ဗြိတိန်တို့ ဆီးရီးယားကိုတိုက်မယ့်အရေးမှာ ပါလီမန်ကန့်ကွက်မှုကြောင့် ပါဝင်တော့မှာမဟုတ်

M-Media
သြဂုတ်လ ၃၀ ရက်၊ ၂၀၁၃

ဗြိတိန်ပါလီမန်မှာ အပြန်အလှန်ဆွေးနွေးနေကြတဲ့ ကင်မရွန်းနဲ့ အတိုက်အခံလေဘာပါတီခေါင်းဆောင် အက်မီလီဘန်း

မနေ့က ကျင်းပခဲ့တဲ့ ဆီးရီးယားအရေးပါလီမန်မဲခွဲပွဲမှာ စစ်တိုက်ဖို့ စိတ်အားထက်သန်တဲ့ ၀န်ကြီးချုပ်ဒေးဗစ်ကင်မရွန်း ရှုံးနိမ့်သွားတယ်လို့ ရိုက်တာသတင်း တစ်ရပ်က တင်ပြပါတယ်။ ကြာသပတေးနေ့ညပိုင်းမှာ မဲခွဲခဲ့တာဖြစ်ပြီး ကင်မရွန်းအရေးနိမ့်တာကြောင့် အမေရိကန်နှင့်အတူ ဆီးရီးယားကိုတိုက်မယ့် စစ်မှာ ဗြိတိန်တို့ပါဝင်နိုင်မယ့်လမ်းပိတ်သွားခဲ့ပါပြီ။

ကင်မရွန်းခေါင်းဆောင်တဲ့ အစိုးရအဖွဲ့က ပါလီမန်မှာ ဆီးရီးယားအရေး စစ်ရေးအရအရေးယူဖို့ မဲခွဲတဲ့အခါ ထောက်ခံမဲ ၂၇၂ မဲရရှိခဲ့ပြီး ကန့်ကွက်မဲ ၂၈၅ မဲရရှိခဲ့ ပါတယ်။

ဒါကြောင့် မိမိအနေနဲ့ ပါလီမန်ရဲ့ဆန္ဒကိုဆန့်ကျင်ပြီး တစ်စုံတစ်ရာလုပ်ဆောင်ဖို့ ရည်ရွယ်ချက်မရှိဘူးလို့ ကင်မရွန်းက ပြောခဲ့ပါတယ်။ ဒါပေမယ့် ကင်မရွန်းက ဥပဒေပြုအမတ်တွေကို ရည်ညွှန်းပြီး သူတို့တွေက ဓါတုလက်နက်သုံးတဲ့ ဆီးရီးယားအစိုးရကို အပြစ်ပေးဖို့ မလိုလားဘူးလို့လည်း ဆိုခဲ့ပါတယ်။

လေဘာပါတီခေါင်းဆောင် အက်မီလီဘန်းကတော့ ဓါတုလက်နက်ကိစ္စအတွက် ပြင်းပြင်းထန်ထန်တုန့်ပြန်သင့်တဲ့အကြောင်း သူယူဆပေမယ့် ပါလီမန်ရဲ့ဆန္ဒ ကို လေးစားရမှာဖြစ်တဲ့အကြောင်း ပြောခဲ့ပါတယ်။

ဒါ့ပြင်သူက ပါလီမန်ရဲ့ဆန္ဒသည် လူထုကိုကိုယ်စားပြုတာကြောင့် လူထုကလည်း စစ်ရေးအရအရေးယူမှုကို မလိုလားဘူးလို့ မိမိယူဆကြောင်း ပြောခဲ့ပါတယ်။