မိတ္ထီလာမြို့မှ အကြမ်းဖက်ခံခဲ့ရသူများအတွက် စိတ်ဓါတ်မြှင့်တင်ရေးဆိုင်ရာ ဟောပြောပွဲ MRF တွင်ပြုလုပ်

ဇွန်လ ၃၀၊ ၂၀၁၃
M-Media
ဆူးထက်

ရန်ကုန် ။ ။ မိတ္ထီလာမြို့မှ အကြမ်းဖက်ခံခဲ့ရသူများ စိတ်ဓါတ်မြှင့်တင်ရေး ဟောပြောပွဲတစ်ရပ်ကို ယနေ့ နံနက် (၉) နာရီမှ (၃း၃၀)နာရီထိ ရန်ကုန်မြို့၊ မအူကုန်းရပ်ကွက်၊ တာမွေမြို့နယ်ရှိ Myanmar Resource Foundation (MRF) သင်တန်းခန်းမ၌ ပြုလုပ်ခဲ့ပါသည်။

ယင်းဟောပြောပွဲတွင် ဖွံ့ဖြိုးရေးဆိုင်ရာ အမြင်အတွေး ခေါင်းစဉ်ဖြင့် MRF Program Manager စစ်တွေရုံးခွဲမှ ဆရာကိုကိုလွင် မှ ဟောပြောခဲ့ ပါသည်။ ဟောပြောပွဲပြုလုပ်ရခြင်းနှင့် ပတ်သက်၍ “မိတ္ထီလာမြို့မှာ နေထိုင်ကြတဲ့ အစ္စလာမ့် ညီနောင်၊ ညီအမများရဲ့ ဘ၀ဖွံ့ဖြိုးတိုးတက်မည့် အသိပညာ ဗဟုသုတများ၊ ဖွံ့ဖြိုးတိုးတက်လာစေရန်၊ မှန်ကန်သော အစ္စလာမ့် လမ်းညွှန်သင်ကြားချက်များကို အခြေခံသိရှိနားလည် ကျင့်သုံးနိုင်စေ ရန်နှင့် ဘာသာပေါင်းစုံ ငြိမ်းချမ်းစွာ အတူယှဉ်တွဲ နေထိုင်နိုင်ကြစေရန် ရည်ရွယ်ချက်ဖြင့် ကျင်းပ ပြုလုပ်ရခြင်းဖြစ်ပါတယ်”ဟု MRF ၏ Assistant Director ကိုကြည် မှ M-Media သို့ပြောသည်။

ထိုဟောပြောပွဲတွင် မိမိဘ၀ဖွံ့ဖြိုးဖို့အတွက် မိမိကိုယ်တိုင်ကပဲ ပြုပြင်ပြောင်းလဲရမှာပဲဖြစ်တယ်။ မိမိကသာဖွံ့ဖြိုးဖို့မလုပ်ဆောင်နိုင်ရင် မိမိအသိုင်းအ၀ိုင်း သည် ဘယ်တော့မှမပြောင်းလဲလာနိုင်ပါဘူး။ အဓိက အခရာထားပြီး စရမယ် ဆိုရင် မိမိကိုယ်တိုင်က စရမှာ ဖြစ်ကြောင်း ထည့်သွင်း ဟောပြောတင်ပြခဲ့ သည်။

တက်ရောက်သူ သင်တန်းသားတစ်ဦးမှ “ကျွန်တော်ကတော့ မိတ္ထီလာမြို့၊ ချမ်းအေးသာယာရပ်ကွက်မှာနေထိုင်သူဖြစ်ပါတယ်။ လက်ရှိကျွန်တော် က နေပြည်တော်မှာကျင်းပမည့် အားကစားပြိုင်ပွဲမှာ ဆက်သွယ်ဆက်ဆံရေးအရာရှိအဖြစ် တာဝန်ထမ်းဆောင်နေပါတယ်။ ယခုကျွန်တော် ဒီသင်တန်း ကို လာတက်ရတဲ့ ရည်ရွည်ချက်ကတော့ ကျွန်တော်တို့ရဲ့ ကျဆင်းနေတဲ့စိတ်ဓါတ်တွေကို ပြန်လည်မြှင့်တင်ပေးနိုင်မယ်လို့ ယုံကြည်တဲ့ အတွက် လာရောက်ရခြင်းဖြစ်ပါတယ်။ ယခု လက်ရှိမှာလည်း သင်ကြားပို့ချနေတဲ့ ဘာသာရပ်တွေအားလုံးက ကျွန်တော်တို့ အတွက် စိတ်ဓါတ်ခွန်အားတွေ ကို ပြန်လည်ရရှိစေပါတယ်။ ဒီသင်တန်းကနေပြီး ကျွန်တော်ရရှိတဲ့ အတွေ့အကြုံတွေက ကျွန်တော်တို့ စိတ်ထဲမှာ ဒွိဟဖြစ်နေတဲ့အကြောင်းအရာတွေကို ရှင်းရှင်းလင်းလင်းသိလိုက်ရတယ်။ နောက်ပြီး ကျွန်တော်တို့တွေ မသိသေးတဲ့၊ ရှေ့ဆက်လုပ်ဆောင်ရမယ့် အကြောင်းအရာတွေကို လမ်းစဖော်ပေး လိုက်တဲ့ သင်တန်းလို့လဲ မှတ်ယူထားပါတယ်။ နောက်များတွင်လည်း ယခုလိုသင်တန်းမျိုးကို ဆက်လက် ပို့ချပေးနိုင်မယ်ဆိုရင် အရမ်းကောင်းမွန်တဲ့ အခြေအနေတစ်ရပ်ဖြစ်လာနိုင်မယ်လို့လဲ ကျွန်တော်ထင်ပါတယ်” ဟု M-Media သို့ပြောပြခဲ့ပါသည်။

အဆိုပါ ဟောပြောပွဲသို့ စုစုပေါင်း လူ (၄၀)ခန့် တက်ရောက်ခဲ့ကြောင်းလည်း သိရပါသည်။