ကျားဘညိမ်း၏ ဟာသများ

ကျွန်တော် ကျားဘညိမ်း ဆိုတဲ့ နာမည်နဲ့ စတင် ရင်းနှီးတာ ၁၉၆၀ ခုနှစ်ဝန်းကျင် လူပျိုပေါက် အရွယ်မှာပါ။ ကျားဘညိမ်းက လက်ဝှေ့ ထိုးသတ်ရာမှာ ဘယ်လိုတော်တာ၊ အရှောင်အတိမ်းမှာလည်း သိပ်လှတာ၊ သူလက်ဝှေ့ထိုးဖို့ စင်ပေါ်တက်လာတဲ့ အခါ ကျားခေါင်းပုံ ပါတဲ့ ၀တ်ရုံကြီး ခြုံတက်လာတာ၊ မြန်မာနိုင်ငံရဲ့ အတော်ဆုံး လက်ဝှေ့သမား စသဖြင့် ကျွန်တော်တို့ လူငယ် အချင်းချင်း အားပါးတရ ပြောဆိုလေ့ ရှိကြတယ်။ ခုလို ပြောဆိုနေကြ ပေမယ့် ကျွန်တော်တို့တစ်တွေ တစ်ယောက်မှ ကျားဘညိမ်း လက်ဝှေ့ထိုးသတ်တာ မမြင်ဖူးကြပါ။ ဒါပေမယ့် ကျားဘညိမ်းရဲ့ ဂုဏ်သတင်းဟာ မြန်မာနိုင်ငံ အ၀န်း ထင်ရှားကျော်ကြား လွန်းလှလို့ ကျွန်တော်တို့လို လူငယ်တွေ ကြားမှာ ရေပန်းစားပြီး စံပြပုံရိပ် ဖြစ်နေတာပါ။

ဒီရှေ့ပိုင်းမှာတော့ ၁၉၅၁ ခုနှစ်မှာ ကျားဘညိမ်းဟာ ဖလိုင်းဝိတ်တန်း၊ ဘင်တန် ၀ိတ်တန်းနဲ့ ဖယ်သာ ၀ိတ်တန်းတွေမှာ ချန်ပီယံဘွဲ့ ရယူနိုင်ခဲ့ပြီး မြန်မာနိုင်ငံရဲ့အကောင်းဆုံး လက်ဝှေ့သမား အဖြစ် သတ်မှတ်ခြင်းခံခဲ့ရ ပါတယ်။ ၁၉၅၂ ခုနှစ် ဖင်လန်နိုင်ငံ၊ ဟယ်လ်ဆင်ကီးမြို့မှာ ကျင်းပတဲ့ ကမ္ဘာ့ အိုလံပစ် ပွဲတော်မှာ မြန်မာနိုင်ငံကို ကိုယ်စားပြု ယှဉ်ပြိုင်ခဲ့တဲ့ ဂုဏ်ယူလောက်စရာ လက်ဝှေ့ကျော်လည်း ဖြစ်ပါတယ်။ ၁၉၅၇ ခုနှစ်မှာ လက်ဝှေ့ ထိုးသတ်ခြင်းမှ အနားယူပြီး၊ အားကစားနှင့် ကာယပညာ ဦးစီးဌာနမှာ လက်ဝှေ့နည်း စနစ်မှူး၊ မြန်မာနိုင်ငံလက်ဝှေ့ အဖွဲ့ချုပ် အတွင်းရေးမှူးစတဲ့ တာဝန်တွေကို ၈.၇.၁၉၇၉ နေ့ ကွယ်လွန်ချိန် အထိ ထမ်းဆောင်ခဲ့ကြောင်း သိရပါတယ်။

ဆရာကျားဘညိမ်းက လက်ဝှေ့ထိုးတဲ့ အပြင် စာလည်း ရေးပါတယ်။ ဆရာ ကျားဘညိမ်း ရေးတဲ့ လုံးချင်းစာအုပ် တစ်အုပ် ဖတ်ဖူးတယ်။ နှင်းဦး၊ ချစ်ညိုတို့နဲ့ ခေတ်ပြိုင်ပေါ့။ ရှုမ၀၊ မြ၀တီ၊ ငွေတာရီ မဂ္ဂဇင်းတွေနဲ့၊ နောက်ပိုင်း တံခွန်သတင်း ဂျာနယ်ထဲမှာလည်း ဆောင်းပါးတွေ ရေးခဲ့တယ်။ ဆရာကျားဘညိမ်းဟာ အားကစား နယ်ကော၊ စာပေနယ်မှာပါ လူချစ်လူခင် အတော်များတဲ့ သူပါ။

၁၉၇၁ ခုနှစ် ကျွန်တော် ဆရာ စိန်ခင်မောင်ရီရဲ့ ဖြူနီညိုပြာ မဂ္ဂဇင်းမှာ အယ်ဒီတာ အဖွဲ့ဝင် အဖြစ် ၀င်လုပ်နေချိန်မှာ ဆရာ ကျားဘညိမ်းကို စတင်တွေ့ဖူးပါတယ်။ ဆရာ ကျားဘညိမ်းက ရုံးဆင်းချိန် ညနေ လေးနာရီ နောက်ပိုင်းဆို ရေကျော် ၄၇ လမ်း ချင်းတွင်း ပုံနှိပ်တိုက်မှာ ရှိတဲ့ ကျွန်တော်တို့ရဲ့ ဖြူနီညိုပြာ မဂ္ဂဇင်းဆီကို ရောက်ရောက် လာတတ်တယ်။ ဆရာ စိန်ခင်မောင်ရီ၊ ဆရာဦးကိုကိုလေးတို့နဲ့ တစ်အောင့်တစ်နား စကားပြောပြီးမှ ပြန်သွားတတ်တယ်။

ဖြူနီညိုပြာမှာ ဆရာ စိန်ခင်မောင် ရီက အယ်ဒီတာချုပ်၊ ဦးကိုကိုလေးက တာဝန်ခံ အယ်ဒီတာ အဖြစ် တာဝန်ယူကြတယ်။ ဦးကိုကိုလေးဟာ န၀ဒေး မဂ္ဂဇင်း မှာ ဆရာတက္ကသိုလ် နန္ဒမိတ်တို့နဲ့ အတူ လုပ်ခဲ့ပြီး၊ မောင်ဌေးကြွယ်၊ ထွန်းသစ် နာမည်တွေနဲ့ စာရေးသားသူ ဖြစ်တယ်။ ရဲကြေးမုံ၊ မှုခင်း မဂ္ဂဇင်းတွေကနေ ဖြူနီညိုပြာမှာ လုပ်နေရင်း၊ ပရုဖတ်၊ စာ ဖောင်ဖွဲ့၊ ကာလာဖောင်ဖွဲ့၊ ဖောင်ကိုင်၊ ဒမ်ဘီချ၊ ဆလစ်ထိုးစတဲ့ မဂ္ဂဇင်း အယ်ဒီတာ တစ်ယောက် တတ်အပ်တဲ့ စာနယ် ဇင်းပညာတွေ ကျွန်တော့်ကို သင်ပေး ခဲ့တဲ့ ဆရာတစ်ဦးလည်း ဖြစ်ပါတယ်။

တစ်နေ့ညနေ ဖြူနီညိုပြာကို ဆရာ ကျားဘညိမ်း ရောက်လာခိုက် ဦးကိုကို လေးက “မောင်ငွေကြည် ကိုဘညိမ်းက မင်းကို အကူအညီ တစ်ခုတောင်း ချင်လို့”ဆိုပြီး ဒီဇိုင်းတစ်ခု ဆွဲပေးဖို့ အပ်တယ်။ မှတ်မှတ်ရရ အလေးမအဖွဲ့ တံဆိပ်တုံး ဒီဇိုင်းပါ။ အဲဒီ အချိန်က ခုလို ကွန်ပျူတာ မပေါ်သေးတော့ တံဆိပ် အ၀ိုင်းထဲမှာ စာလုံးတွေ ကွန်ပါနဲ့ လှည့်ပြီး ဆွဲရတယ်။ အတော် လက်ဝင်တယ်။ ဒီဇိုင်းပြီးတော့ ဆရာညိမ်းက ကျွန်တော့်ကို ဒီဇိုင်းခ သုံးဆယ်ကျပ် ပေးပါတယ်။ (အဲဒီ အချိန်တုန်းက အဖုံး ၁၅၀ ကျပ်၊ ၀တ္ထု သရုပ်ဖော် ၆၀ ကျပ်၊ ခေါင်းစီးဒီဇိုင်း ၃၀ ကျပ်နှုန်း ရှိတယ်) နောက်တစ်ပတ် အကြာမှာ ကျွမ်းဘားအသင်းအမှတ် တံဆိပ် လိုဂိုပုံ အပ်ပြန်ပါတယ်။ ဒါလည်း ၃၀ ကျပ် ထပ်ပေးပါတယ်။ ကျွန်တော့် အဖို့တော့ ကျွန်တော် လေးစားချစ်ခင်တဲ့ လက်ဝှေ့ကျော် စာရေးဆရာကြီးနဲ့ ခုလို သိကျွမ်း ရင်းနှီးခွင့်ရတာ အမှတ်တရပါ။

ကျွန်တော်က တိုက်ပေါင်းစုံမှာ ကာတွန်း ဆွဲနေတာမို့ အဲဒီလို နေရာတွေမှာ ဆရာ ကျားဘညိမ်းနဲ့ မကြာခဏ ဆုံတယ်။ တစ်နေ့ မြ၀တီတိုက်မှာ ပန်းချီ ကာတွန်း ဦးစိန်နဲ့ဆုံတော့ “ကိုဘညိမ်း (ကျားဘညိမ်း) နေရာကို လူသစ် တစ်ယောက် ခန့်ထားလိုက်တယ်တဲ့။ ရာထူးက လက်ဝှေ့ နည်းစနစ်မှူးပေမယ့် အဲဒီလူက လက်ဝှေ့ မထိုးတတ်ဘူးတဲ့” လို့ ပြောပါတယ်။ ကြားရသူ အပေါင်းက ဒါမျိုးလည်း ရှိသကိုးလို့ ရေရွတ်မိကြတယ်။

နောက်လထုတ် မဂ္ဂဇင်းထဲမှာ ဦးစိန်ရဲ့ ကာတွန်း တစ်ပုံပါလာပါတယ်။ လူနှစ်ယောက် လက်ဝှေ့ ထိုးကြရာမှာ တစ်ယောက်က ကင်းမြီးကောက်ထောင် ထားပြီး ခြေထောက်နှစ်ချောင်းမှာ လက်ဝှေ့အိတ် စွပ်ထားကာ၊ ကျုပ်က လက်နဲ့ မထိုးတတ်တော့ ခြေနဲ့ ထိုးမယ်လို့ ပြောနေတဲ့ပုံပါ။ ဒါဟာ ဆရာကျားဘညိမ်း ရဲ့အဖြစ်ကို အခြေပြု ပေါ်ထွက်လာတဲ့ ကာတွန်းဖြစ်ပါတယ်။

ဆရာ ကျားဘညိမ်းနဲ့ ဆုံပါများတော့ သူ့ရဲ့ထူးခြားချက် တစ်ခုကို သတိ ထားမိလာတယ်။ အဲဒါကတော့ ဆရာ ကျားဘညိမ်းဟာ စကားဝိုင်းတွေကို ကောင်းကောင်းထိန်းထားနိုင်ပြီး သူပါတဲ့ စကားဝိုင်းဟာ ပွဲစည်တယ် ဆိုတာပါပဲ။ ဘာကြောင့်ထိန်းထားနိုင်လဲ၊ ပွဲစည်လဲလို့ ဆန်းစစ်ကြည့်တော့ စကား ၀ိုင်းတွေမှာ ဟာသတွေ ပြောတတ်လွန်း လို့ပါ။ ပြုံးပြုံးရွှင်ရွှင် မျက်နှာထား ရှိပေမယ့် လူပုံက ရိုးရိုးအေးအေးကြီးမို့ ဆရာ ကျားဘညိမ်းဆီက ဒီလိုဟာသတွေ ကြားရလိမ့်မယ်လို့ မထင်မှတ်စရာပါ။

ဆရာ ကျားဘညိမ်းဟာ မြန်မာ့ လက်ဝှေ့ကျော် ဘ၀နဲ့ နိုင်ငံတကာကို အတော်များများ ရောက်ဖူးပါတယ်။သူ့ရဲ့ (အိန္ဒိယ၊ မြန်မာ)ချစ်ကြည်ရေး ခရီးစဉ်နဲ့ ပတ်သက်တဲ့ ဟာသ တစ်ခုကို သတင်း ဂျာနယ်တိုက်မှာ ခုလိုပြောပြပါတယ်။ “ကျွန်တော်တို့ မြန်မာလက်ဝှေ့ အဖွဲ့နဲ့ အိန္ဒိယ လက်ဝှေ့အဖွဲ့ ချစ်ကြည်ရေး လက်ဝှေ့ ယှဉ်ပြိုင်ကြတာ နိုင်သူနိုင်၊ ရှုံးသူရှုံးပေါ့။ ပွဲအစီအစဉ်တွေပြီးလို့ ဈေးထွက်ဝယ်တဲ့ အချိန်က ခဏပဲရတယ်။ အိမ်ပြန် အမှတ်တရ ပစ္စည်းလေးတွေ ၀ယ်ဖို့ ကိုယ်ပါတဲ့ ငွေနဲ့ချိန်ရတယ်။ တစ်နေရာရောက်တော့ ဖော့ဦးထုပ်တွေ ရောင်းတဲ့ ဆိုင်တွေ့တယ်။

“အတော်ပဲ ဖော့ဦးထုပ်က တို့ဆီမှာလည်း ဆောင်းကြတယ်ဆိုပြီး ဈေး မေးကြည့်တယ်။ ဈေးသင့်တာနဲ့ ဦးထုပ် အလုံးနှစ်ဆယ် ၀ယ်လိုက်တယ်။ မွန်ဘိုင်းလိုမြို့တစ်မြို့က ထုတ်တဲ့ ဖော့ ဦးထုပ်တွေ။ ရန်ကုန်ပြန်ရောက်တဲ့ အခါ မိတ်ဆွေတွေကို ဖော့ဦးထုပ်တွေ အမှတ်တရပေးလိုက်တယ်။
“အဲဒီမှာ တစ်ယောက်က ကိုဘညိမ်းရယ် ဒီဦးထုပ်တွေ ဟိုက ၀ယ်လာတာမှ ဟုတ်ရဲ့လား၊ ဒီရောက်မှ ၀ယ်ပေးတာ မဟုတ်လားလို့ ပြောတယ်။ တကယ် ဟိုက ၀ယ်လာတာပါလို့ ပြောတော့ ကိုယ့်လူ ရွှီးမနေနဲ့။ ဟောဒီ ဦးထုပ်က စာဟာ သက်သေပဲလို့ ပြောပြောဆိုဆို ဦးထုပ်ကို ပြတယ်။

“ဦးထုပ်ကို အသေအချာ ကြည့်လိုက်တော့ မွန်ဘိုင်းလို အိန္ဒိယမြို့တစ်မြို့က လုပ်တယ် ထင်ထားခဲ့တာ၊ စာတန်း ထိုးထားတာက မိတ်အင် မုံရွာတဲ့ဗျား။ သေရော”

ဆရာ ကျားဘညိမ်းဟာ လက်ဝှေ့ ထိုးသတ်ရာမှာ ကျားတစ်ကောင်လို ရဲရဲရင့်ရင့် ထိုးသတ်တတ်ခြင်း၊ ရွှေကျား လက်ဝှေ့ကလပ် ထောင်ပြီး လူငယ် လက်ဝှေ့သမားတွေ မွေးဖွားပေးခြင်း အပြင်၊ အင်္ဂလိပ် ၁၂ ကောင်ကျားထိုး ရာမှာလည်း ကျွမ်းကျင်ခြင်းတွေကြောင့် ကျားဘညိမ်းလို့ ခေါ်ကြတာ ဖြစ်ပါတယ်။ ဒီဟာသက ကျားထိုးခြင်းနဲ့ ပတ်သက်တဲ့ ဟာသပါ။

“တစ်နေ့တော့ ပဲခူးက လူတွေနဲ့ ကျားထိုးဖို့ ချိန်းထားလို့ ဆိုင်ကယ်စီး ပြီးထွက်ခဲ့တယ်။ ကျုပ်ဆိုင်ကယ်က ဟာလေဒီဗက်ဆင် ဆိုင်ကယ်ကြီး၊ စိတ်တိုင်းကျ ရွေးဝယ်ထားတာ၊ အင်ဂျင်မာတယ်၊ အရမ်းမြန်တယ်။ မြန်သမှ ၃ နာရီလောက်ခရီးကို ၁ နာရီခွဲလောက်နဲ့ ရောက်တယ်”

စကားခဏရပ်ပြီး ဆရာကျား ဘညိမ်းက ပြုံးတုံးတုံးလုပ်နေပါတယ်။ ပြီးမှ စကားဆက်တယ်။ “ဒီလိုနဲ့ ပဲခူး ရောက်ရော။ ပဲခူးက ကျားချန်ပီယံတွေ ကျွန်တော်နဲ့ လက်ရည်စမ်းတယ်။ တစ်ယောက်ပြီး တစ်ယောက် နောက်ကောက်ကျ ကုန်တယ်။ ပွဲစဉ်တွေများတော့ ညနေ ၅ နာရီမှ ပြီးတယ်။ နေကလည်း ၀င်တော့မှာမို့ အိမ်အတွက် ခေါက်ဆွဲထုပ် ၀ယ်ပြီး ဆိုင်ကယ်ကို တရကြမ်းမောင်း ပြန်ခဲ့တယ်။ ဘယ်နှ မိုင်နှုန်းနဲ့ မောင်းခဲ့လဲတောင် မသိဘူး။ အိမ်လည်း ရောက်ရော ခေါက်ဆွဲထုပ်ကို မိန်းမ လက်ထဲပေးလိုက်တယ်။ ခေါက် ဆွဲထုပ်က ပူနွေးနေတုန်းပဲ”

စကားဝိုင်းက လူတွေအဖို့ မိုင် ငါး ဆယ်လောက်ဝေးတဲ့ ခရီးကိုပြန်ရောက်တဲ့ အထိ ခေါက်ဆွဲထုပ်က ပူနွေးနေအောင် သူ့ဆိုင်ကယ် ဘယ်လောက်တောင် မြန်လဲလို့ စဉ်းစားစရာဖြစ်ကုန် ပါတယ်။ ပြီးတော့
“ဒါတော့ လွန်ပြီဗျာ၊ ခင်ဗျားဆိုင်ကယ် ဘယ်လောက်မြန်မြန် မိုင်ငါးဆယ် ခရီးကို လေထုထဲဖြတ်မောင်းလာရ တာ၊ ခေါက်ဆွဲထုပ် အေးသွားမှာ သေချာတယ်။ ပူစရာ အကြောင်းမရှိဘူး”

ဒီအခါ ဆရာကျားဘညိမ်း ပြောလိုက်တာက “ပူပါတယ်ဗျ၊ ပူဆို ကျုပ် က ခေါက်ဆွဲထုပ်ကို ဆိုင်ကယ်အိပ်ဇော ပိုက်မှာ ချည်ပြီး မောင်းလာတာဗျ”တဲ့။ အားလုံးဝေါခနဲ ပွဲကျ သွားကြပါတယ်။
ဒါတွေကတော့ ကျွန်တော် မှတ်မိ သမျှ ဆရာကျားဘညိမ်း ဟာသတွေပါ။ ဆရာက လူချစ်လူခင် များပြီး၊ စကားဝိုင်းတွေလည်း အများကြီး ပြောခဲ့ တာမို့ ကျားဘညိမ်းရဲ့ဟာသတွေ အများကြီး ရှိနေဦးမှာပါပဲ ခင်ဗျား။
ဆရာကျားဘညိမ်းသို့ အမှတ်တရ

ရွှေအမြုတေ ကနေကူးပါသည်။