ပဲရစ်မြို့ရှိ အိုးအိမ်မဲ့သူများ အတွက် မွတ်စ်လင်မ်တို့၏ဒါန

သြဂုတ်-၄၊၂၀၁၃
M-Media

ပဲရစ်မြို့ရှိ ထောင်နှင့်ချီသော မွတ်စ်လင်မ်ဟုတ်သူ မဟုတ်သူ သူဆင်းရဲများ နှင့် အိုးမဲ့အိမ်မဲ့များကို ရမဿွာန်ဥပုသ်လ အတွင်း လုပ်အားပေးများဖြင့် ကျွေးမွေးပြုစုသည့် ဒါနအစီအစဉ်တစ်ရပ် ပြုလုပ်လာခဲ့သည်မှာ နှစ်ပေါင်း ၂၀ ကျော်ပြီ ဖြစ်၏။

“ ဒီကိုလာရောက်ပြီး ဥပုသ်လွှတ်ဝါဖြေတဲ့ မွတ်စ်လင်မ်တွေကိုသာမက အသက်အရွယ်နဲ့ကျောထောက်နောက်ခံမရွေး မွတ်စ်လင်မ်မဟုတ်သူတွေ၊ အိုးအိမ်မဲ့သူတွေ၊ အရက်စွဲနေသူတွေကိုပါ ကျွန်တော်တို့ ကျွေးမွေးပြုစုကြပါတယ်။ ကျွန်တော်တို့ရဲ့တံခါးကို လူတိုင်းအတွက် ဖွင့်လှစ်ပေးထားပါတယ် ” ဟု ဒါနအသင်းဥက္ကဌ ဟကီမ် ဒီဒိုးရှေး(Hakim Didouche) မှ သြဂုတ်လ ၃ ရက်၊ စနေနေ့တွင် France 24 သို့ ပြောကြားခဲ့သည်။

ပဲရစ်မြို့ အရှေ့မြောက်ဖက် ပိုတေး ဒီ လိလပ်စ်(Porte des Lilas)အရပ်တွင် သတ္တုနှင့်ပလပ်စတစ်စပ် ယာယီအဆောက်အဦ၌ (လူမျိုးဘာသာကျောထောက်နောက်ခံမရွေး) အိမ်ရာမဲ့နှင့်နွမ်းပါးသူများအား စွပ်ပြုတ်တိုက်ကျွေးရေးအစီအစဉ်(Une Chorba Pour Tous)ကို လုပ်အားပေး ၃၀ ဦးဖြင့် ထိထိရောက်ရောက် ဆောင်ရွက်လျက်ရှိသည်။

လွန်ခဲ့သည့် ၂၁ နှစ်ကျော်ကာလမှစ၍ ရမဿွာန်လမြတ်အတွင်း နေ့စဉ်နေ့တိုင်း လူတစ်ထောင် နှင့် ၁၂၀၀ ၀န်းကျင်အထိ ယင်းသို့ အခမဲ့ကျွေးမွေးလာခဲ့ခြင်းဖြစ်သည်။ ၄င်းကို Culture Qatar – ကာတာယဉ်ကျေးမှုအဖွဲ့ နှင့် တစ်ဦးချင်းအလှူရှင်များမှ ပံ့ပိုးထောက်ပံ့ကြသည်။

“ အလှူရှင်အများစုဟာ တစ်ဦးချင်းသီးသန့်လှူဒါန်းသူတွေ ဖြစ်ပါတယ် ” ဟု ဒီဒိုးရှေးက ပြောပြ၏။

ကျွေးမွေးမှုမတိုင်မီ တစ်နာရီခန့်အလိုတွင် မိမိအိမ်သို့ ယူပြန်လိုသူ ရာပေါင်းများစွာကို တန်းစီစေ၍ ထုပ်ပိုးပေးကမ်းကြသည်။

လုပ်အားပေးသူ ၃၀ ဦးတွင် ကျောင်းသူကျောင်းသားများ၊ အလုပ်သမားများ၊ အလုပ်လက်မဲ့များ နှင့် အငြိမ်းစားများ ပါဝင်သည်။ ၄င်းသူတို့သည်  ချက်ပြုတ်ရေး၊ ဟင်းရွက်သီးနှံစီမံရေး၊ အစီအစဉ်ကျနရေး၊ သန့်ရှင်းရေး စသည့် မိမိတို့နှစ်သက်အားသန်ရာကဏ္ဍများ၌ စာနာမှုဖြင့် တိတိကျကျ ၀င်ရောက်လုပ်ကိုင်သွားလေ့ရှိကြသည်။

“ တစ်စုံတစ်ရာကို ကောင်းကျိုးပြုပေးဆပ်ပြီး ကူညီဖို့အတွက် ဒီကိုရောက်လာခြင်းဖြစ်ပါတယ်။ ရမဿွာန်လအတွင်းမှာ ပိုမိုအားထုတ်ဖို့အရေးကြီးတယ်။ ဒီလိုလုပ်ခြင်းက နာမ်ပိုင်းဆိုင်ရာတင်းတိမ်မှုခံစားချက်ကို ရရှိစေတယ်လေ ” ဟု အသက် ၂၂ နှစ်အရွယ် လုပ်အားပေးတစ်ဦးဖြစ်သော အစ်စင်းန်မှ ဆိုသည်။

မမေ့နိုင်စရာ အမှတ်သညာ

ဝါဖြေပွဲတက်ရောက်လာသူများအား ကျွေးမွေးပြုစုမှုများကြောင့် ထိုနေရာတစ်ဝိုက်မှာ အခမ်းအနားတစ်ခုကဲ့သို့အလား သွက်လက်ရွှင်မြူးသောစကားဝိုင်းများဖြင့် စိုပြေနေကြ၏။

မိမိ၏ခင်ပွန်းသည် ခါလစ်ဒ်နှင့်အတူ လာရောက်ဝါဖြေသော ၀ရ်ဒဟ်(၂၈ နှစ်)က “ ၀ါဖြေခြင်းက ကျွန်မအဖို့ အရေးအပါဆုံး သမယတစ်ခု ဖြစ်ပါတယ်။ ဒီအစီအစဉ်ကို ကျွန်မ ဘယ်တော့မှ မေ့နိုင်မှာ မဟုတ်တော့ပါဘူး ” ဟု France 24 သို့ပြောကြားခဲ့သည်။ သူမသည် ပြင်သစ်အနောက်ပိုင်းဒေသ ဇာတိမြေမှ ပဲရစ်သို့ မကြာသေးမှီက ပြောင်းရွှေ့လာသူဖြစ်သည်။ သူမအတွက် မျှော်လင့်မထားသောရပ်ဝန်းမှ အစီအစဉ်ကြောင့် အံ့သြ၀မ်းသာဖြစ်နေခဲ့၏။

ထိုဇနီးမောင်နှံကား လွန်ခဲ့သည့် ၂ ပတ်ကတည်းက ရောက်လာခဲ့ခြင်းဖြစ်ပြီး၊ နေအိမ်နှင့်အလုပ်အကိုင် အခြေတကျ မရှိသေးချေ။
“ ဒီ့အလျင်က ကျွန်တော်တို့ဟာ ဈေးဆိုင်တွေမှာ အချိန်အတော်ကြာ သွားလာခဲ့ပြီး ကားထဲမှာဖြစ်စေ၊ ဟိုတယ်မှာ ဖြစ်စေ စားသောက်ကြရတယ်။ ဒီရောက်လာတော့ တော်တော်အဆင်ပြေသွားတယ်။ နွေရာသီရဲ့အပူဒဏ်ပြင်းနေလင့်ကစား ပူပူနွေးနွေးစားသောက်ရတာက စိတ်ချမ်းသာစရာပါဘဲ ” ဟု ခါလစ်ဒ် က ဆို၏။

ပြင်သစ်၌ အစ္စလာမ့်ပြက္ခဒိန်၏အမွန်မြတ်ဆုံး ရမဿွာန်လသည် ဇူလိုင် ၉ ရက်၊ အင်္ဂါနေ့က စတင်ခဲ့သည်။

ရမဿွာန်လမြတ်တွင် အရွယ်ရောက်ပြီး မွတ်စ်လင်မ်တို့သည် အရုဏ်ချိန်မှ နေ၀င်ချိန်ထိ အစာရေစာ၊ ဆေးလိပ်၊ လိင်မှု ကိစ္စများကို ရှောင်ကြဉ်ကြသည့်ပြင် ဖျားနာသူများ၊ ခရီးသည်များကို ကူညီကြည့်ရှုလေ့ရှိကြ၏။ အလ္လာဟ်အရှင်မြတ်၏နှစ်မြို့မှု ရရှိရေးအလို့ငှာ ၀တ်ပြုမှုများ၊ မိမိကိုယ်ကို ထိန်းချုပ်မှုများ၊ ကောင်းမှုလုပ်ရပ်များဖြင့် ရမဿွာန်၏အချိန်ကာလများကို ဖြတ်သန်းလေ့ရှိကြသည်။