ဘင်္ဂလားဒေ့ရ်ှမှ သံဃာအယောင်ဆောင် ၀င်လာသူများမှာ ဗုဒ္ဓဘာသာများသာဖြစ်၊ အလဲဗင်းမီဒီယာမှ ၄င်းတို့အား ခိုးသွင်းပေးသည့် သူများကိုသာ ကိုးကွယ်ရာ ဘာသာနှင့်တွဲ၍ သတင်းဖော်ပြထား

ဇူလိုင်-၁၁၊ ၂၀၁၃
M-Media
မောင်ပုည

ဘင်္ဂလားဒေ့ရ်ှမှ ၀င်လာသူ သံဃာအယောင်ဆောင် ဗုဒ္ဓဘာသာဝင်နှစ်ဦးကိစ္စနှင့် ပတ်သတ်ပြီး အလဲဗင်းမီဒီယာက ယခုလ ၁၀ ရက်နှင့် ၁၁ ရက် တို့တွင် သတင်း နှစ်ပုဒ် ဖော်ပြခဲ့ပါသည်။

၎င်း သတင်းနှစ်ပုဒ်စလုံးတွင် တရားခံများဖြစ်ကြသည့် သံဃာအယောင်ဆောင်များမှာ ဗုဒ္ဓဘာသာများဖြစ်သည်ကို မဖော်ပြဘဲ ၄င်းတို့အား လာရောက်ကြိုဆိုသည့် လင်မယားသည် မွတ်စလင်များဖြစ်သည်ကိုသာ ဖော်ပြပြီး ယခုကဲ့သို့သော အချိန်မျိုး၌ပင် သတင်းမီဒီယာကျင့်ဝတ် ကို ဖောက်ဖျက်ကာတင်ပြထားသည်။

ထိုသတင်းမှန်ကို မြန်မာနိုင်ငံရဲတပ်ဖွဲ့ နှင့် ရန်ကုန်တိုင်း ရဲတပ်ဖွဲ့ရဲ့ FB စာမျက်နှာများတွင် တရားဝင်ဖော်ပြထားသလို တရားခံ ခိုးဝင်နှစ်ဦးမှာ Parsujit Barua (၂၇)နှစ်၊ (ဘ)Rjin Barua နှင့် Antar Barua၊ (၂၉)နှစ်၊ (ဘ) Dulal Barua နှစ်ဦးစလုံးမှာ ဘင်္ဂလားဒေရှ့်လူမျိုး/ဗုဒ္ဓဘာသာ ဟု ထည့်သွင်း ရေးသားထားပါသည်။[1]

ယင်းကို Eleven မီဒီယာမှ လုံးဝဖော်ပြခဲ့ခြင်းမရှိဘဲ ၊ ဆက်စပ်သံသယ ရှိသူများ၏ ကိုးကွယ်ရာ ဘာသာ (မွတ်စလင်)ကို ပထမသတင်းတွင် ၄ ကြိမ်၊ ဒုတိယ သတင်းတွင် ၇ ကြိမ်တိတိ အသုံးပြုထားကြောင်း တွေ့ရှိရသည်။[2][3]

ထိုသည်နှင့် စပ်လျဉ်း၍ အမ်-မီဒီယာ၏ တာဝန်ခံတစ်ဦးအား ဆက်သွယ်မေးမြန်းရာ ၄င်းက –

“မြန်မာနိုင်ငံမှာ ၁၉၆၂ ခုနှစ် ဧပြီလ ၁၇ ရက်နေ့က ကျင်းပခဲ့တဲ့ သတင်းစာဆရာများအသင်း ညီလာခံပေါ့ဗျာ။ အဲဒီညီလာခံမှာ စာနယ်ဇင်း ကျင့်ဝတ် ၁၁ ချက်ကိုချမှတ်ခဲ့တယ်။ ဒါကို ကျနော်တို့ထက် သူတို့ ပိုသိမှာပေါ့။ သူတို့ ပြောနေကျ စကားလုံးတွေပဲလေ။ အဲဒီကျင့်ဝတ် အမှတ်စဉ် ၈ မှာ စာနယ်ဇင်းများ ဟာ တမင်ကြံရွယ် တွက်ဆပြီး ဘာသာရေး၊ လူမျိုးရေးမုန်းတီးမှုများကို လှုံ့ဆော်ခြင်းမပြုရ။ ဇာတိကို သော်၎င်း၊ ကိုးကွယ်ရာဘာသာကို၎င်း အကြောင်းပြု၍ မတရား ဝေဖန်ရေးသားခြင်းမပြုရ။ လို့ ပါရှိတယ်။ ဒါကို သူတို့ မသိတာလား ဘာလားတော့ ဝေခွဲမရဘူး။ အခုလို profitable time လို့ ခေါ်ရမယ့် အခွင့်ကောင်း အခါကောင်းမှာပေါ့၊ ဒါမျိုး လုပ်တာဟာ တော်တော်ဆိုးသလို လက်ယာစွန်းရောက် လုပ်ရပ်လို့ မှတ်ချက်ပြုရပါမယ်။” ဟု ဝေဖန်ပြောကြားခဲ့သည်။

အစ္စလာမ်ဘာသာဝင်များအနေဖြင့် ယခုကဲ့သို့သော ဥပုသ်လတွင် ငြိမ်းချမ်းစွာ တရားဘာဝနာအားထုတ်နေကြရသည့် အချိန်လည်း ဖြစ်ပါသည်။ ထိုသို့သော အခါမျိုး၌ တမင်ချိန်ဆကာ မလိုလားအပ်သည်ကို အကျယ်ဖော်ပြ၍ သတင်း တင်ဆက်ထားသည်မှာ မြန်မာနိုင်ငံသား အစ္စလာမ်ဘာသာဝင်များ အတွက် ရတက်မအေးဖွယ် ဖြစ်စေသလို အစိုးရကလည်း တစုံတရာ အရေးယူတားဆီးခြင်းမျိုး လုံးဝမပြုခဲ့သလို ပြုလုပ်ရန် အရိပ်အယောင်လည်း မတွေ့ရသေးကြောင်း တင်ပြအပ်ပါသည်။

ရည်ညွှန်း-
Photo Credit -ရန်ကုန်တိုင်းရဲတပ်ဖွဲ့ FB
ရန်ကုန်တိုင်းရဲတပ်ဖွဲ့ သတင်းထုတ်ပြန်မှုလင်ခ်
[1] http://goo.gl/NI4mu
Eleven Media သတင်းလင်ခ်များ –
[2] http://www.weeklyeleven.com/local/20908
[3] http://www.news-eleven.com/local/20953