းမြေ့၊ လွတ်လပ်ငြိမ်း၊ မင်းထိုက်သူ ။ အဲဒီနောက်ပိုင်း တော့ စာပေပြိုင်ပွဲတွေ ၀င်တာရှိတယ်။ ကျောင်းသားဘ၀တုန်းကတော့ ကဗျာစာအုပ်လေးတွေ သူငယ်ချင်းတွေစုပြီး လေး/ငါးအုပ်ထုတ်ဖြစ်တယ်။ “နှလုံးသား ဘာသာဗေဒ”ဆိုတဲ့နာမည်နဲ့။ ကျွန်တော်ပဲ ဦးစီးပြီးထုတ်ခဲ့တာ။ ကျွန်တော့်ညီဝမ်းကွဲ အခုမလေးရှားရောက်နေတဲ့ ဇော်လွင်မိုးနဲ့တွဲပြီး လုပ်ကြတာ။ နောက်အရှေ့ပိုင်း တက္ကသိုလ်ကနေ ပုဂံကိုခရီးသွားကြတယ်။ အဲလို ခရီးသွားရင်း လည်နေကြတဲ့အချိန်မှာပဲ ပါမောက္ခဆရာမကြီးက ‘ဆရာ ဆရာမတွေအတွက် ပြိုင်ပွဲလေးတစ်ခု လုပ်ပေးမယ်’လို့ပြောတယ်။ လာကြတာ ပျော်ပျော်ပါးပါးပဲ သိပ်လေ့လာတာမရှိဘူးလို့ ယူဆပြီး လုပ်လိုက်တယ်နဲ့ တူပါတယ်။ စာတမ်းပြိုင်ပွဲလုပ်မယ်ဆိုတော့ လေ့လာထားတာတွေ ပြန်ရေးရမယ်ပေါ့။ အဲဒီတော့မှ စာအုပ်တွေ ဘောလ်ပင်တွေထုတ်ပြီး ရေးကြတာပေါ့။ ဖြစ်ချင်တော့ ကျွန်တော်က ခရီးစဉ်အစကတည်းက ဘာရယ်ကြောင့်မှ မဟုတ်ဘူး၊ ကိုယ့်စိတ်နဲ့ကိုယ် လေ့လာမှတ်သားနေဖြစ်တာ။  ပြန်လာတဲ့ အခါကျတော့ ဆရာမက ကျောင်းသားတွေလည်း ၀င်ပြိုင်လို့ရတယ်တဲ့။ ဒီတော့ ကျွန်တော်ဝင်ပြိုင်ဖြစ်တယ်။ အဲဒီပြိုင်ပွဲမှာ ပထမရခဲ့တယ်။ နောက်ပြီး လေ့လာရေးခရီးသွားတုန်းက အတွေ့အကြုံတချို့ကို ဟာသအဖြစ်သောကြာစာစောင်မှာ ကျွန်တော်ရေးလိုက်သေးတယ်။ နောက်တစ်ခါ “အမျိုးသားဆောင်ပုဒ် စာပေနှင့် ဓာတ်ပုံပြိုင်ပွဲ”ဆိုပြီး ပြန်ကြားရေးဝန်ကြီးဌာနက ဦးစီးလုပ်တဲ့ ပြိုင်ပွဲမှာလည်း ပုဂံလေ့လာရေးအတွေ့အကြုံကို အခြေခံပြီး ၀တ္ထုတိုလေးတစ်ပုဒ်ရေးပြီး ပြိုင်လိုက်တယ်။ တစ်ပြိုင်တည်းမှာပဲ “စာမတတ်သူပပျောက်ရေး” ဆောင်းပါးပြိုင်ပွဲလုပ်တော့ ၀င်ပြိုင်ဖြစ်တယ်။ အဲဒီနှစ်ခုစလုံးမှာ ကျွန်တော် ဒုတိယရတယ်။ ၀တ္ထုတိုအတွက်ဆုပေးပွဲက အမျိုးသားကဇာတ်ရုံမှာ လုပ်တာ။ စာပေဗိမာန်စာမူဆု၊ အမျိုးသားစာပေဆုတွေနဲ့အတူ တစ်ပွဲတည်းဆုပေးတာ။ အဲဒီနှစ်က ရန်ကုန်တက္ကသိုလ်ပါမောက္ခ ဆရာကြီး ဒေါက်တာခင်အေး (မောင်ခင်မင်-ဓနုဖြူ)က အမျိုးသား စာပေဆုရတယ်။ နောက်ဂန္ထ၀င် စာရေးဆရာကြီးမောင်ထင်က ဘ၀တစ်သက်တာ စာပေဆုရတယ်။ ညဘက် ကရ၀ိတ်ဟော်တယ်မှာ ညစာစားပွဲလုပ်ပေးတယ်။ အမှတ်တရပါပဲ။

မေး – အစ်ကို့အနေနဲ့ အဲလိုပြိုင်ပွဲတွေပြိုင်တာ (၃-၄)ခါတော့ ကြားဖူးလိုက်တယ်။ တစ်ခြားဆက်ပြောပါဦးအစ်ကို။

ဖြေ –    ဟုတ်ကဲ့။ ၂၀၀၃-မှာ တစ်ခုဝင်ပြိုင်သေးတယ်။ အဲဒါက စာမတတ်သူပပျောက်ရေးအထိမ်းအမှတ် ပြိုင်ပွဲပဲ။ တတိယရတာ။

မေး – ဟုတ်ကဲ့ အစ်ကို။ အဲလိုပြိုင်တော့ သူတို့က ခေါင်းစဉ်ပေးထားတာလား။ ကိုယ်ကြိုက်တဲ့ ခေါင်းစဉ်ရွေးပြီးပြိုင်ရတာလား။

ဖြေ –    ဟုတ်တယ်။ ၀တ္ထုတိုပြိုင်ပွဲတုန်းက ကိုယ့်ဘာသာကိုယ် သင့်လျော်ရာခေါင်းစဉ်နဲ့ ပြိုင်ရတာ။ အဲဒီတုန်းက “ရွှေဖလားကို ငွေအနားမကွပ်လိုတော့ပါ”ဆိုတဲ့ခေါင်းစဉ်နဲ့ ပြိုင်ခဲ့တယ်။ ပုဂံလေ့လာရေး ခရီးကို အခြေခံပြီး မြန်မာ့ရိုးရာယဉ်ကျေးမှုဓလေ့တွေအကြောင်းကို ၀တ္ထုဖွဲ့ထားတာ။ စာမတတ်သူ ပပျောက်ရေးအထိမ်းအမှတ်ပြိုင်ပွဲတွေကျတော့ သူတို့ပေးထားတဲ့ခေါင်းစဉ်နဲ့ ပြိုင်ရတာ။ အဲဒီတုန်းက ကျွန်တော်က ဒုတိယ။ ပထမက ဘယ်သူလဲကြည့်လိုက်တော့ ကျွန်တော့်အစ်ကိုဝမ်းကွဲဖြစ်တဲ့ အခုဘားအံတက္ကသိုလ်၊ မြန်မာစာဌာနက ကထိက ဒေါက်တာသန်းဝင်း (မောင်သန်းဝင်း-ရန်ကုန် တက္ကသိုလ်) ဖြစ်နေတယ်။

မေး – သြော် တိုက်တိုက်ဆိုင်ဆိုင်ပဲ …. အဲဒါက နိုင်ငံတော်အဆင့်ပြိုင်ရတာလား။

ဖြေ –    ဟုတ်တယ်။ နိုင်ငံတော်အဆင့်ပြိုင်ရတာ။ အဲလို ပထမက ကိုသန်းဝင်းဖြစ်နေတော့ အံ့သြသွားတာပေါ့။ သူလည်းပြောတယ်။ သူလည်းကျွန်တော့်နာမည်တွေ့လိုက်တော့ အံ့သြသွားတယ်။ ဘာလို့လဲဆိုတော့ သူက ဘိတ်(မြိတ်)ကိုရောက်နေတယ်။ သူက ဟိုကနေ လှမ်းပြိုင်လိုက်တာ။ ကျွန်တော်က ဒီဘက်မှာ ပြိုင်လိုက်တယ်။ တစ်ယောက်နဲ့ တစ်ယောက် မသိလိုက်ကြဘူးလေ။ နောက်တော့ ကျွန်တော့်ပါမောက္ခက ပြောတယ်။ ပုဂံခရီးသွားတဲ့ဟာကို သောကြာမှာ ဟာသပုံစံနဲ့လည်းရေးတယ်။ ကျောင်းမှာလည်း စာတမ်းပုံစံနဲ့ ပြိုင်တယ်။ဆုရတယ်။ အခုလည်း ၀တ္ထုတိုအနေနဲ့ ပြိုင်တယ်။ form ပေါ့ အကြောင်းအရာတစ်မျိုးတည်းကို ပုံသဏ္ဍာန်(၃)မျိုးနဲ့ ရေးသွားတာကို တော်တော်လေး ကျေကျေနပ်နပ် ချီးကျူးတယ်။ အားလည်းအားပေးတယ်။ နောက် ပုဂံခရီးသွားဆုရတာနဲ့ပတ်သက်ပြီး ကျောင်းကနေ ကျွန်တော့်ကို ဂုဏ်ပြုပွဲတစ်ခုလုပ်ပေးတယ်။ ကျွန်တော်ရေးထားတဲ့စာမူတွေကို နံရံကပ်လေးလုပ်ပေးပြီးတော့ ပြပွဲလေးတစ်ခု လုပ်ပေးခဲ့တယ်။ နောက် ပြည်တက္ကသိုလ် လေ့လာရေး သွားတော့ ကျွန်တော့်ကို ဟိုမှာထပ်ပြီးဂုဏ်ပြုဖို့ရှိတယ်ဆိုပြီး ခရီးစရိတ်မပေးရဘဲ ခေါ်သွားတယ်။ အဲဒီတုန်းက ပညာရေးနှီးနှောဖလှယ်မှုအစီအစဉ်နဲ့ ချစ်ကြည်ရေးစာတမ်းသွားဖတ်ကြတာ။ သရေခေတ္တရာ လေ့လာရေးရော ပေါင်းပြီးတော့ပေါ့။ အဲဒီက ပါမောက္ခချုပ်က ဆရာကြီးမြ၀င်း-ဒဿန။ အဲဒီနှစ်က ဆရာများနေ့ဆုပေးပွဲအထိမ်းအမှတ်လက်ကမ်းစာစောင်မှာ ကျွန်တော့် စာမူတစ်ပုဒ်ပါတယ်။ ဆရာတွေဂုဏ်ပြုထားတဲ့ အက်ဆေးလေး ရေးထားတာ။ ဆရာကြီးကလည်း အဲဒီထဲမှာ မောင်လင်းကြည်(ပြည်တက္ကသိုလ်)ဆိုတဲ့နာမည်နဲ့ ကဗျာတစ်ပုဒ်ရေးထားတော့ ကျွန်တော့်ကို သတိထားမိနေပုံရတယ်။ မြန်မာစာပါမောက္ခဆရာမကြီးကိုလည်း ကျွန်တော့်ရဲ့မွေးနေ့အထိမ်းအမှတ် ထုတ်ထားတဲ့ ကဗျာစာအုပ်လေး လက်ဆောင်ပေးလိုက်တော့ စာတမ်းဖတ်တဲ့ခန်းမမှာ အဖွင့်အမှာစကားပြောတဲ့ အချိန်မှာပဲ ဆရာမကြီး ကဗျာစာအုပ်ကို ကောက်နုတ်ချက်တွေဖတ်ပြပြီး ချီးကျူးခန်းဖွင့်သွားသေးတယ်။ ၂၅ရက် ၂ လ မွေးတဲ့သူတွေက အနုပညာမှာ အောင်မြင်ထွန်း ပေါက်ကြတယ် ဘာညာပေါ့။ ကျွန်တော်တို့ ပါမောက္ခကိုလည်း ဒီလိုကျောင်းသားမျိုးတွေ မွေးထုတ်နိုင်တဲ့အတွက် လေးစားဂုဏ်ယူပါတယ်၊ ဘာညာနဲ့ဆိုတော့ ကျွန်တော့်ကျောင်းက ဆရာ၊ဆရာမတွေ၊ ကျောင်းသားတွေရော ပျော်လို့ ပြုံးလို့ပေါ့။ အဲလို အမှတ်တရလေးတွေတော့ ရှိခဲ့ပါတယ်။

မေး – သြော် …. ၀မ်းသာစရာပဲပေါ့။ ဒါနဲ့ အစ်ကို ကြားဖြတ်လေးတစ်ခု မေးကြည့်ချင်ပါတယ်။ အစ်ကို ခုလို လုပ်ခဲ့တဲ့တစ်လျှောက်လုံး ကျောင်းမှာစာတမ်းပြိုင်တာတွေရော၊ တစ်ခြားပြိုင်ပွဲတွေမှာရောပေါ့ ကိုယ်က မွတ်စလင်မ်တစ်ယောက်ဖြစ်နေတဲ့အတွက် အစ်ကို့အပေါ် ဘယ်လိုရိုက်ခတ်မှုတွေရှိခဲ့လဲ။ ဘယ်လို အခက်အခဲတွေရှိခဲ့လဲ။ ဘယ်လိုကျော်လွှားခဲ့ရလဲ။ အဲဒါလေးရောပြောပြပေးပါဦး။

ဖြေ –    အဲလိုမျိုးတော့ သိပ်မရှိဘူး။ မရှိဘူးဆိုတာ ရှိတန်သလောက်တော့ ရှိခဲ့ပါတယ်။ အသေးအမွှားကိစ္စ လေးတွေမှာပေါ့။ နောက်တစ်ခုက ပညာရေးလောကမှာ တခြားနယ်ပယ်တွေထက်ပိုပြီး ဒါမျိုးခွဲခြားမှု နည်းပါတယ်။ ဒါပေမဲ့ အခုနောက်ပိုင်းတော့ နည်းနည်းရှိလာသလားမသိဘူး။ ဥပမာ တချို့မွတ်စလင်မ် ဆရာတွေ နိုင်ငံခြားတက္ကသိုလ်တွေမှာ ဧည့်ပါမောက္ခအဖြစ် တာဝန်ထမ်းဆောင်ဖို့အတွက် အရွေးခံရပြီး မှ မွတ်စလင်ဖြစ်နေတဲ့အတွက် မသွားခဲ့ရတာမျိုးတွေ ရှိတယ်။ တစ်ခါတုန်းက ကြုံဖူးတာ တစ်ခုရှိတယ်။ ဒါကတော့ အပြင်လောကမှာပါ။ အရှေ့ပိုင်းတက္ကသိုလ် မြန်မာစာဌာန ပါမောက္ခဆရာမကြီးက ကျွန်တော့်ကို သူ့ရုံးခန်းထဲ ခေါ်တွေ့တယ်။ အယ်ဒီတာအလုပ်လုပ်ချင်လားတဲ့။ ကျွန်တော်ကလည်း ဟုတ်ကဲ့ လုပ်ချင်ပါတယ်ဆိုတော့ ဒါဆိုရင် ဒီလိပ်စာအတိုင်းသွား၊ ဆရာမလွှတ်လိုက်တာလို့ပြော။ ဆရာမလည်း ဖုန်းဆက်ထားမယ်လို့ပြောတယ်။ ဒါနဲ့ ကျွန်တော် သွားဖြစ်တယ်။ ဟိုကျတော့ ကျွန်တော့်ကို အင်တာဗျူးလုပ်တယ်။ အားလုံးအဆင်ပြေတယ်။ ဆရာမကြီးက အသင့်လျော်ဆုံး ကျောင်းသားကို ရွေးပြီးလွှတ်လိုက်တာဆိုလို့ ဘာမှ ပြောစရာမရှိပါဘူးတဲ့။ ဒါပေမဲ့ မွတ်စလင်ဖြစ်နေ တာကိုတော့ သိပ်ဘ၀င်ကျပုံမရဘူး။ ဒီမဂ္ဂဇင်းမှာ ဘုန်းကြီးတွေလည်းရေးချင်ရေးမယ်၊ ဘာသာရေး ဆောင်းပါးတွေလည်း ပါတယ်။ ဒါမျိုးတွေကျတော့ ဘာသာမတူတဲ့အတွက် ဘယ်လိုတည်းဖြတ်မလဲ၊ ဘာလဲ ညာလဲနဲ့ အကြောင်းပြချက်တွေပေးပြီး နောက်မှ ဆက်သွယ်လိုက်မယ်လို့ ပြောလွှတ်လိုက်တာ ရှိဖူးတယ်။ တချို့ကိစ္စတွေကျတော့ မွတ်စလင်ဖြစ်တဲ့အတွက်လို့ ယူဆရတာရှိပေမဲ့ အတည်မပြုနိုင် တာတွေတော့ရှိတယ်။ ကျွန်တော်တို့ မွတ်စလင်တွေကလည်း ချန်တာ၊ ခွဲခြားတာတွေ ကြုံဖူးထားတော့ အရာရာကို ဒီအမြင်နဲ့ပဲ တွေးမြင်ပြီး ကိုယ့်ဘာသာကို အားငယ်နေတာမျိုးတွေလည်း ရှိတတ်တာပေါ့။ ကျွန်တော်ကတော့ မသေချာရင် သိပ်မစွပ်စွဲချင်ဘူး။ တစ်ခါက ပထမနှစ်ဂုဏ်ထူးတန်းမှာ ကျောင်းသား စုံညီပွဲတော်တွေ လုပ်တာရှိတယ်။ ကျောင်းပေါင်းစုံပေါ့။ အဲဒီမှာ တက္ကသိုလ်ကျောင်းသားတွေကိုယ်စား စကားပြောဖို့ကို ကျွန်တော်တို့ဌာနက တာဝန်ယူရွေးပေးရမှာဆိုတော့ ပညာရေးအရကျွန်တော့်ကို ရွေးတယ်။ ဒါပေမဲ့ ရုပ်ကိုကြည့်ပြီး ဗမာရုပ်မဟုတ်လို့ လူကြီးတွေအမြင်မှာ တစ်မျိုးဖြစ်မှာစိုးတယ်ဆိုပြီး နောက်သူငယ်ချင်းတစ်ယောက်ကို ပြောင်းရွေးလိုက်တယ်။ အဲဒီပွဲက အဲဒီတုန်းက ပညာရေး ကော်မတီဥက္ကဋ္ဌ ဗိုလ်ချုပ်ခင်ညွန့် တက်တဲ့ပွဲကိုး။ ဒါကို အစည်းအဝေးတက်ခဲ့တဲ့ ဆရာမ တစ်ယောက်က ကျွန်တော့်ကိုပြန်ပြောပြတော့ ခွဲခြားမှုအတွက် စိတ်မကောင်းပေမဲ့ အဲဒီတုန်းကတော့ ကျွန်တော် ပျော်သွားဖူးတယ်။ အဲဒီအခန်းအနားမှာ နောက်ကရေးပေးတာတက်ဖတ်ပြီး တီဗွီမှာ ပါလာရင် ရှက်စရာကြီးလို့ ကျွန်တော်က တွေးပြီးစိုးရိမ်နေတာကိုး။ ဒါမျိုးက ချန်တာသိသိသာသာ ဆိုပေမဲ့ တချို့ဟာတွေကျတော့ မသေချာဘူးလေ။ ဥပမာ လွန်ခဲ့တဲ့ ၂ နှစ်လောက်က ကျူတာခေါ် တော့ တချို့တက္ကသိုလ်တွေမှာ တော်တဲ့မွတ်စလင် ကျောင်းသား၊ ကျောင်းသူတွေ မပါဘဲ သူတို့လောက်မှမတော်တဲ့သူတွေ ပါသွားလို့ တချို့က ဒီတစ်ခေါက် မွတ်စလင်မ်တွေကို ကျူတာမခေါ်တော့ဘူးလို့ သုံးသပ်ကြတယ်။ ကျွန်တော်ကတော့ အဲဒီလိုသိပ်မထင်ဘူး။ ကျွန်တော်လည်း မအောင်ခဲ့ဘူး။ ဒါပေမဲ့ အားနည်းချက် ၂ ခုရှိထားတယ်။ တစ်ခုက အသက်(၃၀)နဲ့ ကန့်ခေါ်တာ ကျွန်တော်က (၃၁)ဖြစ်နေပြီ။ အသက်တစ်နှစ် ကျော်နေပြီ။ အသနားခံစာနဲ့ လက်ခံပြီးဖြေခွင့်ပြုခဲ့ပေမဲ့ ပွစိပွစိတွေမဖြစ်အောင် အခြေအနေထိန်းတဲ့ အနေနဲ့ ဖြေခိုင်းပြီးမှ ဖြုတ်ချပစ်တာလို့ သုံးသပ်တဲ့သူတွေလည်းရှိတယ်။ ထားတော့။ နောက်တစ်ခုက ကြံ့ခိုင်ရေးအသင်း ၀င်ရတယ်။ အဲဒီအတွက် ပေးမှတ်ရှိတယ်။ ကျွန်တော်က မ၀င်ထားဘူး။ ၀င်လည်း မ၀င်နိုင်ဘူး။ ဒီအခွင့်အရေးရဖို့ ဒီအသင်းဝင်ရတယ်ဆိုတာကလည်း အဓိပ္ပာယ်မရှိဘူး။ ကိုယ့်စိတ်နဲ့ ကိုယ်ပဲ ကောင်းပါတယ်။ ဒီအတိုင်းပဲ တင်မှာလားတဲ့။ ဖောင်တင်တော့ လက်ခံသူတွေက မေးတယ်။ မပြည့်စုံဘူးပေါ့လေ။ သူပြောချင်တာက။ ဟုတ်တယ် ဒီအတိုင်းပဲ ရရင်လည်း လုပ်မယ်၊ မရရင်လည်း မလုပ်တော့ဘူးလို့ ဗြောင်ပဲပြောခဲ့လိုက်တယ်။ ဒါတွေကြောင့် ဖြုတ်ခဲ့တာလို့ပဲထင်တယ်။ မွတ်စလင်မ်မို့  ကျူတာမခေါ်ဘူးဆိုတာလောက်အထိတော့ လုပ်မလာလောက်ဘူးထင်တာပဲလေ။

မေး – ခုနက အစ်ကိုတော့ ပြောသွားတယ်။ အယ်ဒီတာအဖြစ် အပြင်မဂ္ဂဇင်းမှာ မလုပ်ဖြစ်လိုက်ဘူး။ ဒါပေမယ့် အစ်ကို အယ်ဒီတာလုပ်ခဲ့တဲ့ စာစောင်တွေ၊ ဂျာနယ်တွေ ရှိတယ်လို့ ကြားဖူးတယ်။

ဖြေ –    ဟုတ်ကဲ့ အဲဒါက ဘာသာရေးပိုင်းပေါ့။ ကျွန်တော်က ငယ်ငယ်ကတည်းက ခံယူချက်တစ်ခုရှိတယ်။ စာပေအနုပညာ ဘာပဲလုပ်လုပ်။ ကိုယ်ဝါသနာပါတာ ကိုယ်လုပ်သလို သာသနာအတွက်လည်း တစ်ဖက်တစ်လမ်းက အထောက်အကူပြုနိုင်အောင်လုပ်မယ်ဆိုတဲ့စိတ်ရှိတယ်။ ဒါကြောင့် ကဗျာရေးရင် ဘာသာရေးကဗျာလည်းရေးတယ်။ သီချင်းရေးရင်လည်း ဓမ္မတေးကဆွီဒါပါ ရေးတယ်။   (၁၀)တန်းအောင်ပြီးတဲ့နောက်ပိုင်းမှာ ဘာသာရေးစာပေ ပိုရေးဖြစ်လာတယ်။ ဆယ်တန်းအောင်ပြီးတဲ့အခါမှာ ခံယူချက်တစ်ခု ၀င်လာတယ်။ ဘာလဲဆိုတော့ အပြင်စာတွေက ကိုယ်မရေးလည်း ရေးမယ့်သူတွေ အများကြီးရှိတယ်။ ဒီဘက်မှာကျ အဲလိုသိပ်မရှိဘူး။ ကျွန်တော် မြန်မာစာကိုယူလိုက်မိတဲ့ အထဲမှာ အဲဒါတစ်ခုလည်းပါတယ်။ နံပါတ်(၁)အချက်က ကိုယ်ဝါသနာ ပါတယ်။ နံပါတ်(၂)အချက်က ဘာသာရေးစာပေတွေကို ဖတ်ရတာ အားမရဘူး။ အကြောင်းအရာတွေကောင်းပေမဲ့ တင်ပြပုံအပိုင်းမှာ နည်းနည်းအားမရဘူး။ အပြင်စာတွေဖတ်ရတာနဲ့ ဘာသာရေးစာအုပ်တွေဖတ်ရတာ တင်ပြပုံစွဲဆောင်မှုရှိတာချင်းကွာတယ်။ အဲဒီအပေါ်မှာ ကိုယ်ကိုယ်တိုင် ပိုပြီးတော့မှ improve ဖြစ်အောင် လုပ်ချင်လာတယ်။ ဆရာကြီးဦးမောင်ကို(ဂဖွာရီ)ထုတ်တဲ့ “အစ္စလာမ့်အလင်း” ၂၅ နှစ်မြောက်စာအုပ်မှာ ဘာသာရေးကဗျာ စရေးဖြစ်တယ်။ အဲဒီနောက်ပိုင်း စာစောင်တွေထဲမှာ စာတွေဆက်ရေးဖြစ်တယ်။

ဆက်ရန်

အပိုင်း(၂)