ဒို့ကျေးရွာ ဂျာနယ်အတွက် ၀တ္ထုတို စာမူပြိုင်ပွဲ ဖိတ်ခေါ်လွှာ

ဇူလိုင် ၂၆၊ ၂၀၁၃
M-Media
သတင်း – ဆူးထက်

ရန်ကုန် ။     ။     ရန်ကုန်တိုင်း ဒေသကြီး၊ ပြန်ကြားရေး ၀န်ကြီးဌာန ပြန်ကြားရေးနှင့် ပြည်သူ့ဆက်ဆံရေး ဦးစီးဌာနမှ စီစဉ်ထုတ်ဝေလျက်ရှိသော ဒို့ကျေးရွာ ဂျာနယ်အတွက် ၀တ္ထုတို စာမူပြိုင်ပွဲ ကျင်းပပြုလုပ်မည် ဖြစ်ကြောင်း သတင်းရရှိသည်။

အဆိုပါ ၀တ္ထုတိုပြိုင်ပွဲတွင် ကျေးလက် ယဉ်ကျေးမှု ဓလေ့များ၊ ကျေးလက် အလှသဘာဝများနှင့် ဘ၀သရုပ်ဖော် အကြောင်းအရာများကို မိမိနှစ်သက်ရာ ခေါင်းစဉ်ဖြင့် ရေးသား ယှဉ်ပြိုင်နိုင်သည်။ စာမူကို A4 စာမျက်နှာဖြင့် လက်ရေးဖြင့် ခြောက်မျက်နှာ၊ ကွန်ပျူတာဖြင့် လေးမျက်နှာ ထက်မပိုဘဲ ရေးဖွဲ့နိုင်ကြောင်း သိရသည်။

ပြိုင်ပွဲ ၀င်သူသည် စာမူများကို ကွန်ပျူတာဖြင့် ဖြစ်စေ၊ လက်ရေးဖြင့်ဖြစ်စေ စာမျက်နှာ တစ်ဖက်တည်း၌ ရှင်းလင်းပီသစွာ ရေးရမည်။ မူရင်းတစ်စုံ၊ မိတ္ထူ တစ်စောင်ပါ တင်သွင်းရမည်။ ပြိုင်ပွဲ ၀င်သူ၏ ပတ်စ်ပို့ ဓာတ်ပုံ နှစ်ပုံ၊ အမည်ရင်း၊ ကလောင်အမည်၊ မိဘအမည်၊ နိုင်ငံသား မှတ်ပုံတင် အမှတ်၊ ပညာ အရည်အချင်း၊ အလုပ်အကိုင်၊ နေရပ်လိပ်စာ၊ ကိုယ်ရေး အတ္ထုပ္ပတ္တိ အကျဉ်းချုပ် ဖော်ပြပါရှိပြီး မိမိကိုယ်တိုင် ရေးသားထားကြောင်းနှင့် ပုံနှိပ် ဖော်ပြခဲ့ဖူးခြင်း မရှိကြောင်း ၀န်ခံချက် ပါရှိရမည်။ ပြိုင်ပွဲဝင် တစ်ဦးလျှင် ၀တ္ထုတို တစ်ပုဒ်သာ ပါဝင်ယှဉ်ပြိုင်ရမည်ဖြစ်ကြောင်း သိရသည်။

ဝတ္ထုတိုပြိုင်ပွဲတွင် ပထမ၊ ဒုတိယ၊ တတိယ ဆုသုံးဆုနှင့် အထူးဆုများ ရွေးချယ်သွားမည် ဖြစ်ပြီး ပထမဆု-တစ်သိန်းကျပ်၊ ဒုတိယဆု- ခုနှစ်သောင်း ငါးထောင်ကျပ်၊ တတိယဆု- ငါးသောင်းကျပ်၊ အထူးဆု- နှစ်သောင်းကျပ်စီ ချီးမြှင့်ပေးသွားမည် ဖြစ်ကြောင်း သိရသည်။ ဆုရရျိသူများ စာရင်းကို နေ့စဉ်ထုတ် သတင်းစာများနှင့် ဒို့ကျေးရွာ ဂျာနယ်တွင် ထည့်သွင်းဖော်ပြပေးမည် ဖြစ်ကြောင်း သိရသည်။

ပြိုင်ပွဲဝင် စာမူများကို ဒို့ကျေးရွာဂျာနယ်၊ အမှတ်( ၂၂၈)၊ သိမ်ဖြူလမ်း၊ ဗိုလ်တထောင်မြို့နယ်၊ ရန်ကုန်မြို့ ဖုန်း- ၀၁-၂၀၁၉၃၆၊ ၃၇၁၃၄၂ သို့  ၂၀၁၃ခုနှစ်၊ အောက်တိုဘာလ ၃၁ရက်နေ့ ညနေ (၄)နာရီ နောက်ဆုံးထား ပေးပို့ရမည် ဖြစ်ကြောင်း သတင်းရရှိသည်။