ဆရာဝန် အသင်းပိုင် မြေနေရာအား BOT စနစ်ပြုမည့် ကိစ္စ ကန့်ကွယ်ကြောင်း သတင်းစာ ရှင်းလင်းပွဲလုပ်

ဇူလိုင် ၅၊ ၂၀၁၃
M-Media
သတင်း-အိမေ၊ ဓာတ်ပုံ-ဆူးထက်

မြန်မာနိုင်ငံ ဆရာဝန်အသင်းပိုင် မြေနေရာအား BOT စနစ်ဖြင့်ပြုပြင် ပြောင်းလဲမှုကို ကန့်ကွက်ကြောင်း သတင်းစာရှင်းလင်းပွဲပြုလုပ်

ရန်ကုန် ။       ။       မြန်မာနိုင်ငံ ဆရာဝန်အသင်း အဆောက်အဦးနှင့် မြေနေရာ ကာကွယ်စောင့်ရှောက်ရေး ကော်မတီ(ယာယီ)မှ မြန်မာနိုင်ငံဆရာဝန်အသင်းပိုင် မြေနေရာအား BOT စနစ်ဖြင့်ပြုပြင်ပြောင်းလဲမည့်မူကို ပြင်းပြင်း ထန်ထန် ကန့်ကွက်သည့်အကြောင်း သတင်းစာရှင်းလင်းပွဲကို ၂၀၁၃ခုနှစ်၊ဇူလိုင် ၅၊နေ့လည် ၁နာရီတွင် တော်ဝင်နှင်းဆီ ခန်းမ၌ ပြုလုပ်ကြောင်းသိရသည်။

“မော်လမြိုင်မှာပြုလုပ်ခဲ့တဲ့အစည်းအဝေးမှာ ဆရာဝန်အသင်းပိုင်အဆောက်အဦးဖြိုချပြီး မြေကိုရောင်းချမယ်ဆိုတာ ကြားခဲ့ရတယ်။ ဆရာဝန်အသင်းတိုက် မပျက်စီးရေး၊ကာကွယ်စောင့်ရှောက်ရေး၊မဖျက်စီးခံရရေး၊ ရောင်းမစားခံရရေး အတွက် ၂၉.၆.၂၀၁၃ ရက်က ပြည်မြို့တွင် ပထမဆုံးအကြိမ် ကန့်ကွက်ပွဲပြုလုပ်ခဲ့တယ်။

မြန်မာနိုင်ငံဆရာဝန်အသင်းအဆောက်အဦးနဲ့မြေနေရာကာကွယ် စောင့်ရှောက်ရေးကော်မတီ(ယာယီ)မှာယာယီဥက္ကဌ လုပ်နေပေမယ့် အရည်အချင်းရှိတဲ့ သူတွေ့ရင်ဒီနေရာက ဖယ်ပေးမှာပါ။ဒီလိုလုပ်နေတာကို သိအောင်သတင်းစာရှင်းလင်းပွဲ လုပ်တာပါ။ဒါကို အားပေးတက်ရောက်လာတဲ့ အတွက်ကျေးဇူးအထူးတင်ပါတယ်။”ဟု မြန်မာနိုင်ငံဆရာဝန်အသင်း အဆောက်အဦးနှင့် မြေနေရာကာကွယ်စောင့်ရှောက်ရေးကော်မတီ ဥက္ကဌဆရာဝန်ကြီးဒေါက်တာအောင်ခင်ဆင့်ကပြောကြားသည်။

ဆက်လက်၍ မန္တလေးပြည်သူ့ဆေးရုံကြီးမှ အသည်းအထူးကုဆရာဝန်ကြီး ဒေါက်တာ ညိုမီခိုင်သန်းလှိုင်က “မြန်မာပြည်နဲ့ အပြည်ပြည်ဆိုင်ရာ အသင်းအဖွဲ့တွေ၊အစည်းအရုံးတွေကို ဖွဲ့စည်းတည်ထောင်ကြရာမှာ ဘာလုပ်ချင်တာလဲ ဆိုတဲ့ရည်ရွယ်ချက်ကို လိုက်ပြီး ဖွဲ့စည်းတည်ဆောက် လုပ်ကိုင်ကြတယ်လို့ ကျွန်မအကြမ်းဖျင်း နားလည်မိပါတယ်။သက်တမ်း(၆၃)နှစ်ရှိပြီ ဖြစ်တဲ့ ကျွန်မတို့ မြန်မာနိုင်ငံဆရာဝန်အသင်းကြီးရဲ့ ကောင်းမွန်တဲ့ မူလပထမ ရည်ရွယ်ချက်တွေ နဲ့ ဖွဲ့စည်းပုံ၊လုပ်ဆောင်ပုံတွေကနေ လက်ရှိ မြန်မာနိုင်ငံဆရာဝန်အသင်းကြီး ဘယ်လို ဘယ်ပုံ ပြောင်းလဲသွားနေတယ်၊သွားနိုင်တယ်ဆိုတာကို ကျွန်မပြောပြပါရစေ။၁၆.၃.၂၀၁၃ ရက်စွဲပါ မြန်မာနိုင်ငံဆရာဝန်အသင်း စာအမှတ် ၁၄၇/ ဗဟို/ အကျိုးစီးပွား/ ၂၀၁၃ မှာမြန်မာနိုင်ငံဆရာဝန် အသင်းကြီးရဲ့ သဘောထား ကြေငြာချက်ကို အခုလို ဖော်ပြထားပါတယ်။

အချက် ၅။ အလွန်လျှင်မြန်စွာ ပြောင်းလဲနေသော နိုင်ငံတော်၏နိုင်ငံရေး၊လူမှုရေး၊စီးပွားရေး၊ပညာရေး၊အုပ်ချုပ်ရေးများနှင့်အတူ မြန်မာနိုင်ငံဆရာဝန်အသင်းကြီးသည် စိန်ခေါ်မှုများစွာနှင့် အတူ ခေတ်ရေစီးကြောင်းအတိုင်း  မဖြစ်မနေပြောင်းလဲလိုက်ပါနေရမည်။

အချက် ၇။ မြန်မာနိုင်ငံဆရာဝန်အသင်းကြီးသည် နိုင်ငံတကာနှင့် ရင်ဘောင်တန်းနိုင်သော အဆင့်ကိုလည်းကောင်း၊ဒီမိုကရေစီအဆင့်ရှိသည့် အဖွဲ့အစည်းသို့ တက်လှမ်းနိုင်ရန်အတွက်လည်းကောင်း၊အောက်ပါတို့ကို မဖြစ်မနေခံယူ၍ ပြုပြင်ပြောင်းလဲရန် လိုအပ်ပါသည်။

1.Non-Governmental To Civil Development Society
2.Volunteerism To Professionalism
3.Non-Profit To Corporate Social Business and Finance Stability
4.Single Identity To Partnership Identity
5.Non-Competitive To Competitive
6.Non-political To Nation Political To National Politics and Professional Politics

မြန်မာနိုင်ငံဆရာဝန်အသင်းကြီးသည် အဆိုပါအချက်တို့ကို “မဖြစ်မနေ” ခံယူ၍ ပြုပြင်နိုင်မှနိုင်ငံတကာအဆင့်ကိုတက်လှမ်းနိုင်လိမ့်မယ်လို့ လူကြီးမင်းတို့ ယုံကြည်ပါသလား။ကျွန်မကတော့လုံးဝ မယုံကြည်တဲ့အတွက် အဲဒီလိုပြုပြင်ပြောင်းလဲတာကို ပြင်းပြင်းထန်ထန် ကန့်ကွက်ပါတယ်”ဟုပြောကြားသွားခဲ့သည်။

အဆိုပါ သတင်းစာရှင်းလင်းပွဲသို့မီဒီယာ ၃၀-ခန့်တက်ရောက်ခဲ့ပြီး ဧည့်သည့် ၅၀-ခန့်လည်းတက်ရောက်ခဲ့ပါသည်။

ဓါတ်ပုံများ ကြည့်ရန်။ Click Here