ပန်းတနော်တွင် မွတ်စလင်မ် အိမ်တစ်လုံး ဖျက်ဆီးခံရ၊ အကြမ်းဖက်မှု ဖြစ်ပေါ်မည့် အခြေအနေကြောင့် ထိန်းသိမ်းနေရ

သြဂုတ် ၂၆၊ ၂၀၁၃
M-Media
ထွန်းတောက်

သံတွဲ ။ ။ ဧရာဝတီတိုင်းဒေသကြီး၊ ပန်းတနော်မြို့တွင် ယနေ့နံနက်ပိုင်းက ဖြစ်ပွားခဲ့သော အချင်းများမှုနဲ့ပတ်သက်ပြီး အိမ်တလုံး အဖျက်ခံရပြီး အကြမ်းဖက်မှု ဖြစ်ပေါ်မည့် အခြေအနေဖြစ်ပေါ်မှုကြောင့် ၀ိုင်းဝန်း ထိန်းသိမ်းနေရသည်ဟု သတင်းရရှိသည်။

အဆိုပါ သတင်းကြောင့် ပန်းတနော်မြို့သို့ ဆက်သွယ်စုံစမ်းရာ –

“ဟုတ်ကဲ့၊ ပြဿနာဖြစ်မယ့်ပုံစံ နည်းနည်းဖြစ်သွားတယ်။ အခုထိလည်း အေးအေးဆေးဆေးတော့မဖြစ်သေးဘူး။ ၀ိုင်းပြီး ထိန်းသိမ်းနေကြပါတယ်။

ဖြစ်ပုံက ဒီလိုဗျ။ မွတ်စ်လင်မ်မိသားစုတစ်ခု အဝေးကနေ ပြောင်းလာပြီး နေကြတာ။ ပန်းတနော်ဒေသကတော့ မဟုတ်ဘူးဗျ။ သူနေတဲ့ ၀န်းကျင်က ဘာသာခြားတွေပဲရှိတယ်။ အဲ့မှာ အိမ်ဝယ်ပြီးနေတယ်။ အဲလို သူ့ဘေးဝန်းကျင်က ၉၆၉ တရားနာနေကြတဲ့အချိန် သူက ဒီဘက်ကနေ သီချင်းဖွင့်တဲ့အချိန် အဲဒီကနေ အခြေခံပြီး နည်းနည်း ရုတ်ရုတ်သဲသဲ ဖြစ်သွားတယ်။ အဲလို ဖြစ်တဲ့အချိန်ပဲ အာဏာပိုင်တွေရော၊ ဘာသာရေးဂေါပကအဖွဲ့တွေရော ရောက်သွားပြီး သွားထိန်းကြတယ်။ အခုအချိန်ထိတော့ ဂေါပကအဖွဲ့တွေ အစည်းအဝေးသွားတာ ပြန်မရောက်ကြသေးဘူး။

အဲဒီ မွတ်စလင်မ်မိသားစုကိုတော့ ချက်ချင်းပဲ ရန်ကုန်ကားပေါ် ပြန်တင်ပေးလိုက်တယ်။ တဘက်ကတော့ ဒီအိမ်ကို မီးရှို့ရမှ ကျေနပ်မယ်၊ ဖျက်ဆီးရမယ် ကျေနပ်မယ်လို့ ပြောနေကြတော့ ဖြစ်ချင်တဲ့ပုံစံ ဖြစ်အောင် လုပ်ပေးမယ်ဆိုပြီး အာဏာပိုင်တွေကတော့ ထိန်းထားတယ်။

ဒါပေမယ့် အခု အဲ့ဒီနားမှာ သံဃာတချို့လည်းရှိတယ်၊ တချို့ကလည်း ဖျက်ရမှ ကျေနပ်မယ်လို့ပြောတယ်။ ခယက လည်း ရောက်နေတယ်။ အခုတော့အစည်းအဝေးလုပ်နေကြတယ်။

၎း၁၅ နာရီမှာ နောက်ဆုံးထပ်ရတဲ့ သတင်းအရ အာဏာပိုင်များနဲ့ ဂေါပကများ ညှိနှိုင်းပြီးနောက်တွင် မွတ်စလင်မ်ပိုင်အိမ်ကို ဖျက်ဆီးလိုက်ပြီဖြစ်ကြောင်းသိရသည်။ အိမ်ရှိ ပစ္စည်းများအား ထော်လာဂျီနှင့် တင်ဆောင်၍ ဗလီအတွင်းသို့ ပို့ဆောင်နေကြောင်းလည်း သိရသည်။

အဆိုပါအိမ်မှာ ၁၅-ပေ x ပေ-၃၀ ပတ်လည် သွပ်မိုးထရံကာ မြေစိုက်အိမ်တစ်လုံးဖြစ်သည်။ ရပ်ကွက်အတွင်းရှိ အခြေခံလူတန်းစာများမှလည်း အဆိုပါ အိမ်အား မဖျက်ဆီးရပါက မကျေနပ်နိုင်ကြောင်း ဖြစ်ပေါ်လာသဖြင့် ဖျက်ဆီးခွင့်ပြုလိုက်သည်ကို သိရခြင်းဖြင့် တရားဥပဒေစိုးမိုးရေး အရေးတကြီး လွန်စွာလိုအပ်နေကြောင်း သိရှိရသည်။

ဖြစ်တာက ၉-ရပ်ကွက် ရေလှည်းလမ်းမှာပါ။ ပန်းတနော်မှာ မွတ်စလင်အိမ်ခြေက (၃၆၀)လောက် ရှိပါတယ်။ အိမ်ထောင်စုက (၅၀၀)လောက်ရှိပါတယ်။ ဗလီက မြို့ပေါ်မှာ ၁-လုံးတည်းရှိပါတယ်။ အာရဗီစာသင်ကျောင်းက ဗလီနဲ့တွဲလျက်ပဲ အခြေခံဘာသာရေး စာသင်ကျောင်းပဲရှိပါတယ်။ အတန်းကျောင်းအနေနဲ့ မရှိပါဘူး။ ကျောင်းတောင် ပြန်ဖွင့်တာ ရက်ပိုင်းပဲ ရှိသေးတယ်။ ဟိုးတလောက နိုင်ငံအနှံ့အခြေအနေတွေကြောင့် ကျောင်းပိတ်ထားရာကနေ အခုရက်ပိုင်းလေးကမှ ပြန်ဖွင့်လိုက်တာပါ။

ပန်းတနော်မှာရှိတဲ့ မွတ်စလင်မ်အများစုက လယ်သမားနဲ့ အရောင်းအ၀ယ်သမားများတယ်။ ဈေးရောင်းတာလည်းရှိတယ်။ အများစုက လက်လုပ်လက်စားများပါတယ်။”လို့ ပန်းတနော်မြို့ခံများမှ M-Media ကို ပြောပြခဲ့ပါတယ်။

ပန်းတနော်မြို့သည် ကုလသမဂ္ဂအထွေထွေအတွင်းရေးမှူးချုပ် ဦးသန့်၏ မွေးရာဇာတိ မြို့လည်းဖြစ်ပြီး ယခင်ကတည်းက ဘာသာလူမျိုးပေါင်းစုံ အေးချမ်းသာယာစွာနေထိုင်လျက်ရှိသော ဧရာဝတီတိုင်းအတွင်းရှိ မြို့တစ်ခုဖြစ်သည်။