ဦးကျော်လှအောင်အား မီဒီယာများတွင် မဟုတ်မမှန် ရေးသားချက် ၄င်း၏ သားများ ရှင်းလင်းပြောကြား

ဇူလိုင် ၂၁၊ ၂၀၁၃
M-Media
ဇာဏီ

သက္ကယ်ပြင်တွင် မတရားစွတ်စွဲ ဖမ်းဆီးခံရသော ရှေ့နေဦးကျော်လှအောင်နှင့်ပတ်သက်၍ ပြည်တွင်းမီဒီယာများ၊ အင်တာနက်စာမျက်နှာများပေါ်မှ ရေးသားချက်များအား ဦးကျော်လှအောင်၏ သားများမှ ပြန်လည်ချေပရှင်းလင်းချက်

သက္ကယ်ပြင် ။           ။              သက္ကယ်ပြင်တွင် မတရားစွတ်စွဲ ဖမ်းဆီးခံရသော ရှေ့နေဦးကျော်လှအောင်နှင့် ပတ်သက်၍ ပြည်တွင်းမီဒီယာများ၊ ဖေ့ဘွတ်စ် စာမျက်နှာများပေါ်မှ ရေးသားချက်များအား ဦးကျော်လှအောင်၏ သားများမှ ပြန်လည်ချေပရှင်းလင်းချက်တစ်ချက်ရပ် ယနေ့ ဇူလိုင်လ ၂၁-ရက်နေ့တွင် ထုတ်ပြန်ပြောကြားလိုက်ပါတယ်။

ယင်း ပြန်လည်ချေပရှင်းလင်းချက်တွင် ပြည်တွင်းမီဒီယာများသို့ ဦးတည်လိပ်မူထားပြီး အင်တာနက် စာမျက်နှာများထက်တွင် ရေးသားနေသော website များ၊ ဖေ့ဘွတ်စ် စာမျက်နှာတွင် ရေးသားနေသည့် သတင်းစာမျက်နှာများ အားလုံးသို့လည် ရည်ရွယ်ကြောင်း သိရသည်။

အဆိုပါ  ချေပရှင်းလင်းချက်တွင် ပြည်တွင်းရှိ တစ်ချို့သောမီဒီယာများတွင် ဦးကျော်လှအောင်၏ သတင်းများဖော်ပြရာ ရှေ့နေဦးကျော်လှအောင်အား ဘင်္ဂါလီဟု မဟုတ်မမှန်ရေးသားထားသည်ကို ဦးကျော်လှအောင်၏ မိသားစုဝင်များမှ လုံးဝ ကန့်ကွက်ကြောင်း၊ သစ်ထူးလွင် website တွင် မဟုတ်မမှန်ရေးသားထားသည်ကိုလည်း ဦးကျော်လှအောင်၏ သားဖြစ်သူမှ သစ်ထူးလွင် website သို့ ကန့်ကွက်ကြောင်း စာရေးသားပေးပို့ထားပြီး ဦးကျော်လှအောင်သည် ဘင်္ဂါလီလူမျိုး မဟုတ်ကြောင်း ထပ်လောင်းပြောကြားထားသည်။

ဦးကျော်လှအောင်မှာ လူ့အခွင့်အရေးအတွက် ရှေ့တန်းမှ ပါဝင်ဆောင်ရွက်နေသူတစ်ဦးဖြစ်ပြီး ၁၉၉၀-ရွေးကောက်ပွဲတွင် အမျိုးသား လူ့အခွင့်အရေးနှင့် ဒီမိုကရက်တစ်ပါတီ တည်ထောင်ကာ ဒု-ဥက္ကဌအဖြစ် တာဝန်ယူပြီး လွှတ်တော်ကိုယ်စားလှယ်တစ်ယောက်အဖြစ် ၀င်ရောက်ယှဉ်ပြိုင်ခဲ့စဉ်က နိုင်ငံသား/တိုင်းရင်းသား ဖြစ်ခြင်းကို စိစစ်ခံရပြီးမှ စစ်တွေ အမှတ်(၁) မဲဆန္ဒနယ်တွင် ၀င်ရောက်ယှဉ်ပြိုင်ခဲ့သူ တစ်ဦးဖြစ်သည်။ ရွေးကောက်ပွဲတွင် ဦးကျော်လှအောင် မပါဝင်နိုင်စေရန် ရွေးကောက်ပွဲမကျင်းပမီ တစ်ပတ်အလိုတွင် ဖမ်းဆီးထိန်းသိမ်းထောင်ချခံခဲ့ရသော်လည်း ၎င်းရရှိမည့် မဲများအား ကမန်အမျိုးသားပါတီမှ ရှေ့နေ ဦးရွှေယအား ပေးရန် ဦးကျော်လှအောင်မှ လမ်းညွှန်စီစဉ်ပေးမှုကြောင့် ရှေ့နေ ဦးရွှေယမှာ မဲအပြတ်အသတ်ဖြင့် အနိုင်ရရှိခဲ့သည်။

၁၉၉၀-ခု ရွေးကောက်ပွဲမတိုင်မီတွင် ရှေ့နေဦးကျော်လှအောင်အား ရခိုင် ဒီမိုကရေစီ အဖွဲ့ချုပ်မှ ၀င်ရောက် ယှဉ်ပြိုင်ပေးရန် ၎င်း၏ဆရာဖြစ်သူ ရှေ့နေကြီး ဦးမောင်သာဇံ (ယခု ရန်ကုန်တိုင်းဒေသကြိး ရခိုင် တိုင်းရင်းသားရေးရာ ၀န်ကြီး ဦးဇော်အေးမောင်၏ အဖိုးအရင်းဖြစ်သူ)မှ တောင်းဆိုခဲ့သော်လည်း ဦးကျော်လှအောင်မှ ငြင်းဆိုခဲ့သည်။ ထိုကဲ့သို့ ငြင်းဆိုခဲ့ပြီး မကြာမီ အဖမ်းခံရသဖြင့် စစ်ခုံရုံးမှ ထောင်ဒဏ် ၁၄-နှစ် ချမှတ်ခံရခြင်းဖြစ်ကြောင်း မီဒီယာများ သိစေရန် ချေပရှင်းလင်းပြောကြားခဲ့ပါသည်။

ဦးကျော်လှအောင်၏ ပင်စင်စာအုပ်နှင့် ၁၉၉၀-ခု ရွေးကောက်ပွဲ၌ ဦးကျော်လှအောင် ပါဝင်ယှဉ်ပြိုင်ရာတွင် ရှေ့နေကြီး ဦးမောင်သာဇံမှ ထောက်ခံစာကိုလည်း ပူးတွဲ ဖော်ပြခဲ့ပါသည်။

ဦးကျော်လှအောင်အား မတရားသဖြင့် ဖမ်းဆီးခံရခြင်းအပြင် မဟုတ်မမှန် စွတ်စွဲရေးသား ပြောဆိုချက်များကိုလည်း ဦးကျော်လှအောင်၏ မိသားစုဝင်များမှ ထပ်မံ၍ ပြန်လည်ချေပ ရှင်းလင်းမှုများ ဆက်လက်ပြုလုပ်သွားမည်ဟု M-Media မှ ဆက်သွယ်မေးမြန်းစဉ်တွင် ဦးကျော်လှအောင်၏ သားဖြစ်သူမှ ပြောကြားခဲ့ပါသည်။