အကြမ်းဖက်ခံ ကျေးရွာများသို့ အီးဒ်ပွဲတော်တွင် ၀တ်ဆင်နိုင်ရန် အ၀တ်အထည်များကို WCHN နှင့် MMSY တို့ ပူးပေါင်းလှူဒါန်း

သြဂုတ် ၁၊ ၂၀၁၃
M-Media
သတင်း – ဆူးထက်

ပဲခူးတိုင်း အနောက်ခြမ်းတွင် မတ်လအတွင်းက အကြမ်းဖက်ခံရသည့် ကျေးရွာများသို့ ၀ါကျွတ် အီးဒ်ပွဲတော်တွင် ၀တ်ဆင်နိုင်ရန် အ၀တ်အထည်များကို WCHN နှင့် MMSY တို့ ပူးပေါင်းလှူဒါန်း

ပဲခူးတိုင်း ။ ။ ပဲခူးတိုင်းဒေသကြီး အနောက်ခြမ်းရှိ အုတ်ဖိုမြို့နယ်ပိုင် ဖြစ်သော အိုးသည်ကုန်းကျေးရွာတွင် မတ်လအတွင်းက အကြမ်းဖက်ခံခဲ့ရသည့် မွတ်စလင်မ်များ၏ လိုအပ်ချက်အရ WCHN လူသားချင်းစာနာ ထောက်ထားမှု ဆိုင်ရာ အမျိုးသမီးများနှင့် ကလေးများကွန်ရက်(မြန်မာ) နှင့် MMSY Foundation တို့ပူးပေါင်း၍ ၂၀၁၃-ခုနှစ် ဇူလိုင်လ ၃၀ရက်နေ့က အိုးသည်ကုန်းကျေးရွာသို့ သွားရောက် အားပေးစကားများပြောကြားကာ အ၀တ်အထည်များလည်း အကူအညီပေးခဲ့ကြောင်း သတင်းရရှိသည်။

“အိုးသည်ကုန်းရွာ၊ ရေကျော်ရွာ၊ အေးမြသာယာရွာမှာ ရှိတဲ့ အကြမ်းဖက်ခံရတဲ့ အစ္စလာမ် ဘာသာဝင်တွေအတွက် ကျွန်မတို့ WCHN နဲ့အတူ MMSY တို့ ပူးပေါင်းပြီး အကူအညီ ပေးခဲ့ပါတယ်။ အဲဒီမှာ ရှိတဲ့ အစ္စလာမ်ဘာသာဝင်များ အကြမ်းဖက်ခံရတဲ့ ကာလအတွင်းမှာ စောင့်ရှောက် ကူညီ ပေးခဲ့ကြတဲ့ ဗုဒ္ဓဘာသာ ဘုန်းတော်ကြီးများနှင့် ရပ်မိရပ်ဖများကိုလည်း ဂါရ၀ပြု နှုတ်ဆက်ကာ လက်ဆောင်များ ပေးခဲ့ပါတယ်။ ဖြူစင်မွန်မြတ်လှတဲ့ စိတ်ထားတွေရှိတဲ့ ပုဂ္ဂိုလ်တွေကို အပြင်မှာ အခုလို ဂါရ၀ပြုခွင့်ရတဲ့အတွက် အင်မတန် ၀မ်းမြောက် ဂုဏ်ယူမိပါတယ်။

အဓိက ကျွန်မပြောချင်တာက ကျွန်မတို့ အဖွဲ့ အခုလိုသွားရောက် အကူအညီပေးနိုင်အောင် ပူပေါင်းကူညီ ပံပိုးပေးခဲ့တဲ့ အလှူရှင်များကို အထူးပဲ ကျေးဇူးတင်ရှိပါတယ်၊ ယခုလို သူတို့လိုအပ်နေတဲ့ အချိန်မှာ ကျွန်မတို့အဖွဲ့အနေနဲ့ ကူညီပေးခွင့်ရတဲ့အတွက် အရမ်းပဲ ၀မ်းမြောက်ပျော်ရွှင်မိပါတယ်၊ ကျွန်မတို့အဖွဲ့နဲ့ အတူပူပေါင်းပြီး စိတ်အားထက်သန်စွာ လှူဒါန်းပေးကြတဲ့ အလှူရှင်တွေကို အရမ်းပဲ လှိုက်လှိုက်လှဲလှဲ ကျေးဇူးတင်ရှိပါတယ်။ အလှူရှင်တွေ အနေနဲ့လည်း သူတို့ရဲ့ အလှူပစ္စည်းတွေဟာ လိုအပ်နေတဲ့ လူတွေဆီကို တိုက်ရိုက်ရောက်ရှိ သွားတဲ့အတွက် ၀မ်းမြောက်ဝမ်းသာ ဖြစ်ကြမယ်လို့ ကျွန်မယုံကြည်ပါတယ်ဟု WCHN အဖွဲ့ခေါင်းဆောင် တစ်ဦးဖြစ်သော မစိုးစိုးအေး မှ M-Media သို့ပြောကြားခဲ့သည်။

အိုးသည်ကုန်းမြို့နယ်မှ ကူညီစောင့်ရှောက်ခဲ့သူ ရပ်မိရပ်ဖ တစ်ဦးဖြစ်သော ဦးသိန်းလွင်က ” အဲဒီ့ အရေးအခင်းမှာ ဘယ်သူကမှ ကိုယ့်ဒေသကို စွန့်ခွာပြီး မသွားချင်ကြဘူး။ ကျွန်တော်ကတော့ ဗုဒ္ဓဘာသာရယ်၊ မွတ်စလင်မ်ရယ်၊ ဟိုဘာသာရယ် ဒီဘာသာရယ်လို့ မသတ်မှတ်ဘူး။ သက်ရှိလူသား တစ်ယောက်လို့ပဲ သတ်မှတ်တယ်။ တစ်ခုပဲ ရှိတယ် ကိုယ်က ကိုယ့် ပတ်ဝန်းကျင်မှာ မီးပူလို ကျင့်မလား၊ ရေခဲသေတ္တာလို ကျင့်မလား ဆိုတာပဲ။ လူအမျိုးမျိုး နတ်အဖုံဖုံပါ။ အဘ လုပ်ခဲ့တဲ့ အရာတွေကို ဘုရားသိပါတယ်။ တချို့ဆို အဲဒီအရေးအခင်းဖြစ်တုန်းက ကြောက်ပြီး တချို့က ပြောင်းသွားတယ်။ စီးပွားရေး တွေလည်း ပျက်ရှာတယ် ” ဟု M-Media သို့ပြောသည်။

” ကျွန်မတို့ ဒီခရီးစဉ်မှာ ပထမဆုံး အိုးသည်ကုန်း၊ နောက် အိုးသည်ကုန်းကနေ ၅-မိုင် အကွာမှာ ရှိတဲ့ ရေကျော်ရွာ ကိုရောက်ပါတယ်။ နောက် အိုးသည်ကုန်းကို ပြန်သွားပြီး အဲဒီကနေ ၈-မိုင်အကွာမှာ ရှိတဲ့ အေးမြသာယာရွာကို ရောက်ပါတယ်။ သူတို့ကို အားပေးကူညီခဲ့ပါတယ်။ အဲလို ဆောင်ရွက်နိုင်တာဟာ ပါဝင်ကူညီကြတဲ့ အလှူရှင်တွေရဲ့ စေတနာ သဒ္ဓါ တရား ကြောင့်ပါ။ အလှူရှင်တွေထဲမှာ ကျွန်မတို့ အစ္စလာမ်ဘာသာဝင် မောင်နှမတွေ အပြင် ခရစ်ယာန် ဘာသာဝင် လူငယ်တွေကလည်း ပါဝင်လှူဒါန်းခဲ့ပါတယ်။ တကယ် လိုအပ်နေတဲ့ ရွာသားတွေဆီကို အ၀တ်အစားအသစ်တွေ ရောက်သွားတဲ့အတွက် ပျော်သွားကြတဲ့ သူတို့ရဲ့ ရိုးသားပွင့်လင်းလွန်းလှတဲ့ ပျော်ရွှင်မှု အပြုံးတွေကြောင့် ထော်လာဂျီ စီးပြီး သွားခဲ့ရတဲ့ လမ်းခရီး ကြမ်းတမ်းမှုတွေဟာ၊ ပင်ပန်းခဲ့တာတွေဟာ တခနနဲ့ ပျောက်သွားပါတယ်။ အဲဒီအတွက် အလှူဖြစ်မြောက်အောင် ကူညီပေးကြတဲ့ MMSY Foundation နဲ့ အလှူရှင်တွေကို ရင်ထဲက လှိုက်လှိုက်လှဲလှဲ ကျေးဇူးတင်ရှိပါတယ်” ဟု WCHN အဖွဲ့မှ မဆောင်းနှင်းဖြူက M-Media သို့ပြောကြားခဲ့သည်။

အိုးသည်ကုန်းမြို့မှ အသက် ၂၀-ကျော်အရွယ် အမျိုးသမီးတစ်ဦးမှလည်း ” ကျွန်မတို့မှာ ဒုက္ခပေါင်းစုံ ခံစားခဲ့ရပါတယ်။ အခုလို ကယ်ဆယ်ရေး အဖွဲ့က ရွာထဲထိ ၀င်လာပြီး လိုအပ်တာတွေ ပေးကမ်းကူညီပေးတဲ့ အတွက် အရမ်းကျေးဇူးတင်ပါတယ်။ ဒီအ၀တ်အစားတွေက ကျွန်မတို့အတွက် အင်မတန် အဖိုးတန်လှပါတယ်။ ကျွန်မတို့ ဒာစ်နေ့မှာ လှလှပပ ဒီနှစ်မှာလည်း ၀တ်ရပါတော့မယ်။ ကျွန်မတို့ အတိုင်းမသိ ၀မ်းသာမိပါတယ်။”ဟု M-Media သို့ပြောပြခဲ့သည်။

ပဲခူးတိုင်းဒေသကြီး အနောက်ခြမ်းရှိ အုတ်ဖိုမြို့နယ်၊ အိုးသည်ကုန်းမြို့တွင် မတ်လ ၂၄ရက် တနင်္ဂနွေနေ့ည ၉ နာရီ ၁၅ မိနစ်တွင် အစ္စလာမ်ဘာသာဝင်များအား အကြမ်းဖက် ဖျတ်ဆီးခဲ့ကြောင်း သိရသည်။ စုစုပေါင်း အိမ်ခြေ ၅၁-အိမ် ရှိရာ ၄၀-အိမ် ပျက်ဆီးဆုံးရှုံးခဲ့ကြောင်း သိရသည်။ အဆိုပါ အိုးသည်ကုန်းမြို့တွင် တစ်ရွာလုံးအိမ်ခြေ (၁၀၇၃) အိမ်၊ တစ်ရွာလုံး စုစုပေါင်း လူဦးရေ (၄၆၂၀)ဦး အနက် အစ္စလာမ်ဘာသာဝင် အိမ်ခြေ ၅၂-အိမ် နှင့် စုစုပေါင်း လူဦးရေ ၂၃၇-ဦး နေထိုင်လျက်ရှိကြောင်းလည်း သိရသည်။

ဓါတ်ပုံများ ကြည့်ရှုလိုလျှင်=> Click Here